ALIFILI̍PĀYI 2
2
Ɔlɛmlɛ̍ɛ̍ ba̍la rīgā yī Ikra̍yisi
1Ɔhɔ̄leyī nīi ala̍ lɛ la Ikra̍yisi ma̍ ya̍ nīi ala̍ yɛ ē lwɔhu̍ brii? Ɔhɔtū yī nū ya̍ nīi ūkpɔ̄tū lɛ ala̍ yaya? Ala̍ ē rɛ̍ɛya ba̍la Uhu yī Ɔwɔ? Ala̍ ē lɛ yaya gba̍a yɛ ē mlɛ̍ha̍ yī ɔ̍nyīnū? 2Ɔ̍lɔma̍ ala̍ chu̍chu̍u, ala̍ ā ya̍ lɛbɛ nīi ɔwɔ̄wīyā yī u ge̍ gɔ̄grāa gɛ: Ɛri̍ya̍ ogbōgbo yī ala̍ ge̍ lɛ ūkpo̍he ūkpo̍he. Ala̍ ā lɛ̍ɛhi tāa ɔ̍nyīnū la ɔhɔtū ūkpo̍he. Ala̍ ā ngmo̍tu̍chɛ̄ la uhu ba̍la ɛri̍ya̍ ogbōgbo ūkpo̍he. 3Ala̍ e̍e ya̍ lɛlɛ̄lā bū la a̍hla̍ yī lɛlā wɔ̄bɔ̄bɔ̄ yī ala̍ ɛlɛjā kɛ̄ɛ a̍hla̍ yī lɛlā ɔya̍ bī gbogū ni̍. Ɔkɔkɔ ɔla̍ā, ala̍ ā lɛ mlɛ̍ɛ̍ pīyeyīta̍ ɔ̍nyīnū. Ɔ̄chɔ̄chɛ ge̍ e̍e gbɛri̍ya̍ hīka anɔ̍lɔ hwɔhi hi̍ āchɛ ɛha̍ ni̍. 4Ala̍ ā deyīrɛ yī ɔjā nīi hi ɔ̍nyīnū ɔtū ma̍, i̍ iyī ala̍la̍ ɛlɛjā ni̍. 5Abɔ̄lɛ̄lā yī ala̍ ge̍ lɛ ke̍e̍ bāa iyī Ikra̍yisi Iji̍sɔ̄ɔsi ɔlɔjā ma̍ gɛ:
6Ikra̍yisi lɛ i̍ngɔ̍ɔ ke̍e̍ lɔkɔ nīi Ɔwɔ lɛ ma̍.
O̍ i̍ chī chikpo̍ ode jɔ̄ɔ̄jɛ̄ tāa Ɔwɔ wɔhu̍ wɔhu̍ ni̍.
7Ɔkɔkɔ ɔla̍ā, o̍ tu̍ hī ɔla̍ā ke̍e̍
la abɔ̄ yī anu̍ ɔlɔjā.
O̍ chōo̍chē tū ibi̍īyē yī ɔ̍chɛ̍.
O̍ de pīya ɔ̄chɛ̄ɛchɛ,
tū ibi̍īyē i̍ngɔ̍ɔ ke̍e̍ bāa ɔ̄chɛ̄ɛchɛ ma̍.
8O̍ lɛ mlɛ̍ɛ̍ lēchi̍ lēchi̍,
kpɛɛ nīi o̍ chrōoko̍o yī ɔpīyaku̍.
Ɔpīyaku̍ ɔla̍ā nīi o̍ ku̍
la ɔchi̍ ɔhrɛ̍ɛpa a̍nɛ.
9Wu̍chē yī ɔla̍ā, Ɔwɔ hu ɔ̍ hwa̍a̍
pīya ga abɔ̍ɔ ga ichō hwɛɛ.
O̍ de riyī nīi gla riyī ɔha̍lɔha̍ wa̍a̍ ta̍ ma̍ de ɔ̍.
10Bū la ɛbɛ ɔla̍ā,
ɔjāmɔjā wa̍a̍ nīi hɔ̄ abɔ̍ɔ la ichō,
kɛ̄ɛ amu la ajɛ,
kɛ̄ɛ abɔ̍ɔ lipu̍ yī ajɛ ma̍ ge̍ po̍ riyī
yī Iji̍sɔ̄ɔsi ji mɛ̍,
e̍ ge̍ē de ūnōowu ɛpɛpa ē tāajɛ ē de ɔ̍.
11Bū la ɛbɛ ɔla̍ā, ɔ̄chɛmɔ̄chɛ wa̍a̍ ge̍ē
de ē ka hwōō hi̍yɛchɛ hīka,
Iji̍sɔ̄ɔsi Ikra̍yisi ɔ̍lɔ - Ādādā a̍nɛ oo!
Wu̍chē yī rīgā yī Ɔwɔ A̍dā.
