MATEO 27
27
Jesosa dojocapoa cuaa emeshimese Pilatoque oja bajji
(Mc 15.1; Lc 23.1-2; Jn 18.28-32)
1Majoya aje jjapojjaquiajo mecajjeahuanei ojjaña Eyacuiñajjija equi-aijo chacochacopoquiani etii poanicuana, judío etiicuana pea-ai oya jjashahuabaquime pea-ai pocapoa Jesosa quecuamee'yojjijo. 2Jama jjashahuabaquime pomajjeya Jesosa ejeyo dojocapoa cuaa romano dejja emeshimese poani Pilato aniyasijje oja manomee'yojji.
Judas mano'yapoa jjanaajjequisibijeaqui'yapoa oyatii jjonojo
3Majoya aje Judas, Jesosa iñameesahuajji epo eso'dojjo sosejje etiicuaa Jesosa quecuameecaje'yo shajja-ajjamajje pea jjashahuabaquime po'yapoa Jesosajo. Jamajjeya ohuaya oja jjesheajja bejjo 30 eso'dojjo huiso huacuaya jeaquica'yapoa Eyacuiñajjija equi-aijo chacochacopoquiani etii poanicuana, judío etii poanicuana nequiyasijje. 4Ohuaya jama acañaquiapoa etiicuana ba'a: —Eya queamimishinee poanaje jjabaquinaje. Dejja mimishima'nei eyaya iñameesahuanaje miquianaja quecuamee'yojji.—
Oya jama mimime poajo etiicuaa jama acapoa oya ba'a: —E'e, miquea ejjashahuabaquijji aje ca jamaya, ecuanajaya ca jama pojjeama. ¡Jamajje camanoqui'yahua!—
5Majoya Judasya oja quia bejjo eso'dojjo huojjojeajeacapoa Eyacuiñajjija equi-aiquiquibojotii. Majo ani poqui'yomajje oyaneitii jjanaajjequisibijeaqui'yapoa jjonojo.
6Eyacuiñajjija equi-aijo chacochacopoquiani etii poanicuaa oja huojjojeajea ani bejjo eso'dojjo chichaquica'yapoa. Jama poa cuana ba'a: —Jiquio eso'dojjocuana pea quecuamee'yojji sosejje jjeshe poanaje. Jamajjeya jiquio Eyacuiñajjija echacojji yajjijo quiaca'yoajja, iyaca'yoajja oja equi-aiyasijje.—
7Majoya etii poanicuana mimimimimajje jjashahuabaquiapoa meshi jjeshejji ma bejjo eso'dojjojoya. “Meshihuahua iñapejjajji” bajjani acani meshi jjeshecapoa cuaa joya peajaajji huapapojjeamama'nei poanajecuana mojeapoquiajji. 8Jamajojoya aje ma meshi bajjanicapoa “Ena'huo'o cuayaquinaje meshi”. Jjeyanei pea-aiya oyatiiya acani. 9-10Jamaya meshi jjeshecapoa cuaa ma ecua yahuajonei Eyacuiñajjija esohuihuohuijji poa dejjaa Jeremías bajjaniya tehuecapoa jama jayojjaya. Jama tehueme acapoa ba'a: “Etii poanicuaa 30 huisome eso'dojjo jjesheca'yonaje ma Israel dejjacuaa sosequiacanaje huisotii o quecuamee'yojji sosejje. Ma bejjo eso'dojjojoya Meshihuahua iñapejjajji bajjani meshi jjeshecanaje. Jamaya oya Emeshimeseneiya huohuicanaje ojaya meshi ejjeshejji.” Jama tehuemeya yahuajonei acapoa Jeremiasya.
