Loos 2
2
Vaajtswv Txuj Kev Txavtxim
1Yogle ntawd, tug phoojywg, koj puas txavtxim rua lwmtug hab? Koj yuav nyam yog leejtwg los xij, koj yeej zaam tsi tau le. Ruaqhov yog koj txavtxim rua lwmtug taag, tabsis koj ho ua tuabyaam nkaus le puab ua hab, tes yog koj teemtxim rua koj xwb. #Math 7:1; Lukas 6:37 2Peb paub tas thaus Vaajtswv txavtxim rua cov tuabneeg kws ua tej ntawd Nwg ua yog lawm. 3Tabsis tug phoojywg, koj tseem ua kag yaam kws koj txavtxim rua lwmtug vim puab ua yaam koj ua ntawd hab! Koj xaav tas koj yuav tsiv dlim Vaajtswv txuj kev txavtxim nua lov? 4Lossis puas yog koj tuammom qhov kws Vaajtswv ua sabdlawb sabzoo, hab ua sabluj sabntev rua koj? Koj puas paub tas qhov kws Vaajtswv ua sabdlawb sabzoo rua koj ntawd yog Nwg xaav kuas koj tso koj tej kev txhum tseg?
5Tabsis koj muaj lub sab kws tawv ncauj hab tsi kaam tso koj tej kev txhum tseg le, qhov ntawd yog koj rov teemtxim nyaav ntxiv rua koj rua Nub kws Vaajtswv yuav qha txug Nwg txuj kev npautawg hab kev txavtxim ncaajnceeg. 6Ruaqhov Vaajtswv yuav muab nqezug rua txhua tug lawvle tegnum kws nwg tau ua lug lawm. #Nnkauj 62:12; Paaj 24:12 7Vaajtswv yuav muab txujsa ntev dlhawv moog ibtxhis rua cov tuabneeg kws najnub ua zoo; nrhav Vaajtswv tug tshwjchim, nrhav Nwg txuj kev qhuas, hab nrhav txujsa kws tsi txawj tuag. 8Vaajtswv yuav chim hab npautawg rua cov tuabneeg kws ua lawvle puab lub sab nyam, tsi nyam qhov tseeb, tabsis nyam kev phem kev qas. 9Txhua tug tuabneeg kws ua phem yuav raug kev txomnyem hab nyuajsab; cov Yudais yuav xub raug uantej, tomqaab ntawd yog Lwmtsaav Tuabneeg. 10Tabsis Vaajtswv yuav pub tshwjchim, yuav qhuas, hab pub kev kaajsab rua txhua tug kws ua zoo; yuav xub pub rua cov Yudais uantej, tomqaab ntawd yuav pub rua Lwmtsaav Tuabneeg. 11Ruaqhov Vaajtswv yeej txavtxim rua txhua tug ib yaam nkaus. #2Kev 10:17
12Lwmtsaav Tuabneeg kws tsi muaj Mauxes txuj Kevcai, thaus puab ua txhum, puab raug puamtsuaj tabsis yuav tsi raug txavtxim lug ntawm txuj Kevcai. Cov Yudais muaj txuj Kevcai, thaus puab ua txhum, puab yuav raug txavtxim lug ntawm txuj Kevcai ntawd. 13Ruaqhov Vaajtswv tsi suav has tas tug tuabneeg kws nov txuj Kevcai yog tug kws ncaajnceeg, tabsis tug tuabneeg kws ua lawvle txuj Kevcai txhaj yog tug tuabneeg ncaajnceeg. 14Lwmtsaav Tuabneeg tsi muaj Mauxes txuj Kevcai, tabsis thaus puab lub sab qha kuas puab ua ib yaam dlaabtsi lawvle txuj Kevcai ntawd qha, tes txawm yog puab tsi muaj txuj Kevcai los puab yeej paub tas muaj ib txuj kevcai tswj puab lawm. 15Puab tug cwjpwm yeej qha tau has tas puab tub muab txuj Kevcai ntawd sau ca rua huv puab lub sab lawm. Puab lub sab kws paub qhov phem qhov zoo yuav qha tau has tas yeej muaj tseeb le ntawd tag, vim qeezag puab lub sab komtxim rua puab, hab qeezag puab lub sab kuj qha has tas puab ua zoo lawm. 16Yogle ntawd, lawvle Txuj Moo Zoo kws kuv qha, Nub kws Vaajtswv txavtxim, Nwg yuav kuas Yexus Khetos txavtxim rua tej kws tuabneeg lub sab xaav nraim nkoog.
