Lukas 2
2
Yug Yexus
1Lub sijhawm ntawd Fuabtais Aunkuxatus tau has kuas yuavtsum muaj kev sau npe txug tej pejxeem kws nyob thoobplawg txhua lub tebchaws kws yog numtswv Loos kaav. 2Nuav yog thawjzag kws muaj kev sau npe le nuav. Lub sijhawm ntawd yog Kulinius taabtom ua tug tswvxeev kaav Xilias. 3Yogle ntawd, txhua tug nyag txhaj moog sau npe rua huv nyag lub qub zog.
4Yauxej txawm tawm huv lub nroog Naxalev xeev Kalilais moog rua huv Daviv lub nroog Npelehees kws nyob nraag lub xeev Yudas, ruaqhov nwg yog Daviv le caajceg. 5Yauxej coj Malis kws nwg tub qhab lawm nrug nwg moog sau npe; thaus ntawd Malis suab ib plaab mivnyuas. 6Thaus obtug tseem nyob huv lub nroog Npelehees, txawm txug caij kws Malis yug mivnyuas lawm. 7Malis txhaj yug nwg tug tub, nwg muab khaubdluag qhwv tug mivnyuas hab muab tso pw rua huv ib lub dlaab zaub, vim tej tsevsu tsi muaj chaw seem rua obtug moog su lawm.
Cov Yug Yaaj Hab Cov Timtswv Ceebtsheej
8Nyob thaajtsaam ntawd muaj ib cov tuabneeg yug yaaj tseem taabtom zuv puab cov yaaj tom tej tajnraag thaus montuj. 9Tug Tswv ib tug timtswv lug cuag puab, hab tug Tswv tug tshwjchim tau ci ntsaa-ab tuaj rua ntawm puab, ua rua puab ntshai kawg le, 10tabsis tug timtswv ntawd has rua puab tas, “Mej tsi xob ntshai! Kuv lug ntawm nuav yog kuv coj txuj xuv zoo lug qha rua mej, kws yuav ua rua txhua tsaav tuabneeg muaj kev zoosab kawg nkaus. 11Nubnua tug Cawmseej tub yug lug rua huv Daviv lub nroog lawm, Nwg yog tug Mexiyas, kws yog tug Tswv! 12Mej yuav pum ib tug mivnyuas mog qhwv khaubdluag pw huv lub dlaab zaub, qhov ntawd yog lub cim kws qha rua mej has tas muaj tseeb le kws kuv has.”
13Taamsim ntawd txawm muaj ib paab timtswv ceebtsheej coob-coob lug nrug tug timtswv ntawd hunkauj qhuas Vaajtswv le nuav:
14“Thov kuas Vaajtswv tug kws nyob sau ntuj ceebtsheej tau koobmeej,
hab thov kuas txhua tug tuabneeg nplajteb kws Vaajtswv txaussab rua, tau nyob kaajsab lug!”
15Thaus cov timtswv ncaim puab rovqaab moog rua sau ntuj ceebtsheej lawm, cov tuabneeg yug yaaj txawm sisthaam has tas, “Peb cale moog rua huv lub nroog Npelehees hab moog saib tej xwmtxheej kws tshwmsim lug nuav, lawvle tug Tswv tau qha rua peb lawm.”
16Yogle ntawd, puab txawm ceevnrooj moog; puab moog pum Malis hab Yauxej, hab pum tug mivnyuas pw huv lub dlaab zaub. 17Thaus cov yug yaaj pum tug mivnyuas lawm, puab txhaj qha zaaj kws tug timtswv ceebtsheej qha rua puab has txug tug mivnyuas ntawd rua Malis hab Yauxej noog. 18Txhua tug kws nov zaaj kws cov tuabneeg yug yaaj has ntawd, suavdlawg xaav tsi thoob le. 19Malis khaws tej lug ntawd hab xaav ntsujntsoov rua huv nruabsab. 20Thaus cov yug yaaj rovqaab moog, puab hunkauj qhuas Vaajtswv, vim puab nov hab pum lawv nraim le tug timtswv tau qha rua puab lawm.
Tis Yexus Lub Npe
21Thaus tug mivnyuas ntawd muaj yim nub, txug caij kws muab Nwg ua kevcai txav tawv, txhaj muab Nwg tis npe hu ua Yexus, lawvle tug timtswv ceebtsheej tau qha tseg uantej thaus tseem tsi tau xeeb tug mivtub ntawd. #Levi 12:3; Lukas 1:31
Fij Yexus Huv Lub Tuamtsev
22Thaus txug lub sijhawm kws Yauxej hab Malis moog ua kevcai ntxuav lawvle Mauxes txuj Kevcai tau xaaj tseg, obtug txawm coj tug Mivtub moog nraag lub nroog Yeluxalees hab muab Nwg fij rua Vaajtswv, #Levi 12:6-8 23lawvle tub muaj lug sau tseg rua huv tug Tswv txuj kevcai lawm has tas, “Yuavtsum muab txhua tug tub hlub fij rua tug Tswv.” #Tsiv 13:2, 12 24Hab obtug nqaa ib nkawm nquab taug lossis ob tug rhaws nquab nyeg moog fij lawvle tub muaj lug sau tseg rua huv tug Tswv txuj kevcai lawm.
25Lub sijhawm ntawd muaj ib tug txivneej hu ua Xime-oos nyob huv lub nroog Yeluxalees. Nwg yog ib tug tuabneeg ncaajnceeg, nwg fwm Vaajtswv hab najnub tog tug kws yuav lug cawm cov tuabneeg Yixalayees. Vaaj Ntsujplig tug Dlawbhuv yeej nrugnraim Xime-oos, 26hab qha rua nwg has tas nwg yuav tsi tuag uantej kws nwg pum tug Mexiyas kws Vaajtswv tau coglug tseg lawm. 27Vaaj Ntsujplig txawm coj Xime-oos moog rua huv lub Tuamtsev. Thaus ntawd Yauxej hab Malis coj obtug tug Mivtub Yexus tuaj ua kevcai huv lub Tuamtsev lawvle txuj Kevcai qha tseg, 28Xime-oos txawm muab tug Mivtub lug puag hab ua Vaajtswv tsaug has tas:
29“Tug Tswv, nwgnuav Koj tub ua lawvle Koj coglug tseg lawm,
thov Koj coj Koj tug tubqhe moog ntawm txuj kev kaajsab lug,
30ruaqhov kuv lub qhovmuag tub pum Koj txuj kev cawmdlim
31kws Koj npaaj taabmeeg txhua tsaav tuabneeg lawm.
32Yog lub teeb kws yuav ci moog rua Lwmtsaav Tuabneeg,
hab yuav ua rua Koj tsaav tuabneeg Yixalayees tau ntsejmuag.” #Yaxaya 42:6; 49:6; 52:10
33Thaus tug Mivtub nam hab txiv nov Xime-oos has txug tug Mivtub le ntawd, obtug xaav tsi thoob le. 34Xime-oos foom koobmoov rua puab hab has rua Malis kws yog tug Mivtub ntawd nam has tas, “Vaajtswv xaiv tug Mivtub nuav lug ua kuas cov Yixalayees ntau leej qaug hab ntau leej sawv. Nwg yog ib lub cim lug ntawm Vaajtswv lug, tabsis ntau leej yuav tawmtsaam Nwg, 35vim Nwg yuav muab tej kws tuabneeg xaav huv nruabsab nthuav tawm. Hab yuav mob koj sab cuag le ib raab ntaaj chob.”
