Лука 9
9
9 къаьм
АцӀона къона асгьаб ваъза-насигьатлил ме̄йо
1АцӀона къона асгьабна илӀена, гьоллол нилӀийо къацӀцӀа̄ зинналла̄кьа ихтиярна кӀовакӀова ба̄хълал къудратна. 2Ме̄йо Иса гьолло̄л Аллагьлис Парчагьлъи йоᵸкъоцалас хабар нисална кӀовакӀова ба̄хъланна. 3Гьоллохъа нисойо гьоьшшона гьиногьид йеза̄къалӀо: йа кӀобала, йа хуржалла, йа баьба, йа окко, гьула̄зу къо̄-къона мухунна къацӀо йеза̄къалӀо. 4Нӣйа билӀоъ мекьедана, гьолълъо аьлӀаъаш, йаги шагьарбаъаш кьа̄ь мекьецал, вагьалълъо билӀоъ лахбалӀечӀе бечелӀо. 5Амма лъоди миже къабул боваъда, гьулиъис боьвачошлаъ, шагьарбала кавлидой мокъолъ, мизола гьалалъцола̄лъцо пах йолъола, гьоллол аьламатлъилаъ йахъалъгъа.
6Мекьена Гьолло мо̄-мокъова̄ аьлӀа̄ъ на̄назу Рохеллис Хабарна ме̄йо, кӀовакӀова аьдамлана ба̄хъилло.
Гьерод гьаьгьелъна гьихлъойо
7Гьерод ханлилна тухъийо къацӀцӀо караматлис хабар. Гьули гьаьгьелъна гьихлъойо, судлӀо нисода садло нисос зукъойо угъоваъас ахъна Ягья оᵸкъоналӀо. 8Бадлосола нисос зукъойо Иляс авараг оᵸкъоналӀо, гьоᵸсо-гьоᵸсола – аьᵸйда̄ш гьоᵸс авараг угъоваъас ахъналӀо. 9Гьероди нисойо:
– Ягьяс до къаьм йуьчӀиллина зукъойо. СукӀод Гьули, вагьло хабар гьинис дил тухъилцас?
Гьули эга̄л атӀна икье-аькьеш зукъойо Гьерод.
Лъина гьазайликьа оᵸкъова сукӀос бешна оᵸха йовацӀийо
10Чапарла кьа̄ь мокъолъ, Исахъа йеᵸйагьийо гьиде йо̄-йо̄ва жойлас хабалла. Бета бадло аьдамла̄дойс гьолло̄лна бежеллина, Гьули эᵸкьейо БетсаидалӀо нисоцала шагьарлилъда̄. 11Амма халкъилал эᵸкьейас тухълъо, Гьолцогъой муьгъалӀ гьолло̄нна мекьейо. Иса гьолло̄л къабул богьна Аллагьлила Парчагьлис хабарна ме̄йо, бета сагъ бовал нуцӀова̄ аьдамлана ба̄хъилло.
12Водо нисда̄кийо. АцӀона къона асгьабла гьицана мекьена Гьолцохъа нисойо:
– Халкъ меццабакӀа, гьицайцӀо гаьгьийа̄ аьлӀа̄ъна хъунна̄ъна гьидел буватӀанна бесанна маьче михъолас, судлӀо нисода иле гьолӀоъ аьдам-сукӀо гаьчча боьчӀчӀо авлахълиъ гей.
13Амма Иса гьоллохъа нисойо:
– Миже нилӀаъче гьоллол бесал кен!
Гьогло нисойо:
– Лъина баьбана къона бисана̄ъ бади кен-оᵸх гаьъа илохъа, къацӀцӀолал оьлло кен йохал мекьеда бахъас иле.
14Гьулиъ зукъойо лъина гьазайликьа оᵸкъойо або. Амма Иса нисойо Гьинила асгьабла̄хъа:
– Миже гьолло̄л, лъӣ-лъинайиг хъогьна мухъликьа къе̄ бечела!
