ALƐ̍FƐ̄SUSI 5
5
Ɔhɔ̄leyī yī ɛbɛ ɔlɛgēdēgēdē
1Lɔkɔ nīi ala̍ - ayi̍ yī Ɔwɔ nīi hi ɔ̍ ɔtū gba̍a̍ nɛ ma̍, ala̍ ā lɛ bāa anu̍ ɔlɔjā ma̍ gɛ. 2Ɔhɔtū ge̍ bī wɔhu̍ yī ɔhɔ̄leyī yī ala̍ wa̍a̍. I̍ngɔ̍ɔ nīi Ikra̍yisi ɔlɔjā yɔ̍ɔhɔtū yī alɔ, de ɔhɔ̄leyī yī nū nāa de wu̍chē yī alɔ a̍nɛ. O̍ de iyī nū nāa de bāa ɔpɔ̄pā ba̍la ɔjā odōde nīi ē ni̍pī kwɛ̍kwɛ̍ hi Ɔwɔ ɔtū ma̍.
3Lɔkɔ nīi ala̍ - ayi̍ yī Ɔwɔ nɛ ma̍, o̍ i̍ ngma̍ nīi lɛlɛ̄lā ya̍chi ɔyɔ̍ɔ̄ya̍, kɛ̄ɛ lɛlā i̍ya̍ kpakpa ni̍, kɛ̄ɛ ānyānyi ɔha̍lɔha̍ ē tū la olo̍ōlo̍ yī ala̍ ni̍. 4O̍ i̍ ngma̍ nīi lɛlā ya̍chi ɔkɔ̄ka, kɛ̄ɛ i̍bobo ɔkɔ̄ka, kɛ̄ɛ a̍kpla yī lɛlā ɔkɔ̄ka ɔha̍lɔha̍ ge̍ e̍e bū la oko̍o yī ala̍ ni̍. Ɔkɔkɔ ɔla̍ā, ala̍ ā bla ɔ̍nyīnū nīi ala̍ ge̍ da Ɔwɔ o̍be. 5Ala̍ ma̍ gɛ ko̍ō! Ɔlya̍chi yī lɛlā ɔyɔ̍ɔ̄ya̍, kɛ̄ɛ ɔ̄chɛ i̍yɛ̍ɛ̄lā kpakpa ni̍, kɛ̄ɛ ɔlānyānyi, ɔ̄chɔ̄chɛ i̍ ge̍ē nāa ɔpiyɛ ɔha̍lɔha̍ la Ɔchwɔ̄lɛ̍ Oro̍ōre̍ yī Ikra̍yisi ba̍la Ɔwɔ ni̍. Wu̍chē oji̍ nɛ, ānyānyi ɔyɔ̍ɔ̄ya̍ lɛ bāa otūlichō ɔyɔ̍ɔ̄ya̍ de ɛchi̍yɛka ma̍.
6Ala̍ e̍e chɛ̄ nīi ɔ̄chɔ̄chɛ ge̍ bī i̍bobo yī lɛlā yī wā ɛla̍ā gla̍ ala̍ ni̍. Wu̍chē yī ɛjā ɛla̍ā wa̍a̍ nīi Ɔwɔ ge̍ē de ichi̍ ɔdwɔ̄bi̍ ɔdwɔnyɛ ē de āchɛ nīi i̍ pɔ̍ɔkɔ yī nū ni̍ ma̍ a̍nɛ. 7Wu̍chē yī ɔla̍ā, ala̍ e̍e tābɔ̄ yī lɛlɛ̄lā ba̍la āchɛ eli̍ngɔ̍ɔ ni̍. 8Ala̍ ɛlɛjā - āchɛ ɔgblāa la ɛbɛ odobū o̍bū nɛ. Ala̍ chī de pīya āchɛ yī Ādā mɛ̍ ma̍, ɛbɛ ɔlɛgēdēgēdē nīi ala̍ tū bɛ̍ɛ̄nɛ̄ a̍nɛ. Wu̍chē yī ɔla̍ā, ɔhɔ̄leyī yī āchɛ ɔgblāa la ɛbɛ ɔlɛgēdēgēdē nīi ala̍ ge̍ē hɔ̄ a̍nɛ. 9Ɛbɛ ɔlɛgēdēgēdē nūma̍ ē bī lɛlā ɔnɛ̄ɛhɛhi ba̍la ode lɛ kpakpa la eyī yī Ɔwɔ ba̍la olēchi̍ lēchi̍ yī lɛlā wā mwɛbɛ mwɛbɛ a̍nɛ. 10Ala̍ ā chɛ̄rī lɛbɛ nīi ala̍ ge̍ ngū lɛlā nīi hi Ādā ɔlɔjā ɔtū ma̍. 11Ala̍ e̍e tābɔ̄ ya̍ a̍kpla yī lɛlā ɛla̍ā nīi āchɛ ē ya̍ ma̍ ni̍. Ɛla̍ā - lɛlā yī ɛbɛ odobū nɛ. Ɔkɔkɔ ɔla̍ā, ala̍ ā bī wā ngmɛ̍ɛchɛ wā la ɛbɛ ɔlɛgēdēgēdē. 12Lɛlā ɛla̍ā nīi e̍ ē ya̍ lɛ̍bɛ̍ba ma̍ chī u̍tu liwēyī liwēyī la ɔkɔ̄ka la oko̍o o̍bo̍bū. 13Yɛ̄grāa nīi e̍ ge̍ de ɛjā ɛla̍ā wa̍a̍ bī wā la ogēdēgēdē mɛ̍ o̍bū nīi ɔkɔ nīi e̍ lɛ ke̍e̍ lēchi̍ lēchi̍ ma̍ ge̍ē hi̍yɛchɛ tɛri̍tɛri̍ a̍nɛ. 14Ɔjāha̍ ɔjāha̍ nīi ge̍ hi̍yɛchɛ tɛri̍tɛri̍ mɛ̍, o̍ ē de lɛ gēdēgēdē bɛ̍ɛ̄nɛ̄. Ɔla̍ā - ohu̍ nīi e̍ ka hīka,
“Ɔgbwɔlā be̍e, hye̍ēyī gɛ!
