Mahte 25

Zo-myi Raxê Yùq Lé Dangtú Yu É Hkyô

1Haú hkûn, mauhkûng mîngdán gi, myibung yu chûng mù, lusik lé te yù râ ga, htoq e ló é zo-myi raxê yùq eq pûng râ nghut lhê. 2Haú bang má, ngo yuq gi, nhik a gying kó; ngo yuq gi, nhik gyîng akô nghut ri. 3Haû nhik a gyîng é bang gi, myibung yu chûng kôlhang, xû a yu chûng kó nghut ri. 4Nghut kôlhang, haû nhik gyîng é bang kúm gi, yhángmòq é myibung lé le, xû bo é bòng lé le yu chung akô nghut ri. 5Lusik jé lé lô râ myáng nyi é yánmai, yhángmòq bànshoq bang gi, yhupmui lò kômù, yhup myhî byùq bekô nghut ri.

6Myín gùnggàm jé jáng, ‘Lusik jé bê ô! Yhang lé te yù râ matú, htoq lé lô keq hkoi ô!’ ga, garû é htê htoq lo ri.

7Haú hkûn, zo-myi haú bang bànshoq gi, toq lô mù, yhángmòq é myibung lé hen lajâng akô nghut ri. 8Haû nhik a gying bang gi, ‘Ngá-mòq lé, xû ra-tsuí byi kó laq; hkâsu mù gâ le, ngá-mòq é myibung shi ló nyi ri.’ ga, haú nhik gying bâng chyáng dûng akô.

9Haú hkûn, haû nhik gying bang gi, ‘Núngmòq eq ngá-mòq é matú ga jáng, luq râ a nghut. Haû mù, núngmòq é matú, xû ung bâng chyáng ê wui yù keq.’ ga tû taî kat akô.

10Yhángmòq, xû wuì e ló kô é hkûn, lusik gi, jé lé lô mù, haû rì rì hen tô é zo-myi wuì gi, yhang eq rahá myiháng poî má wang ló bekô. Hkum le myhî byùq bê nghut ri.

11Hau htâng má, haû htâng gyó tô é zo-myi wuì gi, taû jé lô kômù, ‘Yhûmsîng ê! Yhûmsîng ê! Ngá-mòq lé, hkum hpóng byi làq ô!’ ga taî akô.

12Nghut kôlhang, haû lusik gi, ‘Ngò, núngmòq lé teng za taí kôlé, núngmòq lé ngò a sé.’ ga tû taî kat ri.

13Haû mù luî, haû Byu Yhangzo jé lé râ buìnyì eq ahkyíng lé, núngmòq a sé kô é yánmai, sidìq machyâ nyì keq.

Duìnhâng Zoshâng Sum Yuq Lé, Dangtú Yu É Hkyô

Luk 19:11-27

14Mauhkûng mîngdán gi, byù rayùq byìn we htoq râ hen nyi é nghut mù, yhâng é duìnhâng zoshâng wuì lé wùt yù luî, yhâng é sùtzè lé àp byî to sû eq pung ashî nghut ri. 15Yhang gi, yhángmòq é a-tsam má cháng luî, rayùq lé gi, ngùn ngo joí, rayùq lé gi, í joí, htâng rayùq lé gi, rajoí kut byî to mù, byìn we shut htoq ló byùq bê nghut ri. 16Ngùn ngo joí wó yû sû gi, haú hkûn jáng htoq ló mù, wuìloq kut luî, ngùn ngo joí wó myàt yù bê nghut ri. 17Haû eq rajung za, ngùn í joí wó yû sû le, í joí wó myàt yù bê nghut ri. 18Nghut kôlhang, rajoí za wó yû sû gi, htoq e ló mù, myigùng má du luî, yhâng yhûmsîng hpô é ngùn lé haq myhup tô ri.

19Hau htâng tsómra myáng jáng, duìnhâng zoshâng haú bâng é yhûmsîng hpó gi, dum taû jé lô mù, yhángmòq é ngùn chyârâng lé, lo jep ri. 20Ngùn ngo joí wó yû sû gi, a-myàt ngo joí lé le yu lé lô mù, ‘Yhûmsîng ê, nàng, ngo lé, ngùn ngo joí àp tô é nghut lhê. Wú aq, a-myàt ngo joí wó ho jàt yù bê.’ ga taî ri.

