काम 22
22
1“यहूदि भाईड़ो, अर बडको मेरो पक्ष बी सुणो।” 2आ सुणर की बो म्हारूँ इबरानी भासा म बोलै ह जणा भीड़ एकदम चुपचाली होगी। जणा बो बोल्यो, 3#काम 5:34–39“म एक कलिकीया का तरसुस म जलमेड़ो एक यहूदि मिनख हूँ। अर मेरी लिखाई पढाई अठैई इ यरूसलेम नगरी म गमलिएल धरम-गरूजी क कनैई होई ह। अर आपणा बाप-दादा का नेम-कायदा मनै सई ढंगऊँ सीखाया गया हीं। अर जंय्यां थे परमेसरनै मानबा ताँई कट्टर हो बंय्यांई म बी हूँ। 4#काम 8:3; 26:9–11इ ईसु का गेला प चालबाळा मिनखानै म मार गेर्यो अर बानै दिन घाल्यो हूँ अर इ गेला प चालबाळा मोट्यार अर लूगायानै बांद-बां'दर जेळ म गेर दिआ। 5अर मेरी इ बात का गुवा म्हायाजक अर म्हासभा का सगळा यहूदि नेता ह। म बाऊँ अधिकार कागद मंडवार इ गेला प चालबाळा यहूदि भायानै पकड़र यरूसलेम ल्यार बंद करबानै दमिसक नगरी जार्यो हो।
बिको मन बदलबा क बारां म पोलुस बोल्यो
(काम 9:1–19; 26:12–18)
6“अर जद चालतो-चालतो म दमिसक क सांकड़ै लाग्यो जणा दोपारी क टेम आसमानऊँ मेरै च्यारूमेर एक जोरकी बिजळीसी चमकी। 7अर जिकी बजेऊँ म धरती प पड़गो अर मनै एक उवाज सुणी जखी अंय्यां ही, ‘ओ साऊल, ओ साऊल तू मनै क्याले दिनघालै ह?’ 8जणा म बोल्यो, ‘म्हराज थे कूण हो?’ अर बे कह्या, ‘म ईसु नासरी हूँ, जिनै तू दिनघालै ह।’ 9मेरै सागैहाळा बिजळी को बो च्यानणो सो तो देख्या पण जखो मेरै सागै बात करै हो बिकी उवाज कोनी सुण्या। 10जणा म बोल्यो, ‘तो परबु म काँई करूं?’ परबु मेरूँ कह्या, ‘खड़्यो होर दमिसक म जा, अर जोक्यु तनै करबो ह बो तनै बठैई बतायो ज्यासी।’ 11अर बि च्यानणा की बजेऊँ मनै सुजबो बंद होगो, अर मनै मेरै सागैहाळा हात पकड़र दमिसक ल्याया।
12“बि नगरी म हनन्या नाम को एक मिनख हो जखो नेम-कायदा प चालबाळो अर बठै का यहूदि मिनखा म मान्यो-थान्यो हो। 13परबु की इंछ्या गेल बो मेर कनै आर खड़्यो होर मेरूँ बोल्यो, ‘मेरा लाडला बिस्वासी भाईड़ा साऊल, ओज्यु देखबा लाग।’ अर बि घड़ीई मेरी आँख्या का पाट खुलगा अर म बिनै देख्यो। 14जणा बो मेरूँ बोल्यो, ‘आपणा बाप-दादा को परमेसर तनै इ ताँई टाळ्यो ह क तू बिकी इंछ्या जाणै। अर बि धरमीनै देखै अर बिका मुंडाऊँ बाता सुणै। 15क्युं क तू मिनखा क आगै बा बाता की गुवाई देसी जानै तू सुणी अर देखी। 16इब देर क्याकी? खड़्यो हो बतिस्मो ले अर बिका नामऊँ अरदास कर जिऊँ परमेसर तेरा पाप धो दे।’
17“यरूसलेम आबा क पाछै म जद एक दिन मनदर म अरदास करर्यो हो, जणा मनै चाणचुकई एक दरसाव होयो। 18अर मनै परबु जी दरसाव देर कह्या, ‘तावळोसो यरूसलेमऊँ चल्योजा क्युं क अठै का मिनख मेरा बारां म तेरी गुवाईनै कोनी मानी।’ 19जणा म बोल्यो, ‘परबु जी थे तो जाणोई हो की म यहूदि मिनखा क अरदास करबाळी झघा म जार थार प बिस्वास करबाळा क तड़ा मरवाया करतो हो अर जेळ म गेर दिआ करतो हो। 20#काम 7:58अर जद थारा गुवा सतफनुसनै मार्यो जार्यो हो जणा बि टेम म बठैई खड़्यो हो, अर बिकी मोतनै सई बताई अर बिनै मारबाळा का गाबा की रूखाळी करी।’ 21जणा बो मेरूँ बोल्यो, ‘जणा जा म तनै दूर-दूर ताँई गैर-यहूदि मिनखा क कनै भेजस्युं।’” 22आ बाता ताँई तो लोग बिकी सुणबो कर्या, अर इकै पाछै बे जोर-जोरऊँ रोळा घालबा लागगा, “अंय्यां को मिनख धरती प जीबा जोगो कोनी इनै मार गेरो।” 23अर जद बे रोळा घालता अर गाबा बगाता अर आसमान म धुळीया उडाता रिह्या। 24जणा पलटण को सरदार बिनै सेनाहाळा गड म लेज्यार बिकै तड़ा मारबा अर जाच करबा ताँई ओडायो क, “लोग इकै खिलापत म अंय्यां क्युं रोळा घालीं हीं।” 25पण जद बे बिनै तड़ा मारबा ताँई बांदर्या हा जणा बो सुबेदारऊँ बोल्यो, “कानून गेल थे एक रोमी मिनख क बिना अपराद साबित होया तड़ा लगवा सको हो के?” 26आ सुणर सुबेदार पलटण का सरदार क कनै गयो। अर बिनै जार बोल्यो, “तू ओ काँई करै ह? ओ तो रोमी मिनख ह।” 27जणा पलटण को सरदार बिकन आर बिऊँ बोल्यो, “मनै बता, के तू रोमी ह?” जणा बो बोल्यो, “हाँ।” 28आ सुणर पलटण को सरदार बोल्यो, “म रोमी नागरिकता मोटी रकम देर लिओ हूँ।” पोलुस बोल्यो, “म तो जलमजातई रोमी हूँ।” 29जणा बे सगळा मिनख जखा बिकी जाच पड़ताळ करर्या हा बे सगळा नाकै होगा। अर पलटण को सरदार बी आ जा'णर डरगो क म इनै बांद्यो हूँ।
यहूदि म्हापंचायत म पोलुस की पेसी
30सऊँ पेली पलटण को सरदार आ जाणबो चायो क यहूदि पोलुस क खिलापत म काँई दोस लगार्या हीं। इ ताँई बो दुजै दिन बिका हात-पग खुलवाया अर परधान याजक अर सगळी म्हासभानै भेळा होबा ताँई ओडायो। जणा पोलुसनै ल्यार बाकै सामै खड़्यो कर दिओ।
Terpilih Sekarang Ini:
काम 22: एस डब्लु वी
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
(c) 2010-2017, New Life Computer Institute. All rights reserved