Malakaus 14
14
Cov Thawjcoj Nrhav Kev Nteg Yexus
(Mathais 26:1-5; Lukas 22:1-2; Yauhaas 11:45-53)
1Tshuav ob nub xwb tes txug nub ua kevcai Hlaa Dlhau hab ua kevcai Noj Ncuav Tsi Xyaw Keeb. Cov thawj povthawj hlub hab cov xwbfwb kws qha Kevcai taabtom nrhav kev tuabywv yuav nteg Yexus coj moog tua. #Tsiv 12:1-27 2Puab has tas, “Peb tsi xob nteg rua thaus tseem taabtom ua kevcai, nyobtsaam tej pejxeem yuav ua kev kubntxhuv.”
Muab Roj Tswqaab Laub Rua Yexus Nyob Rua Lub Zog Npethanis
(Mathais 26:6-13; Yauhaas 12:1-8)
3Thaus Yexus nyob huv lub zog Npethanis, Nwg su huv Ximoos tug kws thaus u mob ruas lub tsev. Thaus Yexus taabtom noj mov, muaj ib tug quaspuj nqaa ib lub fwj alanpaxataws kws ntim roj tswqaab kim heev kws yog muab nroj naludas ua tuaj. Nwg muab lub ncauj fwj luv, hab muab cov roj tswqaab ntawd laub rua sau Yexus taubhau. #Lukas 7:37-38 4Ibtxha tuabneeg kws nyob ntawd tsi txaussab hab has tas, “Uacaag nwg yuav muab cov roj tswqaab ntawd nkim povtseg? 5Yog muab coj moog muag, yuav tau ntau dlua le 300 lub npib nyaj,#14:5: 300 lub npib nyaj: Saib 6:37. Phoo Kilis sau has tas 300 denalis. hab muab cov nyaj ntawd coj moog pub rua cov tuabneeg pluag kuj zoo dlua!” Hab puab thuam tug quaspuj ntawd nyaav kawg le.
6Tabsis Yexus has rua puab tas, “Ca nwg ua nwg! Mej ua rua nwg ntxhuvsab ua dlaabtsi? Qhov kws nwg ua rua Kuv ntawd yog ib qhov zoo heev. 7Yeej yuav muaj cov tuabneeg pluag nrug mej nyob moog le, mej xaav paab puab thaus twg los yeej tau, tabsis Kuv yuav tsi nrug mej nyob moog le. #2Kev 15:11 8Tug quaspuj nuav yeej ua kawg nwg lub zug lawm. Nwg muab roj tswqaab laub ywg Kuv, tub yog nwg npaaj tu Kuv lub cev uantej kws muab Kuv log. 9Kuv qha tseeb rua mej has tas, txhua thaaj chaw huv qaabntuj nuav kws tuabneeg qha Txuj Moo Zoo moog txug, qhov kws tug quaspuj nuav tau ua, yuav raug muab qha tawm kuas suavdlawg ncu txug nwg.”
Yudas Pumzoo Ntxeevsab Rua Yexus
(Mathais 26:14-16; Lukas 22:3-6)
10Dlhau ntawd, Yudas Ixakali-us kws yog ib tug ntawm kaum-ob tug thwjtim txawm moog cuag cov thawj povthawj hlub, hab xaav muab kuas tau Yexus moog cob rua puab. 11Thaus puab nov le ntawd puab zoosab kawg le, puab coglug has tas puab yuav muab nyaj rua nwg. Yogle ntawd, Yudas txawm pib nrhav sijhawm muab kuas tau Yexus rua puab.
Yexus Nrug Nwg Cov Thwjtim Noj Pluag Mov Ua Kevcai Hlaa Dlhau
(Mathais 26:17-25; Lukas 22:7-14, 21-23; Yauhaas 13:21-30)
12Thawj nub kws ua kevcai Noj Ncuav Tsi Xyaw Keeb, nub ntawd yog nub kws suavdlawg tua mivnyuas yaaj noj ua kevcai Hlaa Dlhau. Yexus cov thwjtim nug Nwg has tas, “Koj xaav kuas peb moog npaaj pluag mov ua kevcai Hlaa Dlhau rua Koj noj qhovtwg?”
13Yexus txawm khaiv Nwg ob tug thwjtim moog hab qha obtug has tas, “Meb moog rua huv nroog, yuav muaj ib tug txivneej kwv ib hub dlej lug ntsib meb. Meb cale lawv nwg qaab moog 14rua huv tsev, hab has rua tug tswvtsev tas, ‘Xwbfwb has tas, Chaav kws koj muab rua Kuv hab Kuv cov thwjtim noj pluag mov ua kevcai Hlaa Dlhau nyob qhovtwg?’ 15Thaus ntawd nwg yuav coj meb nce moog rua txheej sau, hab nwg yuav qha ib chaav dlaav-dlaav kws tub muaj rooj muaj tog txhij lawm rua meb. Meb cale npaaj txhua yaam ca rua qhov ntawd tog peb.”
