Isaías 51
51
Di'll xhenlall ke Jerusalén'na
1Lewzenay yoyte re' llenle sure gunle dalixhaj,
na llayirjre nada', nee Xanllon.
Lewia yajen gan bzoy ake' ren,
yajen nzi kanter gan braj ake' ren,
2lewia Abraham'na, Xa' ren,
na Sara, be'nnen ben yelnban keren.
Kan balwilla le'e, tuzen nak,
axha benlaye, na bia le'e be'nn zan xhi'nn xhasoe.
3Nada' gaka be'nn wen konen Sión'na,
yell xhen dan nyinjen.
Wayuna latj yech ke latj dach yu billen ga wayaken nbaraz,
kan nak latj gan sjalla yaj na yay xhixh dan bzue Edén'na danellte.
Gana' gat yel nbaraz, na yel llawe,
gul ake' da werao ake' kone ya wakoell.
4Yell ake', le wzenay,
le wzenay kia latj yell-liw ake':
nada' chixjoera dan wroe wsedan,
na xtilla ka' wsenin yell xhen ka'.
5Gawze ba za yel korchis kian,
yel wasra kian bayun nez,
konen yelwak kian wnebia yell ka'.
Latj yell-liw ka' lla' llwa nista'on kwexh aken nada',
na wxenlall aken yelwak kian.
6Le wlis rao ren le yeban,
na lewia llelre, raw yell-li'on:
yeban waranen ka' llen,
na yell-li'on yeywen ka to rall,
na be'nn ka' lla' gana' kweyi ake' ka bia dao ake'.
Axha yel wasra kian gaken ke chnare,
na yel korchis kian sibian ke chnare.
7Lewzenay kia, re' nezere dan nak dalixhajen,
yell da llun bare dan llroe llsedran.
Bi llebre dan lltitje be'nn ka' re',
bi were latj wzoayiachen re' dan lladyi ake' ren,
8Le kweyi ake' ke to rall da ba bteba,
ke to yich xha xhir da ba bdaw beldao ka'.
Axha yel korchis kian naken ke chnare
na yel wasra kian sibian ke chnare.
9Baban, baban xhichj Xanllo,
bayundiprall,
baban kan beno batna,
kan batnate.
Rwen bxhoxjtino Rahaben, bayix snian zu lo nista'on,
10bachecho nista'on,
nis dan yull zitjen,
na bayuno kllete nista'on to tnez
nench'na bde be'nn ka' basra'on.
11Kakse wayed be'nn ka' basra Xanllon,
na cho ake' gusia ake' yewe akre gan zu Sión'na,
llwarao aken du tiemp sun nbaraz,
wallel akre dan llzoa nbarazen, na yel llawe,
na dan lleyllra aken, na dan bell ake' waranen.
12Nadaksa llundipralla rwe'.
¿Nuxha llebo cha? ¿Be'nn nach kan?
¿Le be'nn nach kan llde ke ake', le sjanak ake' yix da le llarante?
13¿Galallo Xanllo, be'nnen ben rwen,
na bchirje yeban na brekw'lle'e yell-li'on cha?
¿Xizo kwen kwenze, na biteze hor,
nike yel llruk ke be'nn ka' llsakzi rwen,
na baze ake' xnid wlleyi ake' rwe' cha?
Axha ¿gare ze yel llruken cha?
14Be'nnen llalleyra'on,
yechullze le wasra akte le'e,
bi gate lo yell broj ke rill yan
na bi gake win pan.
15Nadan naka Xano, Dios ko'o,
ran naken Xano nap doxhente yelwak,
nadan bta nista'on
na bias nisen,
16bchirja yeban
na brekwlla yell-li'on.
Nada' bzoa xtillan llwa'on,
na bdapa rwe' kone takan.
Nada' gulla Sión'na: Rwen nako yell kia.
17Baban, baban
Jerusalén, bias.
Rwe' bxhakziw raw yel llaklla ke Xanllon
keto be'nn llaje to kop,
na llaje doxhenten,
xte llzulltere.
18Raw yoyte xhi'nno ka' ba bzu ko'on,
ni tichbe bi llgo rwe' nez,
raw yoyte xhi'nno ka' ba basllion,
ni tichbe bi nox rwe' kone takbe.
19Chop dakenxhie ki ba guk ko'o:
latj yell-liw ko'on blleyin, na btach'blan aken,
na be'nn ko'o ka' gut ake' nike dan bdun aken, na dan guk wdilen.
¿Nuxha wayachrall rwe'?
¿Nuxha wayunxhen rwe'?
20Ka' to bllin yix ba bdol lo tramp,
xhi'nno ka' bill ndiprall akbe,
na ba nit'tinj akbe skin ke tnez ka',
sjanak akbe we nike yel llruk ke Xanllon,
nike dan llago Dios ko'on rwe' nez.
21Kelen'na, yell xhen da zuyach, bzenay dani,
rwe' zullro, axha kere konen zu ke uva,
22Xano, na Dios ko'on,
le'en llakrene yell ke'en, na nee:
Waka lo takon
kop dan ba bsulle rwen,
bill yajllo kop ke yel llruk kian.
23Nada' wian
be'nn ka' bsakzi rwen,
be'nn ka' lle rwe':
Got raw yun, le teto wrajchekwto rwe',
na rwe' goto raw yun
nench'na brajchekw ake' rwe' ka bichte.
လက္ရွိေရြးခ်ယ္ထားမွု
Isaías 51: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