36-37Muaj ib tug pujntsuag hu ua Anas, kws yog ib tug xwbfwb cev Vaajtswv lug, nwg yog Fanuees kws yog xeem Asaws tug ntxhais. Nwg laug heev lawm; tomqaab kws nwg yuav quasyawg tau xyaa xyoo xwb, tes nwg tug quasyawg tuag lawm. Nwgnuav nwg muaj noobnyoog yimcaum-plaub xyoos.#2:36-37 Nwgnuav nwg muaj noobnyoog yimcaum-plaub xyoos, lossis nwg ua pujntsuag tau yimcaum-plaub xyoos lawm. Nwg yeej tsi tawm moog qhovtwg le, nwg tsuas najnub najmo moog pehawm Vaajtswv huv lub Tuamtsev, ua kevcai yoo mov, hab thov Vaajtswv xwb. 38Taamsim ntawd Anas txawm tuaj txug, nwg ua Vaajtswv tsaug hab has txug tug Mivtub ntawd rua txhua tug kws taabtom tog Vaajtswv lug cawm cov tuabneeg huv lub nroog Yeluxalees kuas dlim noog.
Kev Rovqaab Moog Peg Naxalev
39Thaus Yauxej hab Malis ua txhua yaam tav lawvle tug Tswv txuj kevcai lawm, obtug txawm rovqaab moog tsev rua peg lub nroog Naxalev kws nyob huv lub xeev Kalilais. #Math 2:23 40Tug Mivtub ntawd tau lujhlub zoo hab muajzug, Nwg puvnpo laajlim tswvyim hab Vaajtswv txaussab rua Nwg.
Tug Mivtub Yexus Nyob Huv Lub Tuamtsev
41Yexus nam hab txiv naj xyoo moog ua kevcai Hlaa Dlhau nraag lub nroog Yeluxalees. #Tsiv 12:1-27; 2Kev 16:1-8 42Thaus Yexus noobnyoog muaj kaum-ob xyoos, puab txawm rov moog ua kevcai lawvle ibtxwm ua lug. 43Thaus dlhau lub sijhawm ua kevcai Hlaa Dlhau lawm, obtug rovqaab moog tsev, tabsis tug Mivtub Yexus tseem nyob rua huv lub nroog Yeluxalees. Nwg nam hab Nwg txiv tsi paub. 44Obtug xaav tas Yexus yuav nrug paab tuabneeg kws nrug puab tuaj ntawd lug uake lawm; obtug tub moog tau ib nub ke, obtug maamle pib nrhav seb puas pum Nwg nrug obtug cov kwvtij hab cov phoojywg uake. 45Thaus obtug nrhav tsi pum, obtug txhaj rovqaab moog nrhav Nwg rua nraag nroog Yeluxalees.
46Nub thib peb obtug txhajle nrhav tau Nwg nyob huv lub Tuamtsev, taabtom nrug cov xwbfwb nyob uake, noog puab qha hab nug puab ntau yaam. 47Txhua tug kws nov Nwg tej lug, yeej xaav tsi thoob txug Nwg tej kev txawjntse hab tej lug teb ntawd le. 48Thaus Yexus nam hab txiv pum Nwg, obtug kuj xaav tsi thoob le hab. Nwg nam txawm has rua Nwg tas, “Mivtub 'e, uacaag Koj yuav ua le nuav rua wb? Koj txiv wb nrhav Koj hab txhawjxeeb txug Koj kawg le.”
49Nwg teb obtug has tas, “Meb yuav nrhav Kuv ua dlaabtsi? Meb tsi paub tas Kuv yuavtsum nyob huv Kuv Txiv lub tsev nua lov?” 50Tabsis obtug tsi totaub tej lug kws Nwg has ntawd.
51Yexus txawm nrug obtug rovqaab moog rua peg lub nroog Naxalev, hab Nwg noog obtug lug. Nwg nam khaws tej lug ntawd rua nruabsab. 52Yexus lujhlub zoo ntawm saab nqajtawv hab saab laajlim tswvyim, ua rua Vaajtswv hab tuabneeg puavleej txaussab rua Nwg. #1Xamu 2:26; Paaj 3:4
လက္ရွိေရြးခ်ယ္ထားမွု
Lukas 2: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.