16Ob tug thwjtim txawm moog huv lub nroog, hab pum txhua yaam lawvle Yexus qha rua obtug; tes obtug txhaj npaaj pluag mov ua kevcai Hlaa Dlhau rua qhov ntawd.
17Thaus tsausntuj, Yexus hab kaum-ob tug thwjtim lug txug. 18Thaus puab taabtom noj mov ntawm rooj, Yexus has tas, “Kuv qha tseeb rua mej has tas, mej cov ko muaj ib tug yuav ntxeevsab rua Kuv, nwg yog tug kws taabtom nrug Kuv noj uake.” #Nnkauj 41:9
19Thaus cov thwjtim nov le ntawd, puab nyuajsab heev, puab nyag taug nyag nug Yexus has tas, “Koj has le ko puas yog kuv?”
20Yexus teb tas, “Yeej yog ib tug ntawm mej kaum-ob leeg nuav ntaag, tug ntawd yog tug kws nrug Kuv koom muab ncuav ntsw huv ib lub taig. 21Tuabneeg Leejtub yeej yuav tuag lawvle Vaajtswv tej Lug sau has txug Nwg lawm, tabsis tug kws ntxeevsab rua Tuabneeg Leejtub, nwg yuav raug kev puamtsuaj luj heev! Yog nwg tsi xob yug lug kuj yuav zoo dlua!”
Tug Tswv Rooj Mov
(Mathais 26:26-30; Lukas 22:14-20; 1 Kauleethaus 11:23-25)
22Thaus puab tseem taabtom noj mov, Yexus muab ib lub ncuav lug ua Vaajtswv tsaug, muab ndlais hab cev rua Nwg cov thwjtim, hab has tas, “Lub ncuav nuav yog Kuv lub cev, mej cale txais moog noj.”
23Tes Nwg muab ib khob cawv txivmaab lug ua Vaajtswv tsaug, Nwg muab cev rua puab, hab puab txhua tug txais haus. 24Yexus has rua puab tas, “Nuav yog Kuv cov ntshaav kws ndlwg lug rua ntau leej. Kuv cov ntshaav, kws yog Vaajtswv lulug cogtseg. #Tsiv 24:8; Yelemi 31:31-34 25Kuv qha tseeb rua mej has tas, Kuv yuav tsi haus cov cawv txivmaab nuav ntxiv, moog txug nub kws Kuv haus cov cawv txivmaab tshab huv Vaajtswv lub Tebchaws.”
26Tes puab hu ib zaaj nkauj qhuas Vaajtswv hab txawm tawm moog rua peg Roob Txiv Ntoo-Roj lawm.
Yexus Qha Uantej Txug Qhov Kws Petus Yuav Tsi Leeg Paub Nwg
(Mathais 26:31-35; Lukas 22:31-34; Yauhaas 13:36-38)
27Yexus has rua puab tas, “Mej txhua tug yuav tsiv taag hab tso Kuv tseg, ruaqhov Vaajtswv Txujlug sau ca has tas, ‘Vaajtswv yuav tua tug tswv yug yaaj, hab paab yaaj yuav tawg uasaab uasua moog.’ #Xekhali 13:7 28Tabsis tomqaab Kuv sawv huv qhovtuag rovqaab lug muaj txujsa lawm, Kuv yuav ua mej ntej moog rua peg Kalilais.” #Math 28:16
29Petus teb tas, “Txawm yog suavdlawg tso Koj tseg los kuv yuav tsi tso Koj tseg ib zag le!”
30Yexus has rua Petus tas, “Kuv qha tseeb rua koj has tas, mo nuav uantej qab qua ob tsig, koj yuav tsi leeg paub Kuv txug peb zag.”
31Petus teb tawv qhawv has tas, “Txawm yog kuv nrug Koj tuag uake los kuv yuav tsi has tas kuv tsi paub Koj ib zag le!”
Hab cov thwjtim txhua tug puavleej has ib yaam le ntawd.
Yexus Thov Vaajtswv Huv Lub Vaaj Khexemanes
(Mathais 26:36-46; Lukas 22:39-46)
32Puab moog txug rua ntawm ib qhov chaw kws hu ua Khexemanes, Yexus has rua Nwg cov thwjtim tas, “Mej nyob ntawm nuav, Kuv yuav moog thov Vaajtswv lawm tod.” 33Nwg coj Petus, Yakaunpaus, hab Yauhaas nrug Nwg moog. Nwg nyuajsab hab nyaavsab kawg le. 34Nwg has rua puab tas, “Kuv nyuajsab tshuav tuag lawm xwb, mej cale nrug Kuv nyob ntawm nuav hab zuv tog.”
