ܚܓܝ 1
1
ܚܲܒܪܵܐ ܕܡܵܪܝܵܐ ܒܝܲܕ ܚܲܓܲܝ
1ܒܫܹܢ݇ܬܵܐ ܕܬܲܪܬܹܝ ܠܕܲܪܝܵܘܵܫ ܡܲܠܟܵܐ، ܒܝܲܪܚܵܐ ܕܐܸܫܬܵܐ، ܒܝܵܘܡܵܐ ܩܵܕ݇ܡܵܝܵܐ ܕܝܲܪܚܵܐ، ܗܘܹܐ ܠܹܗ ܚܲܒܪܵܐ ܕܡܵܪܝܵܐ ܒܝܲܕ ܚܲܓܲܝ ܢܒ݂ܝܼܵܐ، ܠܙܘܼܪܒܵܒܹܠ ܒܪܘܿܢܵܐ ܕܫܹܠܲܬܐܹܝܠ، ܫܲܠܝܼܛܵܐ ܕܝܼܗܘܼܕܵܐ، ܘܠܝܼܫܘܿܥ ܒܪܘܿܢܵܐ ܕܝܘܼܙܵܕܵܩ، ܟܵܗܢܵܐ ܓܘܼܪܵܐ، ܒܹܐܡܵܪܵܐ، 2”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܐܵܗܵܐ ܥܲܡܵܐ ܒܹܐܡܵܪܵܐ ܝܢܵܐ، ”ܠܵܐ ܐ݇ܬܹܐ ܠܹܗ ܙܲܒ݂ܢܵܐ ܕܒܲܝܬܵܐ ܕܡܵܪܝܵܐ ܠܸܦܝܵܫܵܐ ܒܸܢܝܵܐ.“‘“ 3ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܒܝܲܕ ܚܲܓܲܝ ܢܒ݂ܝܼܵܐ، ܒܹܐܡܵܪܵܐ، 4”ܙܲܒ݂ܢܵܐ ܝܠܹܗ ܕܐܲܚܬܘܿܢ ܝܵܬܒ݂ܝܼܬܘܿܢ ܓܵܘ ܒܵܬܵܘ̈ܟ݂ܘܿܢ ܟܘܼܣܝܹܐ، ܘܐܵܗܵܐ ܒܲܝܬܵܐ ܚܵܪܵܒܵܐ؟ 5ܘܐܵܕܝܼܵܐ ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܡܲܣܸܡܘܼܢ ܒܵܠܵܐ ܥܲܠ ܐܘܼܪ̈ܚܵܬܵܘܟ݂ܘܿܢ. 6ܒܸܙܪܵܥܵܐ ܝܬܘܿܢ ܪܵܒܵܐ، ܘܡܲܥܒ݂ܘܼܪܹܐ ܝܬܘܿܢ ܠܒܲܝܬܵܐ ܚܲܕ݇ܟ̰ܵܐ، ܒܹܐܟ݂ܵܠܵܐ ܝܬܘܿܢ ܘܠܹܐ ܝܬܘܿܢ ܒܸܣܒ݂ܵܥܵܐ، ܒܸܫܬܵܝܵܐ ܝܬܘܿܢ ܘܠܹܐ ܝܬܘܿܢ ܒܸܦܨܵܚܵܐ، ܒܸܠܒ݂ܵܫܵܐ ܝܬܘܿܢ ܓ̰ܘܼܠܹ̈ܐ ܘܠܹܐ ܝܬܘܿܢ ܒܸܫܚܵܢܵܐ، ܘܒܝܼܵܗ݇ܒ݂ܵܐ ܝܬܘܿܢ ܓܵܢܵܘܟ݂ܘܿܢ ܒܗܵܩܵܐ، ܘܓ̰ܲܡܘܼܥܹܐ ܝܬܘܿܢ ܒܟܝܼܣܬܵܐ ܒܙܝܼܥܬܵܐ.‘“
7”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ، ’ܡܲܣܸܡܘܼܢ ܒܵܠܵܐ ܥܲܠ ܐܘܼܪ̈ܚܵܬܵܘܟ݂ܘܿܢ. 8ܐ݇ܣܘܿܩܘܼܢ ܠܛܘܼܪܵܐ، ܘܡܲܝܬܹܝܡܘܼܢ ܩܲܝܣܹ̈ܐ، ܘܒܢܹܝܡܘܼܢ ܐܵܗܵܐ ܒܲܝܬܵܐ، ܘܒܸܬ ܒܵܣܡܵܐ ܠܝܼ ܒܝܼܹܗ، ܘܒܸܬ ܦܵܝܫܹܢ ܡܝܘܼܩܪܵܐ،‘ ܒܹܐܡܵܪܵܐ ܝܠܹܗ ܡܵܪܝܵܐ. 9’ܣܦܝܼܪܵܘܟ݂ܘܿܢ ܠܚܸܨܕܵܐ ܪܵܒܵܐ، ܘܗܵܐ، ܗܘܹܐ ܠܹܗ ܚܲܕ݇ܟ̰ܵܐ، ܘܡܘܼܥܒܸܪܵܘܟ݂ܘܿܢ ܠܒܲܝܬܵܐ، ܘܢܦܝܼܚ ܠܝܼ ܒܝܼܹܗ. ܩܵܡܘܿܕܝܼ؟