Къанун 9
9
БЕТӀЕРГЬАНАС гӀизраилазе ракь кьеялъе гӀилла
1ГӀенекке, ГӀизраилил халкъ! Гьанже дуца#9:1 Гьаб тӀехьалда халкъалде насихӀат гьабулаго цолъул формаялда хӀалтӀизарурал цӀарубакӀазул (мун, дудаса, дуе ва гь. ц.) магӀна ккола халкъалдехун буссун гьабураб хитӀаб. Иордан гӀор бахинехъин буго, дудасаги рикӀкӀен цӀикӀкӀарал ва къуватал халкъазул ракьал кверде роси мурадалда. Гьезул шагьарал руго кӀудиял, зодире гӀунтӀарал къадаз сверун къарал. 2Гьезул гӀадамал руго залимал ва къуватал – Анакил наслу! Дуда лъала гьел ва дуда гӀемер рагӀана анакилазда данде чӀун лъихъа бажарулебилан гьезул рахъалъ бицунеб. 3Амма дуда лъан букӀа Живго БЕТӀЕРГЬАН Аллагь унев вукӀин дуда цеве-цеве, цебе батанщинаб кӀкӀунеб боркьараб цӀа гӀадин. Гьес гъуризе руго гьел ва дуе бергьенлъи кьезе буго ва, БЕТӀЕРГЬАНАСУЛ рагӀуда рекъон, дуца кверде босизе буго гьезул ракь, гьелги араб бакӀ лъачӀого хехго тӀагӀинаризе руго.
4Дур БЕТӀЕРГЬАН Аллагьас гьел дуда цереса къотӀидал, дуда ракӀалде ккоге: „Нижер ритӀухълъиялъухъ рачана БЕТӀЕРГЬАНАС ниж гьанире, гьаб ракь нижее кьезе гӀоло“, – ян. Гьел халкъазул капурлъи сабаблъунин БЕТӀЕРГЬАНАС гьел дуда цереса нахъе ахӀизехъин ругел. 5Дур ритӀухъал ишаздалъун, ялъуни дур рекӀелъ кутакаб иман-яхӀ букӀун гуреб дуца гьезул ракьазда ханлъи гьабизехъин бугеб. БЕТӀЕРГЬАН Аллагьас кьолеб буго гьезул ракь дуе, гьезул квешлъи сабаблъун ва дур умумузе, ай Ибрагьимиеги, ИсхӀакъиеги, Якъубиеги Гьес кьураб рагӀи букӀун. 6ПалхӀасил, дуда лъан букӀа, мун ритӀухъаб букӀиналъ гуреб БЕТӀЕРГЬАН Аллагьас дуе доб гьайбатаб ракь кьолеб бугеб – хӀакъикъаталда, мун буго ракӀ биццатаб халкъ.
Меседил баси
(Тархъ. 32:1-35)
7Киданиги кӀочонге, гӀицӀаб авлахъалда рукӀаго кигӀан нужеца ццин бахъинабулеб букӀарабали БЕТӀЕРГЬАН Аллагьасул. Мисри таралдаса нахъе жакъа къоялде щвезегӀанги нужеца БЕТӀЕРГЬАНАСУХЪ гӀин тӀамичӀо. 8Хоривалда нужеца бахъинабураб ццидал кутакалъ, БЕТӀЕРГЬАНАС нуж тӀагӀинаризехъин рукӀана. 9ГанчӀил къанал, ай БЕТӀЕРГЬАНАС нилъергун гьабураб КъотӀиялъул къанал росизе магӀарде тӀаде вахараб мехалъ, дица гьениб бана кӀикъого сордо-къо, квенги кваначӀого, лъимги гьекъечӀого. 10Гьениб БЕТӀЕРГЬАНАС кӀиго ганчӀил къоно кьуна дихъе – гьезда тӀад Аллагьасул килщица хъван букӀана, жамагӀаталъул данделъи ахӀараб къоялъ магӀардаса цӀадуда гьоркьоса БЕТӀЕРГЬАНАС нужеда абурабщинаб жо.
11КӀикъого сордо-къоялдасан БЕТӀЕРГЬАНАС кӀиго ганчӀил къоно кьуна дихъе – КъотӀиялъул къанал. 12БЕТӀЕРГЬАНАС дида абуна: „Хехлъи гьабун магӀардаса гъоркье рещтӀа, дуца Мисриялдаса къватӀибе бачараб халкъ пасалъун буго. КигӀан хехгоха гьел Дица малъараб нухдаса тарарал! Меседил биун тӀураб баси гьабуна гьез жидеего тӀагӀат-гӀибадаталъе“.
