ALIGALE̍SIYA 2
2
Ipɔ̍ɔli ba̍la alɛrɔ̄ āchɛ ehēhī
1Lɛ̍yi̍ igwo̍lɛnɛ gba̍a wā ge̍ ga ma̍, n gba̍a ku̍chē ga Ijɛru̍sālɛm; ami ba̍la Iba̍nābasi. N bī Ita̍yi̍tɔ̄ɔsi yɛ i̍ngi̍ngɔ̍ɔ. 2N yɛ wu̍chē oji̍ nɛ, Ɔwɔ ka amɔ̍lɔ ge̍ yɛ. La ogrēeyī ɔha̍ nīi alɔ ba̍la alɛhu̍ yī abɔ̍ɔ lɛ la i̍kplɛ̍pa̍ ma̍, n koko̍o de wa̍ lɔkɔ nīi ami yɛ ē ka ɛrɔ̄ yī Ɔwɔ ē de Ɛchɛkɔcha wa̍a̍ ma̍. N i̍ chikpo̍ hīka u̍ku̍rɔ̍ nīi n ya̍ o̍bū ma̍ ba̍la olu̍ma̍ama ge̍ chāajɛ i̍ngɔ̍ɔ ji ni̍. 3Ita̍yi̍tɔ̄ɔsi nīi - olikpɛ̍ɛ yī u ma̍, o̍ wɔ̄wɛ Igri̍iki nyaa ma̍, e̍ i̍ de ɔ̍ twɔ̍wu̍ wɔhu̍ wɔhu̍ ni̍. 4Āchɛ ɛha̍ nīi mɔ̍ɔ̄ma̍chi̍ ya̍ bɔ̄ɔjā nīi e̍ - aɛ̍nɛ̍ yī alɔ la abɔ̄ yī Ikra̍yisi nɛ ma̍ wā ge̍ tū ribi ɔla̍ā chikpo̍ ge̍ē de ɔ̍ ē twɔ̍wu̍ a̍nɛ. Āchɛ ɛla̍ā gatū wā bāa alɔwɛ ma̍, hɛ̄ɛbɛ ge̍ē ma̍ alɔ ē jo̍ōkū lɔkɔ nīi alɔ yɛ ē ya̍ ɔhɔ̄leyī yī alɔ tɛ̍bɛ̍lɛ̍ la ongmo̍tu̍chɛ̄ nīi alɔ tū ba̍la Ikra̍yisi ma̍. Āchɛ nūma̍ chikpo̍ ge̍ē ku̍ alɔ ē tū lɛfiyɛ. 5Alɔ i̍ chī kɔ̄ ɛbɛ ta̍ de wa̍ yɛ̄grāa pi̍nyɛ̍ ni̍ lachi̍lachi̍. Alɔ ya̍ i̍ngɔ̍ɔ hɛ̄ɛbɛ ge̍ē de lɛlā olēchi̍ lēchi̍ yī Wɔ̄kā Ɔlwɔnyɛ ɔla̍ā gbōgbō de ala̍ hwɔhi hwɔhi.
6Āchɛ ɛla̍ā nīi - alɛhu̍ ɛ̍lɛma̍ ma̍, ɔ̄chɔ̄chɛ i̍ chabɔ̄ yī lɛlā ɔha̍ hu̍ u lɛ̍kɛ̍kɔ̍ gɛ ni̍. Iyī “alɛhu̍ ɛ̍lɛma̍” nīi n ka ma̍, e̍ ge̍ - alɛhu̍ kɛ̄ɛ i̍ alɛhu̍ ni̍ oo, ɔla̍ā i̍ lɛlɛ̄lā yī u ni̍. I̍ ɔkɔ nīi ɔ̄chɛ lɛ la yɛchɛchɛ ma̍ nīi Ɔwɔ ē nāa ē bī ka a̍ni̍. 7Ɔjā ūkpo̍he, alɛhu̍ ɛla̍ā jo̍ōkū hīka Ɔwɔ ɔ̍lɔ de u̍ku̍rɔ̍ yī Wɔ̄kā Ɔlwɔnyɛ obī ge̍ ka de Ɛchɛkɔcha de amɔ̍lɔ mɛ̍. O̍ lɛ lɔkɔ nīi Ɔwɔ de u̍ku̍rɔ̍ yī Wɔ̄kā Ɔlwɔnyɛ obī ge̍ ka de āchɛ yī Iju̍u de Ipi̍ta ma̍. 8Wu̍chē oji̍ nɛ, bū la wɔhu̍ yī Ɔwɔ nīi n de pīya ɔlɛrɔ̄ yī Ikra̍yisi de Ɛchɛkɔcha a̍nɛ; gala ɔgɔgu lɔkɔ nīi Ipi̍ta de pīya ɔlɛrɔ̄ yī Ikra̍yisi de āchɛ yī Iju̍u ma̍. 