35Yexus moog tomntej mivntsiv, tes Nwg txawm txhuscaug ndlua rua huv aav hab thov Vaajtswv tas, yog ua tau, thov kuas lub sijhawm kws yuav raug txuj kev txomnyem nuav dlhau ntawm Nwg moog. 36Nwg txhaj thov has tas, “Anpas, Txiv! Koj yeej ua tau ibpuas tsaavyaam huv tuabsi, thov Koj muab lub khob ab khob dlaw nuav tshem ntawm Kuv moog. Txawm lecaag los thov tsi xob ua lawvle Kuv lub sab nyam, tabsis ca ua lawvle koj lub sab nyam xwb.”
37Thaus Yexus rovqaab lug, Nwg pum puab peb tug thwjtim tsaugzug taag lawm. Nwg has rua Petus tas, “Ximoos, koj tsaugzug lawm lov? Koj tub yoo tsi taug dlaabndlub txug ib nyuas txoogteev le lov?” 38Hab Nwg has rua puab tas, “Mej yuavtsum ceevfaaj hab thov Vaajtswv paab, mej txhaj tsi poob rua kev simsab. Lub sab yeej txaussab hlo, tabsis lub cev qaugzug zig.”
39Yexus rovqaab moog thov Vaajtswv dlua ib zag ntxiv, hab has tuabyaam le qub. 40Thaus Nwg rovqaab lug, Nwg pum cov thwjtim tsaugzug taag lawm; puab rua tsi taug qhovmuag le, hab puab tsi paub yuav has lecaag rua Nwg.
41Thaus Nwg rovqaab lug zag thib peb, Nwg has rua puab tas, “Mej tseem yuav tsaugzug hab su kuas txaus tsaiv lov? Txaus lawm! Tub txug lub sijhawm lawm! Mej saib seb, Tuabneeg Leejtub saamsim raug luas nteg coj moog rua cov tuabneeg txhum txhais teg lawm. 42Cale sawv es peb moog. Mej saib maj, tug tuabneeg kws ntxeevsab rua Kuv tub tuaj txug nuav lawm!”
Yexus Raug Nteg
(Mathais 26:47-56; Lukas 22:47-53; Yauhaas 18:3-12)
43Thaus Yexus tseem taabtom has le ntawd, tes Yudas kws yog ib tug ntawm kaum-ob tug thwjtim txawm tuaj txug. Muaj ib paab tuabneeg coob-coob nqaa ntaaj nqaa qws nrug nwg tuaj. Puab yog cov kws cov thawj povthawj hlub hab cov xwbfwb kws qha Kevcai hab cov txwjlaug tso tuaj. 44Tug kws ntxeevsab ntawd tub xub qha rua cov tuabneeg ntawd lawm has tas, “Kuv nwj tug twg, tes yog tug ntawd ntaag. Mej cale nteg Nwg hab coj Nwg moog ceev tuabzoo.”
45Thaus Yudas tuaj txug ncua, nwg txawm ncaajnraim moog rua ntawm Yexus hab has tas, “Xwbfwb!” tes nwg txawm nwj kag Yexus. 46Puab txhaj lug nteg kag Yexus hab tuav Nwg ruaj-ruaj. 47Muaj ib tug kws sawv ze ntawd txawm rhu hlo nwg raab ntaaj lug tuab ntaag rua tug Tuam Povthawj Hlub tug tubqhe ib saab nploojntseg tunrho. 48Thaus ntawd, Yexus has rua puab tas, “Mej nqaa ntaaj nqaa qws tuaj nteg Kuv ib yaam le Kuv yog tubsaab nua lov? 49Kuv najnub qha mej huv lub Tuamtsev, tabsis mej ho tsi nteg Kuv. Tabsis yeej yog yuav muaj le nuav, txhaj tav lawvle Vaajtswv tej Lug.” #Lukas 19:47; 21:37
50Tes cov thwjtim txawm tsiv taag lawm tso Yexus tseg.
51Muaj ib tug tub hluas lawv Yexus qaab, nwg tsi naav rigtsho, nwg npua ib dlaim ntaub maag xwb. Puab npaajsab yuav nteg nwg hab, 52tabsis nwg cale tsiv labqaab cuas hab tso dlaim ntaub ntawd tseg rua tomqaab.