13Ва БЕТӀЕРГЬАНАС дида абуна: „ХӀакъикъаталдаги Дида бихьулеб буго гьеб букӀин ракӀ биццатаб халкъ! 14Биччанте Дица гьел хвезаризе ва араб бакӀ лъачӀого дунялалдасаго тӀагӀинаризе. Хадуб Дица дудасан лъугьинабила гьездасаги къадар цӀикӀкӀараб ва къуватаб халкъ“.
15Гьебмехалъ дун цӀадулъ босараб магӀардаса гъоркье вилълъана, кодоб ккун КъотӀиялъул кӀиго къоноги букӀана. 16Ва дида бихьана, хӀакъикъаталдаги биун тӀураб басиги гьабун, нужеца БЕТӀЕРГЬАНАСДА данде мунагь гьабун букӀин. ГьедигӀанги хехго тарана нуж БЕТӀЕРГЬАНАС малъараб нухдаса! 17Гьебмехалъ дица кӀиябго къоно, нужер беразда цебе гӀодобги речӀчӀун, бекана.
18Хадув дун нахъеги БЕТӀЕРГЬАНАСДА цеве кӀалагъоркье ккана ва гьедин вукӀана кӀикъого сордо-къоялъ, цебесеб нухалда гӀадин квенги кваначӀого лъимги гьекъечӀого, БЕТӀЕРГЬАНАСДА рихараб жоги гьабун ккараб нужер квешаб мунагьалъ БЕТӀЕРГЬАНАСУЛ ццин бахъинабун букӀун. 19Дун квешго хӀинкъун вукӀана БЕТӀЕРГЬАНАСУЛ ццидакьа, гьеб ццидал хӀалуциналъ Гьес нуж тӀагӀинаризехъин рукӀиндал. Амма БЕТӀЕРГЬАНАС гьебмехалъги дир гьари къабул гьабуна. 20Гьарунидеги БЕТӀЕРГЬАНАСУЛ ццин букӀана, гьев битӀахъе чӀвазехъин вукӀана. Амма дица Гьаруниеги дугӀа гьабуна. 21Нужер мунагьин абуни, ай нужеца гьабураб баси дица, цӀадулъеги рехун биинабуна, хадуб хӀур лъугьинегӀан хъурун, магӀардаса гъоркье чвахулеб лъелъе бана.
22Гьединго нужеца Тавераялдаги, Массаялдаги, Киврот-Гьатааваялдаги БЕТӀЕРГЬАНАСУЛ ццин бахъинабуна.
23Кадеш-Барнеаялдаса нуж къватӀире ритӀулаго, БЕТӀЕРГЬАНАС абуна: „Рахъа, Дица нужее кьураб ракьалда кверщел гьабе“, – ян. Амма нужеца БЕТӀЕРГЬАН Аллагьасул амруялда дандечӀей гьабуна. Нуж Гьесда божичӀо, Гьесухъ гӀенеккичӀо. 24Дида лъаралдаса нахъе нуж БЕТӀЕРГЬАНАСЕ мутӀигӀлъичӀо.
25БЕТӀЕРГЬАНАС нуж тӀагӀинаризе ругин абураб мехалда, кӀикъого сордо-къоялъ БЕТӀЕРГЬАНАСДА цеве кӀалагъоркье ккана дун 26ва гьарана Гьесда: „Огь, ХӀалкӀолев БЕТӀЕРГЬАН! ТӀагӀинабуге Дурго халкъ – Дурго ирс! Дурго хӀалкӀолъиялдалъун ва къудраталдалъун Дуца хвасар гьаруна ва Мисриялдаса къватӀире рачана гьел. 27Дурго лагъзал Ибрагьимги, ИсхӀакъги, Якъубги ракӀалде щвезаре, гьазул ракӀазул согӀлъиялъухъги, гьазул мунагьазухъги, гьазда ккараб гӀайибалъухъги валагьуге, я Аллагь! 28Гурони, Дуца Дурго халкъ нахъе бачараб улкаялъул чагӀаз абизе буго: ‘Балагье, БЕТӀЕРГЬАНАСДА бажарун гьечӀо Жинцаго рачун щвезаризе рагӀи кьураб ракьалде дол рачине; Жиндаго гӀемерал рихиялъ рачун рукӀун руго Дос дол гӀицӀаб авлахъалда хвезаризе’, – ян. 29Амма гьаб халкъ Дур ирслъидал – Дурго хӀалкӀолъиялдалъун ва къудраталдалъун Дуца эркен гьабураб!“
Terpilih Sekarang Ini:
Къанун 9: АварАК
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Институт перевода Библии, 2005-2023