Emeshimese Pilatohua a'a Jesosa queamimishi poani ebajji huohuiajjacapoa
(Mc 15.2-5; Lc 23.3-5; Jn 18.33-38)
11Majoya aje Jesosa dojocapoa cuaa emeshimese Pilatoque oja a'a Jesosa queamimishi poanaje ehuohuiajjajji. O ani cojjaneijo nequimeemajje Pilatohua Jesosa huohuiajjacapoa jama ba'a: —¿A'a miya judiocuanaja emeshimese poani?—
Jesosaa saja-acapoa jama ba'a: —E'e, joya ecua miya huohuiajjanaje jama pea-aiya eya poani.—
12Eyacuiñajjija equi-aijo chacochacopoquiani etii poanicuaa, judío etii poanicuaa pea-ai Jesosa queamimishinee poani niñebacaquijotii Pilatoja eshajja-ajjajji Jesosa jamatii nequiapoa mimima'tii, jjasaja-aquiajjanei. 13Majoya aje etii poanicuaa oya queamimishi niñebacani shajja-ajjamajje Pilatohua Jesosa huohuiajjatiicapoa jama ba'a: —¿A'a miquea shajja-ajjajjima joya mi queamimishi ajji poanicuana?—
14Ohua jama huohuiajjame acajje Jesosa jamatii nequiapoa sohuima' che oe mimijjimanei poa. Jesosa mimima'tii nequi bamajje emeshimese jjabaneineiquiapoa ojo, yajjajje shai oya jama, mimiajja, jjanahuequiajja.
Pilatohua esohui tehuecapoa Jesosa manomee'yojji acui ecuiata'apeejo
(Mc 15.6-20; Lc 23.13-25; Jn 18.38—19.16)
15Ojjaña eshequiajajo judiocuanaja fiesta ma yahuajonei oja etiiquianaja bacuacuana Eyacuiñajjiya nahuecapoajo shahuaba'yojji poe'yajo romano emeshimese poaniya oe ejeanobia ani huoojeacuayameeca'yapoa cua judiocuaa babacacaje dejja. 16Oe dejja ejeanobia aniapoa Barrabás bajjani. Queahuisocuaa oya queamasenee poani shajja-ajjacapoa. 17Majotiiya aje queahuisocuana ejjachichaqui nequi bamajje Pilatohua jama huohuiajjame acapoa cuana ba'a: —¿Ache dejja shai ejeanobia ani miquiaaya eya huoojeacuayamee'yosa-aña? ¿A'a Barrabás, a'a Jesosa joya becacuaa Eyacuiñajjija huoojea ojjaña nahue'yojji epojji acani? ¿Ache shai?—
18Pilatoja ebanei poa yajjajo judío etii poanicuaa Jesosa iñameecanaje. Queahuisocuaa Jesosa queapame poani bacani. Judío etiicuana ca queapamepishana bacaniyajjejojoya botiamanei acapoa etiicuaa Jesosa o sapo-ajjaneiyajjejojo.
19Majoya aje Pilato jjashahuabaneiquianijotii yajja Jesosa acajji emeshimeseja quii-anijjijotii ani, oja huanaseya esohui oque huoojeacapoa jama ba'a: —¡A'a jja ca miya oe joya dejja queanee amee'yojji cuana! Oya ca jja ca oma queapamenee, mimishiamanei. Jiquio mecajje eya jjacahuibaquinaje ojo, majoya eya cahui'yojjimatii jaa jjapojjaquinaje.—
20Eyacuiñajjija equi-aijo chacochacopoquiani etii poanicuaa, judío etiicuaa pea-aiya ma ejjachichaqui nequicacuana huohuicapoa jama ba'a: —Emeshimeseya huohuiajjacajo ache ojaya huoojeacuayameeca'yojji Barrabás oe acue. Jesosa ca chojja, ¡oya camanoqui'yahua!— 21Majoya aje emeshimese Pilatohua huohuiajjacao'oyapoa ma ojo ejjachichaqui nequica jama ba'a: —¿Ache dejja jiquiojo beca ani miquiaaya eya huoojeacuayamee'yosa-aña epoqui'yojji?—
Jama saja-ame acapoa cuaa ba'a: —Barrabás oe huoojeacuayamee'yocue.—
