Lukas 3
3
Yauhaas Tug Kws Muab Tuabneeg Ua Kevcai Rausdlej Tej Lug Qhuabqha
(Mathais 3:1-12; Malakaus 1:1-8; Yauhaas 1:19-28)
1Xyoo thib kaum-tsib kws Tinpelius ua Fuabtais kaav tebchaws, thaus ntawd Pootius Philaj yog tug tswvxeev kaav lub xeev Yudas. Helauj yog tug kaav lub xeev Kalilais hab nwg tug kwv Filiv yog tug kaav lub xeev Itule-as hab lub xeev Takaunitis; Lixaniyas yog tug kaav lub xeev Anpilees, 2Anas hab Kaiyafas obtug yog Tuam Povthawj Hlub. Lub sijhawm ntawd, Vaajtswv tau qha Nwg txujlug rua Xekhaliyas tug tub Yauhaas tom roob mojsaab qhua. 3Yogle ntawd, Yauhaas txhaj moog qhuabqha thoobplawg ib cheebtsaam kws nyob lawv tug Dlej Yauladees has tas, “Mej yuavtsum tso mej tej kev txhum tseg hab ua kevcai rausdlej, Vaajtswv txhaj yuav zaam mej lub txim.” 4Qhov nuav muaj lawvle Yaxayas, kws yog tug xwbfwb cev Vaajtswv lug tau sau tseg rua huv nwg phoo ntawv has tas:
“Muaj ib tug has nrov-nrov tom roob mojsaab qhua has tas,
‘Cale khu kev tog tug Tswv;
khu kev kuas ncaaj rua Nwg tau taug! #Yaxaya 40:3-5 (LXX)
5Txhub txhua lub kwjhaa kuas puv,
khawb txhua lub roob hab txhua lub povroob kuas taj.
Khu tej kev kws nkhaus kuas ncaaj,
muab qhov sab hab qhov qeg pheev kuas taj xwmyeem.
6Txhua tsaav tuabneeg yuav pum Vaajtswv txuj kev cawmdlim!’ ”
7Muaj tuabneeg coob-coob tuaj cuag Yauhaas kuas nwg muab puab ua kevcai rausdlej. Yauhaas has rua puab tas, “Cov nam naab phem! Leejtwg qha rua mej has tas mej yuav tsiv dlim Vaajtswv txuj kev txavtxim kws yuav muaj lug sai-sai nuav? #Math 12:34; 23:33 8Mej yuavtsum ua lub neej kuas qha tau has tas mej tub tso mej tej kev txhum tseg lawm. Mej tsi xob khaav has tas Anplahaas yog mej yawmkoob. Kuv qha rua mej has tas, Vaajtswv muaj peevxwm muab tej pobzeb nuav lug ua Anplahaas le caajceg los yeej tau! #Yauh 8:33 9Taamsim nuav raab taus tub nyob ntawm cov hauvpaug ntoo lawm; txhua tsob ntoo kws tsi txi cov txiv zoo, yuav raug muab ntuv hab muab pov rua huv cub suavtawg.” #Math 7:19
10Cov tuabneeg coob-coob ntawd nug Yauhaas has tas, “Yogle ntawd, peb yuav ua lecaag?”
11Yauhaas teb puab has tas, “Yog leejtwg muaj ob lub tsho, nwg yuavtsum muab ib lub pub rua tug kws tsi muaj; hab yog leejtwg muaj zaub-mov, nwg yuavtsum muab faib rua tug kws tsi muaj hab.”
12Cov tuabneeg kws sau se los kuj muaj qeeleej tuaj ua kevcai rausdlej hab, puab nug Yauhaas has tas, “Xwbfwb, peb yuav ua lecaag?” #Lukas 7:29
13Yauhaas teb tas, “Mej yuavtsum tsi xob sau tej se tshaaj le txujcai.”
14Cov tubrog muaj qeeleej kuj nug Yauhaas ib yaam nkaus has tas, “Peb ne, peb yuav ua lecaag?”
Yauhaas teb tas, “Mej tsi xob txhaav leejtwg le nyaj lug ntawm kev uanruj uatsiv lossis komtxim tsi tseeb rua lwmtug. Mej cale txaussab rua lub nyaj hli kws mej tau.”
15Cov tuabneeg kws togntsoov tug Cawmseej xaav huv puab lub sab has tas, Yauhaas puas yog tug Mexiyas tag. 16Yauhaas txhaj has rua puab tas, “Kuv muab mej ua kevcai raus lug ntawm dlej, tabsis tug kws yuav lawv kuv qaab lug, Nwg muaj fwjchim luj dlua kuv, txawm yog Nwg nkawm khau xwb los kuv tub tsi tsimnyog moog dlaws txuj nyuas hlua. Nwg yuav muab mej ua kevcai raus lug ntawm Vaaj Ntsujplig tug Dlawbhuv hab huv suavtawg. 17Nwg tuav rawv ib raab ntxuam, yuav ntxuaj Nwg pawg nplej kuas cov npluag yaa tawm huv tuabsi. Nwg yuav muab cov nplej ntim rua huv Nwg lub txhaab tabsis Nwg yuav muab cov npluag pov rua huv cub suavtawg kws cig tsi paub tuag.”
