ܡܙܡܘܪ̈ܐ 147 (ܩܡܙ)

147 (ܩܡܙ)

1ܫܲܒܚܘܼܢ ܠܡܵܪܝܵܐ،

ܣܵܒܵܒ ܨܦܵܝܝܼ ܝܠܵܗ̇ ܠܸܙܡܵܪܵܐ ܠܐܲܠܵܗܲܢ،

ܣܵܒܵܒ ܒܲܣܝܼܡܬܵܐ ܝܠܵܗ̇؛ ܠܚܝܼܡܬܵܐ ܝܠܵܗ̇ ܐܸܠܹܗ ܬܸܫܒܘܿܚܬܵܐ.

2ܒܸܒܢܵܝܵܐ ܝܠܹܗ ܠܐܘܿܪܸܫܠܸܡ ܡܵܪܝܵܐ،

ܒܘܼܪ̈ܒܸܙܹܐ ܕܝܼܣܪܵܝܹܠ ܓ̰ܲܡܘܼܥܲܝ ܝܠܹܗ.

3ܟܹܐ ܒܲܣܸܡ ܠܬܒ݂ܝܼܪܹ̈ܐ ܕܠܸܒܵܐ،

ܘܟܹܐ ܐܵܣܹܪ ܕܲܪ̈ܒܵܬܲܝܗܝ.

4ܟܹܐ ܡܵܢܹܐ ܡܸܢܝܵܢܵܐ ܕܟܵܘܟ݂ܒܹ̈ܐ،

ܠܟܠܲܝܗܝ ܟܹܐ ܩܵܪܹܐ ܫܸܡܵܢܹ̈ܐ.

5ܓܘܼܪܵܐ ܝܠܹܗ ܡܵܪܲܢ ܘܪܵܒܵܐ ܚܲܝܠܵܢܵܐ،

ܠܦܲܪܡܵܝܬܹܗ ܠܲܝܬ ܬܚܘܼܡܵܐ.

6ܟܹܐ ܣܵܢܹܕ ܡܸܣܟܹܢܹ̈ܐ ܡܵܪܝܵܐ،

ܟܹܐ ܡܲܟܸܦ ܪ̈ܲܫܝܼܥܹܐ ܗܲܠ ܐܲܪܥܵܐ.

7ܙܡܘܿܪܘܼܢ ܠܡܵܪܝܵܐ ܒܫܵܟܲܪܬܵܐ،

ܙܡܘܿܪܘܼܢ ܠܐܲܠܵܗܲܢ ܒܟܸܢܵܪܵܐ.

8ܗ̇ܘ ܕܟܲܣܹܐ ܫܡܲܝܹ̈ܐ ܒܥܲܝܒܹ̈ܐ،

ܗܲܕܸܪ ܩܵܐ ܐܲܪܥܵܐ ܡܸܛܪܵܐ،

ܡܲܓ̰ܝܸܢ ܥܲܠ ܛܘܼܪܹ̈ܐ ܓܸܠܵܐ.

9ܝܲܗ݇ܒܸܠ ܠܒܸܩܪܵܐ ܡܹܐܟ݂ܘܼܠܬܲܝܗܝ،

ܠܙܲܥܝܹ̈ܐ ܕܥܘܼܪܒ݂ܵܐ ܕܟܹܐ ܩܵܪܝܼ.

10ܠܵܐ ܒܓܲܢ݇ܒܵܪܘܼܬܵܐ ܕܣܘܼܣܹܐ ܟܹܐ ܒܵܣܡܵܐ ܠܹܗ،

ܠܵܐ ܒܐܲܩܠܹ̈ܐ ܕܐ݇ܢܵܫܵܐ ܟܹܐ ܩܲܒܸܠ ܗܸܢܝܵܢܵܐ.

11ܟܹܐ ܒܵܣܡܵܐ ܠܹܗ ܡܵܪܝܵܐ ܒܙܕܝܼܥܘܼ̈ܗܝ،

ܒܐܵܢܝܼ ܕܣܵܦܪܝܼ ܠܫܵܦܵܩܲܬܹܗ.

12ܫܲܒܸܚܝ، ܝܵܐ ܐܘܿܪܸܫܠܸܡ، ܠܡܵܪܝܵܐ،

ܡܲܐܣܸܩܝ ܗܲܠܸܠܘܼܝܵܐ ܠܐܲܠܵܗܵܟ݂ܝ، ܝܵܐ ܨܸܗܝܘܿܢ.

13ܣܵܒܵܒ ܚܘܼܠܸܢܲܝ ܠܹܗ ܕܵܒ݂ܪܹ̈ܐ ܕܕܲܪ̈ܘܵܙܵܟ݂ܝ،

ܒܘܼܪܸܟ݂ ܠܹܗ ܠܒܢܘܿܢܵܟ݂ܝ̈ ܒܓܵܘܵܟ݂ܝ.

14ܟܹܐ ܡܲܬܸܒ݂ ܫܠܵܡܵܐ ܒܬܚܘܼܡܵܟ݂ܝ،

ܒܫܲܡܝܼܢܘܼܬܵܐ ܕܚܸܛܹ̈ܐ ܟܹܐ ܡܲܣܒܸܥ ܠܵܟ݂ܝ.

15ܟܹܐ ܫܲܕܸܪ ܗܹܡܸܙܡܵܢܹܗ ܥܲܠ ܐܲܪܥܵܐ،

ܓ̰ܲܠܕܹܐ ܟܹܐ ܪܵܚܹܛ ܚܲܒܪܹܗ.

16ܟܹܐ ܝܲܗ݇ܒܸܠ ܬܲܠܓܵܐ ܐܲܝܟ݂ ܥܲܡܪܵܐ،

ܛܠܘܼܠܵܐ ܡܘܼܓܕܸܠܵܐ ܐܲܝܟ݂ ܩܸܛܡܵܐ ܟܹܐ ܒܵܙܹܩ.

17ܟܹܐ ܕܵܪܹܐ ܓܕܝܼܠܹܗ ܐܲܝܟ݂ ܦܸܪ̈ܬܘܼܚܹܐ،

ܩܵܕ݇ܡ ܩܲܪܬܹܗ ܡܵܢܝܼ ܟܵܠܹܐ؟

18ܟܹܐ ܫܲܕܸܪ ܚܲܒܪܹܗ ܘܟܹܐ ܡܲܦܫܸܪܗܘܿܢ،

ܟܹܐ ܡܵܚܹܐ ܦܵܘܚܹܗ، ܟܹܐ ܓ̰ܵܪܝܼ ܡ̈ܝܼܵܐ.

19ܟܹܐ ܡܲܕܸܥ ܚܲܒܪܹܗ ܠܝܲܥܩܘܿܒ݂،

ܩܵܢܘܿܢܘܼ̈ܗܝ ܘܕܝܼܘܵܢܘܼ̈ܗܝ ܠܝܼܣܪܵܝܹܠ.

20ܠܵܐ ܥܒ݂ܝܼܕ ܠܹܗ ܗܲܕܟ݂ܵܐ ܠܟܠ ܐܘܼܡܬܵܐ،

ܘܕܝܼܘܵܢܘܼ̈ܗܝ ܠܵܐ ܝ݇ܕܝܼܥܲܝ ܠܗܘܿܢ.

ܗܲܠܸܠܘܼܝܵܐ.

လက္ရွိေရြးခ်ယ္ထားမွု

ܡܙܡܘܪ̈ܐ 147 (ܩܡܙ): ABTAB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ အေၾကာင္းကို ပို၍ သင္ယူပါ။