Насигьятар 20

1Чяхри аьлхъюз гъитру, ичкийи гъярхьуз гъитру,

дурариин аьшкьламиш гъашириз, аькьюл шлуб дар.

2Паччагьдин яман хъял асландин ккярябгъюбсиб ву,

думу жвувʼина хуб – жвуву жвуваз апӀурайи гуннагь ву.

3Гьюжатарихьан ярхла вуйириз – гьюрмат,

гьарсар ахмакьри апӀуру гъалмагъалихьна гьяракат.

4Темпли хутӀил вахтниинди хътабкдар,

гьаддиз иган апӀру вахтна дугъаз фукӀара бихъдар.

5Инсандин ниятар дерин гъуйдин штар ву,

фагьумлуйихьан дидʼан хьибди адабцӀуз.

6Гизафдари чпин вафалуваликан гьарай ипру,

аммаки дицир инсан дихъуйкӀан яраб?

7Гьякьлур ктрацӀди яшамиш шулу,

гьацирин наслар, хушбахтаврар ву!

8Паччагь тахтниин суд апӀуз деиган,

дугъан саб лигбу микӀлахь гьипди писвал.

9Шли пиди: «Адариз кӀваъ харживал,

йиз гунгьихьан узу марцц гъахьунза»?

10Алвер апӀруган, кучӀлин гирйирна метрйир –

му вари РАББИЙИЗ хявишин ву.

11БицӀирра кмиди аьгъю шулу ляхнариинди:

марццидар вуш, дюзидар вуш дугъан ляхнар.

12Ебхьру иб, рябкъру ул –

мура, тмура яратмиш дапӀна РАББИЙИ.

13Ккундувуз ахуз – алабхъидивуин касибвал;

ул иливидарва – ипӀидива ацӀайиз.

14«Башаккадру мутму ву!» – гъадабгърури кӀуру,

ва цӀиб гьудучӀвайизра, тяриф апӀуз хъюгъру.

15Ал дюнʼяйиин гъизил, ал жавагьир гъванар,

аммаки гьарсабдикан аьгъю мелз – хъана багьа ву.

16Чаз аьгъдру касдин буржарихъанди гаф туврурин палатра тадабгъиди,

Жарарин хъпирихъди гъахьиризра гьациб хьибди.

17Алдатмиш дапӀну гъибису уьл меэлди шулу,

аммаки ушвниъ думу гъумраз илтӀибкӀиди.

18Яв апӀуз ккайи ляхнар жарадарихъди гьял апӀуз кӀваълан магьархан;

дяви гъабхуради, хъебехъ теклифарихъ.

19Футнийир даргърури сирарра масу тувди,

гьаци вуйиган, лагълагъчийин тай махьан.

20Адашдизна дадайиз агьрар апӀрурин

кутӀубшвиди лампа яман мучӀушнаъ.

21Сифте рягьятди ккубкьу девлетну

хъасин ужувлахъна дархур.

22МакӀан: «ГъапӀу чӀуруб алдабгъидиза!»

Хъугъвал апӀин РАББИЙИИН, ва Дугъу уьрхидиву.

23Ариш-веришдиъ кучӀал апӀуб РАББИЙИЗ хяви ву,

дюз дару терезар пис ляхин ву.

24РАББИЙИ аъра адми рякъюъ,

гьаддиз саризра аьгъдар чаз закур фу шулуш.

25Инсандиз гьялкья – гьялакди гъапӀу ху,

ясана РАББИЙИЗ фикир дарапӀди туву гаф.

26Аькьюл айи паччагьди, микӀлахь гьахьди гьякьсузар,

дурарилантина гъахиди гад апӀру гадар.

27Инсандиъ рюгь – РАББИЙИН лампа ву,

айтӀантинара вари рябкъюз гъитру.

28Гьякьну ва рягьми уьрхюра паччагь,

дугъривалиинди мюгькам апӀура тахт.

29Жигьилар кьувватну уткан апӀура,

кьабидар лизишну кбалгура.

30Инсан писвалихьан чак куркӀу зийнари марцц апӀура,

гъурччвурин хасият къайдайиз гъюра.

လက္ရွိေရြးခ်ယ္ထားမွု

Насигьятар 20: ТабГК

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Гирами Китаб အေၾကာင္းကို ပို၍ သင္ယူပါ။

Насигьятар 20