18Yauhaas siv ntau txujkev lug qha Txuj Moo Zoo rua cov tuabneeg ntawd hab nquahu kuas puab hloov puab lub sab. 19Tabsis Yauhaas tshev Helauj kws yog tug tswvxeev Kalilais, ruaqhov Helauj yuav Helaudias kws yog nwg tug namntxawm lug ua nwg tug quaspuj, hab nwg ua ntau yaam kev phem. #Math 14:3-4; Malak 6:17-18 20Helauj tseem ua ib qhov phem tshaaj tej ntawd ntxiv hab, kws yog nwg muab Yauhaas nteg coj moog kaw rua huv tsev lojcuj.
Yexus Ua Kevcai Rausdlej
(Mathais 3:13-17; Malakaus 1:9-11)
21Tomqaab kws suavdlawg ua kevcai rausdlej taag lawm, Yexus kuj ua kevcai rausdlej hab. Thaus Nwg tseem taabtom thov Vaajtswv, roojntug txawm qheb hlo, 22hab Vaaj Ntsujplig tug Dlawbhuv txawm lug tshwmsim muaj lub cev zoole tug nquab lug rua sau Yexus. Hab muaj ib lub suab has sau ntuj tuaj has tas, “Koj yog Kuv tug Tub kws Kuv hlub, Kuv txaussab rua Koj heev.” #Chiv 22:2; Nnkauj 2:7; Yaxaya 42:1; Math 3:17; Malak 1:11; Lukas 9:35
Yexus Cov Yawmkoob
(Mathais 1:1-17)
23Thaus Yexus chiv ua num, Nwg muaj noobnyoog kwvlaam le pebcaug xyoo. Lawvle suavdlawg xaav, Yexus yog Yauxej tub, Yauxej yog Helis tub, 24Helis yog Mathaj tub, Mathaj yog Levis tub, Levis yog Melekhis tub, Melekhis yog Yaanais tub, Yaanais yog Yauxej tub, 25Yauxej yog Matathias tub, Matathias yog Amaus tub, Amaus yog Nahus tub, Nahus yog Exalis tub, Exalis yog Nakhais tub, 26Nakhais yog Ma-aj tub, Ma-aj yog Matathias tub, Matathias yog Xemi-ees tub, Xemi-ees yog Yauxes tub, Yauxes yog Yaudas tub, 27Yaudas yog Yau-anaas tub, Yau-anaas yog Lexas tub, Lexas yog Xelunpanpees tub, Xelunpanpees yog Se-atiyees tub, Se-atiyees yog Nelis tub, 28Nelis yog Melekhis tub, Melekhis yog Adis tub, Adis yog Kauxas tub, Kauxas yog Emadas tub, Emadas yog Aws tub, 29Aws yog Yausuas tub, Yausuas yog Eli-exaws tub, Eli-exaws yog Yaulees tub, Yaulees yog Mathaj tub, Mathaj yog Levis tub, 30Levis yog Xime-oos tub, Xime-oos yog Yudas tub, Yudas yog Yauxej tub, Yauxej yog Yaunames tub, Yaunames yog Eliakees tub, 31Eliakees yog Mele-as tub, Mele-as yog Menas tub, Menas yog Matathas tub, Matathas yog Nathaas tub, Nathaas yog Daviv tub, 32Daviv yog Yexis tub, Yexis yog Aunpes tub, Aunpes yog Npau-am tub, Npau-am yog Xamoos tub, Xamoos yog Nasoos tub, 33Nasoos yog Aminadas tub, Aminadas yog Amis tub, Amis yog Anis tub, Anis yog Hexeloos tub, Hexeloos yog Pelej tub, Pelej yog Yudas tub, 34Yudas yog Yakhauj tub, Yakhauj yog Ixaj tub, Ixaj yog Anplahaas tub, Anplahaas yog Telas tub, Telas yog Nahaus tub, 35Nahaus yog Xelus tub, Xelus yog Le-us tub, Le-us yog Pelej tub, Pelej yog Enpaws tub, Enpaws yog Selas tub, 36Selas yog Kainas tub, Kainas yog Afaxas tub, Afaxas yog Xees tub, Xees yog Nau-as tub, Nau-as yog Lamej tub, 37Lamej yog Methuxelas tub, Methuxelas yog Enauj tub, Enauj yog Yalej tub, Yalej yog Mahalalees tub, Mahalalees yog Kenaas tub, 38Kenaas yog Enauj tub, Enauj yog Xej tub, Xej yog Adaas tub, Adaas yog Vaajtswv tub.
လက္ရွိေရြးခ်ယ္ထားမွု
Lukas 3: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.