खबरदुत 2
2
पबित्र ग्वालाम र पेन्तिकोसको दिन
1जब पेन्तिकोस त तोओ छ्यात#२:१ पेन्तिकोस त तोओ छ्यात पेन्तिकोस त तोओ छ्यातखे छुत्काराको छ्यातको पचास दिन लोन्हे वाङ्ना। दाहा, जुदा बिस्वासिलम यातज्यो थाउहाङ ब्रकले हुमाकाय। 2अचानक लाङकासय ताह्ङो गाइध ङुह्रोलेखा सवास वाङा, र ओउमय मुओ किमभरि ब्लिङा। 3अनि ओउमयइ लेलम लेखाताह्ङो म्हेःको लप्कालम ओहाङ थाओ च्यवाकानि, र ओउ म्हेःको लप्कालममखे वेङ्काइति ओउमयकहाङ न्यासाकाय। 4अनि ओउमय जुदा पबित्र ग्वालामइ भरपुर स्याउति अरु भासालमहाङ नोःसा फाःङाकानि। पबित्र ग्वालामको जिःङ दोःति ओउमय ओउत नोःओ खेइतो।
5ओउ समयहाङ परमेस्वरको भक्ति जाह्ङो सङ्सारको नाःतो देसको धार्मिक यहुदिलम यरुसलेमहाङ याकितो। 6जब ओउमयइ ओउ ताह्ङो गाइध ङुह्रोलेखा सवास सायाकानि, ओहाङ मान्तालमको यातज्यो हुल हुमाकाय। ओउमय जोक्तोले ग्याह्ङाकाय, धइतिदाह्य्सा ओउमयइ लयमयको भासालमहाङ बिस्वासिलम नोःधयमुओ सायाकानि। 7ओउमय आन जोक्तो ग्याह्ङ्ति एत दाह्याकाय, “दोह इ नोःओ जुदा मान्तालम गालिलसय वाङो खेइलि र? 8ओउतखेया गतहाइति ओउमयइ निको भासाहाङ नोःधयमुओ निइ साइधय मुनातहि? 9निमध्ये कोयखे दाहन्यामसयको पार्थिया, मेदिया, एलाम, र मेसोपोतामिया छेत्रसय वाङो खेनातहि। कोयखे इ यहुदिया छेत्रसय वाङो खेनातहि। अनि कोयखे उत्तरसयको कपादोकिया, पोन्तस, एसिया, 10फ्रिगिया, र पाम्फिलिया छेत्रसय वाङो खेनातहि। र कोयखे मिस्र छेत्र, र लिबिया छेत्रको कुरेनि सहरसय वाङो खेनातहि। र कोयखे रोम सहरसय वाङो खेनातहि। 11अनि ओउतले कोयखे अरबिया छेत्र, र क्रेत तापुसय वाङो खेनातहि। कोयखे यहुदि स्याउति नाःओलम मुनातहि, र कोयखे यहुदि धर्म लेःओ यहुदि खेमालोलम मुनातहि। तर परमेस्वरइ जाह्ङ्सास्यावो महान् कामको बारेहाङ ओउमयइ निको भासाहाङ नोःधयमुओ नि जुदाइ साइधयले मुनातहि।” 12ओउमय जुदाले ग्याह्ङ्ति अलमल्ल त स्यावाकाय। अनि ओउमय “इको माने दोह खेना?” त दाह्य्ति लयमय ह्वत्कायाकाय।
13तर हुलको केहि मान्तालमइखे “इमयपाय नाःतो ङोतिः तुङ्ति ङोआकाय” त दाह्य्ति बिस्वासिलमकाय थ्याउति तोआकानि।
पेन्तिकोसको दिनहाङ पत्रुसको भासन
14अनि पत्रुस अरु एघार जना मुख्य चेलालमकुस ब्रक्त चिङा र ताह्ङो हाउनयहाङ मान्तालमको हुलकाय प्रचार जाह्ङ्सा फाःङाकान—
“अ यहुदि होयालम र यरुसलेमहाङ याको जुदा पुःचोङलम, इहाङ दोह स्यावो त दाह्यो कुरा ङाइ निङकाय तोनेनाङ्स, र निङइ ङाको कुराकाय घिःति साइनु। 15निङ मध्येको कुनयइ सम्झओलेखा इमयखे ङोतिःइ ङोओ मान्तालम खेइलि। धइतिदाह्य्सा देङेपाय बिहानको नउ मात्र बजओ मुना। 16ओउत खेल, निङइ च्यवो इ कुराको बारेहाङपाय उहिलेखाले योएल अगमबक्ताइ एतदाह्य्ति तोओ मुना—
17‘परमेस्वर दाह्य्सास्याउना,
“लोन्हेको दिनलमहाङ, ङाइ ङाको पबित्र ग्वालाम जुदाकाय#२:१७ जुदाकाय इ सब्दइखे परमेस्वरको राज्यको जुदा मान्तालमकाय जनाउनउ। परमेस्वरहाङ बिस्वास जाह्ङ्मालो मान्तालमकायखे परमेस्वरइ पबित्र ग्वालाम बइसा स्याउलेल। बइनाङ,
निङको चोः चोःद्याङलमइ ङाको आखर नोःनय।