Ala̍ fi̍yajɛ bāa ɔla̍ ɔmyɛ̍ma̍ ma̍ amu la yɛchɛ
12Aɛ̍ɛya ami lēchi̍ lēchi̍! N jo̍ōkū hīka ala̍ ē pɔ̍ɔkɔ yī u myɛ̄grāa-myɛ̄grāa nīi n hɔ̄ abɔ̍ɔ ba̍la ala̍ ma̍. U̍ma̍ama nūma̍ kpɛ̍ɛ nīi i̍ hɔ̄ abɔ̍ɔ ba̍la ala̍ gɛ ni̍ ma̍, anu̍ hwɔhi gɔ̄ga la ɔpɔ̍ɔkɔ yī lɛlā yī u a̍nɛ. Ala̍ ā ya̍ u̍ku̍rɔ̍ ga iyɔ̄bū iyɔ̄bū, tūuhwi hi̍bi̍īyē ejē kpa̍kpa̍ hɛ̄ɛbɛ nīi ɔhɛ̍ta̍ yī ala̍ ge̍ gɔ̄grāa. 13Wu̍chē oji̍ nɛ, Ɔwɔ kū abɔ̍ɔ la u̍ku̍rɔ̍ la ibi̍īyē yī ala̍ hɛ̄ɛbɛ nīi ala̍ ge̍ē lɛ ūkpɔ̄tū ɔlɛgbadagbada, ē lwɔhu̍ brii, ē ya̍ ɔjā nīi anu̍ ɔlɔjā chikpo̍ ma̍ ē mɛ.
14Ɔjāha̍ ɔjāha̍ wa̍a̍ nīi ala̍ ge̍ē ya̍ ma̍, wɔ̍na yī lɛlā ɔyɔ̍ɔ̄ya̍ kɛ̄ɛ ahu̍lɛ̄lā ɔtɔ̍ɔ̄ta̍ i̍ ge̍ e̍e tū la anu̍ ni̍. 15Ala̍ ā ya̍ i̍ngɔ̍ɔ ke̍e̍ hɛ̄ɛbɛ nīi ala̍ ge̍ lɛ cha̍ri̍cha̍ri̍ nīi ala̍ ge̍ e̍e gblɛfiyɛ ɔha̍lɔha̍ ni̍. Bū la ɛbɛ ɔla̍ā, ala̍ ge̍ē lɛ bāa ayi̍ yī Ɔwɔ nīi hwɔhi gɔ̄grāa chī hɔ̄ amu la yɛchɛ yī āchɛ ɔdwɔ̄bi̍ lɛlā ba̍la āchɛ ɔyɛ̍ɛ̄lā ɔdwɔ̄bi̍ ma̍. Ala̍ ā fi̍yajɛ la olo̍ōlo̍ yī wā bāa i̍nyi̍nyɔ̍ɔwīyā nīi ē fi̍yajɛ abɔ̍ɔ la akpɔ̍ɔwɔ ma̍ gɛ. 16Ala̍ ā ya̍ i̍ngɔ̍ɔ yɛ̄grāa nīi ala̍ ge̍ē ka ɛrɔ̄ yī ɔhɔ̄leyī de wa̍ ma̍ gɛ. Ala̍ ge̍ ya̍ i̍ngɔ̍ɔ, ɔ̍lɔma̍ n ge̍ē ma̍ ɛbɛ ē jɔ̍ɔkɔ ē wɔ̄wīyā wu̍chē yī ala̍ la ɔ̄chī ɔla̍ā nīi - Ɔ̄chī Ɔwɔ̄wā yī Ikra̍yisi ma̍. Wu̍chē oji̍ nɛ, ɔla̍ā ge̍ē chabɔ̄ ke̍e̍ hīka ɔchɛ̄rī yī amɔ̍lɔ ba̍la u̍ku̍rɔ̍ yī amɔ̍lɔ i̍ chāajɛ ni̍.
17Ɔtū ode chōche yī ala̍ - ɔjā ode pā Ɔwɔ nɛ. N ka̍a ē de yeyī yī ɔhɔ̄leyī yī u nāa ā chīyēkla̍ ɔjā ode pā Ɔwɔ ɔla̍ā oo! O̍ ge̍ i̍ngɔ̍ɔ, ɔ̍lɔma̍ n lɛ ɔwɔ̄wīyā; ɔwɔ̄wīyā ɔla̍ā chī - iyī ami ba̍la ala̍ nɛ. 18Gala ɔgɔgu ɔla̍ā, ala̍ titi ge̍ē lɛ ɔwɔ̄wīyā; ɔwɔ̄wīyā yī ala̍ ɔla̍ā chī - iyī ami i̍ngi̍ngɔ̍ɔ titi nɛ.
