YEHESKIEL 33
33
Allahu Taa̒ala lomudua̒ olei Yeheskiel odelo tamoodahawa
(Yeh. 3:16-21)
1 Eeya lotahuda mai oelaatia, tauhda lo Eeya, 2“Wuu manusia panaa, poleleaalo ode bangusaamu deu̒ wonu bolo Wau̒ mopodungga mai popaatea ode lipu tuwau, utieelo u mamotoduo. Ulipu lolipu boito mamo lulaotao̒ towolota limongolio ngotaalio tamoodahawa. 3Wonu tamoodahawa boito moo̒onto musu meidungga mai, tio mopotingohe mola tuoto topotala alihu ngoa̒amila tau mopoo̒daaha. 4-5Titaalo tita tamodungohe tuoto u topotaala boito bo diila momandungi mao̒, wau musu monao̒ mai tulusi momate olio mate-mateelo mao̒, yi tio mate sababu totalaalio lohihilao. Humayaalio tio momandungi tuoto topotala boito, tantulo mao̒ tio mowali moa̒ahu. 6Bo wonu tamoodahawa boito moo̒onto musu meidungga wau tio diila mopotingohe mola tuoto topotala, tulusi musu momate-mateelo mao̒ tau-tauwalo odusa boito, yi tatihu-tihula to opopate limongolio matontuliyo-U̒ monto olio.
7Wuu manusia panaa, yio̒ puduo̒o-U̒ mowali tamoodahawa bangusa lo Isirai̒lu. Potunggula mao̒ ode limongolio poe̒ela botie: 8Wonu Wau̒ mopoo̒taa mai deu̒ ngotaalio tamoodahawa maamate, bo yio̒ diila mopoe̒elao̒ olio alihu tio molomela watadelio tilinggula tio moa̒ahu, yi tio maamate donggo odelo ngotaalio odusa. Bo tatihu-tihula to opopatelio matontuliyo-U̒ olemu. 9Wonu yio̒ mopoe̒elao̒ taa moleeta boito wau tio mohuto mohuheli mohutu moleeto, yi tio maamate odelo taa odusa, bo yio̒ lohihilao mamoa̒ahu.”
Tatihu-tihulo tobatanga ngota-ngota
10 Eeya lotahuda mai odelaatia, “Wuu manusia panaa, wulia mola ode taulo Isirai̒lu loi̒ya limongolio botie, ‘Ami lohiheo lodutolo ngongoto sababu bilanta lo dusa wau ololeeto lami. Woloolo mola mowali tumumulo?’ 11Polelea mao̒ olimongolio deu̒ domi Wau̒, Allahu Taa̒ala tatumu-tumulo, Eeya Taa Laba-labaalo Molanggato, Wau̒ diila sanangi wonu taa moleeto mate; bolii̒o mao̒ Wau̒ motohilaa tio mololaa mao̒ duduu-saalio alihu tio debo tumutumulo. Wuu bangusa lo Isirai̒lu, pohuhelilo mohutu u moleeto! Yilongola timongoli ohilaa mate?
12Naa, manusia panaa, poleleaalo ode taulo Isirai̒lu deu̒ wonu bolo taa u mopiohu mohutu dusa, yi opopiohio muloololio mai diila mowali motuulungi olio. Wonu taa moleeto mohuheli mohutu dusa, tio diila tahukuu-maniyola wau wonu taa mopiohu mohutu dusa, tio diila tapo aahuwolo. 13Mowaliilio Wau̒ malodanti mamo poa̒ahu taa u mopiohu, bo wonu tio molumula mohutu dusa wau mohalapu deu̒ tio mapo aahuwolo sababu opopiohio u muloololio mai boito, tio tilaala. Wau̒ diilalo moe̒elao̒ opopiohu u pee̒enta pilohutulio wau tio diila tamaate sababu duduu-saalio. 14-15Mowaliilio Wau̒ malo poe̒elao̒ taa moleeto deu̒ tio maamate. Bo wonu tio mohuheli mohutu dusa wau molumula mohutu wolo u mopiohu wau otutu, humayaalio tio mopo walingao̒ balangi u pilopohuloo̒ lotau, meaambo balangi u matilao̒lio wau modungohe toonulaalo butoo̒ u modelo ode tutumulo, yi tio diila tamaate. 16Wau̒ diilalo moe̒ela duduu-sawaalo umapilo hutulio, wau tio matumumulo sababu mohutu wolo u otutu wau mopiohu.