22Pilatohua majo nequica jama poajo huohuiajjacapoa jama ba'a: —¿Yajja shai eyaya Jesosa aje joya Eyacuiñajjija huoojea ojjaña nahue'yojji epojji acani cuaa?—
Ojjaña majo nequicacuaa oya jama acapoa ba'a: —¡Oya acui ecuiata'apeejo me cacajeameecue emano'yojji!—
23Majoya Pilatohua jama acapoa cuana ba'a: —¿Ajeo shai, ache oja mimishijo shai oya quecuameeca'yojji? Oja mimishi chama' o quecuamee'yojji.—
Jamatii taaasajajeanequiapoa cuana jama ba'a: —Oya acui ecuiata'apeejo me cacajeameecue emano'yojji.—
24Pilatohua ma ojo queahuiso ejjachichaqui nequica o shajja-ajjasapo-ajjatii poani oya esohuitii taaasajajeamajamajaqui queaquenenee popoquiani pea-ai bamajje ena jjequiya huoojeacapoa. Majoya ohuaya oja me shacuacapoa ojjaña majo nequicajo. Jama acapoa ba'a: —Jiquio dejja quecuameesapo'yoajja eya, miquianajaya esohuijo ca oya manoje'yo. Jamajojoya aje eyaya ecuea eme shacuaña. Miquianajayanei ejjashahuabaquijjijo coma dejja manoje'yo.—
25Ohua jama huohuime acajje jama saja-ame acapoa majo nequicacuaa ba'a: —Ee, ecuana, ecuanaja osecuacuana pea-ai cabacahuatii Eyacuiñajjiya ecuana o manomee'yojji poanaje.—
26Jamajjeya Pilatohua Barrabás huoojeacuayameeca'yapoa ejeanobia ani. Majoya ohuaya Jesosa daasa cuiasejjajeameecapoa jjono ejeapashajjajja sa'shejjijjiya. Jama ameemajje ohuaya oja soldadocuana dojomeecapoa Jesosa acui ecuiata'apeejo eba'ehuanasohuajeajji emano'yojji.
27Majoya aje oja soldadocuaa Jesosa dojocapoa emeshimeseja equi-aiquiquibohuasijje. Jesosa majo nequijoya aje emeshimeseja soldadocuana jjachichaquicapoa o nequipejjeyasijje. 28Soldadocuaa Jesosaja daqui huijjiajeamajje daqui-aohuo'o huoshomeecapoa emeshimesenisho epojji. 29Majoya oya ejahuojjanisho acuisha oja sipiya Jesosaja sapahuasijje iyape'ejeacapoa janobajjimanei. Oya acui pea-ai ojaya ebañei mejje iñanequiameecapoa emeshimesenisho epojji. Majoya soldadocuana o nequi cojjaneijotii nequioqueapoa oja ecuioshajjajo o bihuianishojji. Jama bihuianishome soldadocuaa Jesosa acapoa ba'a: —Canequitiitiiquiahua judiocuanaja emeshimese epojji— jama soadojomeya acapoa Jesosa.
30Jesosa cojja cuichojeapea-aicapoa. Ma oja mejo nequi acuiyatii Jesosa oja sapajje cuiapea-aicapoa soldadocuaa. 31Majoya aje oya soadojoneineimajje, bihuianishojeyomajje pea-ai daqui-aohuo'o oja yamijo ba'e huijjiajeaca'yapoa. Oja daquinei huoshomee'yomajje soldadocuaa Jesosa dojocuayaquicapoa esecueyasijje edojojji acui ecuiata'apeejo ba'ehuanasohuajeaa emano'yojji.
Jesosa ba'ehuanasohuajeacapoa cuaa acui ecuiata'apeejo emano'yojji
(Mc 15.21-32; Lc 23.26-43; Jn 19.17-27)
32Majo aniya cuayaquimajje soldadocuaa oe dejja Simón bajjani Cirenecuiñajji poani bacapoa. Oya Jesosa me cacajji acui abomeecapoa.
33Majoya aje quijjepishana meshi eyiyoiyeao Gólgota bajjani bacañaquiapoa. Gólgota bajjani jama poanijje ba'a: “Sapajjii anijji meshi.” 34Majo aniya Jesosa uvajjajjana' mirrajo hua o neeamapishana epojji quiajjacapoa. Jesosaa jjequibibiajjamajje cajaa acapoa.