Cov Tuabneeg Yudais Hab Txuj Kevcai
17Koj neb, koj suav has tas koj yog tuabneeg Yudais; koj casab rua txuj Kevcai hab koj khaav has tas koj nrug Vaajtswv sis raugzoo. 18Koj paub tej kws Vaajtswv xaav kuas koj ua, hab koj paub qhov phem qhov zoo ruaqhov koj tub tau kawm lug ntawm txuj Kevcai lawm. 19Koj tub paub meej lawm has tas koj yog ib tug kws coj cov dligmuag kev, hab yog lub teeb rua cov kws nyob huv qhov tsausntuj, 20koj yog ib tug kws cobqha cov ruag, hab yog ib tug kws qha cov mivnyuas yau. Koj yeej paub meej tas txuj Kevcai ntawd yog qhov kws ua rua koj puvnpo tswvyim hab qhov tseeb.
21Koj qha lwmtug, ua lecaag koj tsi qha koj tugkheej? Koj qhuabqha has tas, “Tsi xob ua tubsaab,” tabsis koj puas ua tubsaab? 22Koj has tas, “Tsi xob dleev luas quaspuj luas quasyawg,” tabsis koj puas dleev luas quaspuj luas quasyawg? Koj ntxub tej mlom kawg le, tabsis koj puas tseem moog nyag tej khoom kws nyob huv tej tuamtsev teev mlom ntawd? 23Koj khaav has tas koj muaj Vaajtswv txuj Kevcai, tabsis koj puas ua rua Vaajtswv poob ntsejmuag lug ntawm qhov kws koj hlaa Nwg txuj Kevcai ntawd? 24Vaajtswv Txujlug has tas, “Tub yog vim mej cov tuabneeg Yudais ntaag, es Lwmtsaav Tuabneeg txhajle thuam Vaajtswv lub npe.” #Yaxaya 52:5
25Yog koj ua lawvle txuj Kevcai, mas qhov kws koj ua kevcai txav ntawd txhajle muaj qaabhau; tabsis yog koj tsi ua lawvle txuj Kevcai, tes qhov kws koj ua kevcai txav ntawd tsuas zoo ib yaam le tug kws tsi tau ua kevcai txav hab xwb. 26Yog Lwmtsaav Tuabneeg kws yeej tsi tau ua kevcai txav le, tabsis puab ho coj lawvle txuj Kevcai, Vaajtswv yuav tsi suav has tas puab tub ua kevcai txav lawm nua lov? 27Yogle ntawd, Lwmtsaav Tuabneeg kws tsi ua kevcai txav ntawm nqajtawv le, tabsis ho ua lawvle txuj kevcai qha, puab yuav txavtxim rua mej cov kws tub muaj ntaub ntawv sau tseg ca hab tub ua kevcai txav lawm, vim mej tsi ua lawvle txuj Kevcai ntawd.
28Tug kws yog tuabneeg Yudais tag kws yeej ua kevcai txav lawm yog tug zoo lecaag? Tug ntawd yog tug kws tsi laam ua kevcai txav ntawm nqajtawv xwb. 29Tug kws yog tuabneeg Yudais tag, yog tug tuabneeg Yudais huv lub sab lub ntsws, qhov ntawd, yog nwg lub sab tub raug ua kevcai txav lug ntawm Vaajtswv tug Ntsujplig lawm, tsi yog lug ntawm txuj Kevcai. Tug tuabneeg ntawd tsi yog tug kws tuabneeg nplajteb qhuas, tabsis yog tug kws Vaajtswv qhuas. #2Kev 30:6
လက္ရွိေရြးခ်ယ္ထားမွု
Loos 2: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.