Likezo 10
10
1MuKesareya mwadiŋi iyala wumu, ijina dindi Konelisu, senturinu yamashidika atenaŋawu nawu aItaliya; 2muntu wukweti kale-mesha kakulemesha Nzambi, waakamaŋa Nzambi hamu nawakwetala dindi ejima, wenkelaŋa antu yamukunkulu yayivulu, walombelaŋa kudi Nzambi hefuku hefuku. 3Hakumona muchimwenu chalumbuluka, kaŋelu kaNzambi hakwinza kudi yena haora kwiji yamuchitanu nachiwanayefuku; hakumwila nindi, Eyi Konelisu. 4Niyena chanamushinshikiyi kaŋelu swi-i, hakutiya woma nindi, Chika Mwanta? Yena hakumwila nindi, Kulomba kweyi kwakuvulu niyamukunkulu yeyi yinashi ki kudi Nzambi, anakwanuki nachu. 5Dichi dinu, temeshaku amayala kuYopa, akaleti Shimona atumbiluwu ijina di kwawu daPetulu; 6washakamakwamuntu wumu ijina dindi Shimona, mukwakuloomba yitembi, wukweti itala dindi kwakwihi nakaluŋalwiji. 7Chanayiyi kaŋelu wadiŋi nakuhosha nindi, Konelisu hakutambika aŋamba jindi ayedi, niishidika wumu wukweti kalemesha kakulemesha Nzambi, wowu akwakumwimena hefuku hefuku. 8Hakuyihitila mwejima mwanamulejuwu kudi kaŋelu, hakuyitemesha kuYopa.
9Chikunachi, achidi kuya munjila yawu, hiyakuya nakuswila kwakwihi namukalowu, Petulu hakukanduka hewulu detala alombi, kwiji neyi ora yamuchitanu nayimu. 10Hakutachika kutiya nzala, hakukeŋa kudya. Hachidi kuloŋeshawu kudya, hakwila neyi wukukeŋa kuya namutulu. 11Hakumona iwulu hiyakudijikula, nichuma kwiji chika, chidi neyi ihina deneni, hichikuzelumuka, hiyakuchizelumwina kumawombu achu awana, chishi ka niheseki. 12Mwenomu mudi anyama anyitundu yejima, niyuma yazalalaŋa hamaseki, nitujila twahaluzwizu. 13Kudi yena hikukwinza izu nawu, Eyi Petulu, nyamukaku, wujahi, wudyai. 14Ilaŋa Petulu nindi, Aha-a, Mwanta! Kanda dehi nidyi chuma chatama hela chajilaku. 15Izu hidikwinza kudi yena ipampa damu chiyedi nawu, Chuma chanatookeshiyi Nzambi, bayi wuchitena neyi chatamaku. 16Chenichi achilili kasatu; chumochu atambula nikwiwulu hohenohu.
17Hachidiŋivi Petulu kujinoka nankashi, nindi chimwenu ichi chinamoni chinayi mudihi? kukasumuka owu amayala atemesheluwu kudi Konelisu, aneliuli dehi kwitala daShimona, anemani dehi kuchisu chachipaŋu. 18Hiyakutambika nakwihula nawu, Shimona atumbiluwu ijina di kwawu daPetulu, washakama kunu? 19Hachidiŋiyi Petulu kutoŋojoka nsaŋu yachimwenu ochu, Spiritu hakumwila nindi, Tala, amayala asatu anakukeŋi. 20Dichi nyamukaku wusuluki, wuyi nawu chakadi ntadi; yami nayitemeshi. 21Petulu hakusulukila kudi owu amayala nindi, Yami muntu mudi nakukeŋa; munenjilidi? 22Nawu, Senturinu Konelisu, muntu waloŋa waakamaŋa Nzambi, amuhamekaŋa kudi muza wejima wawaYudeya, anamuleji kudi kaŋelu wajila nawu akakutumeshi wuyi mwitala dindi, kulonda atiyi mazu kudeyi. 23Hakuyitambika mwitala hakuyileja kwakukama. Chikunachi hakunyamuka hakuya nawu, niana kwindi amakwawu akuYopa hiyakumutwalaku. 24Chikunachi ifuku di kwawu hiyakwijila muKesareya, kuwana Konelisu wudi nakuyichiŋilila, wapompesha dehi awusoku windi niamabwambu jindi akundayi. 25Chanepiliyi Petulu, Konelisu hakumubulakana, hakudinata kunyendu yindi nakudifukula kudi yena. 26Ilaŋa Petulu hakumuhindwisha nindi, Imanaku; ninami aweni nimuntu kwami. 27Iku wudi nakuhosha nindi hakwijila, hakuwana antu amavulu anapompi dehi. 28Hakuyila nindi, Enu aweni muneluki kaYudeya kushakama namuntu wakumuza wacheŋi hela kwinza kwakwihi nindi, chinjila. Hela chochu, Nzambi nanleji nindi, kutena muntu neyi watama hela wajila, chinjila. 29Dichi chimwantumesha, hinukwinza chakadi ntadi. Dichi neliuli nami mwantumesheladi?