17Bo bangusa boito hemoloi̒ya deu̒ huhutuu-U̒ boito diila aadili! Lebe-lebe pomao̒ huhutu limongoliolo u diila aadili. 18Pee̒entapo pintala-U̒ mai deu̒ wonu taa u mopiohu molumula mohutu u moleeto, tio maamate kalana uito. 19Wonu taa u moleeto mohuheli mohutu dusa, wau molumula mohutu wolo u mopiohu wau otutu, yi tio matumumulo kalana uito. 20Eleponu odito bangusa lo Isirai̒lu hiemoloi̒ya deu̒ huhutuu-U̒ diila aadili. Otutu, Wau̒ mamomutoo̒ olimongolio ngota-ngota modudua̒ huhutuulio.”
Habari pasali dudehulio lo Yerusalemu
21To dulahu olimolio hulala opululio, todelomo taunu opulaa duluo maasa lo polayahu lami, ngotaalio ilohaasili loo̒lahi lonto Yerusalemu lonao̒ mai wau lopoo̒taa olaatia deu̒ kota boito malodehu. 22To hui tou̒ diipo pilodunggalio mai, watia malolaasa kawasa lo Eeya. Oditolio tou̒ tau boito lonao̒ mai odelaatia, watia malowali lobisala wau diilalo bubu.
Duduu-sawaalo bangusa boito
23 Eeya lotahuda mai odelaatia, 24“Wuu manusia panaa, tau-tauwalo tahi biluloa̒wa to tuodu lo kokoo-tawaalo tohuta lo Isirai̒lu hipoloi̒yawa, ‘Tei Abraham loo̒tapu ngoilanggubu huta botie, lebe-lebe pomao̒ tio bo tutuuwau. Ito botie dadaata jumulaalio, oditolio huta botie mowali milikinto.’ ”
25Sababu uito Eeya Taa Laba-labaalo molanggato lopoa̒hu mai olaatia mopo tunggulao̒ tahuli lo Eeya botie ode limongolio, “Timongoli hemolamela tapu u donggo oduhulio; timongoli hipoluboa balaahala wau hemomate mate-mateelo mao̒. Buheli tutu timongoli mongaku huta botie odelo milikimu. 26Timongoli hemopo mangga wamilumu. Huhutuumu moo̒lonuo̒. Timongoli ngoa̒amila hipojinawa. Tingga donggo buheli timongoli mongaku deu̒ huta botie odelo milikimu?
27Domi Wau̒, Allahu Taa̒ala tatumu-tumulo, Eeya Taa Laba-labaalo molanggato, tau-tauwalo tahi biluloa̒wa to tutuu-wodeyaalo kota boito maamate opatealio mate-mateelo mao̒. Timongolio tahi biluloa̒wa to huhuu-tawaalo luasi maa̒alo lo binatangi mongantau. Timongolio tahituua̒ to huhuu-ideyaalo wau gogoowaalo maamate sababu wembelo lo ngongoto. 28Lipu boito mapowaliyo-U̒ huta luasi udelita umoliilo, wau okokawasa u hepomangga limongolio boito mamopulito. Huhuu-ideyaalo to Isirai̒lu mamowali moliilo daa̒ tilinggula diaaluo penu boli ngotaa mao̒ tabuheli molibaya mao̒. 29Tou̒ Wau̒ mohukuumani mai bangusa boito sababu duduu-sawaalo limongolio wau mopowali lipu boito moliilo daa̒, yi mao̒taawa mao̒ limongolio deu̒ Wau̒ulo Eeya.”
Akiibati lotahuli li nabi
30 Eeya lotahuda mai, “Wuu manusia panaa, yio̒ malowali hipoloo-iyaawa lotaa ngobangusaamu tou̒ timongolio tinggai lodunggaya totili lo didii-ngingaalo meeseli lokota totalu lo huhuu-hebuwalo bele. Timongolio hemoloi̒ya ngota timongota, ‘Ntali, dungoheelo wolo tahuli mai lo Eeya todulahee botie.’ 31Timongolio monao̒ mai tutuuyuta dadaata daa̒ wau odelo umati-U̒ timongolio motihuloa̒a modungohe loloo-iyaamu, bo wolo upilo malentaamu diila dilungohe limongolio. Biihu limongolio molapali loloo-iyaalo sinta, bo hilaa limongolio bo hemo mikiilangi uuntungi. 32Yio̒ ilanggapulio tamoolahua lalaa-huwaalo sinta u osuaala moonungo wau motota moitohe kocapi. Memangi timongolio modungohe loloo-iyaamu bo diila mopohutu mao̒. 33Ngoa̒amila u loi̒yamu boito mamotoduo mai, wau wonubolo wakutu boito meidungga yi mao̒taawa mao̒ limongolio deu̒ pee̒enta yiloluo mai ngotaalio lonabi to huungi mongolio.”
လက္ရွိေရြးခ်ယ္ထားမွု
YEHESKIEL 33: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