9Ije̍mēehi ba̍la Ipi̍ta ba̍la Ijɔ̍ɔn nīi lɛ bāa alɛhu̍ ma̍ de jo̍ōkū hīka Ɔwɔ ɔ̍lɔ de ita yī u̍ku̍rɔ̍ nūma̍ pi̍i̍ de amɔ̍lɔ ke̍e̍ a̍nɛ ma̍, aa̍ āchɛ ɛtɛ̍ɛta̍ chɛ̄ la lɛhɛ̍hu̍ de ami ba̍la Iba̍nābasi. Bāa alu̍ku̍rɔ̍ ūkpo̍he ma̍, alɔ ba̍la aa̍ chɛ̄ku iyī alɔ hīka, alɔ ge̍ē ya̍ u̍ku̍rɔ̍ lipu̍ yī Ɛchɛkɔcha; aa̍ ge̍ē ya̍ lipu̍ yī āchɛ yī Iju̍u. 10Ɔjā ka̍ta̍ nīi e̍ ra̍ābɔ̄ ma̍, e̍ ka aɛ̍lɛ ge̍ bla tū alyeklo̍ nīi - ɛ̍lɛ hɔ̄ amu lipu̍ yī aa̍ ma̍. U̍ku̍rɔ̍ ɔla̍ā pi̍i̍ nīi n chī de abɔ̄ ngmu̍wɔ̍hu̍ la ɔyɔ̍ɔ̄ya̍ a̍nɛ.
Ipɔ̍ɔli ka alābi̍ tāa Ipi̍ta abɔ̍ɔ la A̍ntīyɔ̄ɔki
11Yɛ̄grāa nīi Ipi̍ta wā la A̍ntīyɔ̄ɔki ma̍, n hi̍hi̍yo̍ de ɔ̍ la ɔgbādu wu̍chē yī lɛlā ɔha̍ nīi o̍ i̍ ya̍ grāa ni̍ ma̍. 12Yɛ̄grāa nīi āchɛ nīi Ije̍mēehi de tɛ̄rɔ̄ ma̍ i̍ gbajɛ wā we̍ ni̍ ma̍, Ipi̍ta yɛ ē tābɔ̄ yī ojōre̍ i̍ngi̍ngɔ̍ɔ ba̍la aɛ̍nɛ̍ yī alɔ nīi - Ɛchɛkɔcha ma̍. E̍ gbajɛ wā abɔ̍ɔ bɛ̍ɛ̄nɛ̄ ma̍, Ipi̍ta hɛ̍ ja̍a̍ bɛ̍ɛ̄nɛ̄; o̍ i̍ chɛ̄ tābɔ̄ yī ojōre̍ ba̍la aa̍ gɛ ni̍. O̍ ya̍ i̍ngɔ̍ɔ wu̍chē oji̍ nɛ, o̍ yɛ ē tūuhwi yī āchɛ nīi yɛ ē bli̍kpo̍ hīka ɛ̍lɛ ge̍ kpo̍ Ɛchɛkɔcha wa̍a̍ twɔ̍wu̍ o̍bū ma̍. 13Aɛ̍nɛ̍ yī alɔ āchɛ ehēhī nīi - Iju̍u ma̍ pra̍akū titi yɛ ē hɛ̍ ja̍a̍ja̍ ba̍la Ipi̍ta ē hī Ɛchɛkɔcha nīi - Āchɛ yī Ikra̍yisi ma̍. Bū la ɛbɛ ɔla̍ā, Iba̍nābasi titi pra̍atū la ɔyɔ̍ɔ̄ya̍ i̍ngi̍ngɔ̍ɔ. 14N ma̍ i̍ngɔ̍ɔ ma̍, n jo̍ōkū hīka i̍ ɔgulɛ̄lā olēchi̍ lēchi̍ nīi tū la Wɔ̄kā Ɔlwɔnyɛ yī Ɔwɔ ma̍ nīi e̍ yɛ ē ga a̍ni̍. Wu̍chē yī ɔla̍ā, n da Ipi̍ta abɔ̍ɔ la iyɔ̄bū yī āchɛ ɛla̍ā wa̍a̍ hīka, “Ipi̍ta, je̍ka aa̍ awɔ - Iju̍u nɛ? A chī yɛ ē ya̍ ɔhɔ̄leyī yī wɔ bāa Ɛchɛkɔcha ma̍; a i̍ chī ya̍ ɔhɔ̄leyī yī Iju̍u ni̍. Kana̍ bɛ̍ɛ̄nɛ̄ nīi a chikpo̍ ge̍ē ku̍ Ɛchɛkɔcha wɔhu̍ wɔhu̍ nīi e̍ ge̍ē ya̍ ɔhɔ̄leyī bāa āchɛ yī Iju̍u ma̍?”
