Loos 3
3
1Puas yog cov Yudais tsimtxaj dlua Lwmtsaav Tuabneeg? Lossis qhov kws ua kevcai txav ntawd muajnqes dlaabtsi? 2Yeej muajnqes rua txhua yaam! Thawj qhov, yog Vaajtswv muab Nwg txujlug rua cov Yudais tuav. 3Tabsis yog puab qeeleej tsi ncaajnceeg, puas txhais tau has tas Vaajtswv yuav tsi ncaajnceeg hab? 4Tsi yog le ntawd! Txawm yog txhua tug dlaag los Vaajtswv yeej tsi dlaag. Lawvle Vaajtswv Txujlug tau has tseg has tas,
“Thaus Koj haslug suavdlawg yeej yuav paub tas Koj has tseeb;
thaus luas taug Koj zaaj, suavdlawg yeej yuav paub tas Koj tsi tau ua txhum.” #Nnkauj 51:4
5Tabsis yog peb tej kev phem ua rua suavdlawg pum Vaajtswv txuj kev ncaajnceeg meej dlua qub ntxiv, peb ho yuav has lecaag? Peb yuav has tas thaus Vaajtswv rautxim rua peb, Nwg ua tsi ncaaj lawm nua lov? (Kuv has le tuabneeg has.) 6Tsi yog le ntawd! Yog tas Vaajtswv tsi ncaaj, Nwg yuav ua lecaag txavtxim rua tuabneeg nplajteb?
7Tabsis yog kuv txuj kev tsi ncaajnceeg ua rua suavdlawg pum Vaajtswv tug tshwjchim luj dlua qub hab tseem ua rua Nwg txuj kev ncaajnceeg meej dlua qub ntxiv, ua lecaag kuv tseem raug txim ib yaam le tug tuabneeg txhum hab? 8Yogle ntawd, uacaag ho tsi has tas, “Ca peb moog ua qhov phem kuas peb tau qhov zoo”? Muaj qeeleej txobthuam kuv hab puab lam has tas kuv yog tug kws has cov lug ntawd ntaag! Qhov puab raug txim le ntawd yeej tsimnyog lawm.
Tsi Muaj Ib tug Tuabneeg Ncaajnceeg Le
9Yogle ntawd, peb cov kws yog tuabneeg Yudais, puas yog peb zoo dlua Lwmtsaav Tuabneeg? Tsi yog le ntawd!#3:9: zoo dlua Lwmtsaav Tuabneeg? Tsi yog le ntawd!; lossis phem dlua Lwmtsaav Tuabneeg? Kuj yuav tsi yog le ntawd. Kuv tub qha lawm has tas taagnrho cov tuabneeg Yudais hab Lwmtsaav Tuabneeg puavleej nyob huvqaab txuj kev txhum lub fwjchim. 10Lawvle Vaajtswv tej Lug has tas:
“Yeej tsi muaj ib tug tuabneeg ncaajnceeg hlo le, #Nnkauj 14:1-3 (LXX); Nnkauj 53:1-3 (LXX)
11tsi muaj ib tug totaub
lossis nrhav Vaajtswv le.
12Txhua tug tau tig tawm ntawm Vaajtswv moog lawm;
puab txhua tug dlhau moog ua tuabneeg phem huv tuabsi;
yeej tsi muaj ib tug kws ua qhov zoole, txawm yog tuabtug xwb los tub tsi muaj.
13Puab lub qaa zoo ib yaam le lub qhovntxaa kws qheb lug ca;
puab tug nplaig has tej lug dlaag;
puab dlaim tawvncauj muaj taug ib yaam le taug naab. #Nnkauj 5:9 (LXX); Nnkauj 140:3
14Puab lub qhovncauj puvnpo tej lug foom hab lug ab lug dlaw. #Nnkauj 10:7 (LXX)
15Puab txhais kutaw maajnroog rua txuj kev kws ua kuas lwmtug ntshaav nrug; #Yaxaya 59:7-8
16puab moog txug twg, kev txomnyem hab kev puamtsuaj moog txug ntawd.
