ALIGALE̍SIYA 1
1
Owu̍tu
1Ami Ipɔ̍ɔli nīi ɔlɛrɔ̄ nīi Ɔwɔ ɔlɔjā hōhu ma̍ ta̍ īpū nūma̍ tɛ̄rɔ̄ a̍nɛ. Wu̍chē oji̍ nɛ, ohōhu yī u nūma̍ i̍ bū la abwɔ̄hu̍ yī ɔ̄chɛ̄ɛchɛ kɛ̄ɛ gala abɔ̄ yī ɔ̄chɛ̄ɛchɛ ɔlamu ni̍. N de pīya ɔlɛrɔ̄ bū la abɔ̄ yī Iji̍sɔ̄ɔsi Ikra̍yisi ba̍la Ɔwɔ A̍dā ɔlɔjā nīi de ɔ̍ hye̍ēyī la okū ma̍. 2Aɛ̍nɛ̍ yī alɔ wa̍a̍ nīi - Āchɛ yī Ikra̍yisi bāa alɔ ma̍ ngmo̍tu̍chɛ̄ ba̍la ami tɛ̄rɔ̄ ɔma̍kpɔɔ nūma̍ hu ala̍ ogrēeyī yī āchɛ yī Ɔwɔ nīi hɔ̄ la Igale̍siya wa̍a̍ ma̍ a̍nɛ.
3Ɔwɔ nīi - A̍dā yī alɔ ma̍, ba̍la Ādā Iji̍sɔ̄ɔsi Ikra̍yisi ge̍ de ɔpiyɛ ba̍la ogbodɔ̍dɔ̍ de ala̍ wa̍a̍.
4Lɛlā nīi Ikra̍yisi ya̍ hɛ̄ɛbɛ ge̍ē hɛ̍ alɔ ē ta̍ hī yɛchɛ ɔdwɔ̄bi̍ nīi hɔ̄ ma̍ ma̍, Ikra̍yisi de iyī nū nāa de wu̍chē yī lɛlā ɔdwɔ̄bi̍ yī alɔ wa̍a̍. O̍ ya̍ i̍ngɔ̍ɔ gala ɔgɔgu yī lɛlā nīi Ɔwɔ A̍dā yī alɔ chikpo̍ ke̍e̍ ma̍. 5Rīgā ɔnɔ̄kɔ̄kū ge̍ iyī Ɔwɔ i̍ngɔ̍ɔ kpɛɛ ku yɛ̄grāa ɔha̍lɔha̍. O̍ ge̍ lɛ i̍ngɔ̍ɔ.
Wɔ̄kā Ɔlwɔnyɛ lɛ ūkpo̍he kpo̍kpo̍
6O̍ lɛ u lɛbɛ̍bi̍ gba̍a̍ de ala̍! Ɔjā nīi o̍ i̍ lōligbi̍gbo̍ we̍ ni̍ ma̍, ala̍ chī yɛ abɔ̍ɔ ē gwɛ̍ɛnya ē hī Ɔ̄chɛ nīi hu ala̍ ohōhu bū la lɛhi ɔyɔ̍ɔ̄ya̍ yī Ikra̍yisi ma̍ mɛ̍. Ala̍ chōo̍chē yɛ abɔ̍ɔ ē darɔ̄ku lɛlā yī wɔ̄kā ɔlwɔnyɛ ɔha̍ nīi hɔ̄ɔ̄hɔ̄ ke̍e̍ ma̍ bɛ̍ɛ̄nɛ̄ mɛ̍. 7La olēchi̍ lēchi̍ ma̍, wɔ̄kā ɔlwɔnyɛ ɔha̍lɔha̍ i̍ gba̍a hɔ̄ gɛ ni̍. Ɔjā nīi hu̍ nīi n ka i̍ngɔ̍ɔ o̍bū ma̍, āchɛ ɛha̍ nīi gblāa abɔ̍ɔ ē ti̍ya ala̍ ē tū, chikpo̍ ge̍ē de Wɔ̄kā Ɔlwɔnyɛ yī Ikra̍yisi ē hīyabɔ̄ ma̍ nɛ. 8O̍ ge̍ ro̍ōre̍ka alɔ kɛ̄ɛ ayɛ̍ɛ̄chɛ̄rɔ̄ yī Ɔwɔ nīi bū la ichō ma̍ wā ge̍ kā wɔ̄kā ɔlwɔnyɛ ita ɔha̍ nīi hɔ̄ɔ̄hɔ̄ hi̍ onīi alɔ ka de ala̍ ma̍, Ɔwɔ ge̍ hɛ̍ ɔlɔjā ɔpīyaku̍ ga ayekū oli̍gba̍o̍. 9Alɔ ka i̍ngɔ̍ɔ de ala̍ je̍ mɛ̍; n chī ge̍ē gba̍a ē ka i̍ngɔ̍ɔ ē de ala̍ u̍ma̍ama: Ɔ̄chɛ ɔha̍ ge̍ kā wɔ̄kā ɔlwɔnyɛ ita ɔha̍ nīi hɔ̄ɔ̄hɔ̄ hi̍ onīi alɔ ka de ala̍ ma̍, Ɔwɔ ge̍ hɛ̍ ɔlɔjā ɔpīyaku̍ ga ayekū oli̍gba̍o̍!