15Гьогцо нисогъа къацӀцӀа̄ гьолло̄л къе̄ бечелло. 16Иса лъина баьбана къона бисана бокчина, гьаᵸсаъда̄на говацӀона, кенлил доьъа бо̄йо, бета бувакӀинна асгьабла̄хъа халкъилал битӀал нилӀийо. 17КъацӀцӀа̄ оᵸха йоваццал бесийо. Муьгъатта̄ гьихлъойо роилла̄с ацӀона къона кедна боцӀийо.
Петерис Иса Масигь гаьгьийакьа йакӀо йоᵸкъос, Иса аварагли жу угъоцаласна кьа̄ь чӀаго ахъцаласна нисос
18Гьоᵸс водолалъ аьдам-сукӀо гаьчча мицаъ тӀаъатлиъ гаьгьийа мехлаъ, Гьинила асгьабла̄хъа Гьолцо нисолло:
– Халкъила До сукӀолъилаъад бикӀзи о̄с?
19Гьолло жаваб нилӀийо:
– Садло Ягья авараг, бадло Иляс авараг, гьоᵸсола бадо̄лъола аварагла̄ъас гьоᵸсцойс угъойо авараг аьгъиъна гейлӀо нисос.
20Иса гьоллохъа кьа̄ьна нисолло:
– Миже сукӀолъилаъад До бикӀзи о̄с?
Петерли жаваб нилӀийо:
– Аллагьлис Масигь.
21Амма Гьолцо асгьабла̄хъа лъази йо̄йо вагьалълъос гьоᵸссидихъана гьокӀ йагъа̄къалӀо нисона.
22– Аьдамлила Оьждил тели азаб-акъуба бега̄л нуцӀос: букъа̄ кашишла̄на, гьаькимла̄на, вагьла̄зу диниябла аьлимла̄на гьинкьас инкар бо̄с, бета жу икьеш, лъанасла водиъ угъоваъас ахъца, – лӀо нисойо Гьолцо.
23Бетана Иса къацӀцӀолахъа нисойо:
– Дӣгъой говал атӀийо сукӀо зогъда, гьинкьас ко̄на йагъала, шибаб водиъ гьинис хъанчна бохала, Дӣгъойна говала. 24СудлӀо нисода гьинис ругь цӀуми бовал батӀийо сукӀо, гьолълъо ругьлиъис маьгьрум ахъца. Дил оьло ругь нилӀийа сукӀос, ругь хъосар бахъца. 25Гьинизу жуна угъонна, йана гьинилзу гьини зарална богьна, вагьалӀо къацӀцӀо дуниялликьа ханлъилаъ аьдам ахъналӀона инсаллил сийона хайир гейди? 26Дона дие йаьжена бикӀзи йойэш сукӀо, Аьдамлила Оьждина бикӀзи оваъас, Гьинилана, Аболана, мукъадабла малаикла̄лана къудратликьа Гьули оᵸкъолъ. 27Гьаькъкъаб жо гейлӀо нисос мизохъа: вагьалӀоъ бечейа̄ла гьоᵸсолал хел мокъаъас Аллагьлис Парчагьлъи йегайчӀе.
Иса авараг бадизу ахъийо
28Вагьла̄ нисона муьгъатта̄ белӀналъийо водо йеᵸкьелъ, Петерна, Иоаннана, Якъубна къацӀо мокъона тӀаъат-ибадат бовал Иса эᵸкьейо ма̄ькьа. 29Гьуна вагьлиъ доьъа-гьари бо̄слаъ, Гьолцола мотӀолис куц хужойо, магъокьас лъицӀона бабалолъна гьаьлдолъийо. 30Гьуна вагьлиъ къона або Гьолцохъа икълашеш зукъойо. Гьолло̄л зувакъойо Мусана Илясна. 31Гьогго̄л мовакъойо букъа рец-нурликьа. Гьогло нисойо Иерусалимлиъ оᵸкъолъ, Иса Аллагьлис амрона тӀубази богьна гьолӀо дунияликьас эᵸкьешлӀо. 32Петерна къацӀо гаьгьийа̄на йуькьеэшла милӀаъ зувакъойо, амма лъуьъбалӀолъ, Иса букъа рец-нурликьа эга̄йо, эцокьа эчейо къона сукӀона эга̄йо. 33Гьогго̄л къонана сукӀоба бовачошлаъ, гьинил нисоцас йикъечӀе Петери Исахъа нисойо:
– Йа̄ НасигьатсукӀо! Илол гьолӀоъ ахо гей. Лъана къай бовал: гьоᵸс Дул, гьоᵸс Мусал, гьоᵸс Илясил!