17Puab yeej tsi paub txug txuj kev thaajyeeb,
18lossis paub ntshai Vaajtswv hlo le.” #Nnkauj 36:1
19Nwgnuav peb paub tas txhua yaam kws sau nyob rua huv txuj Kevcai yog has rua cov kws nyob huvqaab txuj Kevcai, sub txhua tug txhaj tsi muaj lug has, hab txhaj yuav coj tau taagnrho lub nplajteb nuav lug rua Vaajtswv txuj kev txavtxim. 20Ruaqhov txhua tug kws ua lawvle txuj Kevcai qha yeej tsi muaj ib tug ncaajnceeg taabmeeg Vaajtswv le; txuj kevcai ntawd tsuas qha kuas peb paub tas peb tau ua txhum lawm nua xwb. #Nnkauj 143:2; Kalat 2:16
Vaajtswv Ua Rua Peb Ncaajnceeg Tau Lecaag
21Tabsis qhov kws nwgnuav Vaajtswv suav has tas tuabneeg ncaajnceeg taabmeeg Vaajtswv tsi yog vim txuj kevcai; Mauxes txuj Kevcai hab cov xwbfwb cev Vaajtswv lug los kuj tau ua timkhawv has txug zaaj nuav. 22Vaajtswv suav has tas txhua tug kws lug ntseeg Yexus Khetos yog tuabneeg ncaajnceeg. Vaajtswv ua le ntawd rua txhua tug kws ntseeg Khetos, ruaqhov yeej tsi muaj qhov sistxawv: #Kalat 2:16 23vim txhua tug puavleej tau ua txhum hab ncaav tsi cuag Vaajtswv tug tshwjchim. 24Tabsis lug ntawm Vaajtswv txuj moovhlub kws Nwg tau muab pub dlawb rua tuabneeg, Nwg txhaj suav has tas txhua tug ncaajnceeg vim Yexus Khetos tau lug txhwv suavdlawg dlim lawm.
25-26Vaajtswv tau khaiv Yexus Khetos lug tuag theej tuabneeg lub txhoj, sub lug ntawm Nwg cov ntshaav, tuabneeg tej kev txhum txhaj yuav raug zaam vim puab ntseeg Nwg. Vaajtswv ua le ntawd kuas qha tau has tas Nwg yog tug ncaajnceeg. Yaav taag lug Nwg ua sabntev hab tsi rautxim rua cov tuabneeg kws ua kev txhum; tabsis nwgnuav Nwg rautxim rua cov kws ua kev txhum, kuas qha tau has tas Nwg yog tug ncaajnceeg. Qhov nuav yog Vaajtswv qha has tas Nwg yog tug ncaajnceeg hab yog tug paab kuas txhua tug kws ntseeg Yexus Khetos dlhau tau lug ua tuabneeg ncaajnceeg.
27Yogle ntawd, peb yuav muab dlaabtsi lug khaav tau? Yeej tsi muaj ib yaam dlaabtsi le tag! Yuav khaav txug dlaabtsi? Khaav has tas peb coj tau lawvle txuj Kevcai nua lov? Tsi yog le ntawd, peb tsuas khaav txug qhov kws peb ntseeg Yexus Khetos nkaus xwb. 28Yogle ntawd peb pum tas tsuas yog lug ntawm txuj kev ntseeg nkaus xwb, Vaajtswv txhaj suav has tas tug tuabneeg ntawd ncaajnceeg, tsi yog lug ntawm qhov kws nwg coj lawvle txuj Kevcai qha.
29Vaajtswv tsuas yog cov Yudais tug Vaajtswv xwb lov? Nwg tsi yog Lwmtsaav Tuabneeg tug Vaajtswv lov? Tseeb tag, Nwg yeej yog Lwmtsaav Tuabneeg tug Vaajtswv hab. 30Tsuas muaj tuabtug Vaajtswv xwb, hab Nwg yeej suav has tas txhua tug kws ntseeg Yexus Khetos, tsi has cov Yudais lossis Lwmtsaav Tuabneeg, puavleej yog cov kws ncaajnceeg. #2Kev 6:4; Kalat 3:20 31Yogle ntawd, qhov kws peb ntseeg Yexus nuav, puas suav tau has tas peb muab txuj Kevcai rhuav povtseg? Tsi yog le ntawd! Peb tseem yuav hajyam tuav txuj Kevcai ntawd kuas ruaj ntxiv xwb.
လက္ရွိေရြးခ်ယ္ထားမွု
Loos 3: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.