21Haú hkûn, haû yhûmsîng hpó gi, ‘Arà! Nghut bê. Nàng gi, kyèt é eq lùm gíng é duìnhâng zoshâng nghut ri! Tiq é mû má lháng wó lum é sû nghut é yánmai, ngò, nang lé, kô é mû lé le àp byi râ nghut lhê. Náng yhûmsîng hpô é gabú hkyô má bo wang lòm àq hkoi!’ ga tû taî ri.

22Haû eq rajung za, í joí wó yû sû le, lé lô mù, ‘Yhûmsîng ê, nàng, ngo lé ngùn í joí àp tô é nghut lhê. Wú aq, a-myàt í joí wó ho jàt yù bê.’ ga, lé taî ri.

23Haú hkûn, haû yhûmsîng hpó gi, ‘Arà! Nghut bê. Nàng gi, kyèt é eq lùm gíng é duìnhâng zoshâng nghut ri! Tiq é mû má lháng wó lum é sû nghut é yánmai, ngò, nang lé, kô é mû lé le àp byi râ nghut lhê. Náng yhûmsîng hpô é gabú hkyô má bo wang lòm àq hkoi!’ ga tû taî ri.

24Hau htâng, rajoí wó yû sû le, lé lô mù, ‘Yhûmsîng ê, nàng gi, byù wui nghut mù, yhûmsîng a hô tô é jang mâ é shû yù nau é htoq agó, yhûmsîng kyôshi a sân hkyô tô é jang mâ é tsîng yù naù sû nghut é lé, ngò sê lhê. 25Haû mù, ngò gi, gyùq luî, htoq ê mù, náng é ngùn lé, myigùng má ê haq myhup tô é nghut lhê. Wú aq, shî gi, náng é ngùn nghut lhê.’ ga taî ri.

26Haû mù, yhûmsîng hpó gi, yhang lé, ‘Agè ashop é eq lagôn é duìnhâng zoshâng ê! Ngò gi, yhûmsîng a hô tô é jang mâ é shû yù nau é eq, yhûmsîng, kyôshi a sân hkyô tô é jang mâ é tsîng yù naù sû nghut é lé, nàng sê to gù nghut le nhîng, 27ngá é ngùn lé, ngò dum taû jé lô jáng, aráng eq a-myàt wó yû shoq, ngùn hpún kat jang má, haî mù a kat tô é lhú?

28Haû mù, haû ngùn rajoí lé, náng chyáng mai yù luî, raxê joí wó to sû lé, byî pyám nhâng râ nghut lhê. 29Hkâsu mù gâ le, wó sû ó yùq lé nghut kôle, yhang agùn agó wó râ matú, jàt byi râ nghut lhê. A wó su chyáng mai kúm gi, yhang wó tô é lé lháng yu pyám byi shirâ nghut lhê. 30Haû mù, haû a-kyû a bo é duìnhâng zoshâng lé gi, ngaùbyi ngaùnhap eq zuì kyik kyik shoq hpuzô nyì râ jowò nghut é, shinggan mauchut hkaû má dú htoq pyám keq.’ gâ ri.

Sau Eq Bainám

31Haû Byu Yhangzo gi, Yhâng é hpungwup shingkang mai, maumang lagyo lhúnglhâng bang eq rahá jé lé lo é hkûn, Yhâng é hpungwup shingkang bo é hkóhkâm tángmyhâng htoq má zùng râ nghut lhê. 32Haú hkûn, byù myû chângjup gi, Yhâng é hí má zîng lé lo bùm kôrâ nghut mù, Yhang gi, sau zúng sû mai, sau eq bainám lé gótû tû kut gam hkoq é su, byu pé lé gam hkoq pyám râ nghut lhê. 33Yhang gi, sau pé lé, lòqyo hkyam shut, bainám pé lé, lòqpaî hkyam shut kut, nyhi to râ nghut lhê.

