Chivkeeb 37
37
Yauxej Hab Nwg Cov Tijlaug
1Yakhauj tseem nyob huv tebchaws Kana-aas kws nwg txiv ibtxwm nyob lug lawm. 2Zaaj nuav yog has txug Yakhauj tsev tuabneeg lub neej.
Yauxej yog ib tug tub hluas kws muaj noobnyoog kaum-xyaa xyoo; nwg moog yug yaaj hab tshis nrug nwg cov tijlaug kws yog Npilehas hab Xilepas kws yog nwg txiv ob tug namyau cov tub. Nwg pheej coj tej yaam tsi zoo kws nwg cov tijlaug ua lug pav qha rua nwg txiv noog.
3Taagnrho Yakhauj cov tub, mas nwg hlub Yauxej tshaaj, ruaqhov nwg muaj Yauxej thaus kws nwg tub laug lawm. Nwg xaws tau ib lub tsho ntev kws muaj npaab#37:3: lub tsho ntev kws muaj npaab; lossis lub tsho ntev kws txaij. rua Yauxej naav. 4Thaus Yauxej cov tijlaug pum tas puab txiv hlub Yauxej tshaaj puab lawm, puab txhaj ntxub nwg heev, txug qhov kws yeej tsi xaav has ib lulug zoo rua nwg le.
5Muaj ib mo Yauxej txawm ua npausuav, hab thaus nwg qha zaaj npausuav ntawd rua nwg cov tijlaug noog taag, ua rua puab yimfuab ntxub nwg heev ntxiv. 6Nwg has tas, “Mej noog kuv zaaj npausuav nuav seb. 7Peb suavdlawg taabtom paav peb cov teg nplej nyob huv teb, kuv teg nplej txawm sawv nreg nreeg tabsis mej cov txawm sawv vijvog kuv teg hab cale qhau zumzawg lug hawm kuv teg nplej.”
8Nwg cov tijlaug nug has tas, “Koj xaav tas koj yuav tau ua vaajntxwv kaav peb nua lov?” Tes puab tseem yimfuab ntxub nwg heev ntxiv, vim nwg zaaj npausuav hab tej lug kws nwg pav rua puab noog ntawd.
9Dlhau ntawd Yauxej rov ua dlua ib zaaj npausuav hab nwg qha rua nwg cov tijlaug noog has tas, “Kuv rov ua ib zaaj npausuav has tas kuv pum lub nub, lub hli hab kaum-ib lub nubqub txawm pau lug hawm kuv zumzawg.”
10Nwg kuj pav zaaj npausuav nuav rua nwg txiv noog huv tuabsi hab; nwg txiv txawm ywg nwg has tas, “Uacaag koj yuav txawj ua npausuav ualuaj le? Koj xaav tas koj nam wb hab koj cov tijlaug, peb suavdlawg yuav tau lug txhuscaug huv aav pe koj nua lov?” 11Yauxej cov tijlaug txawm khib nwg heev, tabsis nwg txiv xaavntsoov txug zaaj npausuav ntawd rua nruabsab. #Tegnum 7:9
Yauxej Raug Muag Hab Coj Moog Rua Tebchaws Iziv
12Muaj ib nub thaus Yauxej cov tijlaug moog yug puab txiv paab tsaj rua peg Sekhees, 13Yakhauj has rua Yauxej has tas, “Kuv xaav kuas koj moog peg Sekhees, qhov chaw kws koj cov tijlaug yug tsaj.”
Yauxej teb tas, “Tau kawg mas!”
14Nwg txiv has rua nwg has tas, “Koj moog saib seb koj cov tijlaug puas nojqaab nyobzoo hab tej tsaj puas nyob txhij-txhua, es koj rovqaab lug qha rua kuv paub.” Yogle ntawd, nwg txiv txhaj tso nwg sawvkev huv lub Haav Henploos moog lawm.
Yauxej moog txug peg Sekhees, 15hab nwg ncig moog ncig lug ntawm roob mojsaab; muaj ib tug txivneej pum nwg hab nug nwg has tas, “Koj nrhav dlaabtsi?”
16Nwg teb tas, “Kuv taabtom nrhav kuv cov tijlaug kws puab tuaj yug puab cov tsaj. Thov koj qha rua kuv seb puab moog yug tsav rua qhovtwg lawm?”
17Tug txivneej ntawd teb tas, “Puab tub tawm ntawm thaaj chaw nuav moog lawm. Kuv nov puab has tas puab yuav moog rua tom Dauthaas.” Tes Yauxej txhaj lawv cov tijlaug qaab moog hab pum puab nyob rua ntawm Dauthaas.
18Thaus puab pum Yauxej tseem nyob dleb hab tuaj tsi tau txug, puab txawm tuavhuv yuav muab Yauxej tua povtseg. 19Puab ib leeg has rua ib leeg tas, “Tug nyuas kws txawj-txawj ua npausuav ntawd tuaj lawm lau! 20Zagnua, peb muab nwg tua povtseg hab muab nwg coj moog pov rua huv cov qhovtshij qhuav nuav ib lub. Peb maam dlaag has tas muaj ib tug tsaj nyaum muab nwg tum lawm, seb nwg tej npausuav yuav tshwm tuaj lecaag!”
21Thaus Lunpees nov puab has le ntawd, nwg txawm nrhav tswvyim paab cawm Yauxej. Nwg txhaj has tas, “Peb tsi xob muab nwg tua, 22tabsis ca peb muab nwg pov rua huv lub qhovtshij kws nyob ntawm roob mojsaab qhua nuav xwb, tsi xob ua kuas nwg nqaj ndluag ntshaav nrug.” Lunpees has le nuav, ruaqhov nwg xaav cawm kuas Yauxej dlim ntawm puab hab tso nwg rov moog cuag nwg txiv. 23Thaus Yauxej tuaj txug ntawm nwg cov tijlaug lawm, puab txawm muab nwg lub tsho ntev kws muaj teg#37:23: lub tsho ntev kws muaj teg; lossis lub tsho ntev kws txaij. hle hlo. 24Tes puab txawm muab nwg moog pov rua huv lub qhovtshij kws qhuav lawm.
25Thaus puab tseem taabtom noj mov, puab txawm tsaa qhovmuag saib pum ib paab tuabneeg Yisamayees taug kev peg lub nroog Nkile-as tuaj moog rua nraag tebchaws Iziv. Puab caab ntxhuav thauj tej tshuaj tswqaab hab txumlom moog muag. 26Yudas has rua nwg cov kwvtij has tas, “Yog peb muab peb tug kwv tua povtseg hab npug nwg cov ntshaav ca, peb yuav tau dlaabtsi? 27Peb kuj muab nwg muag rua cov tuabneeg Yisamayees ntawd. Peb tsi xob ua rua nwg raug mob, ruaqhov nwg yeej yog peb tug kwv hab nrug peb koom roj koom ntshaav.” Tes nwg cov kwvtij kuj pumzoo le nwg has. 28Thaus cov tublaag tubluam tug puav kws yog tuabneeg Midias dlhau kev tuaj, tes cov tijlaug#37:28: cov tijlaug; phoo lug Henplais has tas puab. txhajle nqug Yauxej tawm huv lub qhovtshij lug hab muab nwg muag rua cov Yisamayees ua 20 lub txajnyag, tes luas txhaj coj Yauxej moog rua tebchaws Iziv lawm. #Tegnum 7:9
29Thaus Lunpees rovqaab moog rua tom lub qhovtshij hab tsi pum Yauxej nyob huv lawm, nwg nyuajsab heev, nwg txawm muab nwg lub tsho dlua rhe. 30Nwg rov lug cuag nwg cov kwv hab has rua puab tas, “Tsi pum Yauxej nyob huv lub qhovtshij lawm! Zagnua kuv yuav ua lecaag lau?”
31Tes puab txawm muab ib tug tshis tua hab muab Yauxej lub tsho ntev moog raus rua huv cov ntshaav tshis. 32Puab txhaj nqaa lub tsho ntev kws muaj teg ntawd moog rua puab txiv hab has tas, “Peb khaws tau lub tsho ntev nuav. Koj sim muab saib seb puas yog koj tug tub lub tsho los tsi yog?”
33Nwg ncu tau lub tsho ntawd zoo hab has tas, “Yog lau, lub tsho nuav yog Yauxej lub! Muaj tsaj nyaum muab kuv tug tub tum lawm tag. Kuv tug tub Yauxej raug muab dlua ua tej dlwb dlaig lawm lau!” 34Yakhauj dlua rhe nwg lub tsho povtseg hab muab ntaub tsaaj lug npua ua kev tusab quajntsuag. Nwg quaj rua nwg tug tub tau ntau nub. 35Taagnrho nwg tej tub tej ntxhais puavleej lug nplig nwg sab, tabsis nwg yeej tsi noog leejtwg has le; nwg has tas, “Txawm kuv txujsa tu hab moog txug huv tubtuag teb los kuv yeej tseem yuav quajntsuag txug kuv tug tub le.” Yogle ntawd, nwg pheej quaj txug nwg tug tub Yauxej le.
36Thaus cov tublaag tubluam kws yog tuabneeg Midias moog txug rua huv tebchaws Iziv lawm, puab txawm muab Yauxej muag rua Pautifas kws yog Falaus#37:36: Falaus: tsi yog ib lub npe tuabneeg tabsis yog ib lub meejmom kws txhais has tas “vaajntxwv.” ib tug thawj tubrog saib cov tubrog kws zuv Falaus lub loog.
လက္ရွိေရြးခ်ယ္ထားမွု
Chivkeeb 37: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.