Насигьятар 24

1Пис инсанариин бахил махьан,

дурарикан сар хьуз махъачӀарккан,

2инсафсуз ляхнар а дурарин фикрариъ,

шлиз-вуш бала гьязур апӀура дурарин ушвари.

3Аькьвли тикмиш апӀура хал,

душваъ фагьми мюгькам апӀура тухмар,

4хъа аьгъюваларира абцӀра ужагъ

багьа ва тухъ шейʼарихъди.

5Аькьюл айир кьувватлу ву,

гъурдаъ аьгъювалар айир къудратлу ву.

6Дяви гъабхури, хъебехъ теклифарихъ:

насигьят туврудар гизаф айишваъ гъалибвал а.

7Ахмакьриз аькьюл рубкьруб дар,

гимихъ дугъхьан ушв абццуз хьибдар.

8ЧӀуруб ккабалгруриз

фендигар пиди.

9Ахмакьрин ниятар ву гуннагь,

ягьсузра инсанариз ву хяви.

10Эгер яв рюгь бала гъядябхъю йигъан гъюбгъиш –

дугъридан яв рюгь зяифуб вуяв.

11Аьжал гьадабтӀнайидар ккадаъ!

ЙикӀуз гьадагънайидар уьрх!

12Пидива: «Учуз аьгъдайчуз дидкан!»

Аммаки юкӀвар ахтармиш АпӀруриз хабар а,

вари аьгъя яв уьмрин Гъаравлиз –

Дугъу гьардиз, чаз лигну тувди.

13Йиччв ипӀин, йиз бай, думу ужуб ву,

фицики йиччв яв ушвниз меэлди ву.

14Гьациб ву аькьюлра яв гъяназ,

гъибихънуш думу увуз – авуз гележег,

ва яв умударра гъюдучӀвидар.

15Гьякьлуйин хуларихь гьякьсузси меккеан,

дугъан ужагъ мапӀан тӀараш:

16гьякьлур ургубан алдакиди, амма гъудужвиди,

хъа гьякьсузар ахъди ва хьибди бала дурариз!

17Алдакнийин яв душман – шад махьан,

хъарснийин – гъит шад гьарай адрабхъри яв кӀваъ,

18дарди гъабшиш, рябкъиди РАББИЙИЗ, гьисаб апӀиди думу, писвалси,

ва Чан хъял яв душмнилан алдабгъидар.

19Писдарикан хъял мапӀан,

гьякьсузариин бахил махьан,

20фицики писвалихъ гележег хътар,

гьякьсузарин ктӀубшвиди лампа.

21РАББИЙИХЬАН ва паччагьдихьан гучӀ апӀин, жан бай,

гьюкмиз къаршу гъедергрударихьан гъирагъ йив,

22фицики бала гъибди дурарихьна хабарсузди:

гъавриъ ана, фициб гьял РАББИЙИНА паччагьди дурариин алапӀуруш?

Аькьюл айидарин жара мисалар

23Магьа аькьюл айидарин жара гафар.

Шлин-вуш тереф бисру суд – ужуб ляхин дар;

24шли гьякьсузриз: «Яв тахсир дар» гъапиш –

агьнакк кка халкьарин,

нигь дапӀна миллетари.

25Гьацдариз жаза туврудариз бахт хьибди,

ужувлар дурариин алахьиди.

26Дугъри жаваб –

мак апӀбак гьисаб ву.

27Сифте икир ккабалг,

хъюгъ яв хутӀлихъ,

ва хъасин увуз див хал.

28Жарарикан мапӀан кучӀлин шагьидвал –

гъит дарибшри яв кӀвантӀариин кучӀал.

29«Дугъу узуз гьапӀнуш, узура дугъаз гьаци апӀидиза!

Алдабгъидиза дугълан хъял!» – гьамци макӀан.

30Сабан гъярайза хутӀлихьантина темплин,

тӀумтӀин багъдихьантина фикирсуз эйсийин,

31гьаци магьа: гьар йишваъ аьхю дубхьна заз,

варишвар ацӀна чӀуру укӀари,

дарабгъна гъвандин арчил.

32Гъилигунза, фикир гъапӀунза,

магьа узуз фу гъябкънуш ва гъаври гъахьиза:

33хъана цӀиб ахарва, улар мани апӀарва,

хил хлиин иливну хъана дусарва –

34ва гъибди увухьна касибвал, тӀафалси,

аьжузвал гъибди тӀарашчиси.

လက္ရွိေရြးခ်ယ္ထားမွု

Насигьятар 24: ТабГК

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Гирами Китаб အေၾကာင္းကို ပို၍ သင္ယူပါ။