Hosia 4
4
Ọrovwohwo vẹ Izrẹl Phra Aphro
1Nyo ota rẹ Ọrovwohwo E ihwo rẹ Izrẹl,
kidie Ọrovwohwo vẹ ihwo rẹ otọ na vwo aphro.
O gbi vwo ọvwata yẹrẹ aruẹdọ-ọn,
ọ rhe vwo erianriẹn rẹ Ọghẹnẹ vwẹ otọ na-a;
2Iyori eduvwo, efian, ozighẹ, uji vẹ ọfarhiẹ egbe,
ayen miovwo urhi ejobi, ozighẹ vwọ kpahe ozighẹ.
3Fiki rẹ ọtiọye na otọ na de muoma phihọ,
ihwo re dia otọ na ejobi oma re ro ayen,
ọtiọye ji te eranvwe rẹ aghwa,
kugbe ephran rẹ irharheghe,
iyeri rẹ evun rẹ ame ghwrara e ji si ayen nọ.
4Ejẹn ohwo ọvuọvo họnra-a
ejẹn ohwo ọvuọvo se ohwo ẹdjọ-ọ,
kidie me vẹ owẹ gbe vwo te, E orherẹn.
5Wọ cha kpro owọ vwẹ oghẹruvo,
ọmraro vẹ owẹ cha yẹnghrẹn vwẹ ason,
ke me guọghọ oni wẹn.
6A guọghọ ihwo mẹ fiki rẹ jẹriẹn
fikiridie wọ sen erianriẹn,
Me sen we nẹ wọ gbe dia orherẹn mẹ-ẹ.
Ọtiobo rẹ urhi rẹ Ọghẹnẹ wẹn vwọ chọro owẹ ẹro na,
emọ wẹn ke je chọro ovwẹ ẹro rhe.
7Ọtiọbo rẹ ayen bute,
ọtiọye ayen ji ghwe ru imwemwu kpahe ovwẹ,
Me rhẹriẹ urinrin rayen vwo kpo omẹvuọ.
8Vwẹ enu rẹ imwemwu rẹ ihwo mẹ koye ayen da ghẹrẹ oma rẹ ayen;
Ayen hirhe phihọ ọvwurhuru fiki rẹ orukuruku rẹ ayen.
9Kirobo rẹ ihwo na epha, ọtiọye irherẹn na je epha;
Me vwẹ oja re ayen fiki rẹ idjerhe rayen,
ke me re ihri rẹ umwemwu rayen vwẹ obọ rayen.
10Ayen ke re, je evun vọn aye-en,
ayen gbe igberadja jẹn ayen buru-u;
kidie ayen siẹn Ọrovwohwo ọfarhiẹ kọye ayen gbe.
11Udi ekianke kugbe udi ọkpokpọ miẹ ayen iroro.
12Ihwo mẹ re duotọ rẹ akpọ vwẹ obọ rẹ ubrurhe,
ọkpọ rayen kọye ayen vwọ bọ epha.
Kidie urhuru sivwe rẹ ọfarhiẹ sun ayen ghwru,
ayen da yan jẹn Ọghẹnẹ rayen vwo re gbe igberadja.
13Ayen ze izobo vwẹ enu rẹ igbenu na,
ayen da ghwẹ Izobo kpahe enu rẹ igbenu itete,
vwẹ esiri rẹ ohahe, esiri rẹ afon vẹ esiri rẹ oghriki,
kidie ophie rayen yovwiri.
Fiki rẹ ọtiọye na emetẹ wẹn vwo gbe igberadja,
rẹ epha rẹ ovwan vwo gbe ọfarhie.
14Me cha vwẹ oja re emetẹ rẹ ovwan vwẹ ọke rẹ ayen de gbe igberadja,
yẹrẹ epha rẹ ovwan vwẹ ọke rẹ ayen de gbe ọfarhie;
fikiridie ekpuyovwi rẹ eshare na je ro akakọ bru igberadja na
ayen vẹ iniedjọ rẹ igberadja gbe ze izobo rẹ ọfarhiẹ kugbe,
ihwo ri vwo iroro-o ke cha guọghọ kufia.
15Owene wo gbe igberadja, E Izrẹl,
wo ji Juda reabe-e,
Wọ vwẹriẹ Gilgal re,
eyẹ wọ kpọ enu rẹ Betave-en,
wo duvwu iyori nẹ, Kirobo rẹ Ọrovwohwo herọ na.
16Izrẹl vẹ udu kọi,
kerẹ erhuẹn ọshare ro vwo udu,
kẹ Ọrovwohwo sa ghẹrẹ ayen vwẹ etiyin na,
kerẹ ogodẹ vwẹ egbri ophephẹ?
17Ifrem vwẹ oma ba edjọ,
wa yan jo vwo.
18Usun rẹ egbaidi ayen ejobi kẹ igberadja ayen gbe;
emu rẹ omaẹvuọ ayen ma guọnọ nẹ ọ rẹ urinrin rayen.
19Odju phare ayen phihọ ibekpe rọye,
oma kọ cha vo ayen fiki rẹ agbada rayen.
လက္ရွိေရြးခ်ယ္ထားမွု
Hosia 4: UBV77
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible in Urhobo © United Bible Societies, 1977.