Likezo 13
13
1Muchipompelu chadiŋi kuAntiyoki mwadiŋi atuprofwetu niankuluŋaŋa, iwu Baranaba, iwu Simeyona atumbiluwu ijina di kwawu daNiŋeri, iwu Lusiyu wakuKireni, iwu Manena aleleleluwu hamu nanowu mwanta Herodi, niSawulu. 2Chadiŋi nakudifukulawu munyichima yawu kudi Mwanta, nakujiŋa nakuleka kudya, Spiritu Wajila hakwila nindi, ŋambwilenuku Baranaba naSawulu akeli mudimu wunayitambikili. 3Chanajiŋuwu cheŋi nakuleka kuoya, hiyakulomba, hiyakuyinaŋika makasawu, hiyakuyileka nawu ayi.
4Wena cheliluwu anayitemeshi dehi kudi Spiritu Wajila, hiyakuya kuSelusiya; kufuma kwenoku hiyakuya muwatu kuKipirosi. 5Chanashikuwu kuSalamisa, hiyakushimuna mazu aNzambi mumashikola awaYudeya. Adiŋi naYowanu Maku kulonda ekali kansi kawu. 6Chanahituwu muchitutu chejima nikuPafwosi, hiyakuwana kateŋa wumu hikaprofwetu wakutwamba, kaYudeya, ijina dindi Barayesu. 7Yenowu wadiŋi hamu namwanta waboma Serŋi Pawulu, iyala wukweti kashinshi. Yena hakutambika aBaranaba naSawulu, hakukeŋa nindi atiyi mazu aNzambi. 8Ilaŋa owu katepa Elimasi, dimu mwalumbulukila ijina dindi, hiyakudikaŋa nawu, nindi aluwaŋeshi owu mwanta waboma abuli kwitiya. 9Ilaŋa Sawulu, atenaŋawu nawu Pawulu, wenzala Spiritu Wajila, hakumushinshika swi-i, 10nindi, Eyi mwana kadiyabolu, eyi wasweja kudimbana nikutama, eyi mukwankunyi nakuloŋa kwejima, wamba kaleka kuheŋesha njila jaMwanta jaloŋa mwakanyi? 11Dichi dinu tiya, chikasa chaMwanta chikukukunka, wakekala mputamesu; mukuhita chilaaka hiwakamona mwaanaku. Hohenohu kumuholokela nimbundu nimwidima bwi; hakukimbuka nakukeŋakeŋa muntu wakumukwata kuchikasa. 12Owu mwanta waboma, chanamoniyi chaneluwu, hakwitiya, nahayami dehi kuleja kwaMwanta.
13Pawulu nawakwawu hiyakufuma kuPafwosi muwatu, ashika nikuPereŋa muPamfwiliya; kwenoku Yowanu Maku hakuyishiya, hakufunta kuYerusalema. 14Ilaŋa wena hiyakuhita muPereŋa, hiyakushika kuAntiyoki wamuPisidiya. Hiyakwijila mushikola hasabata, hiyakushakama. 15Cheliluwu enimbu anakumishi dehi kutaŋa nyikanda yajila yanshimbi niyawatuprofwetu, anyuli jashikola hiyakuyitemeshela izu nawu, Enu ana kwetu, neyi mukwetuhu kadizu kakukundeja naehu antu, taŋenu.
16Pawulu hakwimana, hakwolola chikasa nindi, Enu akwetu aIsarela, ninenu mwaakamaŋa Nzambi, tiyililenu. 17Nzambi yaniwu muza waIsarela, watondeli ankakulula jetu, watúumbakesheli iwu muza hashakaminuwu mwituŋa daEjipitu, hakuyiidishamu nachikasa chakutwala kwiwulu. 18Hakukaba nawu omu mwisaŋa nyaka makumi awana. 19Chanajilumuniyi nyuza yitanu nayiyedi mwituŋa daKenani, hakuyinka ituŋa dawu diikali wuswana wawu, mwahitili nyaka kafwampi neyi makulakaji awana nanyaka makumi atanu. 20Mwejimomu hakuyinkaŋa ansompeshi nichashikiluwu hadi kaprofwetu Samweli. 21Nkumininaku hiyakulomba mwanta walukanu. Nzambi hakuyinka mwana kaKishi, Sawulu, iyala wakumuza waBenjamini, himukuhita nyaka makumi awana. 22Chanamufumishuwu yena, hakudiishamu Davidi ekali mwanta wawu; niyena nawa wamushimwini wunsahu nindi, Namoni dehi mwana kaJesi, Davidi, iyala damwaya muchima wami, diyi wakela munakeŋa mwejima. 23Kwokudi anyana kayeniwu, mwomwakaniniyi dehi Nzambi, naleteli dehi Isarela Chamwinu, Yesu. 24Hadiŋiyi Yesu kanda amwekani, Yowanu wasambilaŋahu dehi kushimwina muza waIsarela wejima chipapatishu chakubalumuka munyichima. 25Helili Yowanu hakuya nakumanisha mafuku indi, hakuyila antu nindi, Enu munatoŋojoki nenu yaminyi? Ami hiniKristuku. Tiyenu, munyima yami imu mudi nakwinza muntu, ami hinatelela hela tuhu kusubula nkwabilu jakunyendu yinduku.
