YEHESKIEL 14
14
Allahu Taa̒ala lohukuumani taa hipolubowa balahala
1Dengolo lota lonto tau̒wa bangusa lo Isirai̒lu lonao̒ mai odelaatia u lohintu kahandaki lo Eeya. 2Lapatao̒ maa lotahuda mai Eeya odelaatia, 3“Wuu manusia panaa, tau-tauwalo botie maa lopopalacaya mao̒ batangaalio ode balahala tilinggula timongolio lodehu ode delomo dusa. Diila pongaa lo aakali Wau̒ mohuto pohintua limongolio?
4Sababu uito, polelea mao̒ olimongolio deu̒ Wau̒, Eeya Taa Laba-labaalo molanggato mongamaanati mai odie, ‘Timii̒du tau lo Isirai̒lu taa maa lopopalacaya mao̒ batangaalio to balahala wau lopoluli batangaalio lodehu ode delomo dusa, lapatao̒ monao̒ mai mei̒ nasehati to ngotaalio lo nabi, maa tameta-U̒ mai lohihilao wolo totameto u paatutilio duo̒lo babaarahalaalio u dadaata boito! 5Ngoa̒amila balahala boito maa lopohalahu umati-U̒ lonto ola-U̒, bo pohileaala dua̒ wolo totametu-U̒ boito umati-U̒ maa muli mohualingai ode Olau̒.’
6Poo̒taa mao̒ olo ode tau lo Isirai̒lu deu̒ Wau̒, Eeya Taa Laba-labaalo molanggato lotahuda mai ode limongolio, ‘Polilihulo monto duduu-sawaalo limongoli, wau tolailo mao̒ babaa-laahalaalo limongoli u moo̒lonuo̒ boito.’
7Timii̒du tau lo Isirai̒lu meaambo tau deli taa hibiluloa̒awa to wolota bangusa lo Isirai̒lu, taa lopohalahe ola-U̒ wau lopopalacaya batangaalio ode balahala, lapatao̒ lei̒ nasehati to ngotaalio lo nabi, maa tameta-U̒ mai lohihilao. 8Wau̒ maa molaawani olio wau mopowali olio obaaya duo̒lo taa wewo. Wau̒ maa mopowiwi mao̒ olio monto umati-U̒, yi maa otaawa mao̒ lo umati-U̒ deu̒ Wau̒ulo Eeya.
9Wonu ngotaalio lonabi maa ilowimubuloa tilinggulaa molameta u talatala, yi Wau̒ulo taa maa lohimbulo mai. Wau̒, Eeya Taa Laba-labaalo molanggato maa mopowiwi mao̒ olio monto tau-tauwala lo Isirai̒lu. 10Mopio nabi boito, meaambo timongolio taa lei̒ nasehati olio, maa moo̒tapu hukuumani u tutuuwaua. 11Ngoa̒amila boito pohutuo-U̒ mai alihu tau lo Isirai̒lu diilalo mao̒ mopohalahe ola-U̒ wau diila mao̒ olo moponajisi lo batanga wolo dusa. Lou̒ odito timongolio maa mowali umati-U̒, wau Wau̒ mowali Allahu Taa̒ala limongolio.” Wau̒, Eeya Taa Laba-labaalo molanggato maa lotahuda mai.
Tei Noho, Daniali wolei Ayuba
12 Eeya lotahuda mai odelaatia, “Wuu manusia panaa, 13wonu lipu tuwau odusa wau diila tatapu wau molotolo hilao to Olau̒, Wau̒ mamo hukumani mai lipu boito. Wau mamopo aantulu polodapato ua̒alolio, mopodungga mai baala lopolobiti wau momate-mateelo mao̒ mopio manusia boli binatangi. 14Eleponu tei Noho, Daniali wolei Ayuba bilubiluloa̒ totambati boito, yi opopiohi mongolio toulota bo moo̒ posalaamati nyawa limongolio lohihilao wambao̒. Wau̒, Eeya Taa Laba-labaalo molanggato maa lotahuda mai.
15Mowalilio Wau̒ mopodungaa mai bibiinatangiyaalo mongantau u modangapo tuango lipu boito, tilinggula madala boito mowali moo̒ topotaala daa̒ wau diaaluo penu boli ngotaa mao̒ taa buheeli lumaodeo̒. 16Penu boli tei Noho, Daniali wolei Ayuba motibiluloa̒ teeto, yi domi Wau̒, Allahu Taa̒ala taa tumutumulo, Eeya Taa Laba-labaalo molanggato, timongolio diila taa o posalaamatio penu boli lo tatoonu wambai̒o, tumbao̒ walai̒ mongolio olo diila mowali. Bo timongolio lohihilao wambai̒o taa moa̒ahu, hiambola lipu boito maa mowali huta luasi udiila mowali pobutuo lo pilomulo.
17Mowalilio Wau̒ mopodungga mai popaatea ode lipu boito, wau loaloo-U̒ mai titiingolowalo maantapo u mopobinaasa mopio manusia meaambo binaatangi. 18Wau penu boli taa toulota engonti boito motibiluloa̒ teeto, yi domi Wau̒, Allahu Taa̒ala taa tumutumulo, Eeya Taa Laba-labaalo molanggato, timongolio diila tamoo-poa̒ahu penu boli lo tatoonu wambai̒o, tumbao̒ walai̒ mongolio lohihilao olo diila mowali. Bo timongolio lohihilao wamabai̒o taa moa̒ahu.
19Mowalilio Wau̒ mopodungga mai wembelo lo ngongoto ode lipu boito, wau bangguwato-U̒ omuruka-U̒ ode olio tilinggula mopio manusia boli binaatangi maa binaasa. 20Wau penu boli tei Noho, Daniali wolei Ayuba motibiluloa̒ teeto, yi domi Wau̒, Allahu Taa̒ala taa tumutumulo, Eeya Taa Laba-labaalo molanggato, timongolio diila taa moo̒ posalaamati penu boli olo tatooonu, tumbao̒ walai̒ mongolio lohihilao olo diila mowali. Bo timongolio lohihilao wambai̒o taa moa̒ahu sababu opopihi mongolio.”
21 Eeya Taa Laba-labaalo molanggato lotahuda mai, “Wau̒ maa mopodehu mai opaato hukuumani-U̒ u laba-labaalo moo̒tihela hapato ode yitaato Yerusalemu u mopobinaasa mopio manusia meaambo binaatangi. Hukuumani boito yito: popaatea, baala lo polobiti, binaatangi mongantau wau wembelo lo ngongoto. 22Humayaalio mao̒ woluo taa moo̒ lahi wau mopoa̒ahu mongo walai̒o, poo̒tuotilo timongolio wonubolo timongolio monao̒ mai ode olemu. Bilohiilo woloolo mola ololeeti mongolio, yi timongoli maa mongalati deu̒ lotuhataalo huhutuu-U̒ u lohukuumani Yerusalemu. 23Lapatao̒ timongoli olo maa mongalati deu̒ toonulaalo huhutuu-U̒ boito o alaasani. Wau̒ Eeya Taa Laba-labaalo molanggato maa lotahuda mai.”
လက္ရွိေရြးခ်ယ္ထားမွု
YEHESKIEL 14: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