VARUMI 5
5
1Kunangwa kumali kokolwa avalungi imbiri wa Nyasaye kuvitira mu lisuuvira, koveeye ni mirembe na Nyasaye kuvitira mu Mwami wiitu Yeso Kristo. 2Kuvitira mu Kristo, kumali konyoora zimbavasi zia Nyasaye zia koveeye mu kalunu. Kusangaliraa mu lisuuvirizwa lia koveeye nalio liu kusanga mu vukumi vwa Nyasaye! 3Kunyi kandi kusangaliraa ikivi chietu, kigira kumanyi ndi ikivi keleetaa vwikuziri, 4uvwikuziri voletaa livugilirwa na Nyasaye, na livugilirwa lilie liletaa lisuuvirizwa. 5Lisuuvirizwa yili silinyala kukuvihiliriza mba, kigira Nyasaye yamala kuviika mu mioyo jietu uvuyanzi vwivwe kuvitira ku Roho Mutakatifu oveeye kihanwa chiche ku kunyi.
6Lwa kwaali nikukiri avadedekere, Kristo yakuzira kunyi avadamanu ing'inga ya Nyasaye yatovola. 7Sivoveeye vodoto umundu kukuzira mundu wundi mulungi mba. Hawundi ganyala kuva mundu anyala kuluvilira kukuzira mundu mulahi! 8Navuzwa Nyasaye yamanyia ndi yakuyaanza, kigira lwa kwaali nikukiri avoni, Kristo yakukuzira. 9Kalunu kumali kokolwa avalungi kuvitira mu masahi ga Kristo, agaveeye kovora havulavu ndi kunyi kumali kohononoka kutura ku vutima vwa Nyasaye. 10Kigira lwa kwaali nikukiri avasigu va Nyasaye, kwahambanywa naye kuvitira mu likuza liu Mwana weve; kuvita ligali, kalunu kumali kuhambanywa na Nyasaye, kulakahonywi ni livamwoyo lilie. 11Si gaveeye yaga geng'ine, navuzwa kandi kusangara mu Nyasaye kuvitira mu Mwami wiitu Yeso Kristo, umali kukuhambanyia na Nyasaye.
Adamu na Kristo
12Kunangwa, uvwoni vwingira mu lirova kuvitira mu mundu mulala, na uvwoni vwivwe vwaleeta likuza. Likuza lialanda mu vandu vosi, kigira vosi vaakora vwoni. 13Lilaga nilikikiri kuhaanwa, vwoni vwali ho mu lirova, navuzwa si vuvalizwa kuva vwoni vugira Lilaga kuvaho mba. 14Nitali kutura ing'inga ya Adamu kuduuka ing'inga ya Musa, likuza liamiiha kali ku yavo avavura kokora uvwoni kuli lihiolo lia Adamu yakola ku lihing'ana Nyasaye.
Adamu yaali kelolero cha uyu uliza inyima. 15Navuzwa viviri yivi siviveeye vilala viere, kigira kihanwa cha Nyasaye yahaana vuzwa sikeveeye kuli vwoni vwa Adamu mba. Gaveeye giligali avandu vanyingi vakuza kigira vwoni vwu mundu mulala oyo. Navuzwa zimbavasi zia Nyasaye ziveeye zinene kuvita, kandi, kihanwa chiche cha vuzwa ku vandu vanyingi kuvitira mu zimbavasi ziu mundu mulala uyu, Yeso Kristo. 16Kihanwa cha vuzwa zana yiki sikeveeye kuli amakuyu gu vwoni vwu mundu mulala oyo mba. Kigira, likalaga inyima wilihiola lilala lialeta likalagirwa kivi, navuzwa kihanwa cha vuzwa cha Nyasaye yahaana inyima wa mahiolo manyingi, keleetaa uvulungi. 17Gaveeye giligali ndi kuvitira mu vwoni vwu mundu mulala, likuza liatanga kwamiiha mu kivala. Navuzwa kekolwaki kenene ligali chakolwa nu mundu mulala, naye ni Yeso Kristo! Avandu vosi vanyoola zimbavasi zia Nyasaye zinene ligali kandi vaveeye vavoholole muye. Valamiha mu livamwoyo liavo kuvitira mu Kristo.
18Kunangwa kuli lihiola liu mundu mulala lialeta likalagirwa ku vandu vosi, kandi ndio, ku kekolwa kilala chu vulungi chu mundu mulala kihaanaa livoholorwa lia vandu vosi harara ni livamwoyo. 19Kuli vandu vanyingi vakolwa avoni kigira livula kutia liu mundu mulala, nindio kandi avanyingi valakolwa valungi ku lihulira liu mundu mulala.
20Lilaga liaza liduuki komeeda vudamanu; navuzwa hu vwoni vwameedeka, zimbavasi zia Nyasaye ziamedeka ligali kuvita. 21Kuli vwoni vwamiiha ku lileeta likuza ku vandu, kandi ndio iliamiiha lie zimbavasi zia Nyasaye kuvitira mu vulungi lilakwimilira kuduuka mu livamwoyo litahera mba, kuvitira mu Yeso Kristo, Mwami wiitu.
Kukuza ku vwoni navuzwa kuva mwoyo mu Kristo
လက္ရွိေရြးခ်ယ္ထားမွု
VARUMI 5: LOGOOLI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019