35Majoya aje Jesosa acui ecuiata'apeejo ba'ehuanasohuajeamajje majo nequi soldadocuaa hue'ecapoa ebajji aya Jesosaja daquicuana jjeshecaje'yo. 36Majotiiya aje anioqueapoa soldadocuana Jesosa baneineianijji. 37Jesosa sapa ba'e biacuapishana acuisisijo etehue jaa cacacapoa. Majotiiya etehue jaapoa ajeo oya manomeeca'yani cuaa ebajji. Etehue jaa jama poa ba'a: “Jiquio dejja judiocuanaja emeshimese poani.”
38Jesosa ba'epejjeneijo ojee beca dejja siipojjinei queamimishinee ba'ehuanasohuapea-aijeacapoa. Oe oja bañeimijijje, pea ca oja shanimijijje ba'yapoa acui ecuiata'apeejo pea-ai. 39Majoya aje o ba'epejjeneijje jjayejjequijeya esohui queatai Jesosajo soadojocapoa cuaa. Oja sapa jeacajjacanequiapoa cuaa Jesosa soadojomajje. Jama soadojome acapoa cuaa ba'a: 40—Miya jama poanaje Eyacuiñajjija equi-ai quecuajeabichajea'yomajje tres cahuime huiso poajo ojaya equi-ai iyacuajije'yo miyayenei. Miya e'ejojonei Eyacuiñajjija Bacuaejja poani jjabaquimajje miyatii jjanahuequicue jjeya. Nequioque'yocue acui ecuiata'apeejo ba'e.—
41Oya jayojja Eyacuiñajjija equi-aijo chacochacopoquiani etii poanicuaa, Moisesja tehuehuohuijji poanicuaa pea-ai Jesosa soadojopea-aicapoa pea judío etii poanicuananijje pea-aiya. Jama soadojome etiicuaa oya acapoa ba'a: 42—Ohuaya peacuana nahuecapoquinaje, jamatii oyaneitii jjanahuequi'yoajja poanaje. Oya e'ejojonei Israelcuiñajjicuanaja emeshimese poani jabaquimajje nequioqueje'yo. Oya jama poajo eseya e'ejojonei jjashahuabaquije'yo ojo. 43Oya pa Eyacuiñajjijotii jjashahuabaquipoqui'yani. Jamajjeya Eyacuiñajjiya oya canahueca'yahua ojaya queajea poanijojoya. Oya jama poanaje: “Eya ca iña Eyacuiñajjija Bacuaejja poani”— jama soadojomeya acapoa cuaa Jesosa.
44Ma o pejjejo acui ecuiata'apeejo ba'e dejjaa oya esohuiya Jesosa niñebapea-aicapoa queatai.
Jesosa mano'yapoa
(Mc 15.33-41; Lc 23.44-49; Jn 19.28-30)
45Majoya aje shequi biacojjajjanei nequijo, ojjaña meshiyasijje quea-aaponee ponanapoa. Majoya sinecuanei, a las tres, jjaja'aqui'yapoa. 46Ma sinecuanei quea-aapotii nequijo, a las tres, Jesosa jama taaame poa ba'a: —Elí, Elí, ¿lema sabactani?— Jama poanijje ba'a: “Ecue Chii, ecue Chii, ¿yajjajo acuae moya cajaa anaje?”
47Becacuaa majotii nequiya Jesosa taaani shajja-ajjamajje jama acapoa ba'a: —Bacue, ohuaya iyaacani esohuihuohuijji poa Elías bajjani.— Jama poani posoya acapoa cuaa.
