VARUMI 6
6
1Kunangwa, kovoole ki? Kuzizagiliri komenya muvwoni kunangwa zimbavasi zia Nyasaye ziduuki komedeka? 2Awa! Sigaveeye ndio mba! Kunyi koveeye vavoholore kutura ku vwoni, kunyala kuzizagilira ndi komenya muvwoni? 3Si mumanyi ndi kunyi vosi kwabatizwa kuduuki kuva kindu kilala na Kristo Yeso, lwakubatizwa kukuzaa harara naye. 4Ku libatizwa lietu, kwayavilwa harara naye kandi nikusanga mu likuza lilie, kuli Kristo yasimugukizwa kutura mu vakuzu mu vukumi vwi zinguru zia Baba, kunyi kandi kuduuki komenya mu livamwoyo lihia.
5Niiva kwayung'anywa harara naye mu likuza lilie kuli yakuza, kandi ndio munzira ndala nzere, kulung'anywa harara mu lisimugukizwa kutura mu vakuzu kuli oyo yasimugukizwa. 6Kumanyi ndi mundu wiitu wa kale yitirwa ku musalaba harara na Kristo, kunangwa zinguru zie liiva lietu liu vwoni liduuki kwononywa, kunangwa kunyi kuvuli kuva kandi avatugwa vu vwoni. 7Lwu mundu akuzaa, avohololwa kutura kuzinguru ziu vwoni. 8Niiva kwamala kukuza harara na Kristo, kusuuvira ndi kulava mwoyo harara naye kandi. 9Kunyi kumanyi ndi, Kristo yamalakusimugukizwa kutura mu likuza; na sialakuza kandi mba. Likuza si lilamwamiiha kandi mba. 10Ku lwa yago, kigira yakuza, uvwoni sivoveeye ni zinguru kuye mba; kandi kalunu amenyi limenya liu kuyaanziza Nyasaye. 11Kunangwa munzira ndala nzere, gamudukira mwiganagane munyi aveene kuli vakuzu ku vwoni, navuzwa munye muduuki kuyaanziza Nyasaye mu Kristo Yeso.
12Ku lwa yago, mutaleki vwoni vwamihi mu miviri jinyu jikuzaa, kumulomba muduuki kuvugilira likayirwa liajo. 13Anoho mutaleki kali kevero kilala chi miviri jinyu kuva kiju cho kokora vudamanu nuvwoni mba. Navuzwa mwihaane ku Nyasaye kuli vandu vasimugukizwa kutura mu vakuzu, muhaane vivero vienyu viosi ku Nyasaye ku kivuni chuvulungi. 14Mutaleki vwoni vumwamiihi kandi mba, kigira si muveeye mu Lilaga, navuzwa muveeye mu zimbavasi zia Nyasaye.
Avatugwa vu vulungi
15Kunangwa kovoole ki? Kokole uvwoni kigira si koveeye mu Lilaga, navuzwa mu zimbavasi zia Nyasaye? Sigaveeye ndio mba!
16Si mumanyi ndi lwa mwitulizaa aveene kuli vatugwa kuhulira mundu wundi, munyi muveeye ligali avatugwa vu munene wa muhulira oyo-munyala kuva avatugwa vu vwoni, navwo voleetaa likuza, anoho munyala kuva avatugwa vi lihulira ilimwimiliraa muduuki kokolwa avalungi imbiri wa Nyasaye.
17Navuzwa lisandiza liveeye ku Nyasaye! Kigira ku ing'inga ndala mwaali avatugwa vu vwoni, navuzwa kalunu mumali kutia ni mioyo jinyu josi agiligali ganyoolekaa mu amigizu maduukiru ga mwanyoola. 18Mwavoholorwa kutura muvwoni, ma ni mugwa avatugwa vu vulungi. 19Hano moloma kuli mundu wa kase kigira vodedekere vwi liiva lienyu aveene. Ku ing'inga ndala mwihaana aveene ligali kutumikira uvudamanu kandi kifwavwi kigira uvudamanu. Navuzwa kalunu kuduuka mwihaane aveene ligali muve avatugwa vu vulungi kigira kivuni kitakatifu.
20Lwa mwaali avatugwa vu vwoni mwaali avavoholore kutura ku vulungi. 21Mwanyoola vukala ki kutura ku vindu via muveeye soni navio kalunu? Kigira keheri chi vindu yivio ni likuza! 22Navuzwa kalunu, mumali kovoholorwa kutura muvwoni, na mugwiyi vatugwa avatumikiri va Nyasaye. Vukala vwa muveeye navwo kalunu nu vutakatifu, kandi keheri chavwo kcveeye livamwoyo lie mihiga ni mihiga. 23Madanyi gu uvwoni ni likuza, navuzwa kihanwa cha Nyasaye chavuzwa keveeye livamwoyo litahera mba, mu Kristo Yeso, Mwami wiitu.
Malago gi lihilana nu vuhambani mu Kristo
လက္ရွိေရြးခ်ယ္ထားမွု
VARUMI 6: LOGOOLI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019