Matayu 26
26
Mpangu gwa kumlaga Yesu
Mariku 14:1-2; Luka 22:1-2; Yohani 11:45-53
1Shaka Yesu pakamalariti kufunda vitwatira vyoseri avi, kawagambiriti wafundwa wakuwi, 2“Pamashaka mawili muvimana, hapaweri na msambu gwa Pasaka, na Mwana gwa Muntu hawamkamuli su wampingiki mulupingika.” Msambu gwa Pasaka guweriti gwa kulihola ntambu Waisraeli pawawalopoziya kulawa muufalumi wa Farawu.
3Shakapanu watambika wakulu pamuhera na wazewi waliwoniti pamuhera muukumbi wa Kayafa, Mkulu gwa Watambika. 4Wasakuliti ntambu ya kumkamula Yesu kwa bada su wamlagi. 5Womberi watakuliti, “Shitwatira ashi nashitendeka shaka sha msambu gwa Pasaka toziya wantu hawatendi ndewu.”
Yesu wankumswaga lipaki Kubetaniya
Mariku 14:3-9; Yohani 12:1-8
6Yesu kaweriti Betaniya, ukaya kwa Simoni, muntu yakalwaliti ungumbula. 7Yesu pakaweriti kankuliya shiboga, mdala yumu kamgenderiti pakaweriti na supa ya alabasta yayimemiti utuli wa mpiya zivuwa, kammiminira mumtuwi mwakuwi. 8Wafundwa wakuwi pawawoniti hangu, wakalala na wamkosiya, “Iwera ashi kwananga goseri aga?” 9“Utuli awu meuwuzwi kwa mpiya zivuwa na kuwapanani wahushu!”
10Yesu kavimati shawashiyowera su kawagambira, “Iwera ashi mwankumgaziya mdala ayu? Shakantendiriti ndo shiherepa kwaneni. 11Wantu wahushu mwanawu mashaka goseri, kumbiti neni hapeni hweri na mwenga mashaka goseri. 12Shakatenditi mdala ayu kumiminira utuli awu munshimba mwangu su katandira kusilwa kwaneni. 13Vinu nuwagambirani nakaka, poseri pawabwera Shisoweru Shiwagira pasipanu, shitwatira shakatenditi mdala ayu hashitakulwi, na wantu hawamuholi.”
Yuda kankujimila kumgalambuka Yesu
Mariku 14:10-11; Luka 22:3-6
14Shakapanu yumu gwa wantumintumi lilongu na mbili, litawu lyakuwi Yuda Isikariyoti su kagenda kwa watambika wakulu 15na kawakosiyiti, “Hamnupi shishi handa panumgalambuki Yesu kwa mwenga?” Womberi wamuwalangiriti magwala ga shaba malongu matatu na kumupa. 16Na kwanjira shaka shilii Yuda kaweriti kankusakula lupenyu luherepa lwa kumgalambuka Yesu kwa womberi.
Yesu kankuliya shiboga sha Pasaka pamuhera na wantumintumi wakuwi
Mariku 14:12-21; Luka 22:7-13; Yohani 13:21-30
17Lishaka lya kwanja pamberi pa msambu gwa mabumunda galekerwa ndiri simika, wafundwa wamgenderiti Yesu na kumkosiya, “Gufira twakakutandiri koshi shiboga sha Pasaka?”
18Yesu kawagambira, “Mgendi mlushi kwa muntu yumu ayu mwakamgambiri, ‘Mfunda kalonga, Shaka shangu shisoka, handiyi shiboga sha Pasaka pamuhera na wafundwa wangu, ukaya kwaku.’ ”
19Wafundwa watenda handa Yesu ntambu yakawagambiriti watandiri shiboga sha Pasaka.
20Shaka payiweriti pamihi, Yesu na wantumintumi wakuwi lilongu na wawili walivaga kuliya shiboga. 21Pawaweriti wankuliya Yesu kalonga, “Nuwagambirani yumu gwenu hakang'alambuki.”
22Wantumintumi wahinginika nentu wanja kulikosiya yumu yumu, “Mtuwa hashi ndo neni?”
23Yesu kawankula, “Yakashwika ndolonji mubakuli pamuhera na neni ndo hakang'alambuki. 24Mwana gwa Muntu hakahowi gambira Malembu Mananagala ntambu yagatakula, kumbiti oli wakuwi muntu ayu yakamgalambuka Mwana gwa Muntu! Iweri mbaka kwa muntu ayu handa mekayiwuki ndiri!”
25Yuda mgalambuka kamkosiya, “mfunda ndo neni?”
Yesu kamwankula, “Yina, gwenga ndo gutakula.”
Shiboga sha Mtuwa
Mariku 14:22-26; Luka 22:14-23; 1 Wakorintu 11:23-25
26Pawaweriti wankuliya, Yesu katoliti libumunda, kalonga mayagashii Mlungu, kalimega na kawapanana wafundwa wakuwi, pakalonga, “Mtoli mlii, ayi ndo nshimba ya neni.”
