ALIFILI̍PĀYI 3
3
Ode lɛ kpakpa nīi - olēchi̍ lēchi̍ ma̍
1Aɛ̍nɛ̍ yī u! Ɔchlɛhu̍ yī nū, Ādā ge̍ de ɔwɔ̄wīyā mwɛbɛ mwɛbɛ de ala̍. Ami ma̍, n ge̍ gbɔ̍ɔ̄gbla̍a lɛlā nīi n de tɔ̍ɔ̄ta̍ tū la īpū ma̍ ka, o̍ i̍ ē hwō u ni̍. Ɔya̍ nīi o̍ ge̍ tū ala̍ wɔbɔ̄ nɛ. 2Ala̍ gbō iyī ala̍ hī āchɛ ɔyɛ̍ɛ̄lā ɔdwɔ̄bi̍ ɛla̍ā. Yoō ɛla̍ā nīi ē bli̍kpo̍ ka āchɛ ɛ̍lɛ ge̍ de ɛbɛ ɔha̍ yī ibi̍īyē hɛ̍ kpɛɛ o̍bū ma̍ nɛ. 3Wu̍chē oji̍ nɛ, alɔ nūma̍ re̍ka āchɛ nīi twɔ̍wu̍ olēchi̍ lēchi̍ a̍nɛ, i̍ aa̍ ni̍. Alɔ ē ya̍ otūlichō yī Ɔwɔ bū la Uhu yī Ɔwɔ ɔlɔjā. Alɔ chī lɛ ɔwɔ̄wīyā la ɔhɔ̄leyī nīi alɔ hɔ̄ la Ikra̍yisi Iji̍sɔ̄ɔsi ma̍. Alɔ i̍ de ūkpɔ̄tū yī alɔ che lɛlā ɔya̍ la yɛchɛchɛ yī ibi̍īyē ɔla̍ā ni̍. 4N chī ge̍ē de ūkpɔ̄tū che lɛlā eli̍ngɔ̍ɔ ē mɛ. Ɔ̄chɛ ɔha̍ ge̍ ka anɔ̍lɔ ē de ūkpɔ̄tū che lɛlā ɔya̍ la yɛchɛchɛ yī ibi̍īyē i̍ngɔ̍ɔ ē mɛ, ɔ̍lɔma̍ ami kpɛ̍ɛ ge̍ē jɔ̍ɔkɔ ē ya̍ i̍ngɔ̍ɔ ē mɛ a̍nɛ. 5E̍ de u twɔ̍wu̍ yɛ̄grāa nīi e̍ ma u nīi n re̍ ɔ̄chī arāata̍ ma̍. Ami - Oli̍sɛ̄rɛli la ɔmɔ̄ma nɛ. N bū la wɔma yī Ibɛ̍njāmɛn. Ami - Ihi̍bru nīi - Ihi̍bru ke̍e̍ la ɔmɔ̄ma ma̍ nɛ. Lɛlā yī Lihɔ yī Iju̍u ode gbōgbō ma̍, ami pi̍i̍ tū ribi yī Āchɛ yī Ifa̍rasīi. 6Wu̍chē yī ɔpɔ̄pū yī lɛlā yī Ɔwɔ ɔla̍ā nīi ami chɛ̄ ma̍, n ē ya̍ nīi ogrēeyī yī āchɛ yī Ɔwɔ mi̍chi̍ gba̍a̍ yɛ̄grāa ɔla̍ā. Lɛlā yī ode lɛ kpakpa ba̍la Ɔwɔ bū la ɔya̍ lɔkɔ nīi Lihɔ yī Imo̍sīisi ka ma̍, n i̍ gblabɔ̄ la ɔha̍lɔha̍ ni̍ kpɛkpɛ. 7Ɛjā ɛla̍ā wa̍a̍ nīi n ge̍ē nāa bāa ɛpiyabuna yī lɛlā bɛ̍ɛ̄nɛ̄ ma̍, i̍ ɔjɔ̄jā de u u̍ma̍ama gɛ ni̍, wu̍chē yī Ikra̍yisi. 8I̍ ɛjā ɛla̍ā ɛjā ɛla̍ā ke̍e̍ i̍ ɔjɔ̄jā de u gɛ ni̍ a̍ni̍. Ɛjāha̍ ɛjāha̍ wa̍a̍ jimini i̍ ɔjɔ̄jā de u gɛ ni̍ wu̍chē yī ɔjā nūma̍ nīi - ɔjā ɔlamu