Hye̍ēyī la okū gɛ!
Ma̍a Ikra̍yisi ge̍ē fi̍yajɛ ē kla̍ awɔ,” a̍nɛ.
15Wu̍chē yī ɔla̍ā, ala̍ ā de eyī kōkū la ɔhɔ̄leyī nīi ala̍ ge̍ē hɔ̄ ma̍. Ala̍ e̍e hɔ̄ bāa āchɛ i̍je̍ ɔjɔ̄jā ni̍ ma̍ ni̍. Ala̍ ā hɔ̄ bāa āchɛ ɔjyɛ̍ɛ̄lā ka̍ka̍ ma̍. 16Yɛ̄grāa ɔha̍lɔha̍ nīi ala̍ ge̍ lɛ ma̍, ala̍ ā bī ɔ̄ ya̍ yɛ̍yɛ̍. Wu̍chē oji̍ nɛ, ɔ̄chī ɔdwɔ̄bi̍ hɔ̄ ma̍ a̍nɛ. 17Ala̍ e̍e de ya̍ i̍bobo ni̍ gɛ. Ala̍ ā chɛ̄rī nīi ala̍ ge̍ kwɔgu yī lɛlā nīi Ādā chikpo̍ nīi ala̍ ge̍ē ya̍ ma̍.
18Ala̍ e̍e gwa̍ ɛ̍mwɔ̄ de wɔ̄wīyā ni̍. Ɔla̍ā ge̍ē bīya ala̍ ibi̍īyē. Ɔkɔkɔ ɔla̍ā, Uhu yī Ɔwɔ ge̍ mu ala̍ iyē. 19Ejē obī kā Ɔwɔ ɔkɔ̄kā ba̍la ejē obī to̍gbo̍ de Ɔwɔ ba̍la ejē ɔha̍lɔha̍ ji nīi e̍ de kwɔbɔ̄ de Ɔwɔ ma̍, ala̍ ā bī kɛlā ba̍la ɔ̍nyīnū. Ala̍ ā gwe̍ejē to̍gbo̍ de Ādā, gwe̍ejē kā ɔ̄ ɔkɔ̄kā. Ala̍ ā kā ɔ̄ ɔkɔ̄kā la ūkpɔ̄tū wa̍a̍. 20Ala̍ ā da Ɔwɔ nīi - A̍dā ma̍ o̍be yī ɛjā wa̍a̍ bū riyī yī Ādādā yī alɔ Iji̍sɔ̄ɔsi Ikra̍yisi.
Lɛlā yī ɔngrɔ̄ɔ ɔwɔ̍ɔ̄nyā ba̍la ɔnyā ɔblɛ̍ba̍
21Ala̍ ā tu̍labɔ̄ hī iyī ala̍ tū ɔ̍nyīnū la abɔ̄, wu̍chē yī otūlichō yī ala̍ de Ikra̍yisi.
22Anyā ɛblɛ̍ba̍, ala̍ ā tu̍labɔ̄ hī iyī ala̍ tū ɔbu̍ ala̍ la abɔ̄ bɔ̄ɔjā nīi Ikra̍yisi nīi ala̍ ya̍ i̍ngɔ̍ɔ de ɔ̍ a̍nɛ ma̍. 23Wu̍chē oji̍ nɛ, ɔngrɔ̄ɔ nīi wu̍ ɔnyā ma̍ - ɔ̄chɛ odeyīrɛ ɔnyā yī nū a̍nɛ. Ɔla̍ā gala ɔgɔgu lɔkɔ nīi Ikra̍yisi ɔlɔjā titi re̍ka ɔ̄chɛ odeyīrɛ ogrēeyī yī āchɛ yī nū ma̍. Ikra̍yisi ɔlɔjā chī - Ɔhɔ̍ɔnyɛta̍ yī ogrēeyī yī āchɛ yī nū nīi - ibi̍īyē yī anu̍ ɔlɔjā ma̍ a̍nɛ. 24Bū la ɛbɛ ɔla̍ā, anyā ɛblɛ̍ba̍ titi ge̍ tu̍labɔ̄ hī iyī wā tū ɔbu̍wā la abɔ̄ gala ɔgɔgu lɔkɔ nīi ogrēeyī yī āchɛ yī Ɔwɔ de iyī nū tū Ikra̍yisi la abɔ̄ ma̍.