27Shakapanu katola lwindi na kalonga mayagashii Mlungu, kawapanani pakalonga, “Mlandi woseri mwenga, 28agu ndo mwazi gwangu, gwagulanguziya lipatanu lya Mlungu kwa wantu wakuwi, mwazi gwaguyitika kwajili ya wantu wavuwa kuwalekiziya vidoda. 29Nuwagambirani, hanandi kayi ndiri divayi ya mzyabibu mpaka lishaka lilii pananda divayi yasyayi pamuhera na mwenga Muufalumi wa Tati gwangu.”
30Shakapanu womberi wimbiti lwimbu na wawuka wagenditi kulugongu lwa Mizeyituni.
Yesu kankutunga handa Peteru hakamlemi
Mariku 14:27-31; Luka 22:31-34; Yohani 13:36-38
31Shakapanu Yesu kawagambira, “Leru pashiru panu mawoseri mwenga hamtugi na kundeka neni, ntambu ya Malembu Mananagala galonga, ‘Mlungu kalonga, hakamlagi mlolera mifugu na wakondolu wa shipinga hawapalanganyiki.’ 32Kumbiti panzyukaku, hanuwalongoleri kugenda ku Galilaya.” 33Peteru kamgambira Yesu, “Neni hapeni nukuleki gwenga ata woseri pawakulema!”
34Yesu kamgambira Peteru, “Nukugambira, pashiru pamberi njogolu hakeniwiki, hagunemi mala ntatu kuwera gumana ndiri neni.”
35Peteru kamwankula, “Ata panfiruwa kuhowa pamuhera na gwenga, hapeni nukulemi nakamu!”
Na wafundwa wamonga woseri watakula ntambu iraa ayi.
Yesu kankusali mushiwunga sha Getisemani
Mariku 14:32-42; Luka 22:39-46
36Shakapanu Yesu kagenditi pamuhera na wafundwa wakuwi pahala pawapashemapu Getisemani na kawagambira, “Mulivagi panu neni ng'enda palongolu palii na kuluwa.” 37Kawatola Peteru na wana wawili wa Zebedayu, kanja kuhinginika na kushashatika, 38na kawagambira womberi, “Moyu guntama nentu sambira nfuwi. Mulivagi panu na mwikali masu pamuhera naneni.”
39Su kagenda kulongolu kidogu, kasuntama makukama na kuluwa, “Tati gwangu, handa payiwezekana, guwusiyi lwindi alu lwa ntabikui kwaneni! Ntambu yanfira ndiri neni, kumbiti gutendi ntambu yagufira gumweni.”
40Shakapanu kawawuyira wafundwa watatu walii na kawawona wagonja mpota na kamgambira Peteru, “Muweza ndiri kulikala masu pamuhera na neni ata lisaa limu? 41Mulikali masu na mluwi namwingira mumajerwa. Moyu gwa muntu gufira gutenda gakafira Mlungu, kumbiti makakala ga muntu gatosha ndiri.”
42Yesu kagenditi kayi na kaluwa, “Tati gwangu, handa payiwezekana ndiri lwindi lwa ntabiku luwuki pota neni kululanda, su vyagufiriti guvitendi.” 43Kawuyiti kayi na kuwawona wantumintumi wagonja mpota, masu gawu gaweriti gana mbota nentu.
44Yesu kawaleka kayi, kagenda zyakuwi na kuluwa mala ya tatu, pakaluwa ntambu iraa ilii. 45Shakapanu kawawuyira wafundwa na kuwagambira, “Hashi mwankali mwakugonja mpota na kwoyera? Mloli! Lisaa lyeni lisoka lya Mwana gwa Muntu kukamulwa kwa makakala mumawoku ga wantu yawana vidoda. 46Mwimuki, tugendeni zyetu. Mloli, panu kwana muntu ulii yakafira kung'alambuka!”
Yesu wankumkamula
Mariku 14:43-50; Luka 22:47-53; Yohani 18:3-12
47Yesu kaweriti kankali kankutakula shaka Yuda yumu gwa wantumintumi lilongu na mbili, pakasokiti. Liziti lipinga likulu lya wantu wavuwa yawawera na magumba pamuhera na vindonga, womberi watumitwi na watambika wakulu pamuhera na wazewi. 48Yuda kawapiti lipinga lya wantu lilangaliru pakatakula, “Muntu yanumnona ndo yamumfira, su mumkamuli!”
49Yuda kamgendera Yesu na kamlamsiya, “Mfunda, ponga iweri na gwenga, su kamkisikira.”
50Yesu kamgambira, “Ganja gutendi kanongola shagwiziriti!”