34Гьолцохъа вагьли нисослаъ, гьаᵸс-мусна йоᵸкъона, гьоллол гьидоци йахъийо. Вагьалълъо гьаᵸса-мусаъ гьогго̄л эᵸдобаклъо, асгьабла̄с йилӀа гьицӀода йейакийо. 35Бета гьаᵸса-мусаъкьа̄ гьодлол гьоᵸс гьокӀ тухъийо:
– Гьули гей до гьакӀийо Дие оьжо. Гьолцохъа миже энекзи ба̄хъ!
36Вагьли гьокӀ тухъийаъ, Иса гьоᵸсцо гьихлъойо.
Гьоглос гьокӀа йоваъийо, гьидел йега̄йо жо асгьабла̄ вагьагло водла̄ъ гьоᵸссидихъана нисеэш.
Иса зиннала̄ охийо гьоᵸс оьжо сагъ о̄йо
37Бета хиса ма̄ькьаш лӀийо мокъолъ, Исал данде тели аьлам мекьейо. 38Гьуна вагьлиъ, халкъилаъ эᵸдо гаьгьийо гьоᵸс сукӀо илӀела̄йо:
– Йа̄ Муалим! Гьарзи йо̄с Дӯхъа, диела гьоᵸс гаьгьийа оьждихъа гоцӀохъ. 39Гьуна зама-замаллиъ зинналли охца гьули: гелокьас гьолцо хъаьлӀеш, илӀелас, муьшо мокъонна сикӀаъ поьп чӀалӀеллис. Тели азаб-акъобана нилӀна гьаьлалъ эццакӀца зинналли гьули. 40Дибола асгьабла̄хъа гьарзи йо̄йо зиннал боцӀалӀо нисона, амма гьоллохъа боцӀна бахъеэш.
41Иса жаваб нилӀна нисойо:
– Йа̄ иман гаьччо мекъаб агьло! Нитокцалди До мизогъой ахъал, нитокцалди миже гьекези бовал?
Бета гьолцо сукӀохъа нисойо:
– Акъа гьолӀоъ дибо оьжо, – лӀо.
42Акъона го̄сла̄ъна, зиннал оьждикьа богицӀийо, къе̄на экинна гьолцол вагьго унти мокъолло. Иса зинналлихъа оьлиллалӀо нисойо, бета сагъ огьна оьжо абохъа нилӀийо. 43Аллагьлис гьаьлкӀолъи йегасдилӀо нисона къацӀцӀа̄ гьикмат ба̄хъийо.
Иса жу угъоцаласна кьа̄ь ахъцаласна бетана нисойо
Йо̄ва муъжизатли къацӀцӀа̄ гьайран бовагьна гаьгьийа мехлаъ, Гьолцо асгьабла̄хъа нисойо:
44– Вагьаддо̄л Дие йаьжбо миже йакӀкьа йоваха: Аьдамлис Оьжо гьаколъечӀе аьдамла̄ла каъ ницца.
45Амма асгьабла̄л нисойо жойлас маъна биджи бахъеэш. Гьулина нисона зукъойо гьоллол йикъаъалъгъа. Гьолълъос нисолал гьолло̄лна гьийабачӀейо.