निङको जवान गोय्चोलमइ दर्सन च्यउनानि,
र निङको बुधापाकालमइखे सपना च्यउनानि।
18मा, ओउबेलाहाङखे ङाको सेवक-सेविकालमकहाङमा,
ङाइ ङाको पबित्र ग्वालाम बइनाङ,
अनि ओउमयइ ङाको आखर प्रचार जाह्ङ्नानि।
19ङाइ त्याःव फेलबाङहाङ ग्याह्ङ्सिओ कामलम,
र काःम ल्हाउदयबाङहाङ चिनोलम छ्यान्लेनाङ,
अनि ओहाङ वुइ, म्हेः, र धुवाको मुस्लो थालेना।
20प्रभु परमेस्वरको महान् अनि महिमाको दिन वाङ्सासय ङ्हा,
न्याम च्याक्तो स्याउलेना,
र लाह्खे वुइ लेखा दुतो स्याउलेना।
21अनि सहयोगको लागि परमेस्वरकाय बिन्ति जाह्ङोलमखे जुदाले स्याक्लेनय।”#योए २:२८-३२’
22द्याह, ङाइ नासरत त तोओ मयो सहरको येसुको बारेहाङ तोसा बोःङो कुरा निङ इस्राएलको मान्तालमइ साइनु। येसुइ निङको माझहाङ जाह्ङ्सास्यावो जिःङकालि ग्याह्ङ्सिओ कामलम र चिनोलमसयले, परमेस्वरइ निङको लागि येसुकाय ल्होक्सास्यावो कुराको प्रमान बइसास्यावो मुना। इ कुराखे निङ जुदाइ चिःओले मुना। 23येसुकाय निङको क्रुतहाङले सुम्पति बइसा परना त दाह्य्ति परमेस्वरइ ङ्हाखाले योजना र निर्नय जाह्ङ्सास्यावो खेतो। ओउतझ्यान्ते येसुकाय क्रुसहाङ योकोति सात्ताक्साको लागि निङइ येसुकाय दुस्त मान्तालमको क्रुतहाङ सुम्पति बइतेआकानि। 24तर परमेस्वरइ येसुकाय सिओसय छुत्कारा जाह्ङ्सास्यावा, र रुवाङहाङ फेरि स्याक्ताक्सास्यावा। धइतिदाह्य्सा येसुकाय सिमयको जिःङको अधिनहाङ स्याउति मुसाकाय सम्भब नाःआक्ल। 25राजा दाउदइ उहिलेखाले येसुको बारेहाङ एत तोसास्यावो खेतो—
‘ङाइ प्रभुकाय सधय ङाकुसले मुओ च्यउनाङ।
ङा रइङल, धइतिदाह्य्सा प्रभु ङाको ङोइसय मुसास्याउना।
26ओउतझ्यान्ते ङाको ल्हुङतुक चोङाइलेना,
र ङाको म्होतोङइ प्रभुको प्रसङ्सा जाह्ङ्लेनउ।
ङा सिसाखेओ प्रानिले खेनाङ,
तर ङा आसा-भरोसाहाङ स्याक्लेनाङ।
27धइतिदाह्य्सा नाङइ ङाकाय सिओलमको माझहाङ फेतिवाइसा स्याउल,
र नाङइ लयको पबित्र सेवककाय तेसराङहाङ सय्ङ्तिवाइसा बइसास्याउल।
28नाङइ ङाकाय रुवाङको ल्याम छ्यान्ति बइसास्यावो मुना,
र नाङइ ङाकाय लयको ङ्हा चोङाइति आससितो जाह्ङ्सास्याउना।’#भजन १६:८-११
29ङाको राप्तो बिस्वासि होयालम, निको पुर्खा दाउदको बारेहाङ ङाइ पेतोकुसि तोसा खाइनाङ। दाउद सिआ र ओउको म्हाङकाय तेसहाङ पाह्माकानि अनि ओउको तेस तेनको दिनसम्मले निको सहरहाङ मुलेना। 30दाउदखे यातचाक अगमबक्ता खेतो, र परमेस्वरइ ओउकुस बाचा जाह्ङ्सास्यावो कुरा ओउइ चिःओ खेतो। परमेस्वरइ दाउद राजा स्यावोलेखाले, ओउको सन्तानलम मध्येसयले यातचाककाय राजा जाह्ङ्लेनाङ त दाह्य्ति बाचा जाह्ङ्सास्यावो खेतो।
31परमेस्वरइ लोन्हेको दिनहाङ जाह्ङ्साखेओ कुरा दाउदइ चिःआकान, ओउतझ्यान्ते ओउइ ख्रिस्त सिओसय उह्ति च्योक्साखेओको बारेहाङ एत दाह्या,
‘परमेस्वरइ ख्रिस्तकाय सिओलमको माझहाङ फेतिवाइसा स्याउल,
र ख्रिस्तको ज्यानकाय तेसराङहाङ सय्ङ्ति वाइताक्सा स्याउलेल।’#भजन १६:१०
32परमेस्वरइ ओउ येसुकायले सिओसय उह्ति च्योक्ताक्सास्यावा, र नि जुदाले इ कुराको साछि खेनातहि।