10Lɛlā nūma̍ lɛ ala̍ bɔ̄ɔjā nīi n yɛ ē ya̍ nīi āchɛ ge̍ē klɛhi yī u ma̍? Īchāha̍ īchāha̍! Ɔwɔ nīi n chikpo̍ nīi o̍ ge̍ē klɛhi yī u a̍nɛ. Kɛ̄ɛ ohu oro̍ōre̍ nīi n yɛ ē gāla̍ la abɔ̄ yī āchɛ a̍nɛ? O̍ ge̍ i̍ngɔ̍ɔ nīi yɛ ē chikpo̍ a̍nɛ, ɔna̍ - ɔgba̍a hɔ̍chɛ̍ yī Ikra̍yisi ma̍?
Lɔkɔ nīi Ipɔ̍ɔli de pīya ɔlɛrɔ̄ yī Iji̍sɔ̄ɔsi ma̍
11N ā koko̍o de ala̍ gɛ ko̍ō, aɛ̍nɛ̍ yī u! Wɔ̄kā Ɔlwɔnyɛ nīi n ē ka ē de ala̍ ma̍, i̍ ɔ̄chɛ̄ɛchɛ ya̍ ɔ̄ a̍ni̍. 12N i̍ nāa bū la abɔ̄ yī ɔ̄chɛ̄ɛchɛ ɔha̍lɔha̍ ni̍; i̍ ɔ̄chɛ ɔha̍ chī ngū u wɔ̄kā ɔla̍ā ongōngū a̍ni̍. Ādā Iji̍sɔ̄ɔsi Ikra̍yisi ɔlɔjā de wɔ̄kā ɔla̍ā hi̍yɛchɛ de u ke̍e̍ a̍nɛ.
13Je̍ka aa̍ ala̍ po̍ lɔkɔ nīi ɔhɔ̄leyī yī u lɛ i̍chɔ̍lɔ yɛ̄grāa nīi n de iyī u kwɔbɔ̄ de ɔgu lɛlā yī Ɔwɔ ɔyɔ̍ɔ̄ya̍ lɔkɔ nīi Iju̍u ē ya̍ ma̍! Ogrēeyī yī āchɛ yī Ɔwɔ, n ē ya̍ wā ichi̍ dwɔ̄bi̍ dwɔ̄bi̍, chɛ̄rī kpɛ̍ɛ hīka n ge̍ē de ogrēeyī ɔla̍ā chāajɛ. 14Lɛlā ɔyɔ̍ɔ̄ya̍ lɔkɔ nīi ɔ̄chɛ yī Iju̍u ē ya̍ ɔgulɛ̄lā yī Ɔwɔ ma̍, ami re̍ka ɔba̍ka yī lɛlā ɔla̍ā ɔyɔ̍ɔ̄ya̍ wa̍a̍ hɛ̍ āchɛ yī Iju̍u nīi - ikoni̍ yī u ma̍ a̍nɛ. Ami ē kwɔgu yī lɛlā ɔchɔ̍ɔwɔ yī alɔ nīi bū la a̍dɔ̄kū yī alɔ ma̍ la ɔyɔ̍ɔ̄ya̍ gɔ̄ga yɛ̄grāa ɔla̍ā a̍nɛ.