30Kuchinka Konelisu nindi, Munahiti mafuku awana nakushi ka hampinji yinu, nadiŋi nakulomba mwitala dami haora yamuchitanu nachiwana; kukasumuka iyala nemani kunidi, navwali mahina atoŋeka chejeji. 31Nindi, Eyi Konelisu, kulomba kweyi anakutiyi, niyamukunkulu yeyi anayanuki kudi Nzambi. 32Dichi dinu, temesha antu kuYopa wakatambiki Shimona atumbiluwu ijina di kwawu daPetulu, akenzi kudeyi; yena wekala kwaShimona mukwakuloomba yitembi kuchi kumu chakaluŋalwiji. 33Dichi hinukukutemeshela antu hohenohu. Chinawahi mwani chiwunenzi. Dichi dinu, yetu awa tudi kunu kumesu aNzambi wejima wetu, kulonda tutiyi yejima yanakulejuwu kudi Mwanta.
34Petulu hakuhosha nindi, Mwalala, namoni komana Nzambi haakaminaŋa antu kumesuku; 35hakwila munyuza yejima, muntu wamwakamaŋa yena, welaŋa mwaloŋa, amutiyaloŋa kudi Nzambi kuwaha. 36Enu aweni mweluka mazu atemesheliyi Nzambi kudi aIsarela, nakushimuna nsaŋu yayiwahi yakuwunda naYesu Kristu, diyi Mwanta wawantu ejima. 37Nsaŋu iyi enu aweni mwayiluka, yatiyakeni mwahita Yudeya mwejima; yatachikilili kuŊaliliya hakumishiluwu chipapatishu chashimwiniyi Yowanu. 38Mwatiya dehi nsaŋu yakutena Yesu wakuNazareta, chamuwayishiluwu kudi Nzambi naSpiritu Wajila naŋovu; yena wakimbukilaŋa nakwila yayiwahi, nakukolesha antu ejima akabishilaŋawu kudi diyabolu, muloŋa Nzambi wadiŋi nayena. 39Yetu ayinsahu twamweni namesu mwejima mweliliyi mwituŋa dawaYudeya nimuYerusalema; yena nawa amujahili, nakumukudika hamutondu. 40Yena amusaŋwili kudi Nzambi mudi afu ifuku damu chisatu; 41hakumumwekesha hatooka, bayi kudi antu ejimaku, ilaŋa kudetu ayinsahu akutondaŋahu dehi kudi Nzambi, yetu twelili nikudya nikunwa nindi helililiyi nasaŋuki dehi mudi afu. 42Yena hakutuleja nindi tushimwini antu, tushimuni wunsahu wakutena netu yenowu diyi anafuukuluwu kudi Nzambi kwikala mukwakusompesha niamomi niafu. 43Amushimunaŋa wunsahu kudi atuprofwetu ejima, nawu mwijina dindi antu ejima akumukuhwelela akamona kuyanakena nyiloŋa.
44Iku Petulu wuchidi kuhosha mazu awa, Spiritu Wajila hakuholokela hadi antu ejima adiŋi nakutiya. 45Niakwakwalama enjili naPetulu adiŋi etiya, chanachimonuwu, hiyakuhayama wejima wawu nawu, Komana hadi aJentili nihena nawa anechiluhu chamukunkulu chaSpiritu Wajila. 46Muloŋatiyili hiyakuhosha madimi acheŋi nakumutohesha Nzambi.
47Petulu hakwila nindi, Muntwinyi natweshi kulekesha meji, abuli kuyipapatisha awa anatambuli Spiritu Wajila mwomutwatambwili ninetu?
48Hakuyila nindi ayipapatishi mwijina daYesu Kristu. Hiyakumulembelela nawu ashakamuku mafuku amakwawu.
လက္ရွိေရြးခ်ယ္ထားမွု
Likezo 10: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.