Hosia 5
5
Ehwe re Hwe Izrẹl Fiki rẹ Eshe Rọye
1Nyo ọnana, E irherẹn!
wa kerhọn, E uwevwi rẹ Izrẹl!
Wa kerhọn, E uwevwi rẹ ivie na!
Kidie ẹdjeguo na bru uwe rhe;
kidie wọ vwẹ oma ru ufi vwi Mizpa,
vẹ ariri ra riẹn phihọ enu ri Tabọ.
2Ayen da tọn ukpotọ okokdo phihọ Shitim,
ẹkẹvuọvo me cha fa ayen ejobi.
3Me riẹn Ifrem,
Izrẹl sioma nu kẹ vwẹ-ẹ,
kidie asakiephana, E Ifrem, wo gbe igberadja,
Izrẹl gbe oma ẹgua.
4Uruemu rayen gbi jẹn ayen hirhe
bru Ọghẹnẹ raye-en.
Kidie erhi rẹ igberadja hẹ evun rayen,
ayen gbe riẹn Ọrovwohwo-o.
5Eheri rẹ Izrẹl se iseri hwe;
Ifrem kọ cha yẹnghrẹn vwẹ abe rọyẹ,
Juda vẹ ayen gba cha yẹnghrẹn kugbe.
6Ayen vẹ igodẹ kugbe irhuẹ rayen gba yanran ra guọnọ Ọrovwohwo,
ẹkẹvuọvo ayen cha mrẹ-ẹ.
O sioma nu kẹ ayen.
7Ayen phiẹn Ọrovwohwo;
kidie ayen vwiẹ emọ rẹ erhorha.
Asakiephana emeranvwe ọkpokpọ cha ghwọrọ ayen vẹ idju rayen ejobi.
8Hworo owanre vwi Gibia,
hworo owanre vwi Rama
Bunu vwi Bẹtaven
Phariẹ, E Bẹnjamin.
9Ifrem ko che hirhe phihọ erhurhu
vwẹ ẹdẹ rẹ ojaẹriọ,
vwẹ ohri rẹ uvwiẹ rẹ Izrẹl
mi de ghwoghwo obo ri muẹro
10Isun ri Juda da họhọ ihwo re kpare ughwru;
enu rẹ ayen mi ku ophu mẹ phihọ kerẹ ame.
11E shenyẹ Ifrem, a guọgherọ vwẹ ẹdjeguo,
fikiridie emu gheghe ọ guọnọ nene.
12Fiki rẹ ọtiọye na ke me họhọ eghwọghwọ kẹ Ifrem,
kerẹ ophu kẹ uwevwi ri Juda.
13Ọke rẹ Ifrem vwọ mrẹ ọga rọye,
ri Juda vwọ mrẹ omẹwan rọye,
etiyin Ifrem de kpo Asiria,
o de ji ohwo bru ovie rode na.
Ẹkẹvuọvo o se sivwi uwe-e
eyere sivwi ora wẹn kpo-o.
14Kidie me cha họhọ okpohrokpo kẹ Ifrem,
kerẹ ọmọ rẹ okpohrokpo kẹ uwevwi ri Juda.
Mẹvwẹ, ekpuyovwi mẹ, me da bẹrẹ nu ke me yanran,
Mi che muo yanran, yẹ o vwo ohwo ro se sivwo mie vwe-e.
Ekuorhẹriẹ rẹ Izrẹl ọ rọ Unu Ofefe
15Mi che rhivwi kpo ẹdia mẹ,
bẹsiẹ rẹ ayen vwọ rhọvwe
abe rayen ayen me rhe guọnọ opharo mẹ
vwẹ evun rẹ ọdjorho rayen ke ayen cha guọnọ ovwẹ tane,
လက္ရွိေရြးခ်ယ္ထားမွု
Hosia 5: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.