МутӀиъ бахъал нуцӀоцалас малъи
46Гьоᵸс водолалъ бахъийолӀо асгьабла̄ъ эᵸдо даьъба, сукӀод гьидеъ эᵸдо биссун укъо гейлӀо нисона. 47Гьоллола йакӀиъ гаьгьийо пикрона бикъена, Иса окчина гьоᵸс итӀино къова голца Гьиндой шеблаъ. 48Бета гьоллохъа нисос:
– Диллабза вагьди къова охийо сукӀо Дона охийо сукӀо ахъца. До къабул о̄ва До мизодой э̄ᵸйо Аллагьна къабул о̄с. Вагьалълъобза мизоъ эᵸдос бишшун итӀино бишшун укъо ахъца.
49Вагьалълъол Иоанни нисойо:
– Йа̄ НасигьатсукӀо! Илол иᵸхъойо Дибо ца̄на йагъона аьдамла̄ъаш зинналла йоваццас гьоᵸс сукӀо. Иле гьукъзи йо̄йо гьолцол, судлӀо нисода илогъой муьгъалӀ говаъцас сукӀо гаьлълъо.
50Иса гьолцохъа нисойо:
– Гьукъзи йова̄къа, мизол данде эчеэш сукӀо мизос рахъ бохийо сукӀо ахъца.
Самариялила сид аьлӀа Исал гьоболлъи йойэш
51Жу гьаᵸсаъ эᵸкьал нуцӀойо водбо кьодо йоᵸвакъалъе̄лъ, Иса Иерусалимлиъ эᵸкьал гьоькмо бо̄йо.
52Жу оᵸкъолъол гьаьдурлъилал Гьинис асгьабла ме̄йо. Мекьена Самариялила сид аьлӀаъ бечейо гьолло̄л, Иса оᵸкъолъол гьаьдурлъина йогьна. 53Амма гьулиъ Иса къабул ойэш, Гьули Иерусалимлиъ эᵸкьецас икъелъ. 54Вагьли йикъелъ, асгьабла̄ Якъубина Иоаннина нисойо:
– Йа̄ БетӀерчӀахъаяв! Дул йадда иле нисал, Иляс авараглицой, гьолло аьдамла̄л гьаᵸсаъкьа̄ цӀойис балагь мокъонна бувагъолалӀо.
55Амма, кӀаьйна уьᵸхона, гьоллос гьокӀа йоваъиллийо:
56– Мизол бийакъаъас миже нӣйа Ругьлис гаьгьийа̄на. Аьдамлис Оьжо дуниялликьа оᵸкъона гей аьдамла хъосар бовал, бувагъолал гаьъа Гьули дуниялликьа ахъна.
Бета гьулиъис Исана асгьаблана балӀо аьлӀаъ мекьейо.
Иса авараглигъой муьгъалӀ мекьейо
57Гьид мекьешлаъ, сид сукӀо Исахъа нисойо:
– До го̄с Дӯгъой, Ми на̄ эᵸкьедана.
58Иса гьолцохъа нисойо:
– Сора̄с йецал къоьчӀова гей, гьаᵸсаъла мигьна̄с сӣᵸбо гей, амма Аьдамлила Оьждис къаьм гулал маьче гаьъа.
59Иса бацохъана нисойо:
– Тос Дӣгъой.
Гьолцо жаваб нилӀийо:
– Йа̄ БетӀерчӀахъаяв! Гьакъкъа дил изно нилӀа дие угъойо або иᵸхъолал.
60Амма Иса гьолцохъа нисойо:
– Бувагъова̄ аьдамла̄ гьидес бувагъова̄ мийахъолала, ми эᵸкье Аллагьлила Парчагьлис хабар мейал.
61Бацосола Гьолцохъа нисолло:
– До Дӯгъой къацӀо говал, БетӀерчӀахъаяв! Амма агьло-хъизаллихъа ахо бечелӀо нисал изно нилӀа дил.
62Гьолцохъана Иса нисойо:
– Маьче болӀослаъ боъосбас мигъна йохна, муьгъатта̄ говацӀоцас сукӀо Аллагьлила Парчагьлиъ кьухъаъас.
လက္ရွိေရြးခ်ယ္ထားမွု
Лука 9: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)