Лука 10
10
10 къаьм
Иса алӀнайиг асгьаб халкъилал ваъза-насигьатлил э̄ᵸйо
1Гьолълъогъа муьгъатта̄ Кьодда̄ла Иса бетана гьакӀийо алӀнайиг асгьаб. Къо̄-къона хъогьна гьолло̄л ме̄йо жу эᵸкьал нуцӀоцала шибаб шагьарба̄ъна аьлӀа̄ъна. 2Гьоллохъана нисойо:
– Мицалъ тели муькъо йахъна гей, йокӀолцас аьдамла йоькькьа гей, вагьалълъобза муькъова̄ла БетӀергьаллихъа гьарзи йова Гьинис муькъо йуьᵸвал буьгьдабагийа мейалӀо нисона. 3Гьаᵸже мекье! Гьуна До миже ме̄ш, бацӀла̄ъ эᵸдо лӀилейо̄лцой. 4КъацӀо йейаза̄къа йа окколас боьъо, йа хуржалла, йа гьалалъцова; гьид кези ахъийал гьоᵸссидинна саламна нилӀа̄къа#10:4 Заман аьдада бугъола̄къалӀо нисойо маъна гей вагьалълъос.. 5Нӣйа билӀоъ мекьедана, гьакъкъа аьᵸйдда̄ ниса «Ассаламу алайкумлӀо (рекъел мизоллӀо)» нисона. 6Гьулиъ эᵸдо саламатаб сукӀо зогъда, мизос салам гьолцо бохас, зогъаъда мизодой кьа̄ь мокъас. 7Гьолълъо билӀоъ бече миже бес-хулӀона, билӀола бетӀергьалли йо̄йо гьоболлъина къабул йогьна. Загьмат-гъилликьа шапакъат михъос. Гьоᵸс билӀоъос балӀо билӀоъ боьвачона мекьа̄къа. 8На̄ди шагьарбаъ миже мокъолъ къабул богьда, гьулиъ бече, бесал нилӀийо кенна йуьᵸхъа. 9Гьулиъ гаьгьийа̄ кӀовакӀова̄на ба̄хъла, Аллагьлис Парчагьлъи гьицакна гейлӀона ниса гьоллохъа. 10Амма на̄ди шагьарбаъ мокъолъ миже къабул боваъда, гьулиъис къатӀлиъ гисабакна боьвачошлаъ ниса: 11«Мизола шагьарбаъ илла хаьбала̄кьа йечейо пахна иле мизокьа пахлӀолца. Амма йикъе мизолзу Аллагьлис Парчагьлъи гьицакийолъи».
12Гьуна мизохъа нисос: вагьли къиямасаб водо кьодо йоᵸкъолъ, Содомлила#10:12 Содом – аьдамла̄ш мунагьла телибалълъо, Аллагьлис симо бигьна бугъолло шагьар. халкъилал пигьалъи йахъца гьолълъо шагьарбала аьдамла̄лгъа. 13Балагь мокъос дӯкьа, Хоразин! Балагь мокъос дӯкьа, Бетсаида! СудлӀо нисода мизоллъийа̄ караматла Тирлилана Сидонлилана#10:13 Хоразин, Бетсаида – Галилея улкалаъ гагьийа̄ шагьарба; Тир, Сидон – ралъадбадой гаьгьийа̄ мажусла̄с йукъа̄ капурабла шагьарба. аьдамла̄л йегабанна зувакъойокъода̄, къе̄на бечена – цӀоцӀойо мухунна лъичӀена, къаьмкьа йалӀона чӀалӀена#10:13 Тавба бо̄вас аьламат., гьолло гьехзу тавбана богьна, Аллагьлилъда̄ муьвахаш га̄ь. 14Амма къиямасаб водиъ Тирлинна Сидонлинна пигьалъи йахъца мизоллагъа. 15Мина, Капернаум, гьаᵸсаъад бежеш? Журжагьлиъ тӀутӀас ми!
16Мизохъа энекзи бахъийа̄ Дӣхъана энекзи бахъца, миже ата̄ бовахийа̄ Дона ата̄ охца; ата̄ До охийа, До э̄ᵸйо Аллагьна ата̄ охца.
АлӀнайиг асгьаб кьа̄ь оᵸкъос
17Кьа̄ь мокъойо гьогго̄л алӀнайиг асгьабла, йилӀа разина ба̄хъна Исахъа нисойо:
– Йа̄ БетӀерчӀахъаяв, зинналлана мутӀиъ йа̄хъца илол Дибо ца̄ᵸ йагъолъ.
18Гьолцона гьоллохъа нисос:
– Дил кайлӀо̄цой гьаᵸсаъас бекцас илбис бега̄йо. 19Гьуна, бекела̄на, аькъараблана йовацлална, къацӀцӀо тушмалла̄ла къуватликьа гьаьлкӀолъина До мизол нилӀна гей; мизол гьогло зарал боваъас. 20Амма зинналла мизол мутӀиъ йахъналӀона, гьолълъокьа миже рази бахъа̄къа. Миже рази ба̄хъ мизос ца̄ᵸда гьаᵸсаъ ча̄хийакьа.
21Вагьаллъо мехлаъ Жу Илагьияб Ругьлис оцӀийа Иса рази ахъна нисойо:
– Дул рец гей, Дие Або, зоб-ракьлис БетӀергьан, Ми цӀодорабла̄кьасна аькъилабла̄кьасна балъго йогьна, къовал вагьди къацӀцӀо жо загьир йо̄йо. Ӣᵸ, Дие Або, вагьалълъоъ гей Дибола цӀоблис аьтӀилъи! 22КъацӀцӀо жо Дил Диела Або нилӀна гей. Аболла̄ъ, гьоᵸсидинна икъаъас Оьжо. Оьждилна̄ъ, Оьждил Або икъелал атӀийална̄ъ, гьоᵸссидинна икъаъас Або.
