Proverbs 3
3
Siḷġiqsuutit Nutaġanun
1Miqłiqtuuŋ, piiguġnak iḷisaurrutimnik iliŋnun. Itqaumalugich tiliuġutitka. 2Iḷisaurrutigma iñuusugruktinniaġaatin iluqaapiallaglutillu. 3Pilitchaanagik nakuaqqutillu iḷumutuuġñiġiḷḷu. Qiḷiġlugik quŋusiġñun; agliutikkich uumatignun. 4#Lk 2.52.Tainna piguvich God-ivlu iñuiḷḷu iviġaumaginiaġaatin.
5Ukpiqqutiqaġiñ Ataniġmun iluqaaġlugu uummatin. Makittatiginagu ilvich isumagni kaŋiqsimmatignun. 6Maliġuaġlugu Atanġum pisuutaa suliqipayauraġuvich, aasii ilaan iḷisimapkaġniaġaatin iluaqtuamik igliġviksraġnik. 7#Ro 12.16.Isummatiginak iliŋnun isumatuniḷutin; qiksigilugu Ataniq suli killuuruanik pisuŋiḷḷutin. 8Tainna piguvich, nalauttuatun marasitun inniaqtuq, mamillugich kiḷitin suli anniġñautaiġutin. 9Nanġaġuŋ Ataniq aitchuusiuġlugu nakuuniqsranik nunagniñ nauruanik. 10Tainna piguvich, suġalliqpiktin siḷipkauraġniaqtut suli wine-gutitin siḷipkauraġniaġmiut.
11 #
Job 5.17. #
He 12.5, 6. Miqłiqtuuŋ, Atanġum natqiksruqpatin, naalaġniŋiññagu suli akuqtuumalugu. 12#Rev 3.19.Atanġum natqiksruġuugaich nakuaġirani, aŋayuqaaguruaktun natqiksruiruaktun miqłiqtumignik nakuaġivlugu. 13Quviasugaqtuq kiñaliqaa isumatusiruaq—puttuqsrisiñiktuaglu. 14Akisułhaaqtuq unnii qatiqtuamiñ manigmiñ; umiallałhaaġniaġaatin kaviqsuamiñ manigmiñ. 15Isumattun akisułhaaqtuq piññaġnaqtuaniñ uyaġagniñ; sumun pigisukkaluaqtaġnun nalliummatiŋitchuq. 16Isumattutim iñuulgupkaġniaġaatin, susuksiupkaŋiḷḷutillu kamanautiqaqtillutillu. 17Isumattutim iñuusiñ quvianaktiniaġaa apqutiksraŋiḷu tutqigñiatut. 18Tamatkua isumatusiruat quviasuguurut; isumattutim iñuggutiqaqtinniaġai.
19Atanġum nuna savaŋagaa isumattunmigun;
iḷisimmatimigun siḷa iḷiŋagaa.
20Isumattutaata kuugich igliqtinŋagaich
suli nuviyat sialullasivḷugich nunamun.
21Miqłiqtuuŋ, isumatuŋaiġñaglu kaŋiqsimmataiġñaglu. Iligniñ piiqtinnagik. 22Iñuusiqaqtinniaġaatin tutqigñaqtuamik suli quvianaqtuamik. 23Igliġniaqtutin navianaitchuakun naagga putukkisautaiḷḷutin. 24Iqsiñiaŋitchutin tuttaaġuvich, suli siñigluataġutin unnuapak. 25Isumaaluutiqaġniaŋitchutin tavraŋŋatchiaq pimaqłuutinik, tikisaaġuuruanik pigiiḷḷiqirauruanun anuġiqłuktun. 26Atanġum qaunaginiaġaatin. Kataktinniaŋitkaatin naniġiamun.
27Piyumiñapayauraġuvich, aŋalalluatakkich ikayuaksrat. 28Uqallautinagi siḷalliitin utaqqitqulugi uvlaakumun ikayuġumiñaġupki akkupak. 29Sivunniuġnak anniutauniaqtuamik siḷalliġñun; qanigni iñuuniaqtut, ukpiġivlutin. 30Qapiqsaiḷiñagi allat patchisaiḷḷutin qanuq unnii anniŋaiñmatin. 31Tusunagich pimaqłuktayuktuat naaggaunnii tuvraġlugich, 32qanukkii Atanġum uumigigaich iñuich piḷuktualiqiruat, aglaan iluaqtuakuaqtuat ukpiġigaich. 33Atanġum piaġiiḷḷiuqtitkai aimaaġviŋi pigiitchualiqirauruat, aglaan piḷḷuatautiqaqtiłługich aimaaġviŋi nalaunŋaruat. 34#Jas 4.6; 1 P 5.5.Akiḷḷiḷiqsuġai kamasaaqtuat, aglaan aitchuiruq nagliktuutiqpaŋmik qiñuitchuanun. 35Isumaturuat nanġausiaqaġniaqtut, aglaan isumatuitchuat kanŋunaqsiḷiġñiaqtut.
လက္ရွိေရြးခ်ယ္ထားမွု
Proverbs 3: INUPIAQ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)