Iti̍mōti ba̍la Ɛpafroda̍yītusi
19N de ɔtū che Ādā Iji̍sɔ̄ɔsi hīka n ge̍ē de Iti̍mōti ē tɛ̄rɔ̄ hu ala̍ lipu̍ yī ɔ̄chī ɛpɛpa nūma̍ mɛ̍. N ge̍ē ya̍ i̍ngɔ̍ɔ hɛ̄ɛbɛ nīi wɔ̄kā yī ala̍ ē bī ya̍ nīi n tu̍ ūkpɔ̄tū chɛ̄ brii. 20Anu̍ lōri̍īnū - ɔ̄chɛ nīi ūkpɔ̄tū yī ami ba̍la anu̍ lɛ ūkpo̍he ūkpo̍he a̍nɛ. Anu̍ chī gba̍a - ɔ̄chɛ ɔkwɛ̍ri̍ya̍ tū u lēchi̍ lēchi̍ a̍nɛ. 21Āchɛ ehēhī ma̍, ɔnyɔnyɛ yɛ ē kwɔgu yī lɛlā yī wɔ̄bɔ̄bɔ̄ yī anu̍ ɔlɔjā ke̍e̍; i̍ lɛlā yī Iji̍sɔ̄ɔsi Ikra̍yisi nīi e̍ i̍ kwɔgu a̍ni̍. 22Ala̍ ɛlɛjā chī u̍tu jo̍ōkū lɔkɔ nīi o̍ chabɔ̄ yī ita ɔ̄chɛ nīi o̍ wɛ ma̍ mɛ̍. Ami ba̍la anu̍ lɛ bāa a̍dā ba̍la ɔyi̍ ma̍ yɛ ē bɔ̍ɔ̄ba̍ ē ya̍ u̍ku̍rɔ̍ ūkpo̍he wu̍chē yī Wɔ̄kā Ɔlwɔnyɛ yī Ɔwɔ. 23N yɛ amu ē deyīche ge̍ē de ɔ̍ tɛ̄rɔ̄ hu ala̍. N ge̍ē ya̍ i̍ngɔ̍ɔ ɔpɔ̄ɔpɛ̄ nīi n ge̍ ma̍ lɔkɔ nīi lɛlā yī u yɛ ē pīya wɔcha̍ ma̍. 24N chī de ɔtū che Ādā hīka ami ɔlɔjā ge̍ē wā dikpo̍ ē ba̍ ala̍ lipu̍ yī ɔ̄chī ɛpɛpa nūma̍ i̍ngi̍ngɔ̍ɔ.
25N gbɛri̍ya̍ wa̍a̍ ma̍, n ma̍ hīka o̍ ngma̍ nīi n ē de Ɛpafroda̍yītusi ɔɔ̍nɛ̍ yī alɔ ē tɛ̄rɔ̄ hu ala̍. Anu̍ - ɔlɛrɔ̄ yī ala̍ nīi ala̍ de tɛ̄rɔ̄ wā ge̍ hɔ̄ yɛ ē tū u wɔbɔ̄ a̍nɛ. O̍ ya̍ u̍ku̍rɔ̍ brii, nunu la yɛgɔ̄ yī u gblɛ̍ɛgblɛ̍ɛ. 26O̍ yɛ ē hla̍ anu̍ gba̍a̍ la ɔwā ge̍ ma̍ ala̍ wa̍a̍. Ūkpɔ̄tū ti̍ya anu̍ tū wu̍chē lɔkɔ nīi ala̍ po̍ ka ɔ̍lɔ kwi̍īyē ma̍. 27Lēchi̍ nɛ, o̍ kwi̍īyē i̍ngɔ̍ɔ, hōhī pi̍nyɛ̍ nīi o̍ ka ge̍ pīyaku̍. Ɔwɔ chī mlɛ̍ha̍ yī nū; i̍ ana̍nu̍ ni̍, o̍ mlɛ̍ha̍ yī ami i̍ngi̍ngɔ̍ɔ. O̍ de īlāanyī ɔnɔ̄kɔ̄kū ɔla̍ā nīi ke̍ ge̍ hɔ̄ de u ga iyɔ̄bū iyɔ̄bū ma̍ gwō gbo̍o̍ hī u ke̍e̍. 28Bū la ɛbɛ ɔla̍ā, n yɛ ē chikpo̍ lēchi̍ lēchi̍ ge̍ē de ɔ̍ ē tɛ̄rɔ̄ hu ala̍. N ge̍ē ya̍ hɛ̄ɛbɛ nīi ala̍ gba̍a ē lɛ ɔwɔ̄wīyā nīi ala̍ ge̍ē ma̍ ɔ̄ ma̍, hɛ̄ɛbɛ nīi īlāanyī nīi hɔ̄ de ami ɔlɔjā titi o̍bū ma̍ ē gwō gbo̍o̍ ē hī u. 29Ala̍ ā ku̍ ɔ̄ ba̍ ɔtū la ɔwɔ̄wīyā bāa ɔɔ̍nɛ̍ yī ala̍ la abɔ̄ yī A̍dā ma̍. Ala̍ ā de otūlichō de ita yī āchɛ i̍ngɔ̍ɔ bāa anu̍ ma̍. 30Wu̍chē oji̍ nɛ, o̍ mwanyī yī ɔhɔ̄leyī yī nū, ka ge̍ pīyaku̍ lɛhu̍ yī u̍ku̍rɔ̍ yī Ikra̍yisi. O̍ ya̍ i̍ngɔ̍ɔ hɛ̄ɛbɛ nīi o̍ ge̍ē tū u wɔbɔ̄ nīi ala̍ ɛlɛjā i̍ tū u mɛ ni̍ ma̍.
လက္ရွိေရြးခ်ယ္ထားမွု
ALIFILI̍PĀYI 2: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)