Malaquías 3
3
1Le Xanllon nap doxhente yelwaken ne: Wsela anklen chixjoe xtillan nench'na gune xnid xnezan. Le Xanllon llayirjren, ba zu nez choe'e lo yodao ke'en. Ba za anklen ne'ze xtilla dan ba nchajllan, anklen zerallren.
2Na ¿Noxha akrize llajse rawe'en keten yeden? ¿Noxhakse gak wtil le'e lla? Le keten ze'en nake kakse yi', nench'na wayune'e lliw xhirall, le nake ke to yextir, na wake'e bziw kello kaꞌ. 3Le Xanllon wayune'e xhirall bxus ka', xhi'nn xhasoa Levín, kaꞌ to be'nn llayone yall yan nzi plat, na ya cha'on nzi oro lo yi' barj. Wayollna gak wadoa ake' dan llen akre gu'n ake' nada'. Na gu'n aken ke llayal gaken. 4Na kena yewere Xanllon sie'e da kaꞌ lljeraw Judán rente Jerusalén'na, kan benkse bawere batna.
5Xanllon nap doxhente yelwaken ne: Nada' yeda wadyiena yel korchis ke ren. Na setia watila di'll kan llun be'nn kaꞌ llun yel wallan, na be'nn kaꞌ nzoa xtu ake', na be'nn ka' llacheb di'll wxhiye, na be'nn kaꞌ llsakzi be'nn wen llin ke ake', na nor wazeb ake', na be'nn kaꞌ bill zu xa xna, na be'nn kaꞌ llsakzi be'nn zit ake', na be'nn kaꞌ bi llap nada' barane'.
6Nada' naka Xanle. Bine' wacha. Kelen'na re', xhi'nn xhasoa Jacob bine' kweyire. 7Re' ba babiyre raw xtillan, kan ben xustaw re' ka', na bi ne' yenere wzenayren. Nada', Xanle napa doxhente yelwaken, llzenla re': Le wada konen nada', na nada' wazerena re', axha re' nere: ¿Bixhchen wadzurensto rwe'? 8Na nada' llnaba: ¿Wakrize kwan be'nn nachen Diozen? Axha re' ba branle nada'. Na llayaxjere llnabere nada' nere: ¿Bixhan ba branto rwe'? Dan llbajre to raw chi kwen'na, na dan llgore lmoxh len'na ba branle nada'. 9Yeololte re' lla latj yell-li'on gan nbaneren llbanle nada', kelen'na guna re' de'e. Nada', Xanle napa doxhente yelwaken, llzenla re': 10Le dadoa dan llbejre to raw chi kwen'na lo yoda'on, na kaꞌ gat yelwao lo yo' kian. Na le wiachk, cha bi wsarja reij be ke yeban, nench'na guna' re' yel wnia xhen ke yel nak lay kian. 11Bi wia latj ke no ba ria ka' wlleyi akba dan warapren, na ren yay uvas keren. 12Yeololte be'nn sjalla latj yell-liw yubre, ne' ake' nbaraz ke re', le re' gat to latj yell-liw da nak nbaraz ke re'. Nada', Xanle napa doxhente yelwaken ba bnia kaꞌ.
Diozen llayachralle yell ke'en
13Xanllon ne: Re' ba bnere di'll zban kia. Na llayollna llnabre: ¿Bixha di'll zban'na ba bneto' ko'o rwe'? 14Kin ba bnere: Bibi zaken na gunllo xchin Diozen. ¿Kaꞌ bixha lliarall-llon gunllo kan ne'en, na suyachrizllo raw Xanllon nap doxhente yelwaken? 15Kwinto ba brereto ka nbarazen zajzu be'nn yarall kaꞌ, na be'nn wednay ka' yoyte bi dan llun aken dllojen wen, na llunle akre Diozen, na bikse llsakzie'e le ake'.
16Na be'nn kaꞌ llunxhen Diozen, beren loellj ake' di'll, na Xanllon bzenay yane'e ke diꞌllen llwe aken. Na zekse kwin Xanllon kan byoj le yichen, na konen kaꞌ llajdinlalle be'nn kaꞌ llap le baranen.
17Le Xanllon nap doxhente yelwaken ne: Ba lluna xnid to lla keten wayak ake' be'nn yell kia. Ka llun to be'nn nak xa, llayachralle xhi'nne bi llzenay ke'e, kaꞌ gunksa nada' wayachralla le ake'. 18Na kena wazake re' dayubre noxhan nak be'nn wen, na be'nnen bi llun wen, na be'nnen lloeraw Dios, na be'nnen bi lloeraw le'e.
လက္ရွိေရြးခ်ယ္ထားမွု
Malaquías 3: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