Likezo 22
22
1Nindi, Enu ana kwetu, ninenu atata, tiyenu munukudihakwila kudenu. 2Chanatiyuwu wudi nakuhosha nawu mwidimi daHeberu, asweja nikumwena.
3Hakuhosha nindi, Ami nikaYudeya, navwalikilili kuTarusa muSilisiya, ilaga nadizili muŋanda yinu kunyendu yaGamaleli; anfumbilaga mwalogelanshimbi jawankakulula jetu chikupu; nadipi nakumukalakela Nzambinapovu neyena kumuchima, neyi chimudi nakwila wejima wenu lelu. 4Nakabishilaŋa akwaNjila yinu hela kuyijaha; nadiŋi nakukasakasa amayala nawambanda nakuyisha mutuleya. 5Hela kapristu muneni hichinsahuwukushimuna tuhu, niakulumpi ejima. Wowu anyinkeli nyikanda yakudi akwetu aYudeya, kulonda nakayi mulwendu lwakuDamakasa, nakaleti akwakwitiya munyonji ku Yerusalema, kulonda akayibabeshi.
6Chinadiŋi nakuya munjila yami, hinukushika kwakwihi naDamakasa, itaŋwa mwiwulu; kukasumuka chejeji cheneni chakufuma mwiwulu hichikutoŋekelami kwi-ndo. 7Hinukudimbuka hamaseki, nitiya niizu hidikuŋila nindi, Eyi Sawulu, Sawulu, wankabishila ŋadi? 8Hinukwakula nami, Yeyinyi Mwanta? Yena hakuŋila nindi, Yami Yesu wakuNazareta, yami wankabishaŋa. 9Akwetu twadiŋi nawu, chalala chejeji achimweni, hakwila izu danowu wadiŋi nakuhosha nanami hiyaditiyiluku. 10Hinukwila nami, Nukwila ŋahi, Mwanta? Mwanta hakuŋila nindi, Nyamukaku, wuyi muDamakasa, diku kwakakulejelawu mudimu wejima wanakukunji kuwu. 11Chinakaŋenyi kumona nalubanji lwakulema lwachejeji ochu, akwetu nadiŋi nawu hiyakunkwata kuchikasa, hinukwijila muDamakasa.
12Muntu wumu ijina dindi Ananiya, iyala wukweti kalemesha kakulemesha nshimbi, amuhamekelaŋa kudi aYudeya ejima ashakamini kuDamakasa; 13hakwinza kudami, hakwimana kwakwihi, hakuŋila nindi, Eyi mana kwami Sawulu, tonaku. Hohenohu hinukutona, hinukumumona.
14Yena hakwila nindi, Nzambi yawankakulula jetu nakukunjiki kwiluka muchima windi, wumoni Mukwakuloŋa, wutiyi izu dakukanwa kindi.
15Muloŋa wakekala chinsahu chindi chakushimuna kudi antu ejima yuma yiwunamoni nikutiya.
16Wukulabiladi dinu? Nyamukaku, akupapatishi, wutooki kutooka kwakukufuma nyiloŋa yeyi chiwukutambika ijina dindi.
17Chineli nafunti dehi kuYerusalema, hinadiŋi nakulomba mutembeli, hinukwila neyi nayi namutulu. 18Hinukumumona Yesu, hakuŋila nindi, Nyakalaku, wufumi swayi muYerusalema, Muloŋa hiyakwiteja wunsahu weyi wakunshimunaku. 19Hinukwila nami, Mwanta, awenawu aneluki nashili akwakwitiya amumashikola ejima mukaleya, nikuyeta chikupu. 20Chamwaŋiluwu mashi achinsahu cheyi Setefwanu, ami kwoku nemeni, hinukwitejamu, hinukuhemba mahina anawa adiŋi nakumujaha. 21Hakuŋila nindi, Yaku tuhu, muloŋa ami nakakutemesha kudi aJentili kwakulehi.
22Hiya kumutiya kushika nihezu odu; henohu hiyakuvwakuka nawu, Muntu wudi ichi hadi kwikala hamasekuku. Hanateli kuhandaku. 23Iku adi nakubideka naŋovu, nakutabola mahinawu, nakunata lunkuŋu kwiwulu,
24mukulumpi muneni hakuyila mashidika nindi mwŋi ŋenu mwitala denu, nindi mwesekenu nachikoti kulonda niluki nsaŋu yaku mubi dekawu.
25Chanamukasuwu nanyisúulu, Pawulu hakumwila senturinu wadiŋi nakwimana kwakwihi, nindi, Kweta kaRoma chakadi kumuhisha, hichinjilaku? 26Chana chitiyiyi, senturinu hakuya kudi mukulumpi muneni, hakumuleja nindi, keŋa wili chumanyi? Yeniwu muntu hikaRoma. 27Mukulumpi muneni hakwinza, hakumwila nindi, Nleji, eyi wukaRoma? Yena nindi, Eŋa. 28Mukulumpi muneni hakwakula nindi, WuRomiwu ami nawulandili namali amavulu nankashi. Pawulu nindi, Hakwila ami kwami dimu munavwalikila. 29Henohu wena akeŋeli kumweseka amufuma niku mufuma. Mukulumpi muneni niyena, chanelukiyi nindi Pawulu hikaRoma hakutiya woma, nanochu chanamukasiyi.
30Chikunachi, hakukeŋa kwiluka chakashinshi nsaŋu jana mumo nuwu naju kudi aYudeya; hakumusubula, hakuleja awakulumpi jawa tupristu nichota chejima nindi akapompi hamu; hakumutwala nakumwimika Pawulu kumesu awu.
လက္ရွိေရြးခ်ယ္ထားမွု
Likezo 22: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.