‘ ܒܹܐܡܵܪܵܐ ܝܠܹܗ ܡܵܪܝܵܐ ܚܲܝܠܬܵܢܵܐ. ’ܩܵܐ ܒܘܼܬ ܒܲܝܬܝܼ ܕܝܼܠܹܗ ܚܵܪܵܒܵܐ، ܘܐܲܚܬܘܿܢ ܟܠ ܚܲܕ ܒܸܪܚܵܛܵܐ ܝܬܘܿܢ ܠܒܲܝܬܹܗ. 10ܒܘܼܬ ܐܵܗܵܐ، ܣܵܒܵܒ ܕܝܼܵܘܟ݂ܘܿܢ ܡܘܼܟܠܹܐ ܠܵܗ̇ ܫܡܲܝܵܐ ܡ̣ܢ ܠܝܼܵܗ݇ܒ݂ܵܐ ܛܠܘܼܠܵܐ، ܘܐܲܪܥܵܐ ܡܘܼܟܠܹܐ ܠܵܗ̇ ܡܲܗܨܘܼܠܘܼܗ̇. 11ܘܩܪܹܐ ܠܝܼ ܒܵܪܘܿܙܘܼܬܵܐ ܥܲܠ ܐܲܪܥܵܐ، ܘܥܲܠ ܛܘܼܪ̈ܵܢܹܐ، ܘܥܲܠ ܕܲܚܠܵܐ، ܘܥܲܠ ܚܲܡܪܵܐ ܚܵܕ݇ܬܵܐ، ܘܥܲܠ ܡܸܫܚܵܐ، ܘܥܲܠ ܟܠ ܡܸܢܕܝܼ ܕܦܲܠܛܵܐ ܐܲܪܥܵܐ، ܘܥܲܠ ܒܲܪܢܵܫܵܐ، ܘܥܲܠ ܒܥܝܼܪܵܐ، ܘܥܲܠ ܟܠ ܥܲܡܠܵܐ ܕܐܝܼܕܵܬܹ̈ܐ.‘“
ܡܵܪܝܵܐ ܡܲܪܥܘܼܫܹܐ ܠܪܘܼܚܵܐ ܕܥܲܡܵܐ
12ܘܫܡܝܼܥ ܠܹܗ ܙܘܼܪܒܵܒܹܠ ܒܪܘܿܢܵܐ ܕܫܹܠܲܬܐܹܝܠ، ܘܝܼܫܘܿܥ ܒܪܘܿܢܵܐ ܕܝܘܼܙܵܕܵܩ، ܟܵܗܢܵܐ ܓܘܼܪܵܐ، ܘܟܠܹܗ ܣܵܗܡܵܐ ܦܝܼܫܵܐ ܕܥܲܡܵܐ، ܒܩܵܠܵܐ ܕܡܵܪܝܵܐ ܐܲܠܵܗܲܝܗܝ، ܘܠܚܲܒܪܹ̈ܐ ܕܚܲܓܲܝ ܢܒ݂ܝܼܵܐ، ܕܵܐܟ݂ܝܼ ܕܫܘܼܕܸܪܹܗ ܐܸܠܹܗ ܡܵܪܝܵܐ ܐܲܠܵܗܲܝܗܝ ܠܟܸܣ ܠܲܝܗܝ، ܘܙܕܝܼܥ ܠܗܘܿܢ ܥܲܡܵܐ ܡ̣ܢ ܩܵܕ݇ܡ ܡܵܪܝܵܐ. 13ܘܐ݇ܡܝܼܪܹܗ ܚܲܓܲܝ ܐܝܼܙܓܲܕܵܐ ܕܡܵܪܝܵܐ ܒܐܝܼܙܓܲܕܘܼܬܵܐ ܕܡܵܪܝܵܐ ܠܥܲܡܵܐ، ”ܐܵܢܵܐ ܥܲܡܵܘܟ݂ܘܿܢ ܝܼܘܸܢ،“ ܒܹܐܡܵܪܵܐ ܝܠܹܗ ܡܵܪܝܵܐ. 14ܘܡܘܼܪܥܸܫ ܠܹܗ ܡܵܪܝܵܐ ܠܪܘܼܚܵܐ ܕܙܘܼܪܒܵܒܹܠ ܒܪܘܿܢܵܐ ܕܫܹܠܲܬܐܹܝܠ، ܫܲܠܝܼܛܵܐ ܕܝܼܗܘܼܕܵܐ، ܘܠܪܘܼܚܵܐ ܕܝܼܫܘܿܥ ܒܪܘܿܢܵܐ ܕܝܘܼܙܵܕܵܩ، ܟܵܗܢܵܐ ܓܘܼܪܵܐ، ܘܠܪܘܼܚܵܐ ܕܟܠܹܗ ܣܵܗܡܵܐ ܦܝܼܫܵܐ ܕܥܲܡܵܐ، ܘܐ݇ܬܹܐ ܠܗܘܿܢ ܘܦܠܝܼܚ ܠܗܘܿܢ ܒܒܲܝܬܵܐ ܕܡܵܪܝܵܐ ܚܲܝܠܬܵܢܵܐ ܐܲܠܵܗܲܝܗܝ، 15ܒܝܵܘܡܵܐ ܕܥܸܣܪܝܼ ܘܐܲܪܒܥܵܐ، ܒܝܲܪܚܵܐ ܕܐܸܫܬܵܐ، ܒܫܹܢ݇ܬܵܐ ܕܬܲܪܬܹܝ ܠܕܲܪܝܵܘܵܫ ܡܲܠܟܵܐ.
လက္ရွိေရြးခ်ယ္ထားမွု
ܚܓܝ 1: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation