Ghalat 1
1
Mɛswosel
1Yɛ ɛ́ mam Pɔl mot lwoma ɛ Klisto. Ye ɛ́ tok bot nasa náá, mɛ di mot lwoma ɛ Klisto, ààkobɛ bɛ'ak ɛkwosak ɛ mot ɔ. Tin, yɛ ɛ́ kɔ ɛkwosak ɛ Yezu Klisto bɛ nɛ Zɛɛb sɛɛg, mot nagomal nyɛ bhis ɛsyee ɔ, mɛ di mos mot lwoma ɛ Klisto. 2Bis nɛ bɔn ɛ nyɛɛg bam di wak ɛ, bis sɛɛgaa ɛ étɛp ɛkwyal mɛkana mak nɛ bot ɛ zɛɛga mendjaala kyee dik Ghalat. 3Beta náá, Zɛɛb Sɛɛg'ena nɛ Ghɛŋ Yezu-Klisto djɛ bin enɛm nɛ embɛɛ nɛ egwyem bɛ. 4Klisto naaka nyel'ɛ ɛmet buwa étɛp ɛtsik ɛ mena tɔ mesyem. Ye nabɛɛ étɛp nyɛ neepɛk mena tɔ bhel mbee tsik bot ɛ di mos kɔ bɔs'ak. Nyɛ nasa deenek ɛ nɛ ɛkwosak ɛ Zɛɛb Sɛɛg'ena. 5Duu nɛ nɔ Ghɛŋ, kɔm sii nɛ kɔm! Amɛn!
Sim Mbɛɛ Bhaadal
6Mɛ ɛpedjoka nɛ dáa bi zeleelum koŋ nɛ Zɛɛb, mot nazedjóo bin kɔ enɛm nɛ embɛɛ ɛ Klisto ɛ, étɛp ɛdu dhiiti mbi mɛlyo mɛ bɛdhiiti bot di eke náá, yɛ ɛ́ Mbɛɛ Bhaadal ɛ. 7Deenek, ye tok nɛ dhiiti mbi Mbɛɛ Bhaadal! Yɛ ɛ́ bot ɛ di ezɛm bin, bɛ kwyɛl ɛ ɛswoola Mbɛɛ Bhaadal ɛ Klisto. 8Tin, ye nakoozodi bisɔ bɛmet nɛghu fofop di edus tɔ gwoo ɔɔ, nyɛ zyɛ zɛgoola bin dhiiti Mbɛɛ Bhaadal di ààbɛ tyee wat nɛ yii bis nagoola bin yɛ ɔ, mot tak bela ekɛlok! 9Bis eezelɛɛ yɛ, mɛ ɛpebaabasal bin yɛ nenak. Mot ɛ zɛgoola bin Mbɛɛ Bhaadal sis di ààbɛ tyee wat nɛ yii bi nazegwak ɔɔ, sa bi ààmyaal nyɛ. Mot tak goka nɛ ɛbela ekɛlok. 10É di'enek, mɛ ààsaa náá, bot myaala nɛ nam, mɛ saŋ ɛ náá, Zɛɛb myaala nɛ nam. Mɛ ààkwyɛl náá, bot myaala nɛ nam. Mɛ ɛpediɛ di ekwyɛl náá, bot myaala nɛ nam ɔɔ, pe mɛ tok mot mɛsa ɛ Klisto.
Pɔl nazɛdi mot lwoma dáa?
11Bɔn nyɛɛg bam, mɛ lɛɛ bin ɛ náá: Mbɛɛ Bhaadal mɛ goola bin ɛ, ye tok esuwa-esuwa ee mot zesu ɛ. 12Etɛɛ náá, ye tok mot nadjɛ mɛ yɛ, nɛghu ɛlyaal mɛ yɛ, deenek yɛ ɛ́ Yezu Klisto ɛ natel mɛ.
13Ye nabɛɛ bi naagwak mɛfulu mɛ mɛ nadi esa, é sok mɛ nadi mɛ dinaa mot zɛɛga mendjaala mɛ eYuda ɛ. Bi nɛgu dáa mɛ nadi ewa bot ɛ zɛɛga mendjaala mɛ Zɛɛb tɔ tsik mezuk ɛ, nɛ ɛwa zii étɛp ɛgô ɛ zɛɛga mendjaala ɛ Zɛɛb. 14É sok mɛ nadi tɔ zɛɛga mendjaala mɛ eYuda ɛ, mɛ naadhaa bɛtɛ nɛ bɔn ɛ nyɛɛg bam eYuda e kɔkɔ membu mam tɔ ɛduwal. Etɛɛ náá, mɛ nadi esa zii nɛ ɛwa lyem tɔ mɛtiŋ mɛ bɛbhaab bis.
15Tin, Zɛɛb naazeloosɛ́ɛ mɛ tɔ mɔ nyaag'am, ɛsok nɛ mɛ nɛ byel, nyɛ naadjóo mɛ tɔ enɛm nɛ embɛɛ bɛ. É ɛwala nyɛ nakwos ɛ, 16nyɛ eetel mɛ mɔn'ɛ etɛɛ náá, mɛ neekɛgoola Mbɛɛ Bhaadal nɛ bot ɛ di ààbɛ tɔ mbyak eYuda ɔ, di elii dum nɛ nɛ. Tin, mɛ nabɛɛ ààkɛsaa mɛlyo pɛ daa mot, 17bela náá, mɛ ààpatɔ̂ pɛ Yeluzalɛm, pɛ daa bot ɛ nadi bot ɛ lwoma ɛsok nɛ nam ɔ. Mɛ natɔ̂ ɛ pɛ kyee dik Alaabi, bhii tak mɛ eezɛsik pɛ tɔ ghaada Dhamas. 18Membu melɛl bhii tak mɛ eezɛtɔ̂ pɛ Yeluzalɛm, étɛp ɛkɛboma nɛ Pyɛɛd, tin, mɛ eezɛdi mɛlu kam nɛ etɛn bis nɛ nɛ. 19Mɛ nabɛɛ ààboma nɛ dhiiti mot lwoma sis bhii Zak mɔɔ nyɛɛg ɛ Yezu. 20Etɛp ee mɛ di ekwyal bin wak ɛ, yɛ ɛ́ etɛp etsɛɛtsɛ é mis ɛ Zɛɛb, mɛ ààpakɔɔ.
21Bhii tak, mɛ eezɛtɔ̂ pɛ kyee mɛdhik mɛ Siili nɛ Silisi. 22Bot ɛ zɛɛga mendjaala mɛ Klisto di pɛ kyee dik Yudea ɔ, nabɛɛ bɛ dinaa ààgu ɛbhwoob ɛlam. 23Bɛ nazogwak ɛ bot é ke náá: «Mot nadi ewaka mena tɔ tsik mezuk kpaambel ɔ, nyɛ moo mos ɛ́ egoola Mbɛɛ Bhaadal ɛdum ɛ koŋ nɛ Zɛɛb, ee nyɛ nadi ewa zii étɛp ɛgô ɛ.» 24Tin, bot ɛ Ghalati nadi eduwal Zɛɛb kɔ ɛsu ɛlam.
Terpilih Sekarang Ini:
Ghalat 1: bkw
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© (Active), Wycliffe Bible Translators, Inc. All rights reserved.