25Angrɔ̄ɔ ɛwa̍ānyā titi ge̍ yɔ̍ɔhɔtū yī anyā yī wā lɔkɔ nīi Ikra̍yisi ya̍ ma̍. Ikra̍yisi yɔ̍ɔhɔtū yī ogrēeyī yī āchɛ yī nū de ɔhɔ̄leyī yī nū nāa de wu̍chē yī nū. 26Ikra̍yisi ya̍ i̍ngɔ̍ɔ hɛ̄ɛbɛ ge̍ē de ogrēeyī yī āchɛ yī Ɔwɔ ē kwɔbɔ̄ lā cha̍ri̍cha̍ri̍ ē de Ɔwɔ bū la lɛlā ɔkɔ̄ka yī anu̍ ɔlɔjā ba̍la yenyi. 27Ikra̍yisi ya̍ lɛbɛ nīi ogrēeyī yī āchɛ yī nū nūma̍ ge̍ē ngma̍ a̍cha̍ānyā la ɔgɔ̄grāa. O̍ ya̍ nīi o̍ ge̍ē lɛ cha̍ri̍cha̍ri̍ i̍ tū ābī ni̍, yɛ̄grāa nīi o̍ ge̍ē bī ɔ̄ wā la iyɔ̄bū yī anu̍ ɔlɔjā ma̍. O̍ i̍ ge̍ē chukpru kɛ̄ɛ ē gunyi la ɛbɛbɛ ni̍. I̍hwɔhi gɔ̄grāa ni̍ ɔha̍lɔha̍ i̍ ge̍ē hɔ̄ la anu̍ ni̍. 28Bū la ɛbɛ ɔla̍ā, o̍ ngma̍ nīi angrɔ̄ɔ ē yɔ̍ɔhɔtū yī anyā yī wā lɔkɔ nīi e̍ ē yɔ̍ɔhɔtū yī aa̍ ɛlɛjā ma̍. Ɔngrɔ̄ɔ nīi ɔnyā yī nū ge̍ hi ɔ̍ ɔtū, o̍ re̍ka ibi̍īyē yī ɔlɔjā hi ɔlɔjā ɔtū. 29Ibi̍īyē yī ɔ̄chɛ ɔlɔjā hāa ē ta̍ ɔlɔjā anyī? Ɔ̄chɛmɔ̄chɛ ē deyīrɛ ibi̍īyē yī nū bī ɔ̄ la ojōre̍ gala ɔgɔgu lɔkɔ nīi Ikra̍yisi ē ya̍ de ogrēeyī yī āchɛ yī Ɔwɔ ma̍. 30Alɔ nūma̍ chī tū la ibi̍īyē yī nū ɔ̍lɔma̍ nīi - ogrēeyī yī āchɛ yī Ɔwɔ ma̍ a̍nɛ. 31Īpū yī Ɔwɔ ka ɔ̍lɔ ge̍,
“Ɔla̍ā - ohu̍ nīi ɔngrɔ̄ɔ ē pīya ē hī a̍dā ba̍la ɛ̍nɛ̍
ge̍ē hɔ̄ ngmo̍tu̍chɛ̄ ba̍la
ɔnyā yī nū nīi aa̍
āchɛ ɛpa ē de ē pīya āchɛ ūkpo̍he a̍nɛ.”
32Lɛlā olēchi̍ lēchi̍ ɔnɔ̄kɔ̄kū hi̍yɛchɛ amu lipu̍ yī lɛlā yī Īpū yī Ɔwɔ nūma̍. Lɔkɔ nīi ami po̍ ochi̍chi̍ yī nū ma̍, Ikra̍yisi ba̍la ogrēeyī yī āchɛ yī Ɔwɔ nīi o̍ ka kwichi̍ la aa̍ a̍nɛ. 33O̍ chī kwichi̍ la iyī ala̍ i̍ngi̍ngɔ̍ɔ: Ɔngrɔ̄ɔ ɔwɔ̍ɔ̄nyā ge̍ yɔ̍ɔhɔtū yī ɔnyā bāa anu̍ ɔlɔjā ma̍, anyā titi ge̍ tū ɔbu̍wā lichō.
လက္ရွိေရြးခ်ယ္ထားမွု
ALƐ̍FƐ̄SUSI 5: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)