Likezo 20
20
1Ipumba chidinamweni, Pawulu hakutambika atumbanji; chaneliyi nayikundeji dehi, hakuyishalika chachiwahi, hakufumaku nindi ayi muMasidoniya. 2Chanahitiyi mumpatoyu, chanayikwashiyi namazu amavulu, ashika nimuHeleni. 3Chanashakamiyi kwenoku tukweji tusatu, wadiŋi namuchima wakukeŋa kuya kuSiriya muwatu; ilaŋa chanatiyiyi nawu anamushakamini dehi hampùŋa kudi aYudeya, hakukinkaŋana nakuya cheŋi muMasidoniya. 4Wendelaŋa hamu namwana kaPirihusi, Sopateri wakuBereya; niArisitaka naSekundu akuTesalonika; niGayusi wakuDeribi naTimotewu; niTiklkusa naTirofwimusa antu akuAsiya. 5Hiyakuyaloŋahu dehi kumbidi, hiyakutuchiŋilila kuTirowasi. 6Chanamanuwu mafuku amankendi akadi iluŋi, hitukufuma muFwilipi muwatu, neyi munahiti mafuku atanu hitukudiwana nawu kuTirowasi. Kwenoku hitukulabilaku mafuku atanu nayedi.
7Ifuku damulungu damuchimu, chitunapompi nakuhumuna mankendi, Pawulu hakuyitaŋisha, natoŋojoki dehi nindi nukunyamuka hakuchaha, hakwila hoshe-e nimukachi kawufuku. 8Mwitala dahewulu mutwapompeleli mwadiŋi manoŋu amavulu. 9Munjanina mwashakamini kamukwenzi keyala, ijina dindi Yutikusa, hakuya namutulu twatweni; chaneliyi Pawulu hakushaku mazu amakwawu, yena hakukunduka, hakuholoka kwitala dahewulu damu chisatu, hiyakumunona nawu wafwa dehi. 10Pawulu hakusuluka, hakumubandamina nakumukumbata, nindi, Bayi mwakamaku himumi. 11Hakukandama cheŋi hakuhumuna dinkendi, hakudya nawu. Chaneliyi hanjike-e nichikunachi, hakufumaku. 12Owu kamukwenzi hiyakumutwala wamuwenyi, hiyakutiya kuwaha nankashi.
13Etu hitukuyaloŋahu dehi kuwatu, hitukuya kuAsosa muwatu owu, netu diku kutwakamwiŋila Pawulu; muloŋa dimu mwatushiikiliyi yomweni nindi, Ami nukuyila heseki. 14Chanatuwaniyi kuAsosa, hitukumwiŋijamu, hitukushika nikuMitilene. 15Hitukufuma kwenoku muwatu; chikunachi tushika nikwatalaŋana naChiyosi; chikunachi nawa tudata nikuSamosi; chikunachi nawa cheŋi tushika nikuMiletusa. 16Muloŋa Pawulu nakeŋi dehi kupandakana Efwesesa muwatu, kulonda abuli kulabila muAsiya. Hakudihinda nindi wamba kela nakatwesha kushika kuYerusalema hefuku dapentekosta.
17Chadiŋiyi kuMiletusa, hakutumesha awakulumpi achipompelu chakuEfwesesa. 18Chanenzuwu kudi yena hakuyila nindi, Enu aweni mweluka dehi munashakaminaŋa nenu mafuku ejima, kufumisha kwifuku dinásambilili kudata mwendu muAsiya; 19nakukalakela Mwanta nakudizoza mumuchima namadilu niyuma yakala yinamweni hanshakamininuwu hampùŋa kudi aYudeya. 20Chinabulili kuheŋuka nakuleka kushimuna yuma yakuyikwasha nachu yejima; nayilejeli hatooka nikwitala kwitala, 21nakushimwina niaYudeya niaHeleni kubalumuka munyichima nakutala kudi Nzambi, nikumukuhwelela Mwanta Yesu Kristu. 22Ichi dinu tiyenu, yami nukuyiwu kuYerusalema, anankasi dehi mudi Spiritu. Yuma yakanwana kwenoku hinayilukuku. 23Nakumini dakwiluka mwanlejaŋawu munyikala yejima kudi Spiritu Wajila, nindi kumbidi kunanshakamini nyonji niyuma yakala. 24Hela chochu, wumi wami hinawumoni kulemaku mwaka niwukeŋi; chakala nakamanishi njila yami, nimudimu wanyinkeliyi Mwanta Yesu kukalakala, nikushimuna nsaŋu yaluwi lwaNzambi yayiwahi. 25Ichi dinu tiyenu, neluki dehi nami enu akwetu ejima, mwanmwenaŋa nakukimbuka nakushimuna wanta waNzambi, himwamba kanmona nawa cheŋuku. 26Dihu hanafumi kuyileja lelu, nami nabuli muloŋa wamashi awantu ejima. 27Muloŋa hinaheŋukili nileka kuyishimwina mwaya mpùŋa yaNzambi yejimaku. 28Dihembenu enu aweni, hembenu ninyikoku yejima yanayikunjikuwu kudi Spiritu Wajila kwikala atubiŋa, mudiishi chachiwahi chipompelu chaNzambi chalandiliyi namashi indi yomweni. 29Ami neluki nami chinakafumahu, atupwidi azuwa akeŋila mukachi kenu, hiyakaanakena nyikokuku. 30Hela mukachi kenwenu aweni mwakanyamuka antu akuhosha yuma yaheŋa, akadikokela atumbanji awenawu. 31Dichi dinu tonenu, mwanukaŋa mwahita nyaka yisatu hinalekeli kuyikonkomwena wejima wenu niwufuku nimwaana namadiluku. 32Ichi dinu, hinukuyikunjika kudi Nzambi, nikumazu aluwi lwindi anatweshi kuyituŋa nakuyinka wuswana nawantu ajila ejima. 33Hinadiŋi nalwisu lwasiliva yamuntu niwumu, hela lwawuru, hela lwamahinaku. 34Enu aweni muneluki makasami awa diwu adiŋi nakukalakela yuma yinabulih, niyabulili akwetu nadiŋi nawu. 35Yuma yejimiyi nelili kulonda mutaliluhu, kulonda enu aweni mwakakalakali mukwashi akwenu abula Ŋovujawa mwanukaŋa mazu aMwanta Yesu chahosheliyi nindi, Chi kweti kukooleka yowu kuhana, kutambula chakuminamu.
36Chanakumishiyi kuhosha mwenimu hakufukama, hakulomba nawu wejima wawu. 37Wejima wawu hiyakudila nankashi, hiyakudinata hanshiŋu yaPawulu nakumupwepujola. 38Chuma chaswejeluwu kutiya wushona dodizu dahosheliyi nindi, Himwamba kanmona nawa cheŋuku. Hiyakumutwalaku munjila yindi yakuya kuwatu.
လက္ရွိေရြးခ်ယ္ထားမွု
Likezo 20: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.