Zacarías 12
12
Diozen wlleyie'e be'nn kaꞌ llwiere Jerusalén'na
1Xanllon bene'e nada' di'll ni, ke be'nn Israel ka'. Xanllon ba bchirj yeban, na brekwe rane yell-li'on, na ba be yel nban ke be'nn nachen, ne: 2Nada' guna ke Jerusalén'na gaken to xbin zu ke uva, da wsulle yeololte latj yell-liw wrill kaꞌ. Keten yell ki wlan ake' Jerusalén'na, rente yell kaꞌ gan nbane Judán llajtilren ake'. 3Keten llin lla'na, yoyte latj yell-liw kaꞌ gak aken tuze llajlleyi ake' Jerusalén'na. Na nada' guna nench'na Jerusalén'na gaken kaꞌ to yaj xhen, ke yeololte latj yell-liw ka', na yoyte be'nn yenlizre wlisen na wchochjen le'e. 4Ke lla'na, ne Xanllon, wcheba yeololte kabay kaꞌ, na guna ke be'nn kaꞌ llbia le akban bi su lo yichj ake' wen. Na gapa xhi'nn xhasoa Judán, na wkuana lchul yeololte kabay ka' sjalla latj yell-li'on. 5Keten be'nn braw ka' zeren yell Judán re' akre dani, ne' ake' lo raxhdao aken: Xanllon nap doxhente yelwaken, nake Dios ke be'nn kaꞌ lla Jerusalén'na, na le'en llgultipe le ake'.
6Ka lla'na guna nench'na be'nn kaꞌ ze raw yell Judán, gak ake' ka yi' da llzey lix ga de yix yech, na konen yi' na wzeya yeololte latj yell-liw wrill kaꞌ, na be'nn Jerusalén kaꞌ walla ake' yell xhen ke aken da yubre. 7Xanllon ne, nada', wazra zatk be'nn Judá kaꞌ, nench'na xhi'nn xhasoa Daviden ren be'nn Jerusalén kaꞌ, bi ne' ake', zak aklle kerke be'nn Judá kaꞌ. 8Nada', Xanle, wkoeja be'nn kaꞌ lla Jerusalén'na. Na be'nn kaꞌ natzi radj aken, gak ake' be'nn war kwis kan guk be'nn wnebian gulle David, na xhi'nn xhasoa Daviden gak ake' kaꞌ ankl ke Xanllo, kwiarawe'e raw aken na kwe'e le ake' nez. 9Ke lla'na wlleyia nuteze be'nn zak latj yell-liw yubre, cha ba zak ake' yedtilren ake' Jerusalén'na. 10Waslla yichj raxhdao xhi'nn xhasoa Daviden rente be'nn kaꞌ sjalla Jerusalén'na, espíritu da nsa dawen, na espíritu da weren ake' Diozen diꞌlle. Na re akre be'nnen god ake' lansen, na gak akre, na kwell ake', ka' llun ake' ket llat xhi'nn ake' tich. 11Ka lla'na, yel llake ke be'nn Jerusalén kaꞌ, gaken daxhen kwis, kan llun be'nn kaꞌ nxenlall loe lsaken llak akre Hadad Rimón rachen nzi Meguido. 12Yeololte be'nn ka' sjalla latj yell-li'on cha ake' koell ake', xhi'nn xhasoa Daviden, rente nor ke ake' ka', xhi'nn xhasoa Natán'na, na rente nor ke ake' ka', 13na xhi'nn xhasoa Levín, na rente nor ke ake' ka', na xhi'nn xhasoa Simí, na rente nor ke ake' ka', 14na yeololte be'nn kaꞌ yela, cha ake' ke-ke ake' kwell ake', na rente nor ke ake' ka'.
လက္ရွိေရြးခ်ယ္ထားမွု
Zacarías 12: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