15Bū la lɛhi ɔyɔ̍ɔ̄ya̍ yī Ɔwɔ, Ɔwɔ de u hōhu o̍bo̍o̍bū nīi e̍ ma̍ u a̍nɛ. O̍ de abɔ̄ ku u ka amɔ̍lɔ ge̍ē hɔ̍chɛ̍ yī anu̍. Yɛ̄grāa nīi o̍ miya la abɔ̄ yī nū 16ka anɔ̍lɔ ge̍ē de Ɔyi̍ yī anu̍ ē hi̍yɛchɛ ē de amɔ̍lɔ; amɔ̍lɔ ge̍ē bī Wɔ̄kā Ɔlwɔnyɛ yī ɔ̍lɔ ge̍ē ka de Ɛchɛkɔcha ma̍, n i̍ ga ɛbɛ yī ɔ̄chɔ̄chɛ ge̍ ngū lɛlā o̍bū ni̍. 17N i̍ ga Ijɛru̍sālɛm la ɛbɛ yī āchɛ nīi - alɛrɔ̄ yī Iji̍sɔ̄ɔsi nīi o̍ hu yɔbū de u ma̍ o̍bo̍o̍bū ni̍. Ɔkɔkɔ ɔla̍ā, n wā ge̍ pīya ga ajɛ yī Are̍biya, o̍bū chōo̍chē cha ga Idama̍si̍kɔsi. 18O̍ gbajɛ lɛ̍yi̍ ɛta̍ o̍bū nīi n wā ge̍ ga Ijɛru̍sālɛm ge̍ po̍ wɔ̄kā ɔha̍ la abɔ̄ yī Ipi̍ta a̍nɛ. Obri̍īhī ɛpa nīi jī hɔ̄ abɔ̍ɔ ba̍la anu̍ ma̍. 19N i̍ gba̍a ma̍ ɔlɛrɔ̄ yī Ikra̍yisi ɔha̍lɔha̍ gɛ ni̍, ɔ̍chi̍kpa̍kpa̍ Ije̍mēehi nīi - ɔɔ̍nɛ̍ yī Ādā Iji̍sɔ̄ɔsi ɔlɔjā ma̍.
20Lɛlā nīi n yɛ ma̍ ē ta̍ ē tū la īpū ma̍ - lɛlā lēchi̍ nɛ. N i̍ yɛ ē warīmɛ̄ ni̍; Ɔwɔ jo̍ōkū i̍ngɔ̍ɔ.
21La okwi̍ihi yī ɔla̍ā, n wā ge̍ pīya yī ɛbɛ yɛ̄mɛ̄mɛ̄ abɔ̍ɔ la ajɛ yī Isi̍riya ba̍la Isili̍siya. 22Yɛ̄grāa ɔla̍ā, Āchɛ yī Ikra̍yisi nīi hɔ̄ la ogrēeyī yī āchɛ yī Ɔwɔ abɔ̍ɔ la ajɛ yī Ijudi̍ya wa̍a̍ ma̍ i̍ je̍ u la eyī je̍ ni̍. 23Lɛlā yī u nīi āchɛ ē bī ka ke̍e̍ ma̍ nīi e̍ je̍ a̍nɛ; Ɔngrɔ̄ɔ ɔla̍ā nīi - ɔ̍lɔ ē ya̍ aa̍ ichi̍ dwɔ̄bi̍ dwɔ̄bi̍ ma̍, ɔ̍lɔ chōo̍chē yɛ abɔ̍ɔ ē kā wɔ̄kā yī ɔpɔ̄pū yī lɛlā yī Ɔwɔ nīi ɔ̍lɔ yɛ ē chikpo̍ ge̍ de ɔ̍lɔ chāajɛ o̍bū ma̍ ko̍ō! 24Bū la ɛbɛ ɔla̍ā, aa̍ wa̍a̍ ē kā Ɔwɔ ɔkɔ̄kā wu̍chē yī u.
လက္ရွိေရြးခ်ယ္ထားမွု
ALIGALE̍SIYA 1: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)