Ɔhɛ̍ta̍ hɔ̄ bū la ɔtū ode che Ɔwɔ lōri̍īnū
15La olēchi̍ lēchi̍ ma̍, alɔ - Iju̍u la ɔmɔ̄ma nɛ; i̍ alɔ “Ɛchɛkɔcha ɛyɛ̍ɛ̄lā abi̍” ni̍. 16O̍ chī lɛ i̍ngɔ̍ɔ nyaa ma̍, alɔ jo̍ōkū hīka obū la ɔtū ode che Iji̍sɔ̄ɔsi Ikra̍yisi ke̍e̍ nīi ɔ̄chɛ ē de ē lɛ kpakpa ba̍la Ɔwɔ ē mɛ a̍nɛ; i̍ ɔya̍ lɔkɔ nīi Lihɔ yī Imo̍sīisi chikpo̍ ma̍ ni̍. Alɔ nūma̍ titi de ɔtū che Iji̍sɔ̄ɔsi Ikra̍yisi hɛ̄ɛbɛ nīi alɔ ge̍ē de ē lɛ kpakpa ba̍la Ɔwɔ bū la ɔtū nīi alɔ de che Ikra̍yisi ma̍; i̍ lɛlā ɔyɔ̍ɔ̄ya̍ lɔkɔ nīi Lihɔ yī Imo̍sīisi chikpo̍ ma̍ ni̍. Wu̍chē oji̍ nɛ, ɔ̄chɔ̄chɛ i̍ ē de ē lɛ kpakpa ba̍la Ɔwɔ bū la lɛlā ɔyɔ̍ɔ̄ya̍ lɔkɔ nīi Lihɔ yī Imo̍sīisi chikpo̍ ma̍ ē mɛ ni̍. 17Alɔ nūma̍ ge̍ chī yɛ ē kwɔgu yī ode lɛ kpakpa ba̍la Ɔwɔ bū la otōtū tāa Ikra̍yisi, nīi e̍ ge̍ chī ma̍ hīka aɛ̍lɛ - āchɛ ɔyɛ̍ɛ̄lā ɔdwɔ̄bi̍ bāa Ɛchɛkɔcha ma̍ nɛ bɛ̍ɛ? Ɔla̍ā re̍ka Ikra̍yisi nīi alɔ tū tāa anu̍ ma̍ yɛ ē twɔ̄bɔ̄ la lɛlā ɔdwɔ̄bi̍ ɔyɔ̍ɔ̄ya̍? Īchāha̍ īchāha̍! 18O̍ ge̍ re̍ka n chōo̍chē pra̍akū yɛ ē gbla̍a ɔpɔ̄pū yī lɛlā nīi n wa̍ābɔ̄ yī nū o̍bū ma̍ ē tu̍rɛ nɛ, ɔla̍ā ge̍ē chabɔ̄ hīka amɔ̍lɔ bīya Lihɔ yī Imo̍sīisi mɛ̍. 19Gala abɔ̄ yī Lihɔ yī Imo̍sīisi ma̍, ami - okū nɛ. Lihɔ yī Imo̍sīisi ɔlɔjā de u ngmo̍ mɛ̍. Ɔla̍ā ya̍ lɛbɛ nīi n ge̍ē hɔ̄leyī de Ɔwɔ bɛ̍ɛ̄nɛ̄. E̍ de u ngmo̍ ba̍la Ikra̍yisi la ichō yī ɔchi̍ ɔhrɛ̍ɛpa mɛ̍. 20Bū la ɛbɛ ɔla̍ā, o̍ re̍ka i̍ ami ɔlɔjā hɔ̄leyī u̍ma̍ama ma̍ gɛ ni̍; Ikra̍yisi hɔ̄ ma̍ la ami bɛ̍ɛ̄nɛ̄ a̍nɛ. Ɔhɔ̄leyī nūma̍ nīi n hɔ̄ ma̍ u̍ma̍ama ma̍, n hɔ̄ bū la ɔtū ode che Iji̍sɔ̄ɔsi, Ɔyi̍ yī Ɔwɔ nīi yɔ̍ɔhɔtū yī u, de ɔhɔ̄leyī yī nū nāa de wu̍chē yī u ma̍. 21Ami i̍ ē hi̍hi̍yo̍ yī uhwa ɔnɛ̄ɛhɛhi nīi Ɔwɔ ē de ma̍ ni̍. O̍ ge̍ re̍ka āchɛ ē de ē lɛ kpakpa ba̍la Ɔwɔ bū la Lihɔ yī Imo̍sīisi nɛ, ɔ̍lɔma̍ o̍ re̍ka Ikra̍yisi pīyaku̍ i̍ngɔ̍ɔ ji ta̍anū.
လက္ရွိေရြးခ်ယ္ထားမွု
ALIGALE̍SIYA 2: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)