YEHESKIEL 15
15
Pohumaya tomimbihu ayu bungo lo angguru
1 Eeya lotahuda mai odelaatia, 2“Wuu manusia panaa, wolo ololebe ayu lo angguru monto ayu wewolio to oa̒ayua? Wolo opolutuo̒ bungo lo angguru wolo bubuu-ngowaalo ayu to oa̒ayua? 3Tingga mowali ayulio pomake u mohutu hitua-tuawua? Tingga mowali powaliyola pontayangalo u mongabita pakaakasi? 4Diaaluo hunalio ngopohia powaliyola ayu podiio̒. Wau wonu huudio duduuluolo mopulito mopobu, wau ambahu huungio olo mowali dui̒to, tingga donggo woluo hunalio? 5Diaaluo! Tumbao̒ tou̒ diipo tumbilalo, diila mowali pohunaalo. Tidiyolo mao̒ lapatio mao̒ tumbilalo wau mopobu lotulu!”
6Sababu uito Eeya Taa Laba-labaalo molanggato lotahuda mai, “Debo odelo ayu bungo lo angguru u hilama lonto oa̒ayua wau tilumbila, odito olo mapohutuwo-U̒ ode ulipu lo Yerusalemu! 7Wau̒ mamo hukuumani mai olimongolio. Penu boli timongolio malo lopato lonto tulu, bo tulu olo u mamopo binaasa olimongolio. Yi mao̒taawa limongolio deu̒ Wau̒ulo Eeya. 8Timongolio diila tatapu wau molotolo hilao to Olau̒, sababu uito, huta boito powaliyo-U̒ mai huta luasi udiila mowali pobutua lo pilomulo. Wau̒ Eeya Taa Laba-labaalo Molanggato malo tahuda mai.”
လက္ရွိေရြးခ်ယ္ထားမွု
YEHESKIEL 15: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