Matayu 14
14
Kuhowa kwa Yohani Mbatiza
Mariku 6:14-29; Luka 9:7-9
1Shaka shilii mkulu gwa Galilaya Herodi kapikaniriti visoweru vya Yesu. 2Nakaka ndo Yohani Mbatiza, ayu kazyuka kulawa kwa yawahowiti, “kawagambira maofisa, ayi ndo toziya kana likakala lwa kutenda mauzauza.”
3Herodi ndo yakalagaliriti kuwera Yohani wamkamuli, wamtawi pingu na kumtula mushibetubetu. Katenditi hangu toziya ya Herodiya mdala gwa Filipi mlongu gwakuwi. 4Toziya Yohani Mbatiza kaweriti kankumgambira Herodi, “Iherepa ndiri gwenga kumyuga Herodiya!” 5Herodi kafiriti kumlaga Yohani Mbatiza, kumbiti katiliti wantu wa Shiyawudi toziya Yohani Mbatiza womberi wamwoniti kuwera mbuyi gwa Mlungu.
6Mumsambu gwa kulihola kwiwuka kwa Herodi, muhinga gwa Herodiya, kaviniti kulongolu kwa wahenga woseri. Herodi kanemeleriti nentu 7su kamlagaliti, “Nulirapira, hanukupi shoseri shagunduwa!”
8Mawu gwa muhinga ulii kamhimiziyiti muhinga gwakuwi kamgambiri tati gwakuwi kulonga, “Gunupi palaa panu muluseru mtuwi gwa Yohani Mbatiza!”
9Ata hangu mfalumi kahinginikiti, kumbiti toziya ya kulirapilira kwakuwi kulongolu kwa wahenga, kalagaliriti wampananiti mtuwi muhinga ulii. 10Su kalagalira Yohani kadumulwi mtuwi mushibetubetu. 11Mtuwi gwa Yohani wagujega muluseru na kumpanana muhinga ulii, nayomberi kagujega kwa mawu gwakuwi. 12Wafundwa wa Yohani wiza, wayitoliti nshimba ya Yohani na kuyisira, shakapanu wagenditi kwa Yesu na kumgambira.
Yesu kankulikutiziya shiboga lipinga likulu lya wantu
Mariku 6:30-44; Luka 9:10-17; Yohani 6:1-14
13Yesu pakapikaniriti shisoweru kuusu Yohani, kawukiti pahala palii muuwatu na kagenditi pahala pa gweka. Wantu wapikiniriti aga, wamgendera Yesu kulawa lushi zyawu na wamfata kwa magulu. 14Yesu pakasulukiti kulawa muuwatu na pakaliwoniti lipinga likulu lya wantu, Kawawoneriti lusungu na kawaponiziyiti woseri yawaweriti walwala.
15Pamihi, wafundwa wakuwi wamgendereti Yesu na walonga, “Saa zigenda kala na pahala panu pagweka. Guwalekeziyi wantu wagendi zawu na guwaleki wagendi muvijiji wakahemeri viboga.”
16Yesu kawagambira, “Hapeni wawuki, mwenga muwapanani vintu vya kuliya!”
17Womberi wamwankula, “Twana mabumunda muhanu na wasomba wawili hera.”
18Yesu kalonga, “Su munjegeli panu.” 19Kawagambira wantu walivagi pasi mumihamba, shakapanu katola mabumunda muhanu na wasomba wawili, kalola kumpindi kwa Mlungu, kalonga mayagashii Mlungu. Kagamega mabumunda na kawapanana wafundwa wakuwi na wafundwa wawapanana wantu. 20Kila muntu kaliya na kwikuta. Shakapanu wafundwa wajojinira majamanda lilongu na mbili ga vyavisigaliti. 21Kwa wantu woseri yawaliyiti, wapalu hera waweriti elufu muhanu pota kuwawalanga wadala na wana.
Yesu kankugendagenda pampindi pa mashi
Mariku 6:45-52; Yohani 6:15-21
22Pala palii Yesu kawagambira wafundwa wakuwi wakweni muuwatu na wamlongoleri kuloka kumwambu kulitanda, shaka yomberi kankuwaaga wantu. 23Pakawaagiti kala, mweni kakweniti kulugongu kugenda kumluwa Mlungu. Payisokiti pamihi, Yesu kaweriti gweka yakuwi kulii, 24na shaka ashi uwatu uweriti kala patali pa litanda, uweriti ugenda usegausega toziya lihega liweriti lyankuguyumbisiya.
25Payiweriti luhunjuhunju Yesu kawagendiriti wafundwa wakuwi, pakagendagenda pampindi pamashi. 26Wafundwa wakuwi pawamwoniti pakagendagenda pampindi pamashi, watiliti nentu. Womberi washowangana pawalonga, “Shihoka ayu!”
27Pala palii Yesu kawagambira womberi, “Namtira, ndo neni!”
28Shakapanu Peteru katakula, “Mtuwa, handa nakaka ndo gwenga gung'ambiri neni nizi kwa gwenga pamashi.”
29Yesu kamgambira, “Gwizi!” Su Peteru kasuluka kulawa muuwatu na kamgendera Yesu pakagendagenda pampindi pamashi. 30Kumbiti pakawoniti liyega, kaweriti na lyoga su kanjiti kudidimila mumashi. Shakapanu kalila pakalonga, “Mtuwa! Gumponiziyi.”
31Palaa palii Yesu kalitalipisiya liwoku lyakuwi kamkola na kumgambira, “Ntambu yaguhera njimiru! Iwera hashi gwana lyoga?”
32Woseri wakwena muuwatu, na liyega linyamalira. 33Shakapanu wafundwa muuwatu wamguwira Yesu pawalonga, “Nakaka gwenga gwa Mwana gwa Mlungu!”
Yesu kankumponiziya mlweri ku Genezareti
Mariku 6:53-56
34Waloka litanda na kusoka lushi lwa Genezareti, 35pahala wantu woseri wamumaniti Yesu. Su wawajega wantu yawalwala kulawa lushi zoseri za pakwegera na wamjegera Yesu. 36Wamluwa kawajimiri woseri yawalwaliti wapati kushinkula luwiniku lwa nguwu yakuwi na woseri yawashinkuliti waweriti wakomu.
Terpilih Sekarang Ini:
Matayu 14: PBV
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
The Bible version in the Pogoro Language. @The Word for The World International and Pogoro Language translation. All rights reserved.