23Бадлоъос жужна ба̄гъона асгьабла̄хъа нисойо:
– Гьардарабла гей вагьди къацӀцӀо жо йегацаса мизос гьаьйда, 24судлӀо нисода До мизохъа нисал, тели аварагла̄нна падишагьла̄нна йатӀна зукъойо мизол йега̄йо жо йега̄л, амма йегайэш. Мизол тухъийо жона тухъал йатӀна зукъойо, амма тухъеэш.
Гургьараб Самариялила сукӀокьас хабар
25Гьуна вагьлиъис сид диниябли аьлимчийа Гьули икъелал атӀна суал нилӀийо:
– Йа̄ Муалим! Абадияб билӀос бутӀа дил михъал нуцӀода, сийод до йовал нуцӀос?
26Иса суаллид кьа̄ь жаваб нилӀийо:
– Къанонлиъ нигъад нисона гей? Сийод дул чахна йиᵸхъос вагьалълъос?
27Гьолцона жаваб нилӀийо:
– «Дул дибозу БетӀергьан Аллагь дибола къацӀцӀо йакӀидна, дибола къацӀцӀо ругьлидна, дибола къацӀцӀо къуватлидна, дибола къацӀцӀо аᵸкъло-пикроладна атӀ», бета: «Дибо гьицасна мицойзу атӀ».
28Иса нисойо гьогцохъа:
– Ми битӀун жаваб нилӀийо. Гьуна вагьла̄ уьᵸхо-аьᵸхе, дул абадияб оьмро михъас.
29Амма гьолцо жу битӀараб ахъал икье-аькьена кьа̄ьна нисолло:
– СукӀод «дие гьицас» ахъца?
30Иса вагьлиъисзу гьолцол жаваб нилӀийо:
– Гьоᵸс пуланаб сукӀо Иерусалимлиъис лӀийода̄ Иерихонлиъ эᵸкьеш зукъона. Гьид гьули къачагъла̄л иᵸхъона гей. Гьолло̄л, гьогцохъас лъицӀона йагъона, угъал оᵸкъова гьаьллъилакьа аькьеланна аькьенна, гаьлълъа̄чо гьулина эчаннегьна, боьвачона гей. 31Гелокьас вагьалълъо гьид лӀийода̄ эᵸкьецас гьоᵸс кашиш гьолцо сукӀокьа кьодо оᵸкъона гей, амма гьуги эгалъ гьинолила балӀосола раъаллиъкьа̄ оьчона гей. 32Вагьла̄ кьодо оᵸкъона гей левитла̄с#10:32 Левит – Аллагьлила билӀоъ кашишла̄ла хъуллухълил комак богьцас аьдам. гьоᵸс сукӀона, амма гьулина вагьалла̄зу гьинолила балӀосола раъаллиъкьа̄ оьчона гей. 33Гьоᵸс пуланаб Самариялиъис сукӀо эᵸкьешлаъ, гьолцо аьдамликьа кьодо оᵸкъойолӀо. Гьули эгалъ, гьогцокьа йакӀо йугъона гей. 34Гьицакна гьогцос лаьхъла, зайтуллила йеᵸлълидна гъинолидна низаба̄нна низабана, шовашона гей. Бета гьинила аᵸукьа кьайкъена гонна, петерлиъна эжена, гьогцол бовал нуцӀойо тимар богьна гей. 35Бета хиса гисакалдайлил петерлила бетӀергьаллихъа къона динарна нилӀна нисона гей: «Вагьацо сукӀол бовал нуцӀойо тимар бова, гьолълъогъа тели окко йугъода, до кьа̄ь оᵸкъолъ дул нилӀал».
36Къачагъла̄л иᵸхъойо сукӀол дибола пикролаъ лъаниъ эᵸдос сукӀосод гьиᵸцас зогъал?
37– Гьолцокьа йакӀона йугъона комак бо̄йосо, – лӀо нисона жаваб нилӀийо диниябли аьлимли.
Исана нисойо гьолцохъа:
– Эᵸкьена мина вагьалла̄ йова.
Иса авараг Мартадойна Марияндойна
38Гьоддо̄л вагьлиъис мекьешлаъ, Иса оᵸкъос сид аьлӀаъ. Гьоᵸс пуланаб МарталӀо нисоцала аьдамли Иса гьоболлъилаъ окӀца. 39Гьолълъос зукъона гей МариянлӀо нисона ца̄ᵸ гаьгьийо иси. Исала хаьбала̄гъа къе̄на йечена, иси Гьогцола хабарлихъа энекзи йахъца зукъойо. 40МарталӀо нисода, Гьогцол йукъо гьоболлъи йовал йикье-йаькьеш зукъойо. Исадой гьицана гигьна, Марта нисос:
– Йа̄ БетӀерчӀахъаяв! Дул букъо ургъелна зогъаъас, до иси гьоᵸсцо йечаннегьна йикье-йаькьейас. Дил комак бовал йаьгъиълӀо ниса исихъа.
41Иса гьолълъол жаваб нилӀийо
– Марта! Марта! Ми тели жойлас ургъел бохца. 42Амма йовал нуцӀойо жо гьоᵸс гей. Гьуна Марияни кӀетӀо аьмал кьодос гьаᵸкӀна гей, вагьло гьолълъохъас гьоᵸссидина багъаъас.
လက္ရွိေရြးခ်ယ္ထားမွု
Лука 10: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)