Matiu 13
13
A Iesu isran v'nen ivrur dui isran m'et na sei
(Mak 4:1-9; Luk 8:4-8)
1Arna napn lera a Iesu iln nmah kadav'a kalak a p'ak naui lil. 2#Luk 5:1-3.Laha, nelnal avstudau avp'lt asnn. Sena si lera, iv'a al nauak iamk kalak, nelnal udlani avp'tir a p'ak nauei.
3Sarei, isran v'nen kavrur sei istudau anr, kavr ti a, “Pavrni, dui iamk isran m'et na sei. 4Naran israni, nki irs a p'ak navanel, laha m'anh avrama kavtpluluei kavhani. 5Nki irs arna nadep' nav'et iter a nv'n, laha ispal ilahml, sena ti nadep' ialil a nut nen. 6V'eti naran neiel imima eia inasr, laha, sena ti uarr ihei, avm'lih. 7Nki irs arna nut makau iak. Laha, maku nen ilil kaharev'karr. 8V'eti nki irs arna nadep' p'as katu navan, nki inelnal iv'amk (100), nki inellm'sei (60), nki ineltl (30). 9!M'ertu drlnan iak a ti iparn sei, ipav'rn ani!”
?A Iesu isran v'nen sena v'ata?
(Mak 4:10-12; Luk 8:9,10)
10Laha, arm'ertuan avrama kavvr ani kavvr ti a, “Inap'i hin ksran v'nen asnr?”
11Ivrpranr kavr ti a, “Sena ti Atua ittu sarei a kam'i a ti pavrndu v'nen tutuah na v'anu eia, v'eti iatau anr. 12#Mat 25:29; Mak 4:25; Luk 8:18; 19:26.Sena ti m'ertu iak a sei apatu ki ml ani, sarei ipaiak a sei ipastudau mau. V'eti m'ertu iaiak a sei, apalev'la sei iter uam asnn. 13Sena si lera nsran v'nen asnr, sena ti avla sei, v'eti ahavledaui, avrn sei, v'eti ahavrndaui. 14#Aisaia 6:9,10.V'nenan Aisaia, iv'i pruvet ima katu hin asnr, ivr ti a, ‘Kam'i pavrn v'nen dav'a dav'a, v'eti mkavrndaui, pavlei dav'a dav'a, v'eti mkavledaui. 15Sena ti nlr m'ertu laha ima kahua, drlnar ima kaprpar, m'atar atvp'leskar sarei. Imahei ti apavla sei a m'atar kavrn sei a drlnar, kavrndu sei arna nlr kavvav v'ahienar, a ti Kana p'emhmah anr.’ 16#Luk 10:23,24.V'eti kam'i pavrn ipap'as, sena ti m'etam'i ila sei, drlnam'i irn sei. 17Sena ti nvrdaui nvr a kam'i, pruvet avstudau m'er m'ertu p'as avstudau avrn nam'er a ti apavla sei kam'i kvlei hilaha, v'eti ahavlei, kavrn nam'er a ti apavrn sei kam'i kvrni hilaha, v'eti ahavrni.
A Iesu iv'iv'en v'nen israni ivrur dui isran m'et na sei
(Mak 4:13-20; Luk 8:11-15)
18Sena si lera, kam'i pavv'rn a v'nen ntsran sarei ivrur dui isran m'et na sei. 19Naran m'ertu kinkin irn v'nen ivrur v'anuan Atua v'eti iarndaui, iv'amk m'a ti a Sitan ima kalev'la sei asrani a nln. Aulera inep'a naran asran sei a p'ak navanel. 20V'eti m'ertu la inep'a naran asran sei arna nadep' nav'et iter a nv'n ha, hin iv'i m'ertu irn v'nen p'as, iv'amk m'a ti irn ip'as ani kav'ahi. 21V'eti uarn ihei a nln. Ip'tir isusupa, v'eti naran der iari, v'aha autakm ani sena v'nen p'as, dav'a irs. 22M'ertu kinkin ml inep'a naran asran sei a nut makau iter. Hin irn v'nen p'as v'eti kav'ahur sei a nadep' uaki, nav'et isnari, kaharev'kar v'nen p'as a ti ikahvan. 23V'eti m'ertu inep'a naran asran sei arna nadep' p'as, hin irn v'nen p'as karndaui, laha navan iak. M'ertu kinkin navan inelnal iv'amk (100), m'ertu uraur navan inellm'sei (60), m'ertu uraur navan ineltl.”
A Iesu isran v'nen ivrur m'et na si p'as m'a m'et na si stu
24Isran v'nen uraur ml asnr, kavr ti a, “V'anu eia inep'a sera dui iamk isran m'et na si p'as al namlan. 25V'eti naran m'ertuan avm'atr, dui ilep'lei ima kasran m'et na nina stu asn uit, sarei karuh. 26V'eti naran ispal, raun iak, kalil katu navan, laha ala ti nina stu lahara ima kadasi ml asnn. 27Laha, arm'ertu na m'akarienan avrama asn mlinar kavvr ani kavvr ti a, ‘Mlin, nakm ktsran sera m'et na si p'as al namlam. ?Nina stu laha idan ip'i ml?’ 28Hin ivrpranr kavr ti a, ‘M'ertu kinkin ilep'la kana, hin ien si lera.’ M'ertu na m'akarienan avvr ani kavvr ti a, ‘?Krn ti p'vrav'a kavhslei kavtupiani?’ 29V'eti ivr ti a, ‘Imahei. Imahei pavhs nina stu kavhs uit m'ei. 30P'vm'ahu a ti aparru aparsilv' karlil dav'a ier naran na ti apatr uit. Arna naran lera p'evr anr ardu apavtr uit, kavr ti a, “Pavhsla nina stu ipatauamu, kavhumlsani a ti apasrani al nep'v'en, sarei pavtr uit kavtupiani al nmah nen iv'i nkak.” ’ ”
A Iesu isran v'nen ivrur m'et na m'adak varavar
(Mak 4:30-32; Luk 13:18,19)
31Isran v'nen uraur ml asnr, kavr ti a, “V'anu eia inep'a sera m'et na m'adak varavar m'ertu iamk ilav'i kasrani al namlan. 32M'et na nai lera isusupa mau arna m'et na si udlani, v'eti naran isi kadama kav'i nai lil, isiv' si udlani al naml, dav'a m'anh na p'knaran avrama kavlak arna ranan.”