Wantu walii su wiziti na wamkamula Yesu na wamtawa. 51Yumu gwa wantumintumi wa Yesu kasomola ligumba lyakuwi na kamdumula likutu lya ntumintumi gwa Mtambika mkulu. 52Yesu kamgambira, “Guwuziyi ligumba lyalu mumuhaku, toziya yoseri yakalutendera ligumba, hakahowi kwa ligumba. 53Muvimana ndiri kuwera neni menumluwi Tati gwangu kantangi, nayomberi mekanjegeri majeshi makulu malongu na mbili ga wantumintumi wa kumpindi kuntanga? 54Kumbiti hagaweri hashi, nakaka Malembu Mananagala gagalembitwi kuwera gafiruwa kulawira?”
55Shakapanu Yesu kaligambira lipinga lya wantu, “Iwera hashi munizira na magumba na vindonga kunkamula gambira neni mkwapula? Kila lishaka nweriti Mnumba nkulu ya Mlungu panfunda na munkamula ndiri. 56Kumbiti goseri aga galawira su Malembu Mananagala ga wambuyi wa Mlungu gatendeki.”
Shakapanu wafundwa woseri wamleka su watuga.
Yesu kapalongolu pa shiyotera motu
Mariku 14:53-65; Luka 22:54,55,63-71; Yohani 18:13,14,19-24
57Wantu awa yawamkamuliti Yesu wamjegeriti kunumba kwa Kayafa, Mtambika mkulu, wamjojinikira wafunda wa Malagaliru na wazewi. 58Peteru kamfwatiti kwa kutali mpaka kuluwaga lwa Mtambika mkulu na kingiriti kuzyetu pakutozera kalivaga pamuhera na walolera ligomi, su kapati kulola vitwatira ntambu yaviwera. 59Watambika wakulu na shiyotera motu shoseri sha Wayawudi, shisakuliti upitawu wa kupaya kuusu Yesu wapati kumlaga, 60kumbiti wantu wavuwa watakuliti ukapitawu wa upayira kuusu yomberi. Pamuhera na hangu wapata ndiri shintu shoseri. Lupeleru wiziti wantu wawili 61na walonga, “Muntu ayu katakuriti, ‘Weza kubomolanga Numba nkulu ya Mlungu na hanyawi kwa mashaka matatu.’ ”
62Mtambika mkulu kagoloka na kamgambira Yesu, “Hashi, guwawankula ndiri wantu awa wakutakulira shishi gwenga?” 63Kumbiti Yesu kanyamala jii. Mtambika mkulu kamgambira kayi, “Nukulapira kwa Mlungu mkomu, gutugambiri handa gwenga ndo gwa Kristu Mlopoziya, Mwana gwa Mlungu.”
64Yesu kamwankula, “Yina, gwenga gutakula. Kumbiti nuwagambirani mwawoseri mwenga, kwanjira shaka ashi hamumwoni Mwana gwa Muntu kalivaga uwega wa kumliwu wa Mlungu yakawera na makakala goseri na pakiza mumawundi ga kumpindi!”
65Panu Mtambika mkulu kapapula nguwu yakuwi na katakula, “Kamuhigilanga Mlungu! Tufira ndiri ukapitawu umonga! Vinu mpikanira mayigiranga gakuwi! 66Mwenga mulihola hashi?”
Womberi wamwankula, “Kana makosa su kafiruwa kahowi.”
67Shakapanu wamtemera mata kusheni na wamkoma na womberi wamuwakula.
68Na walonga, “Kristu gututungiri! Ndo gaa yakakuwakuliti!”
Peteru kankumlema Yesu
Mariku 14:66-72; Luka 22:56-62; Yohani 18:15-18,25-27
69Peteru kaweriti kalivagiti kunja kuzyetu ntumintumi mdala pakamgenderiti na kulonga “Gwenga guweriti pamuhera na Yesu gwa Galilaya.”
70Kumbiti Peteru kabera palongolu pa woseri. Kalonga, “Nuvimana ndiri vintu vyagutakula.” 71Pakaweriti kankulawa paligomi lya kuzyetu, ntumintumi mdala yumonga kamwona Peteru na kawagambira wantu yawaweriti paliya, “Muntu ayu kaweriti pamuhera na Yesu gwa Nazareti.”
72Peteru kabera kayi na kuwankula, “Nulirapa kuwera nummana ndiri muntu ayu!”
73Katepu hera wantu yawaweriti wagoloka paliya wamgenderiti Peteru na watakula, “Nakaka ntambu yagutakula ilanguziya gwenga gwa muntu wa Galilaya!”
74Shakapanu Peteru kalonga, “Nulirapa kuwera nuwagambirani nakaka! Mlungu gwangu kanazibu handa neni panuwapayira! Nummana ndiri muntu ayu!”
Katepu njogolu kaweka, 75na Peteru kaliholiti visoweru vyakagambiritwi na Yesu, “Pamberi pa njogolu keniwiki, hagunemi mala ntatu kuwera gumana ndiri neni.” Kalawa kunja na kagenda kulila nentu.
Terpilih Sekarang Ini:
Matayu 26: PBV
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
The Bible version in the Pogoro Language. @The Word for The World International and Pogoro Language translation. All rights reserved.