ɔlamu gɔ̄ga ma̍. Ochi̍chi̍ yī lɛlā ojo̍ōje̍ ku̍ Ikra̍yisi Iji̍sɔ̄ɔsi nīi Ādādā yī u ma̍ anu̍ - ɔjā ɔnɔ̄kɔ̄kū a̍nɛ. Wu̍chē yī nū, n tu̍labɔ̄ hī ɔjāha̍ ɔjāha̍ wa̍a̍ chīyenū. N nāa ɛjā ehēhī ɛla̍ā wa̍a̍ bāa ɛjā ode chīyētū ga limū ma̍ hɛ̄ɛbɛ ge̍ē lɛ Ikra̍yisi. 9N ya̍ hɛ̄ɛbɛ nīi n ge̍ē de ē ngmo̍tu̍chɛ̄ la ɔgɔ̄grāa ba̍la Ikra̍yisi. Bū la ɛbɛ ɔla̍ā, ode lɛ kpakpa ba̍la Ɔwɔ la abɔ̄ yī ami ɔlɔjā nīi re̍ka ɔjā nīi bū la Lihɔ yī Imo̍sīisi ma̍ i̍ hɔ̄ de u gɛ ni̍ i̍ngɔ̍ɔ ke̍e̍. Ode lɛ kpakpa ba̍la Ɔwɔ nīi - ɔjā nīi hɔ̄ bū la ɔtū ode che Iji̍sɔ̄ɔsi Ikra̍yisi ma̍ nīi n lɛ bɛ̍ɛ̄nɛ̄ a̍nɛ. Ode lɛ kpakpa oli̍ngɛ̍ɛ̄nɛ̄ nūma̍ nīi Ɔwɔ ɔlɔjā de lā ma̍ bū la ɔtū ode chōche ke̍e̍. 10Ɔjā nīi n chikpo̍ ka̍ta̍ ma̍, oje̍ Ikra̍yisi ojo̍ōje̍, gba̍a ma̍ wɔhu̍ yī ohye̍ēyī la okū yī nū ke̍e̍ nɛ. N gba̍a chikpo̍ ge̍ē mi̍chi̍ ē tāa anu̍, hɛ̄ɛbɛ nīi n ē de ē lɛ bāa anu̍ ma̍ la ɔpīyaku̍ yī nū. 11Bū la ɛbɛ ɔla̍ā, n deyīche hīka Ɔwɔ ge̍ē de u ē hye̍ēyī la okū wā la ɔhɔ̄leyī ke̍e̍.
Ɛnya ɔrɛ̄ tri̍di̍di̍ ga riyi̍ yī ɔgu
12N i̍ yɛ ē ka hīka n ya̍ yɛ̍yɛ̍ ka̍ka̍ mɛ̍ kɛ̄ɛ n de hwɔhi gɔ̄grāa mɛ̍ ni̍. N yɛ ē chɛ̄rī ɔ̄chɔ̄chɛ̄ i̍ngi̍ngɔ̍ɔ ē ga iyɔ̄bū iyɔ̄bū, yɛ ē chikpo̍ ge̍ē gbɔjā nīi hu̍ nīi Ikra̍yisi de u lɔ̄lɛ ma̍. 13Aɛ̍nɛ̍ yī u, n i̍ chī gbɛri̍ya̍ hīka n gbɔjā ɔ̍lɔma̍ mɛ ni̍. Ɔjā ūkpo̍he nīi n ē ya̍ ma̍, n ē mwanyī hī ɔjā nīi hɔ̄ la okwi̍ihi yī u ma̍; n ē chɛ̄rī gba̍a̍ la ɔyɛ ku̍ ɔjā nīi hɔ̄ la iyɔ̄bū yī u ma̍. 14Wu̍chē yī ɔla̍ā, n ē rɛ̄ɛnya i̍ngɔ̍ɔ tri̍di̍di̍ ē pīyeyīta̍ riyi̍ yī ɔgu hɛ̄ɛbɛ nīi n ge̍ē gbɔjā ɔla̍ā. Ɔjā ogbōgbo ɔla̍ā, anu̍ re̍ka ɛra̍ nīi Ɔwɔ ē hī ɔ̄chɛ gala abɔ̄ yī Ikra̍yisi ē ga ɔhɔ̄leyī nīi hɔ̄ la ichō ma̍ a̍nɛ.