A Iesu isran v'nen ivrur iis
(Luk 13:20,21)
33Isran v'nen uraur ml asnr, kavr ti a, “V'anu eia inep'a sera iis la tav'et iamk ilav'i kataui a nl vlaua ilin paket itl ha, dav'a ti vlaua udlani ima kasrsru.”
Pruvet avrur p'kl ti apasran v'nen
(Mak 4:33,34)
34Si udlani lera a Iesu ivr a nelnal, isran v'nen uaki, iavr si kinkin anr ipam'auar. 35#Npin 78:2.A ti sei pruvet ivri tituei ipama katu hin, ivr ti a, “Kana p'esran v'nen, kavrp'ep'a sei itutuah naran Atua ien nadep' ier dika.”
A Iesu iv'iv'en v'nen israni ivrur m'et na si stu
36Sarei, a Iesu itap'er nelnal avrahau, sarei hin kadav'a al nmah. Laha, arm'ertuan avrama asnn, kavvr ti a, “Pavrp'ep'a v'nen ktsran sarei ivrur nina stu isi al naml.”
37Ivrpranr kavr ti a, “Dui la isran m'et na si p'as ha, iv'i Kana nv'i Net M'ertu. 38Nl naml iv'i nadep' ka. M'et na si p'as iv'i m'ertu na v'anu eia, v'eti nina stu iv'i m'ertuan a Sitan. 39Dui ilep'lei kasran nina stu iv'i a Sitan. Naran na ti apatr uit iv'i naran nadep' ipahiris. Ardu apavtr uit avv'i ensel. 40Naran avtupien nina stu kavsrani al nap', ipanap'i lera naran nadep' ipahiris. 41Kana nv'i Net M'ertu p'etep'a enselak a ti apavlev'la si udlani arna v'anuak iani ti m'ertu avtitihap'el, m'er m'ertu udlani avluvn a v'nen huan Atua. 42Kavsranr al nep'v'en. Arna nut lera apavtakal kavhaha lur. 43Arna naran lera m'ertu p'as apavar kavnep'a neiel arna v'anuan a Tetiar. !M'ertu drlnan iak a ti iparn sei, ipav'rn ani!
A Iesu isran v'nen ivrur si p'as atutuani
44Hilaha ml, v'anu eia inep'a sera si p'as iamk atutuani al naml iamk. Naran m'ertu kinkin ipaslei, itutuani ml karn ip'as ani istudau, kadav'a kulul a sian udlani, kul nadep' lahara.
A Iesu isran v'nen ivrur neiau p'as
45Hilaha ml, v'anu eia inep'a sera dui iulul a sei nakl, katala a neiau p'as. 46Naran ipasla neiau p'as iamk, ulienan ilil, iv'a kulul a sian udlani kadama kuli.
A Iesu isran v'nen ivrur nit
47Hilaha ml, v'anu eia inep'a sera nit iamk asrani al nata kalev' tilau ururaur istudau. 48Naran ilini arv'i ima aut, kalak asnn katupien terp'as al naten, v'eti kasran terstu nen. 49Ipanap'i lera naran nadep' ipahiris. Ensel apavrama kavtupr m'ertu stu asnr m'ertu p'as, 50Kavsranr al nep'v'en. Arna nut lera apavtakal kavhaha lur.”
51A Iesu ivr anr kavr ti a, “?Kam'i kvrndu si udlani lera?” Avvr ani kavvr ti a, “Aau, Mlin.”
52Laha, ivr anr kavr ti a, “Sena si lera dui na v'nen hua udlani la avrndu mamh sei ivrur v'anu eia ha, hir avnep'a dui lil iamk ip'aur nmah, kalev' si m'dah m'a sei itrtarep' asn sian udlani.”
M'ertu arna nut a Nasaret avrnp'lei a Iesu
(Mak 6:1-6; Luk 4:16-30)
53Sarei, naran a Iesu itsran sera v'nen lera udlani, iruh atlera. 54Kadama a utan, kav'iv'en sei anr al nmah tamatar, kani ti avtah ani istudau, kavvr ti a, “?Aulera ilev' v'ahienan m'a pari lililan laha ip'i? 55?Nsarei Aulera iv'i net dui ihl nmah nakl? Nahan a unian iv'i a Meri, artv'aln avv'i a Sim'is, a Suses, a Saimun m'ei a Suta. 56A v'nn udlani avlak asnd uaki. ?V'eti Aulera ilev' si udlani lera ip'i?”
57 #
Sun 4:44. Laha, avrnp'lei, ahavrni ml. V'eti a Iesu ivr anr kavr ti a, “M'ertu arna v'anu uraur apavani naha pruvet ipav'a eia, v'eti m'ertu arna v'anuan v'aha al nmahan akavani.” 58Laha, hin iahan pari lilan istudau atlera, sena ti ahavv'ahi.
Terpilih Sekarang Ini:
Matiu 13: nmb
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2023 Presbyterian Reformed Church of Australia