33परमेस्वर आपाइ येसुकाय च्युन्सास्यावा, र लयको ङोइसय ताह्ङो सम्मानित थाउहाङ च्युःङ्ताक्सास्यावा। अनि लयइ जाह्ङ्सास्यावो बाचा अनुसार पबित्र ग्वालाम येसुकाय बइसास्यावा, र ओउ पबित्र ग्वालामले येसुइ निकाय बइसास्यावो मुना, ओउखे देङे निङइ च्यउधय र साइधय मुतेनय।
34धइतिदाह्य्सा दाउदपाय लाङका पाह्यो नाःआक्ल, तर ओउ एत दाह्या,
‘प्रभु परमेस्वरइ ङाको प्रभुकाय तोसास्यावा—
“ङाको ङोइसय#२:३४ ङोइसय यहुदि रितिथिति अनुसार राजाको ङोइसयको थाउखे लोन्हेको राजा स्याउसाको लागि ज्योओ मान्ताकाय ताह्ङ्तो मान-सम्मान र अधिकारकुसि मुसाकाय गमो थाउ खेना (मति २२:४४; मर्कुस १२:३६; लुका २०:४२-४३)। च्युःङ,
35जबसम्म ङाइ नाङको बइरिलमकाय नाङको दोमपाकताले गम्ङल।”’#भजन ११०:१
36ओउतझ्यान्ते इस्राएलको जुदा मान्तालमइ इ कुरा चिःसाले परना— निङइ क्रुसहाङ योकोति सातो येसुकायले परमेस्वरइ प्रभु र मुक्ति बइसास्यावो ख्रिस्त निसज्योमा जाह्ङ्सास्यावो मुना।”
37जब पत्रुसइ तोओ कुरा मान्तालमको हुलइ सायाकानि, ओउमय आन दुखि स्यावाकाय। अनि ओउमयइ पत्रुस र अरु मुख्य चेलालमकाय ह्वताकानि, “अ होयालम, द्याह निइ दोह हाइसा परनाङ्सु त?”
38अनि पत्रुसइ मान्तालमको हुलकाय तोआकान, “निङ जुदाले लयको पापको पस्ताप जाह्ङ्ति परमेस्वरकताङ द्याह्न्सा परतेनय, र लयको पाप छेमाको लागि येसु ख्रिस्तको मय्ङहाङ बप्तिस्मा लेःसा परतेनय। अनि निङइ परमेस्वरको बरदान पबित्र ग्वालाम दोःलेतेनय। 39धइतिदाह्य्सा परमेस्वरको बाचाखे निको प्रभु परमेस्वरइ गोत्सास्यावो जुदा मान्तालम, निङ र निङको सन्तानलम, र लोक्तो याक्तिमुओ अरु जातिको मान्तालमको लागिमा जाह्ङो खेना।”
40अनि पत्रुसइ लयको कुरा सायो मान्तालमकाय बिन्ति जाह्ङ्धय ज्याङ्तो समयसम्म प्रचार जाह्ङाकान, “इ दुस्त मान्तालमकहाङ दिह्लाङ वाङ्साखेओ दन्दसय निङ लयमयले दल्ति मुन।” 41ओउ दिन पत्रुसको कुरा सायोलममध्ये नाःतो मान्तालमइ ओउको कुराहाङ बिस्वास जाह्ङाकानि, र लगभग सुम हजार मान्तालमइ बप्तिस्मा लेःआकानि। 42ओउमयइ लयमयको समय मुख्य चेलालमकसय स्यान्धय, यात-अर्काकुस सङ्गति जाह्ङ्धय, प्रभु-भोस जेःधय र प्राथना जाह्ङ्धय हुताकानि।
बिस्वासिलमको चालचलन
43मुख्य चेलालमइ जाह्ङो नाःतो ग्याह्ङ्सिओ कामलम च्यउति जुदा मान्तालम ग्याह्ङाकाय। 44जुदा बिस्वासिलम यातय थाउहाङले हुमितो र लयमयकहाङ नाःओ जुदा थोकलम यात-अर्काकुस वेकाइतो। 45ओउमयइ लयमयको सम्पति र मालताललम विःन्नितो र खान्चोहाङ परओलमकाय थेपो बइनितो। 46दिनमले ओउमय परमेस्वरको मन्दिरको आङ्गनहाङ ब्रकले हुमितो। ओउमय यात-अर्काको किमहाङ आल्ति पेओ मनकुसि आसति जेःगा जेःनितो, 47र सधय परमेस्वरको प्रसङ्सा जाह्ङ्नितो। अरु मान्तालमइमा ओउमयकाय झाकितो, र दिनमले मुक्ति दोःओ मान्तालमकाय प्रभुइ ओउमयको हुलहाङ पाःति बइसास्याउतो।
Terpilih Sekarang Ini:
खबरदुत 2: CHEP
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2024 (Active), Mother Tongue Translators Society and Wycliffe Bible Translators, Inc. All rights reserved.