یُونس 2
2
حضرت یونس نی دُعا
1مَچھی نے ٹِہڈے وِچوں حضرت یونس رب اگے دُعا کِیتی - 2اُنہاں اپݨے معبود اللّٰہ تعالیٰ کی آخیا،
” میں اپݨی مصیبت وِچ رب اگے التجا کِیتی،
تے اُس مہاڑی دعا قبول کِیتی۔
اے رب، میں پاتال نی گہرائی وِچوں چِیخی کے فریاد کِیتی،
تے تُوں مہاڑی سُنی۔
3تُوں مِکی ڈُونگے پاݨیئے وِچ
بلکہ سمندر نے بشکار سٹی شوڑیا،
تے پاݨیئے نے تیز بہاؤ مِکی کہیری کِہندا۔
تہاڑی ساری لہراں تے موجاں مہاڑے اپروں لنگی گئیاں۔“
4میں آخیا، ”مِکی تہاڑے حضور وِچوں کڈی شوڑیا گیا اے،
پر میں تہاڑے مُقدّس کہار نی طرف دوبارہ تکساں۔
5پاݨی مہاڑے گاٹے تک پہنچی گیا،
سمندر مِکی چوّاں پاسوں کہیری کِہندا،
سمندری بُوٹے مہاڑے سِرے نال چمٹی گئے۔
6میں پہاڑاں نی بُنیاداں تک ڈُبی گیاں،
میں پاتال نی گہرائی وِچ پُہنچی گیاں،
جِس نے دروازے مہاڑے پِچھے بند ہوئی گئے۔
پر اے رب مہاڑے خدایا، تُوں مہاڑی جانی کی کھڈّے وِچوں کڈی آندا۔
7جدُوں مہاڑی جان نِکلݨ لغی، اے رب، مِکی تُوں یاد آیا،
تے مہاڑی دعا تہاڑے مُقدّس کہار وِچ تہاڑے حضور پُہنچی۔
8جیہڑے لوک بیکار بُتّاں نی پوجا کرنے اݨ،
او تہاڑی محبت تُوں مُنہ پھیری کِہننے اݨ۔
9پر میں شُکرگزاری نے گِیت گاݨیاں تُکی قُربانی پیش کرساں۔
جیہڑی منت میں منی اے، اُسی پُورا کرساں۔
رب ہی نجات دیݨے آلا اے۔“
10فِر رب مَچّھی کی حُکم دِتا، تے اُس حضرت یُونس کی خُشکی پر اُگلی شوڑیا۔
Terpilih Sekarang Ini:
یُونس 2: phr
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Text (c) 2021 Noor-e-Kashmir
Audio (p) 2021 Noor-e-Kashmir