26Enu ana kwetu, enu anyana akumuchidi waAbarahama, ninenu mwaakamaŋa Nzambi, tiyenu, anatutemesheli dehi mazu akutuhandisha nachu. 27Chamuyambiluwu Yesu kudi antu ekala muYerusalema, hamu nawanyuli jawu, chabuliluwu kwiluka nimazu awatuprofwetu ataŋaŋawu hasabata jejima, mazu awa analumbulukili dehi nanochu chamuhishiluwu. 28Cheliluwu wena kumumona nachitela chakumujahila nehi, hiyakumulomba Pilatu nawu chiŋa amujahi tuhu. 29Chanamanishuwu yuma yamusonekeleluwu yejima, hiyakumukulula kumutondu, nakumukamika mwijamu. 30Ilaŋa Nzambi hakumusaŋula mudi afu. 31Hiyakumumona mafuku amavulu kudi antu afuminiyi nawu muŊaliliya nakushi ka kuYerusalema. Ichi dinu, wena hiyayinsahu jindi akushimuna kudi antu mwamwenuwu. 32Diyi nsaŋu yayiwahi yitunayileteli, yakaninuwu ankakulula jetu. 33Chamusaŋwiluwu dehi Yesu mudi afu kudi Nzambi, chinalumbulukili dehi anyanetu, mwomwasonekeluwu mwisamu damu chiyedi nawu, Yeyi Mwanami, nakuvwali lelu. 34Nikweniku kusaŋula kwamusaŋwiluwu kudi Nzambi mudi afu, kwákubula kufunta cheŋi mukutoka, wahoshelumu dehi mwenimu nindi, Nakakukiswila nkisu yaDavidi, yajila yalala. 35Nahoshi nawa mwisamu di kwawu nindi, Hiwaketeja weyi Wajila kumona kutokaku. 36Muloŋa Davidi, chamanishiliyi kukalakela akwawu ahanyaka yindi mwaya mpùŋa yaNzambi, wayili namutulu; hiyakumukamika kwakama ankakulula jindi, yotoka nikutoka. 37Hakwila iwu asaŋulawu dehi kudi Nzambi hamweni kutokaku. 38Dichi enu ana kwetu, leka niyileji mwiluki chachiwahi, nami mwijina dayeniwu muntu itukuyishimwina, dimu mwekala kuyanakena antu nyiloŋa. 39Antu ejima akwitiya chakukuhwelela, akuyiyiŋisha kuyuma yejima mwakaŋenyuwu kuyiyiŋisha nanshimbi jaMosi. 40Dichi babalenu, mubuli kumona mwanahoshuwu munyikanda yawatuprofwetu, nawu, Tiyenu dinu, enu akwakadiwu, muhayami, munoŋi. 41Ami nukukoŋa mudimu mumafuku enu, mudimu owu hela akayilejawu kudi muntu himwakawitiya nihantuku.
42Chanedikuwu, hiyakuyilembelela nawu akayilejuhu cheŋi nsaŋu iyi hasabata yikulondelamu. 43Chanamwaŋaluwu mwenomu mushikola, aYudeya amavulu ninawa abalumukili kwikala aYudeya, akwakulemesha Nzambi, hiyakulonda aPawulu naBaranaba; wena hiyakuhosha nawu nakuyishinjila kukakela muluwi lwaNzambi.
44Sabata yalondelumu, kwasheli hanti nakupompa ŋanda yejima kulonda atiyi mazu aNzambi. 45Ilaŋa Yudeya chamwenuwu antu amavulu, hiyakutiya ichima dasweja; hiyakutadika yuma yadiŋi nakuhoshayi Pawulu, hiyakuhosha mazu atama. 46APawulu naBaranaba hiyakuhosha chakadi woma nawu, Chinawahi chitunasambili kushimuna mazu aNzambi kudenu aYudeya; hakwinzichi chimunayishinjikili dehi kwakulehi nanenu, munadifuukuli enu aweni nenu himunateli kwenu wumi wahaya nyakaku. Talenu, hitukubalumukila kwetu kudi aJentili. 47Muloŋa dichi chanatulejiyi Mwanta, nindi, Nakushili kwikala chejeji chawaJentili, kulonda wakeli wakwamwina antu kushika nikwakumina maseki.
48Chanachitiyuwu aJentili, hiyakutiya kuwaha, hiyakulemesha mazu aNzambi. Wejima wawu afuukwilawu dehi kumona wumi wahaya nyaka hiyakwitiya. 49Mazu aMwanta atiyakana nimwahita mutambowu mwejima, ti-li-li 50Ilaŋa Yudeya hiyakusaŋumuna ambanda alumbwa, akwakuhameka Nzambi, niakulumpi amayala amuŋandoyu, hiyakuvulumuna ikabisha dakukabisha aPawulu naBaranaba, hiyakuyihaŋa muŋinza jawu. 51Ilaŋa wena hiyakutotomwena lunkuŋu lwakunyendu yawu, hiyakuya kuIkoniyumu. 52Atumbanji aswejeli muzaŋalu nikwinzala Spiritu Wajila.
လက္ရွိေရြးခ်ယ္ထားမွု
Likezo 13: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.