ܝܘܢܢ 4
4
ܝܵܘܢܵܢ ܒܸܟܪܵܒܵܐ ܠܡܪܲܚܡܵܢܘܼܬܵܐ ܕܡܵܪܝܵܐ
1ܐܝܼܢܵܐ ܣܪܹܐ ܠܵܗ̇ ܐܵܗܵܐ ܣܪܵܝܬܵܐ ܓܘܼܪܬܵܐ ܒܥܲܝܢܹ̈ܐ ܕܝܵܘܢܵܢ، ܘܟܪܝܼܒ ܠܹܗ ܟܲܪܒܵܐ ܓܘܼܪܬܵܐ. 2ܘܨܘܼܠܹܐ ܠܹܗ ܠܡܵܪܝܵܐ، ܒܹܐܡܵܪܵܐ، ”ܝܵܐ ܡܵܪܝܵܐ، ܠܹܐ ܝܗ݇ܘܵܐ ܐܵܗܵܐ ܚܲܒܪܵܐ ܕܐ݇ܡܝܼܪܝܼ ܟܲܕ ܗܹܫ ܝܼܘܸܢ ܗ݇ܘܵܐ ܒܐܲܪܥܝܼ؟ ܒܘܼܬ ܐܵܗܵܐ ܝܗ݇ܘܵܐ ܕܡܘܼܠܝܸܙ ܠܝܼ ܠܸܥܪܵܩܵܐ ܠܬܲܪܫܝܼܫ. ܣܵܒܵܒ ܒܝܼܕܵܥܵܐ ܝܘܸܢ ܗ݇ܘܵܐ ܕܐܲܢ݇ܬ ܚܲܕ ܐܲܠܵܗܵܐ ܝܘܸܬ ܚܲܢܵܢܵܐ ܘܡܪܲܚܡܵܢܵܐ، ܝܲܪܝܼܟ݂ܬܵܐ ܒܹܐܢܹܗ، ܪܵܒܵܐ ܒܫܵܦܵܩܲܬ، ܐܲܠܵܗܵܐ ܕܡܵܟܹܟ݂ ܡ̣ܢ ܫܵܕܲܪܬܵܐ ܕܓܘܼܢܚܵܐ. 3ܒܘܼܬ ܐܵܗܵܐ، ܝܵܐ ܡܵܪܝܵܐ، ܫܩܘܿܠ ܚܲܝܝܼ̈، ܦܲܪܦܘܼܠܹܐ ܝܘܸܢ، ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܐܸܠܝܼ ܕܡܵܝܬܹܢ ܡ̣ܢ ܕܚܵܝܹܝܢ.“ 4ܐܝܼܢܵܐ ܓ̰ܘܼܘܸܒ ܠܹܗ ܡܵܪܝܵܐ، ”ܐܝܼܬ ܗܵܩܘܼܬܵܐ ܐܸܠܘܼܟ݂ ܠܸܟܪܵܒܵܐ؟“ 5ܘܦܠܝܼܛ ܠܹܗ ܝܵܘܢܵܢ ܡ̣ܢ ܡܕܝܼܢ݇ܬܵܐ ܘܝ݇ܬܝܼܒ݂ ܠܹܗ ܒܡܲܕܢܚܵܐ ܕܝܼܘܼܗ̇. ܬܵܡܵܐ ܬܘܼܪܸܨ ܠܹܗ ܚܕܵܐ ܡܛܲܠܠܵܐ ܩܵܐ ܓܵܢܹܗ، ܘܝ݇ܬܝܼܒ݂ ܠܹܗ ܬܚܘܿܬ ܛܸܠܵܢܝܼܬܘܼܗ̇، ܒܸܣܦܵܪܵܐ ܕܚܵܙܹܐ ܡܘܿܕܝܼ ܒܸܬ ܩܲܘܸܡ ܠܡܕܝܼܢ݇ܬܵܐ. 6ܗ̇ܝܓܵܗ ܗܘܼܕܸܪܹܗ ܡܵܪܝܵܐ ܚܲܕ ܩܲܪܐܵܐ ܕܐܵܣܹܩ ܥܸܠܸܠ ܡ̣ܢ ܝܵܘܢܵܢ ܘܗܵܘܹܐ ܛܸܠܵܢܝܼܬܵܐ ܥܲܠ ܪܹܫܹܗ، ܘܡܲܢܝܸܚ ܠܹܗ ܡ̣ܢ ܐܘܼܠܨܵܢܹܗ. ܗܲܕܟ݂ܵܐ ܚܕܹܐ ܠܹܗ ܝܵܘܢܵܢ ܚܲܕܘܼܬܵܐ ܓܘܼܪܬܵܐ ܒܘܼܬ ܩܲܪܐܵܐ. 7ܐܝܼܢܵܐ ܗܘܼܕܸܪܹܗ ܐܲܠܵܗܵܐ ܚܕܵܐ ܬܸܘܸܠܥܬܵܐ ܒܙܪܵܩܬܵܐ ܕܝܵܘܡܵܐ ܐ݇ܚܹܪ݇ܢܵܐ، ܘܡܚܹܐ ܠܵܗ̇ ܠܩܲܪܐܵܐ ܘܒܪܝܼܙ ܠܹܗ. 8ܟܲܕ ܪܝܼܡ ܠܹܗ ܫܸܡܫܵܐ، ܗܘܼܕܸܪܹܗ ܐܲܠܵܗܵܐ ܦܵܘܚܵܐ ܫܲܚܝܼܢܵܐ ܡ̣ܢ ܡܲܕܢܚܵܐ، ܘܡܚܹܐ ܠܹܗ ܫܸܡܫܵܐ ܥܲܠ ܪܹܫܵܐ ܕܝܵܘܢܵܢ، ܗܵܕܵܐ ܕܫܘܼܪܹܐ ܠܹܗ ܠܫܲܡܫܘܼܡܹܐ. ܘܛܠܝܼܒ ܠܹܗ ܡܵܘܬܹܗ ܒܹܐܡܵܪܵܐ، ”ܒܘܼܫ ܨܦܵܝܝܼ ܝܠܵܗ̇ ܐܸܠܝܼ ܕܡܵܝܬܹܢ ܡ̣ܢ ܕܚܵܝܹܝܢ.“ 9ܘܐ݇ܡܝܼܪܹܗ ܐܲܠܵܗܵܐ ܠܝܵܘܢܵܢ، ”ܐܝܼܬ ܗܵܩܘܼܬܵܐ ܐܸܠܘܼܟ݂ ܠܸܟܪܵܒܵܐ ܒܘܼܬ ܩܲܪܐܵܐ؟“ ܓ̰ܘܼܘܸܒ ܠܹܗ، ”ܗܹܐ، ܟܪܝܼܒܵܐ ܝܘܸܢ ܐܵܢܵܐ ܗܲܠ ܡܵܘܬܵܐ.“ 10ܘܐ݇ܡܝܼܪܹܗ ܡܵܪܝܵܐ، ”ܐ݇ܬܹܐ ܠܵܗ̇ ܠܘܼܟ݂ ܡܘܼܚܲܒܢܵܐ ܕܐܵܗܵܐ ܩܲܪܐܵܐ، ܐܵܦܸܢ ܕܠܵܐ ܓܪܝܼܫ ܠܘܼܟ݂ ܥܲܡܠܵܐ ܥܲܠܘܼܗܝ ܘܠܵܐ ܩܲܡ ܓܲܪܘܸܣܸܬ ܠܹܗ. ܒܚܲܕ ܠܲܝܠܹܐ ܡܘܼܓ̰ܝܸܢܹܗ ܘܒܚܲܕ ܠܲܝܠܹܐ ܒܪܝܼܙ ܠܹܗ. 11ܘܠܵܐ ܐܵܬܝܵܐ ܠܝܼ ܐܵܢܵܐ ܡܘܼܚܲܒܢܵܐ ܕܡܕܝܼܢ݇ܬܵܐ ܓܘܼܪܬܵܐ ܕܢܝܼܢܘܹܐ، ܗ̇ܝ ܕܐܝܼܬ ܠܵܗ̇ ܙܵܘܕܵܐ ܡ̣ܢ ܐܸܡܵܐܐ ܘܥܸܣܪܝܼ ܐܲܠܦܹ̈ܐ ܥܵܡܪ̈ܵܢܹܐ ܕܠܹܐ ܝܵܕܥܝܼ ܝܲܡܝܼܢܲܝܗܝ ܡ̣ܢ ܣܸܡܵܠܲܝܗܝ، ܘܐܝܼܬ ܓܵܘܘܼܗ̇ ܪܸܣܩܵܐ ܪܵܒܵܐ؟“
လက္ရွိေရြးခ်ယ္ထားမွု
ܝܘܢܢ 4: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation