मरकुस 8

च्यार झार मिनखा को पेट भर्यो

(मत्ती 15:32–39)

1बा दिना म एक बार ओज्यु ईसु कनै घणीसारी भीड़ भेळी होई। अर बाकन खाबा ताँई क्युंई कोनी हो। इ बजेऊँ ईसु आपका चेलानै बुलायो अर बानै बोल्यो, 2“मनै आपै तरस आर्यो ह क्युं क अ मिनख तीन दिनाऊँ मेरै सागै हीं अर आकै कनै खाबा ताँई क्युंई कोनी। 3अर म आनै भूखानैई घरा भेजूँ तो अ गेला मई आखता होर बठैई गोडा टेक देसी। क्युं क कई तो बोळी दूरऊँ आएड़ा हीं।” 4चेला ईसुनै बोल्या, “इ उजाड़ म म्हें रोटी कठैऊँ ल्यावां, जिऊँ आको पेट भर सकां।” 5ईसु बाऊँ बुज्यो, “थारै कनै कत्ती रोट्या ह?” बे बोल्या, “म्हारै कनै सात रोट्या ह।”

6ईसु भीड़नै हुकम दिओ थे पंगत बणार जमीन प बेठ ज्याओ। अर इकै पाछै ईसु बा सात रोट्यानै हात म लेर परमेसरनै धनेवाद देर बा रोट्या का टुक कर-कर आपका चेलानै देतो गयो अर चेला भीड़नै परोसता गया। 7बाकन थोड़ीसिक मछी बी ही ईसु बानै बी लिओ अर परमेसरनै धनेवाद देर चेलानै दिओ अर चेला मिनखानै देता गया। 8बे सगळा खार धापगा अर चेला रोट्याऊँ भरेड़ा सात चोल्या बठैऊँ उठाया। 9बठै करीब च्यार झार मिनख हा 10इकै पाछै ईसु बानै बठैऊँ बिदा कर्यो। अर खुद आपका चेला क सागै न्याव म चढर दलमनूता दिसावर चलेगो।

फरिसी ईसुऊँ ईस्बर नगरी की सेलाणी माँगी

(मत्ती 16:1–4)

11 # मत्त 12:38; लूक 11:16 फरिसी ईसु कनै जार बिऊँ जिदबा लाग्या क, तू सचमई परमेसर कानिऊँ भेजेड़ो ह जणा म्हानै ईस्बर नगरी की कोई सेलाणी#8:11ईस्बर नगरी को कोई बडो चमत्कार दिखा। क्युं क बे ईसुनै फसाबो चावै हा। 12#मत्त 12:39; लूक 11:29ईसु बाकी इ बातनै सुणर आपकी आत्मा म जोरऊँ हूँकार भर'र बाऊँ बोल्यो, “इ पिडी का लोग चमत्कार क्युं माँगै ह? आनै सचमई ईस्बर नगरी की कोई सेलाणी कोनी दिज्यासी।” 13इकै पाछै बो बानै छोडर ओज्यु न्याव प चढगो अर दरिआव क परलै नाकै चलेगो।

फरिसीया अर हेरोद को खमिर

(मत्ती 16:5–12)

14चेला आपकै सागै रोटी लेबो भूलगा पण बाकन न्याव म एकई रोटी ही अर इनै छोडर बाकन खाबा ताँई क्युंई कोनी हो। 15#लूक 12:1ईसु बानै चेतार ओडायो क, “थे फरिसीया अर हेरोद का खमिरऊँ#8:15खमिर बाका दोगलापुणानै दिखावै ह। (रोट्यानै फुलाबा ताँई आटा म गेरबा की चिज ) बचर रेहज्यो।” 16चेला आपसरी म बतळाबा लाग्या क ईसु आ बात इ ताँई बोलै ह क्युं क आपणा कनै रोटी कोनी ह। 17ईसु बाकी इ बातनै भापगो अर बाऊँ बोल्यो, “थे आपसरी म अंय्यां क्युं सोचो हो क म्हारै कनै खमिर हाळी रोटी कोनी ह? थारै हालबी क्युंई कोनी पलै पड़ी? थारी मती क्युं बंदगी। 18#मर 4:12थारै आँख्या होतासोता बी थानै कोनी सुजै? अर थारै कान होतासोता बी थानै कोनी सुणै? थानै क्युंई याद कोनी? 19जनाड़ै म पाच झार मिनखानै पाच रोटीऊँ खुवायो हो बी दिन थे रोट्याऊँ भरेड़ा कत्ता चोल्या उठाया हा?” अर बे ईसुनै बोल्या, “बारा चोल्या।” 20“अर जनाड़ै म च्यार झार मिनखानै सात रोट्याऊँ धपायो हो बी दिन थे रोट्याऊँ भरेड़ा कत्ता चोल्या उठाया हा?” बे बोल्या, “सात चोल्या।” 21ईसु बाऊँ बोल्यो, “थारै हालबी पलै कोनी पड़ी के?”

ईसु आँदा की आँख्या खोली

22बे बेतसदा पुग्या अर बठै लोग एक आँदानै ईसु कनै ल्याया अर ईसुऊँ अरदास करता बोल्या बिपै हात धरद्‍यो। 23ईसु बी आँदा मिनख को हात पकड़्यो अर बिनै गाँव क बारनै लेगो। अर बिकी आँख्या म थूक्यो अर आपका हात बिपै धर्यो अर इकै पाछै बिनै बुज्यो, “तनै क्युं सुजै ह के?” 24बो बोल्यो, “मनै हाल तो धुन्दो-धुन्दो सुजै ह। मनै मिनख चालता दरख्ता की जंय्यां सुजीं हीं।” 25ईसु ओज्यु बिकी आँख्या प हात धर्यो जणा बो गोर कर देख्यो अर पाछै बिनै सूल सुजबा लाग्यो। अर बो सगळी चिजानै सूल ढंगऊँ देखबा लाग्यो। 26बो बिनै आ खेर घरा भेज्यो, “गाँव म मना जाए।”

पतरस बोल्यो ईसुई मसी ह

(मत्ती 16:13–20; लूका 9:18–21)

27ईसु अर बिकाळा चेला कैसरिया फलिपी गाँव म जार्या हा गेला म ईसु बानै बुज्यो लोग मनै काँई खेवीं हीं, “म कूण हूँ।” 28#मर 6:14,15; लूक 9:7,8बे ईसुनै बोल्या, “कई तो थानै बतिस्मो देबाळो यहून्ना अर कई एलिआ अर कई परमेसर की खेबाळा मऊँ एक समजै ह।” 29#यह 6:68,69ईसु बाऊँ बोल्यो, “थे मनै काँई समजो हो?” पतरस बोल्यो, “थे मसी#8:29परमेसर को टाळेड़ो खास, बचाबाळो, जिनै यहूदि मिनख उडिका हा। हो।” 30ईसु बानै चेतायो क, “थे इ बात क बारां म कोईनैई मना खिज्यो।”

ईसु आपकी मोत क बारां म चेलानै बतायो

(मत्ती 16:21–28; लूका 9:22–27)

31ईसु आपका चेलानै बताबा लाग्यो क मिनख का बेटानै दुख भोगणो ह। बो बोळो दुख भोगसी अर यहूदि नेता, परधान याजक अर सास्तरानै सीखाबाळा बिनै तजसी अर जिकै पाछै बो मार्यो जासी। पण बो तीसरा दिन मरेड़ा मऊँ जिज्यासी। 32अंय्यां बोलर ईसु आपका चेलानै खुद क बारां म सगळी बाता सची-सची बता दिओ। जणा पतरस ईसुनै एकला म लेगो अर ईसुनै दकाल्यो। 33पण ईसु पाछो मुड़र आपका चेलानै देख्यो अर पतरसनै दकालर बोल्यो, “सेतान! मेरै कनैऊँ चल्योजा। तू परमेसर की जंय्यां कोनी सोचै पण मिनखा की जंय्यां सोचै ह।”

ईसु क पिछै चालबा को मतबल

34 # मत्त 10:38; लूक 14:27 ईसु आपका चेला अर भीड़नै आपकै कनै बुलार बानै बोलबा लाग्यो, “ज कोई मेरै गेल आबो चावै ह बो खुदनै तज'र, आपकी सुळी#8:34दुख उठार मरबा ताँई बी त्यार होबो। उठार मेरै गेल होले। 35#मत्त 10:39; लूक 17:33; यह 12:25जखो बी आपको पिराण बचाबो चावै ह बो आपका पिराणा की हानी उठासी। अर जखो बी मेर ताँई अर चोखा समचार ताँई आपका पिराण तजसी, बो बिनै बचासी। 36कोई मिनख आपका पिराणा की हानी उठार सगळा जगतनै जीत ले जणा बिनै काँई फाईदो? 37कोई चिज क बदला म मिनख खुदका पिराण दे सकै ह के?” 38ईसु बाऊँ बोल्यो, “जखो बी इ कुकरमी अर सचा परमेसरनै कोनी ध्यार बाळी पिडी मऊँ, मेरूँ अर मेरा बचनाऊँ मुंडो फेरसी जणा मिनख को बेटो बी जद बो पबितर ईस्बर नगरी दुता क सागै अर आपका परम-पिता की मेमा म आसी बो बी बा मिनखाऊँ मुंडो फेर लेसी।”

Terpilih Sekarang Ini:

मरकुस 8: एस डब्लु वी

Highlight

Kongsi

Salin