Насигьятар 19
19
1Марцциди яшамиш шулайи касибди ужу ву,
кучӀлин гафар мелзниин алди, абдалди хьайиз.
2Аьгъювалар адарди ужу даршул:
гьялак ликар хъарсну алдакиди.
3Ахмакьвали инсандин уьмур чӀур апӀуру,
хъа гьаддин тахсир дугъу РАББИЙИИН илипуру.
4Девлетну дустарин кьадар артухъ апӀуру,
касибвали дустарихьан гьадахъуз гъитру.
5Жазайихьан гьергидар кучӀлин шагьид,
кучӀал нефес деебтрур ккутӀурччвидар.
6Гизафдар гьюкумдариккан ккидицури шулу,
ва пешкешар апӀрурихъди варди дуствал апӀуру.
7Касибур гъардшаризра кмиди даккунди ву,
дустарра дугъхьан ярхлаанси гъягъюру:
гьялакди ву думу гаф капӀуз, хъа дустарин шил имдар!
8Абгура фагьум ужуб ккунири:
гъадабгъиди ужʼвал аькьюл уьбхрури.
9Жазайихьан гьергидар кучӀлин шагьид,
кучӀлиинди хътабгъурайир ил йикӀиди.
10Абдлиз девлетлу уьмур лайикь дар,
хъа лукӀру аьхюдариин гьюкум дапӀну ккундар.
11Фикирлуйи чаз хъял гъюз гъибтдар,
гирнарилан хил алдабгъувал ву зурбавал.
12Паччагьдин хъял асландин ккярябгъювалсиб ву,
хъа паччагьдин масанвал укӀʼин али чигсиб ву.
13Абдал бай адашдиз бедбахтвал ву,
хъа улхру хпир литӀнар гъюру гъваик гьисаб ву.
14Хал ва девлет – абйириланмина вуйи ирс,
хъа фагьумлу хпир – РАББИЙИХЬАН бахшанд.
15ТӀагърур гьарган ижми нивкӀуъ хьиди,
хъа лихуз даккнир гашʼвалиъ ахъди.
16Табшуругъ уьбхрури уьбхюра уьмур,
хъа йикӀиди чан рякъкан фикир дарапӀрур.
17Шли касибуриз тувраш, РАББИЙИЗ буржди тувра,
хъа РАББИЙИ дугъаз кьяляхъ тутрувди гъибтдар.
18Бализ тербия тув, кьан шайиз,
лиг, дугъан аьжалин тахсиркар махьан.
19Гъит гьадабтӀри жаза хъял кубчӀвруриз,
дугъаз хил хъибтиш, хьибди айибтӀан пис.
20Хъебехъ теклифнахъ, кьабул апӀин насигьят,
аькьюл артухъ хьибдияв, яшар хьпахъ.
21Гизаф кьастар а инсандин кӀваъ,
тамам хьибди РАББИЙИ гьял гъапӀуб.
22Инсандиъ вафалувал ади ккунду:
кучӀляхтӀан касиб вуди ужу ву.
23РАББИЙИХЬАН вуйи гучӀ хьайивали уьмрихъна хура:
дидихьди ацӀнайир архаинди ахура,
дугъʼин улубкьидар бала.
24Темплиз чан гъабраан ипӀруб
чан ушвнихъна гъабхузра тӀагъруди шулу.
25Ягьсузриз жаза гьадабтӀара – авамар фикрихъна гъиди,
фагьумлуйиз хъжаргъарва – думу яв илмин гъавриъ ахъди.
26Адашдиз хътӀурччвру,
дада утӀуккру бализ – нач ва аьйиб!
27Жан бай, насигьятарихъ хъпехъури даршиш,
увуз аьгъюбра гьархдивуз кӀваълан.
28Лазим дару шагьид дюз суддик кялхъри шулу,
къанун чӀюбгъюб гьякьсузариз хурагнак гьисаб ву.
29Ягьсуз ккутӀурччвидар суддиккан,
хъа абдлин йирфар – йивбариккан.
လက္ရွိေရြးခ်ယ္ထားမွု
Насигьятар 19: ТабГК
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Институт перевода Библии, 2010, 2013, 2016, 2018, 2023