Chivkeeb 36
36
Exaus Caajceg
(1 Xwmtxheej Vaajntxwv 1:34-37)
1Nuav yog Exaus caajceg, Exaus muaj dlua ib lub npe hu ua Edoos. 2Exaus cov quaspuj kws yog tuabneeg Kana-aas: nwg yuav Eloos kws yog tuabneeg Hitis tug ntxhais kws hu ua Adas; yuav Xinpe-oos kws yog tuabneeg Hivis tug tub#36:2: Tej cov ntawv qub-qub thaus u sau has tas tug tub; phoo lug Henplais has tas tug ntxhais; lossis tug ntxhais xeebntxwv. Anas tug ntxhais kws hu ua Auhaulinpamas, #Chiv 26:34 3hab Yisamayees tug ntxhais Npasemas kws yog Nenpaiyaus tug muam. #Chiv 28:9 4Adas yug tau Elifas; Npasemas yug tau Le-uyees; 5hab Auhaulinpamas yug tau Ye-uses, Yalaas hab Kaulas. Taagnrho Exaus cov tub nuav puavleej yug huv lub tebchaws Kana-aas.
6Tes Exaus coj nwg cov quaspuj, cov tub, cov ntxhais hab taagnrho nwg tsev tuabneeg, nrug nwg tej tsajtxhu hab txhua yaam kws nwg khwv tau huv tebchaws Kana-aas, tsiv moog nyob rua ib lub tebchaws kws nyob dleb ntawm nwg tug kwv Yakhauj. 7Nwg tsiv moog vim lub tebchaws kws nwg hab Yakhauj nyob ntawd nqaim rua obtug heev; obtug muaj tsajtxhu coob txhaj ua rua obtug nyob tsi tau uake. 8Yogle ntawd, Exaus (kws muaj dlua ib lub npe hu ua Edoos) txhaj moog nyob rua peg lub laaj roob kws nyob peg tebchaws Edoos lawm.
9Nuav yog Exaus caajceg, Exaus yog cov tuabneeg Edoos tug yawmkoob kws nyob peg lub laaj roob peg tebchaws Edoos. 10-13Exaus tug quaspuj kws hu ua Adas yug tau ib tug tub hu ua Elifas; Elifas muaj tsib tug tub: Temaas, Aumas, Xefus, Nkatas, hab Kenas. Elifas tug namyau kws hu ua Tinas yug tau ib tug tub hu ua Amalej.
Exaus tug quaspuj kws hu ua Npasemas yug tau Le-uyees. Le-uyees muaj plaub tug tub: Nahaj, Xelas, Samas hab Mixas.
14Exaus tug quaspuj kws hu ua Auhaulinpamas kws yog Xinpe-oos tug tub#36:14: Tej cov ntawv qub-qub thaus u sau has tas tug tub; phoo lug Henplais has tas tug ntxhais; lossis tug ntxhais xeebntxwv. Anas tug ntxhais, yug tau peb tug tub rua Exaus: Ye-uses, Yalaas hab Kaulas.
15Nuav yog cov thawjcoj kws yog Exaus cov xeebntxwv. Exaus tug tub hlub Elifas yog yawmkoob ntawm cov thawjcoj nraag qaab nuav: Temaas, Aumas, Xefus, Kenas, 16Kaulas, Nkatas hab Amalej. Cov thawjcoj nuav puavleej yog caajceg lug ntawm Elifas kws nyob huv tebchaws Edoos, hab yog Exaus tug quaspuj kws hu ua Adas cov xeebntxwv.
17Exaus tug tub Le-uyees yog yawmkoob ntawm cov thawjcoj nraag qaab nuav: Nahaj, Xelas, Samas hab Mixas. Cov thawjcoj nuav puavleej yog caajceg lug ntawm Le-uyees kws nyob huv tebchaws Edoos, hab yog Exaus tug quaspuj kws hu ua Npasemas cov xeebntxwv.
18Cov thawjcoj nraag qaab nuav puavleej yog caajceg lug ntawm Exaus tug quaspuj kws hu ua Auhaulinpamas kws yog Anas tug ntxhais: Ye-uses, Yalaas, hab Kaulas. 19Taagnrho cov thawjcoj nuav puavleej yog Exaus (kws muaj dlua ib lub npe hu ua Edoos) cov xeebntxwv.
Xe-aws Caajceg
(1 Xwmtxheej Vaajntxwv 1:38-42)
20-21Nuav yog Xe-aws kws yog tuabneeg Haulis cov tub; puab yog cov tuabneeg txumtim huv lub tebchaws Edoos ntawd. Xe-aws cov tub yog: Lautas, Saunpas, Xinpe-oos, Anas, Disoos, Exaws hab Disaas. Xe-aws cov tub kws nyob huv tebchaws Edoos puavleej yog cov tuabneeg Haulis cov thawjcoj.
22Lautas yog cov thawjcoj Haulis hab Hemaas le yawmkoob. (Tinas yog Lautas tug muam.)
23Sunpas yog cov thawjcoj Alevas, Manahaj, Enpas, Sefaus, hab Aunas le yawmkoob.
24Xinpe-oos muaj ob tug tub: Ayi-as hab Anas. (Tug Anas nuav yog tug kws moog pum cov qhovdlej kub npau kws nyob tom roob mojsaab qhua, thaus nwg taabtom tu nwg txiv cov neegluav.) 25-26Anas tug tub yog Disoos, kws yog cov thawjcoj Heedaas, Esenpaas, Ithalaas hab Khelaas le yawmkoob. Anas kuj muaj ib tug ntxhais kws hu ua Auhaulinpamas.
27Exaws yog cov thawjcoj Npilehaas, Xa-avaas, hab Akaas le yawmkoob.
28Disaas yog cov thawjcoj Uxes hab Alaas le yawmkoob.
29-30Nuav yog Haulis cov thawjcoj kws nyob huv lub tebchaws Edoos: Lautas, Saunpas, Xinpe-oos, Anas, Disoos, Exaws hab Disaas.
Tebchaws Edoos Cov Vaajntxwv
(1 Xwmtxheej Vaajntxwv 1:43-54)
31Nuav yog cov vaajntxwv kws kaav lub tebchaws Edoos uantej cov Yixalayees muaj vaajntxwv.
32Npe-aus tug tub Npelas kaav tebchaws Edoos, nwg lub nroog hu ua Dihanpas.
33Thaus Npelas tuag lawm, Xelas tug tub Yaunpas kws nyob huv Npauxelas sawv lug ua vaajntxwv hloov nwg chaw.
34Thaus Yaunpas tuag lawm, Husaas kws nyob huv Temaas sawv lug ua vaajntxwv hloov nwg chaw.
35Thaus Husaas tuag lawm, Npedas tug tub Hadas (Npedas yog tug moog tua yeej cov tuabneeg Midias huv lub tebchaws Mau-am) sawv lug ua vaajntxwv hloov nwg chaw. Nwg lub nroog hu ua Avij.
36Thaus Hadas tuag lawm, Xamelas kws nyob huv Malekas sawv lug ua vaajntxwv hloov nwg chaw.
37Thaus Xamelas tuag lawm, Sa-us kws nyob huv Lehaunpauj ntawm tug Dlej Yufatis sawv lug ua vaajntxwv hloov nwg chaw.
38Thaus Sa-us tuag lawm, Aj-npaus tug tub Npa-aas Hanaas sawv lug ua vaajntxwv hloov nwg chaw.
39Thaus Aj-npaus tug tub Npa-aas Hanaas tuag lawm, Hadas sawv lug ua vaajntxwv hloov nwg chaw. Nwg lub nroog hu ua Pa-us (nwg tug quaspuj hu ua Mehetanpees, yog Matales tug ntxhais hab yog Mexahaj tug ntxhais xeebntxwv.)
40-43Cov nuav yog cov thawjcoj kws yog Exaus cov xeebntxwv, lawvle puab caajceg tsev tuabneeg, puab tej chaw nyob, hab puab tej npe: Tinas, Alevas, Yethej, Auhaulinpamas, Elas, Pinoos, Kenas, Temaas, Mibxas, Mankediyees hab Ilaas. Cov nuav puavleej yog cov tuabneeg Edoos cov thawjcoj.
လက္ရွိေရြးခ်ယ္ထားမွု
Chivkeeb 36: HNJ2022
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 United Bible Societies. All rights reserved.