15Alɔ wa̍a̍ nīi de jɛ̄ angrɔ̄ɔ la ɔpɔ̄pū yī Ɔwɔ ma̍, alɔ ā lɛ ita yī abɔ̄lɛ̄lā nūma̍ bɛ̍ɛ̄nɛ̄. Āchɛ ɛha̍ yī ala̍ ge̍ chī lɛ abɔ̄lɛ̄lā ɔha̍ nīi hɔ̄ɔ̄hɔ̄, Ɔwɔ ɔlɔjā ge̍ē de onūma̍ ē chabɔ̄ hu̍ ɛlɛjā tɛri̍tɛri̍. 16O̍ ge̍ lɔ̄lɛ kana̍ kana̍, alɔ ā yɛ ga iyɔ̄bū iyɔ̄bū ga la ɔgɔgu yī lɛlā ɔla̍ā nīi alɔ yɛ ē ku kpɛɛ wā ge̍ ku i̍chɛ nūma̍ ma̍.
17Aɛ̍nɛ̍ yī u, ala̍ ā mi̍yɛ̄gbla yī u i̍ngi̍ngɔ̍ɔ gɛ. Alɔ de igbla yī lɛlā nīi lɛ kpakpa ma̍ lā abɔ̍ɔ de ala̍ mɛ̍. Ala̍ ā gbeyīchi̍i̍ ma̍ āchɛ nīi yɛ ē ga la ɔgɔgu ɔla̍ā ma̍ gɛ. 18Lɛlā nūma̍, n ka i̍ngɔ̍ɔ de ala̍ je̍ mɛ̍, n chī ge̍ē gbla̍a anu̍ ē ka u̍ma̍ama la yeje la eyī: Āchɛ ɛha̍ hɔ̄ abɔ̍ɔ yɛ̄mɛ̄mɛ̄ nīi ɔhɔ̄leyī yī wā ya̍ nīi e̍ de pīya aluji yī Ikra̍yisi nīi pīyaku̍ la ɔchi̍ ɔhrɛ̍ɛpa ma̍. 19Aa̍ ɛla̍ā wa̍a̍ ge̍ē kwɛ̍ɛjī tū la ayekū oli̍gba̍o̍. Wu̍chē oji̍ nɛ, a̍hla̍ yī ibi̍īyē yī aa̍ ɛlɛjā re̍ka ɔwɔ yī wā a̍nɛ. Ɔjā nīi ge̍ē re̍ka liwēyī de wa̍ ma̍, anu̍ nīi e̍ ē chōo̍chē bī jɛ̄ ɛba̍achɛ a̍nɛ. Ɛjā nīi chī - iyī yɛchɛ nūma̍ ke̍e̍ ma̍, anu̍ nīi e̍ ē gbɛri̍ya̍ ē ku̍ wā a̍nɛ. 20Alɔ ma̍, alɔ - alipwo̍gra nīi hɔ̄ la ichō ma̍ nɛ. Alɔ yɛ ē hɔ̍ɔ̄hla̍, ē gbēyī yī Ɔhɔ̍ɔnyɛta̍ yī alɔ, Ādādā Iji̍sɔ̄ɔsi Ikra̍yisi nīi o̍ ge̍ē bū abɔ̍ɔ la ichō wā. 21O̍ ge̍ē de ibi̍īyē ɔlɛkwīkwī yī alɔ nūma̍ nīi ē ko̍ōku̍ ē mɛ ma̍ ē pīya ē ta̍ ē ya̍ nīi alɔ ē de lɛ bāa ibi̍īyē yī rīgā yī anu̍ ɔlɔjā ma̍. Wɔhu̍ ɔla̍ā nīi o̍ lɛ nīi o̍ yɛ ē bī bī ɛjā wa̍a̍ mɛ ma̍ nīi o̍ ge̍ē bī ya̍ i̍ngɔ̍ɔ a̍nɛ.
လက္ရွိေရြးခ်ယ္ထားမွု
ALIFILI̍PĀYI 3: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)