Лука 3
3
3 къаьм
Ягья авараг халкъиладой аьᵸйда̄ аьгъиъца
1Тиберий къайсарлъилаъ ахънас ацӀона лъинас лӀи зукъойо; Ягьудиялиъ наиблъилаъ Понтий Пилат зукъойо; Галилеялиъ ханлъилаъ Гьерод зукъойо; гьолцос ис Филипп зукъойо Итурейлилана Трахонитлилана вилаятлис хан; Лисаний Абиленаллиъ ханлъилаъ зукъойо; 2Гьаннана Кайафана бишшун букъа̄ кашишлалъилаъ гаьгьийа мехлаъ, Закарияла оьждил – Ягьял боьчӀчӀа авлахълиъ Аллагьлис йаьже тухъийо. 3Гьолцо Иордан эᵸхедой гьица гаьгьийа мица̄ъ кӀаьйлӀона лъӣд ма̄цоллолъи тӀибитӀизи йо̄йо, мизос мунагьла тавба богьда чурзи йа̄хъцалӀо нисойо. 4Вагьаддийа йаьжбо ча̄хна гей Ишая авараглила ТӀекликьа:
«Гьоᵸс гьокӀ тухъца боьчӀчӀа авлахълиъ:
Гьуги оᵸкъолъол гьино къачӀази йова,
Кьодда̄лал гьино йаᵸкъойцӀойо йова,
5Шибаб куво-аьракъ йолъала,
шибаб ма̄ь-бизова йеᵸйалъала,
ЧӀикӀ-чӀекӀдийо жо йаᵸкъойцӀала, хир-хоькӀила̄ маьче мелъала,
6Шибаб ругь-чӀаголъилал Аллагьлис хъосарлъи йега̄ла».
7Гьолцодой ма̄цолал мокъова халкъилала аьламлихъа Ягья ниса̄гьийо:
– Гьай миже, цӀодола бекелалис насло! Лъод миже тӀамзи бо̄йо кьодо мокъоцала Аллагьлила симолдойс боьвачал? 8Миже бо̄ва тавбалас пихъ йегала. Иле Ирбагьинила наслолас къова̄ гейлӀо нисона бикълабаша̄къа. Гьуна До мизохъа нисос, Аллагьлил йадда вагьаддо̄л кьала̄на Ирбагьинила къова̄л Гьогцохъа йуьᵸвахонна йа̄хъца. 9Хоьхила хемухадой оᵸг гуллолъи мизол йикъе. КӀетӀо пихъ кьодо йахъаъцас хоьхо буьчӀна цӀоъ гулцаслъи йикъе.
10Гьиде сийод йовал нуцӀослӀо нисос зукъойо аьдамла̄. 11Ягья жаваб ницца зукъойо:
– Къона мухун гаьгьийа гьоᵸсцойс гаьччал нилӀа, кен гаьгьийана вагьалла̄ йова.
12Мунагьла чурзи йовагьиллал мокъова̄ гьаькъ бокӀолал бечелла̄ аьдамла̄на нисолло гьолцохъа:
– Йа̄ Муалим, иле сийод йовал нуцӀос?
13Гьоллол жаваб нилӀийо Ягья:
– Мизол бегаллагъа кьодда̄с багъа̄къа гьаькъ.
14Вагьалла̄зу рагъухъалла̄на мокъона нисолло:
– Илена сийод йовал нуцӀос?
Гьоллохъана нисойо:
– Гьоᵸссидихъасна гьичӀегонна окко йагъа̄къа, гьоᵸссидикьана гаьччо аьйиб гула̄къа, мизол ниццала харжликьа рази бахъна бече.
15Масигь оᵸкъаллахъа гувабацӀона бечейаъ, халкъилал пикро бахъца зукъойо Ягья Масигь зогъаллӀона. 16Ягья къацӀцӀолал жаваб нилӀийо:
– До мизос мунагьла лъӣд йа̄ᵸцолца, амма оᵸкъос дӣгъана йилӀа къудратаб СукӀо. До гей гьолцола гьалалъцола̄с кьохъа̄ йа̄ᵸкал мустагьикъаб гаьччо сукӀо. Гьогцо мизос мунагьла йа̄ᵸцолас Илагьиябли ругьлидна цӀойидна. 17Гьогцола каъ аьᵸко гей, нахоъос хъибо мацонна гьинила баькьиъ гулца, нахо гьоᵸсна йедаъцала цӀоъна гунна Гьолцо йекӀелца.
18Рохеллис Хабар нисона вагьалла̄зу тели баддо̄нна насигьатла Ягья аьдамла̄л йовагьийо.
19Гьерод ханли гьинила истӀис ахъо Гьеродиада йоᵸкъойолъина, бади гьокцос чороклъина Ягья мотӀолиъ йакьеллъо, 20Гьероди Ягья тӀусагъийаъ голло, ханли йовагьийа бадло кешлъила̄кьа кьодо вагьли кешлъина телилъийо.
Исана лъӣд ацолца
21КъацӀцӀо гаьлъда-гаьгьийо аьламна мокъона лъӣд мунагьла йа̄ᵸцолцалаъ, Исана лъӣъна эᵸдокна доьъа бо̄слаъ, гьаᵸса йеᵸйагьейо. 22Илбалила суратбакьа Илагьияб Ругь мокъойо гьолцодой. Бета гьаᵸсаъкьа̄ гьокӀ тухъийо:
– Ми гей дил аццас дие Оьжо. Дӯкьа До рази гей!
Исала умумаллис кьибил
23Иса Аллагьлил хъуллухъ бовал уьᵸхолъийаъ, гьолцос зукъойо лъанайиглъийо лӀи. Гьолцола умумаллис вагьаддийо кьибил гейлӀо нисос зукъойо: гьолцос або Усуп, гьолцосна або Эли, бета 24Маттат, Леви, Малки, Яннай, Усуп, 25Матитя, Амос, Нагьум, Гьесли, Наггай, 26Магьат, Маттати, Шимъи, Йосех, Йода, 27Йогьанан, Реса, Зеруббабел, Шеалтиэл, Нер, 28Малки, Адди, Къасам, Алмодам, Эр, 29Ешуа, Элиэзер, Йорим, Маттат, Леви, 30Шимъон, Ягьуда, Усуп, Йонан, Элякъим, 31Мелеа, Менна, Маттата, Натан, Давуд, 32Йишай, Йобед, Боаз, Шалмон, Нагьшон, 33Аминадаб, Админ, Арам, Гьецрон, Перец, Ягьуда, 34Якъуб, Исгьакъ, Ирбагьин, Терагь, Нагьор, 35Серуг, Реу, Пелег, Эбер, Шелагь, 36Къейнан, Арпакшад, Шем, Нуьгь, Ламек, 37Метушелагь, Гьенок, Яред, Магьалалеэл, Къейнан, 38Энош, Шит, Адам, Аллагь.
လက္ရွိေရြးခ်ယ္ထားမွု
Лука 3: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)