34Hau htâng má, haû Hkóhkâm gi, Yhâng é lòqyo hkyam shut mâ é bang lé, ‘Ngá wâ chyáng mâ é shimân jeju hkam yu é hui bang ê, lé keq; mingkan lé hpan é hkûn mai, núngmòq é matú ga hen lajâng tô é muì mîngdán má wang ló keq. 35Hkâsu mù gâ le, Ngò zò-mut é u lé, núngmòq, Ngo lé byi tso kô é nghut lhê; Ngò wuìshit é u lé, núngmòq, Ngo lé byi huq kô é nghut lhê; Ngò bíng kut wún é u lé, núngmòq, Ngo lé lhom hkûlum yù kô é nghut lhê; 36Ngò gùngchîn dùt é u lé, núngmòq, Ngo lé byi hut kô é nghut lhê; Ngò nòhpyo huî é u lé, núngmòq, Ngo lé wú gon kô é nghut lhê; Ngò htóng lúng é u lé, núngmòq, Ngo lé lé kum kô é nghut lhê.’ ga taí râ nghut lhê.

37Haú hkûn, haû díngmán bang gi, Yhang lé, ‘Yhûmsîng ê, Nàng zò-mut huî é lé, ngá-mòq, hkâ-nhám myàng luî, byi tsô wú é lhú? Nàng wuìshit é lé, ngá-mòq, hkâ-nhám myàng luî, byi huq wú é lhú? 38Nàng bíng kut wún é lé, ngá-mòq, hkâ-nhám myàng luî, lhom hkûlum wú é lhú? Nàng gùngchîn dùt é hkûn, ngá-mòq, hkâ-nhám byi hut wú é lhú? 39Nàng nòhpyo huî é lé le, htóng lúng é lé le, ngá-mòq, hkâ-nhám myàng luî, lé gon lé kûm wú é lhú?’ ga myi kôrâ nghut lhê.

40Haú hkûn, haû hkóhkâm gi, ‘Ngò, núngmòq lé teng za taí kôlé, shî, Ngá gu-mang wuì mâ é je tiq sû lé, núngmòq kut byî é hkyô haî le, Ngo lé kut byî é nghut bê.’ ga tû taí râ nghut lhê.

41Hau htâng má, Yhang gi, Yhâng é lòqpaî hkyam shut mâ é bang lé, ‘Dingnyé wó é bang ê, Ngá chyáng mai gâng ló mù, nàt Tsádán eq yhâng é maumâng pê é matú hen tô é, ahtum abyùq é myi má wang ló keq. 42Hkâsu mù gâ le, Ngò zò-mut é u lé, núngmòq, Ngo lé a byi tso kó; Ngò wuìshit é u lé, núngmòq, Ngo lé a byi huq kó; 43Ngò bíng kut wún é u lé, núngmòq, Ngo lé a lhom hkûlum yù kó; Ngò gùngchîn dùt é u lé, núngmòq, Ngo lé, mèbu a byi hut kó; Ngò nòhpyo huî é eq htóng lúng é u lé, núngmòq, Ngo lé a gon kó nghut ri.’ ga taí râ nghut lhê.

44Haú hkûn, yhángmòq gi, ‘Yhûmsîng ê, nàng zò-mut wuìshit é, bíng kut wún é, gùngchîn dùt é, nòhpyo huî é eq htóng lúng é lé, ngá-mòq, hkâ-nhám myàng luî, a wú gon kut wú é lhú?’ ga taû myi kôrâ nghut lhê.

45Haú hkûn, Yhang gi, ‘Ngò, núngmòq lé teng za taí kôlé, shí bang mâ é je tiq sû lé, núngmòq, a kut byî é hkyô haî le, Ngo lé a kut byî é nghut bê.’ ga, yhángmòq lé tû taí râ nghut lhê.

46Haû mù luî, haú bang gi, ahtum abyùq mara dam byî é má wang ló kôrâ nghut lhê; haû díngmán bang kúm gi, ahtum abyùq é chyungxe má wang ló kôrâ nghut lhê.” ga Yesuq taî ri.

Terpilih Sekarang Ini:

Mahte 25: znot

Highlight

Kongsi

Salin