Proverbs 2
2
Akiḷiusiat Isumattunmun
1Miqłiqtuuŋ, iḷitkich iḷisaurrutitka suli suuramikunnii piiguġnagich iliŋnun pitquuqtatka. 2Naalaktuaġlugich isumaturuat suli kaŋiqsiñialalugich. 3Ii, iḷisimmatiqaġugutin iŋiqsruġiñ; qasiḷiiñ kaŋiqsisugutin. 4Ivaġuŋ ivaqłiḷgutilauraqtuatun qatiqtaamik manigmik naagga sumik iriqtamik piññaġnaqtuamik. 5Tainna piguvich, iḷitchuġiniaqtutin qiksiksrautiqaġniġmik Ataniġmun aasii iḷitchuġivaallugniaġiñ kiutilaaŋa God. 6Ataniq tavra ilaa isumattutiksritchisuuruq; ilaaniñ qaimmiuk iḷitchuqqutiqaġniġlu kaŋiqsimmatiqaġniġlu. 7Ikayuutiqaqtuġlu qaunakkutiqaqtuġlu iliŋiññun iluaqtuakuaqtuanun suli iḷumutuuqtuanun. 8Qaunagigaich iliŋich aŋalatchilluataqtuat allanik iluaqtuakun, suli munaġigaich inmiñiñ iḷumutuuqtuat.
9Naalaġnigumŋa, iḷitchuġiniaqtutin suna iluaqtilaaŋanik, nalaunŋatilaaŋanik, suli avanmun iluaqtilaaŋanik. Iḷisimaniaqtutin suruksrautilaaġnik. 10Isumatusiñiaqtutin, suli iḷisimmatiqaġniqpich quviasuutiqaqtinniaġaatin. 11Kaŋiqsiummatikpiḷḷu puttuqsrisikpiḷḷu qaunaginiaġaatin 12suli killukuaqtaqtinŋiḷḷutin. Iñugniñ piisinniaġaatin maqutchiñiaqtuaniñ uqalugmikkun. 13Tamatkunaŋŋa tunuttuaniñ iluaqtuakun iñuuniaġniġmik, iñuusukhutik taaqtuaŋani piḷuutim. 14Tamatkunaŋŋa quviasuunmik paqittuaniñ piḷuusiqigamik suli quviagivlugu piḷuusiqiniq 15pitqiksiġayugniñ ukpiġnaitchuaniñ.
16Isumattutim annautiniaġaatin piḷuktuamiñ aġnamiñ payariñialakpatin uqayuqsaaġuni, 17allatuqtuaq avataagun uigmi suli asivaqługich unniqsuqłiisiñi katinnamik Ataniġmun. 18Igluanukkuvich, igliqtutin tuqqunmun; apqutauruq iḷuviġmun. Tavruŋaqtuni tavra ullauġnaqtuq iniŋa tuqqutim. 19Kiñaunnii tavruŋa ullautiruaq utiġataŋaitchuq. Utiyuitchuq apqutaanun iñuggutim. 20Tavraasii maliġuaqtuksraġigitin nakuuruat iñuich suli iñuulutin nalaunŋaruakun. 21Iluaqtuakuaqtuat iñuich—iḷumutuuqtuat iñuich—iñuuniaġniaqtut maani nunaptigni. 22Aglaan God-im piiyaġniaġai pigiḷḷiqirauruat nunamiñ suli nuqiittaġlugich piḷuusiqirit nuqittairuatun naurianik nunamiñ.
လက္ရွိေရြးခ်ယ္ထားမွု
Proverbs 2: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)