Cov Numtswv Taug Yexus Zaaj
(Mathais 26:57-68; Lukas 22:54-55, 63-71; Yauhaas 18:13-14, 19-24)
53Puab txawm coj Yexus moog rua tom tug Tuam Povthawj Hlub lub tsev, kws yog taagnrho cov thawj povthawj hlub, cov txwjlaug, hab cov xwbfwb kws qha Kevcai tuaj txoos uake saablaaj. 54Petus lawv Yexus qaab nrug dleb tsawv, hab nwg moog rua huv lub tshaavloog ntawm tug Tuam Povthawj Hlub lub tsev. Nwg txawm nkaag moog nrug cov faajxwm nte tawg uake. 55Cov thawj povthawj hlub hab taagnrho cov thawjcoj huv Koomhum qebsab txawm nrhav qeeyaam puavpheej lug nkaug Yexus, sub puab txhaj tau cai muab Yexus tua, tabsis puab nrhav tsi tau ib qho le. 56Muaj ntau leej tuaj ua timkhawv dlaag tawmtsaam Yexus, tabsis tej lug kws puab has tsi sistim.
57Muaj qeeleej sawv ua timkhawv cuav tawmtsaam Yexus le nuav: 58“Peb nov Nwg has tas, ‘Kuv yuav muab lub Tuamtsev kws yog tuabneeg txhais teg ua nuav rhuav povtseg, hab peb nub tomqaab ntawd, Kuv yuav ua dlua ib lub tshab kws tsi yog tuabneeg txhais teg ua.’ ” #Yauh 2:19 59Txawm le ntawd los puab cov lug timkhawv yeej tseem tsi sistim le hab.
60Tug Tuam Povthawj Hlub txawm sawvtseeg taabmeeg suavdlawg hab nug Yexus has tas, “Puab kom Koj le ntawd, Koj tsi muaj lug teb puab le lov?”
61Tabsis Yexus ua tuabywv tsi teb ib lus le. Tug Tuam Povthawj Hlub rov nug Yexus has tas, “Koj puas yog tug Mexiyas kws yog Vaajtswv kws Dlawbhuv tug Tub?”
62Yexus teb tas, “Kuv yog! Hab mej yuav pum Tuabneeg Leejtub nyob ntawm Vaajtswv tug kws muaj Fwjchim Luj Kawg Nkaus saab xis, hab nrug fuab nrug cua lug sau ntuj lug!” #Tegnum 7:13
63Tug Tuam Povthawj Hlub txawm dlua rhe nwg lub tsho hab has tas, “Tsi taag peb yuav moog nrhav timkhawv ntxiv lawm! 64Mej tub nov Nwg tej lug thuam Vaajtswv ntawd lawm. Mej xaav lecaag?” #Levi 24:16
Puab suavdlawg txhaj txavtxim has tas, Nwg ua txhum lawm, tsimnyog Nwg yuavtsum tuag.
65Cov tuabneeg ntawd muaj qeeleej cale ntu quavncaug rua Yexus, puab muab phuam paav Nwg qhovmuag hab ntaus Nwg. Puab has rua Nwg tas, “Koj sim twv seb yog leejtwg ntaus Koj?”
Cov faajxwm txawm coj Yexus moog hab xuas tawgncuav rua Yexus.
Petus Tsi Leeg Paub Yexus
(Mathais 26:69-75; Lukas 22:56-62; Yauhaas 18:15-18, 25-27)
66Petus tseem nyob ntawm tshaavloog, tug Tuam Povthawj Hlub ib tug ntxhais qhev tuaj txug ntawd. 67Thaus nwg pum Petus nyob quastsawg nte tawg, nwg saibntsoov Petus hab has tas, “Koj yog ib tug kws txeev nrug Yexus kws yog tuabneeg Naxalev uake los sav.”
68Tabsis Petus tsi leeg le. Petus teb tas, “Kuv tsi paub hab tsi totaub txug tej kws koj has ko,” tes nwg txawm moog rua tom roojvaag lawm. Taamsim ntawd qab txawm qua.#14:68: Tej phoo ntawv qub kws xuas teg sau tsi muaj Taamsim ntawd qab txawm qua.
69Thaus tug ntxhais qhev pum Petus nyob ntawd, nwg txawm rov has rua cov tuabneeg kws sawv ntawd tas, “Tug nuav yog Yexus puab cov ib tug tag!” 70Tabsis Petus rov tsi leeg dlua hab.
Tomqaab ntawd mivntsiv, cov tuabneeg kws sawv ntawd has rua Petus tas, “Koj yeej yog puab cov ntawd ib tug xwb, ruaqhov koj yog tuabneeg Kalilais.”
71Petus txawm twv has tas, “Kuv twv lub ntuj has tas kuv has qhov tseeb xwb! Yog kuv dlaag, thov Vaajtswv rautxim rua kuv. Kuv yeej tsi paub tug txivneej kws mej has ntawd le!”
72Taamsim ntawd qab txawm qua zag thib ob. Petus ncudlheev txug tej lug kws Yexus has rua Petus tas, “Uantej qab qua ob tsig, koj yuav tsi leeg paub Kuv txug peb zag.” Petus txawm quaj tusab kawg le.
လက္ရွိေရြးခ်ယ္ထားမွု
Malakaus 14: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.