48Majoya aje oe dejja majotii nequi cuajicuajinanapoa uvajjajjana' queasesepase jjequiya. Ohuaya uvajjajjana' shamajje taposisi cuiabebocapoa acui quea-aojo ejeasohuajji Jesosaja ejjequibibijji. 49Ohua jama acaje bamajje peacuana majotii anica jama poa ba'a: —Ishoasocue, a'a Elías poeje baa o nequiaoquea'yohua acui ecuiata'apeejo ba'e.—
50Majoya aje Jesosa acui ecuiata'apeejo ba'e taaasajeamajje mano'yapoa. Chama'yotii poa. 51O mano'yojeahuajotii daquimoo, equecuayijjijji'ya Eyacuiñajjija equi-aijo ba'e, oyatii becaneijjipea-ai epojji ejamacoojje ebionei jjaisajeananaquiapoa meshiyasijjeyee. Meshi huehuahuehuapea-aiapoa. Mei-aicuana jjapojojeaquiapoa huehuahuehuajo. 52Emano'yocuana huananobiajjiya' jjani jjapojopea-aiquiapoa. Majoya aje judiocuana ma yahuajonei Eyacuiñajjija esohuijo jjashahuabaqui'yapoa emano'yo jaaca shequica'yapoa. Nequisohua'yapoa queahuisocuana, eshe eba'eo'oyajji. 53Jamajjeya judiocuana Eyacuiñajjija esohuijo ejjashahuabaqui'yo emano'yo jaaca nequisohua'yapoa epoqui'yojji. Majoya quijje Jesosa shequi'yajo poquicapoa ma shequi'yapoacuana meshi queapamenee Jerusalenyasijje. Majo aniya queahuisocuaa ma yahuajonei ejjashahuabaqui'yo emano'yocuana baca'yapoa eshequi'yo nequi.
54Majoya aje soldadohuohuijji poani capitán, oja soldadocuana pea-ai ma Jesosa baneijji poanajecuana meshi huehuahuehuaje, mei-ai jjapojojeaquije pea-ai bamajje queametenee ponanapoa. Jama mimime poa cuana ba'a: —E'ejojonei jiquio dejja Eyacuiñajjija Bacuaejjanei poanaje.—
55Eponacuana pea-ai, ma provincia Galilea meshijo ani poe Jesosanijjetii o asahuapoquiajji poanaje, majotii anipea-aiapoa. Queahueshapishana aniya Jesosa manoje'yo baca-aniapoa ma eponacuaa. 56Jamaya aniapoa eponacuana ba'a: María Magdalena, pea María Santiagoja enaese, Joseja pea-ai. Zebedeoja bacuaejjaja enaese pea-ai aniapoa.
Jesosa huananobiacapoa cuaa meijjaniyasijje
(Mc 15.42-47; Lc 23.50-56; Jn 19.38-42)
57Ma pojjajotiiya sinepoquianijo, oe dejja quea-aquianahuiso poeapoa. Oya bajjani José, pueblo Arimateacuiñajji dejja poa. Oya Jesosaja epeejji pea-ai poa. 58Majoya aje Joseya Pilatoque poquimajje Jesosaja eyami huohuiajjaca'yapoa ehuananobiajji. Jamajjeya Pilatohua oya huohuicapoa Jesosaja eyami edojo'yojji. 59Oja yami jjequioquea'yomajje Joseya daquiosheai eyacuaneiya Jesosaja eyami bebocapoa. 60Majoya ohuaya oja yami ebebo jaa huananobiacapoa ojaya meijjani ejajapejjahuasijje eyacua. Mei queaquemo jeacajjajjameecapoa Joseya meijjani nabacapajji'ya. Majoya oya jama ameemajje poqui'yapoa. 61María Magdalena, pea María pea-ai majo meijjani jaapejjejotii aniapoa so'o, poqui'yojjima poa so'o.
Soldadocuaa Jesosa jaa meijjani jaahuanacanequiapoa
62Majoya aje pea pojjajo mecajjeahuanei Eyacuiñajjija equi-aijo chacochacopoquiani etii poanicuana fariseo dejjacuananijje ojee poquiapoa Pilatonijje mimiya. 63Jama huohuime acañaquiapoa cuaa oya ba'a: —Emeshimese, ecuaaya shahuabaña ma siajjepojji poanaje eshe nequiahua oya jama ponequinaje ba'a: “Tres cahuime huiso pomajje eya shequije'yo emano'yo jaa.” 64Jamajjeya miyaya pea soldadocuana jjeya huoojeacue cuamaya meijjani o jaa jaahuananeiya tres cahuime huiso epojji. O shajja-ajjajji poanajecuaa oja yami siica'yochana. Majoya oya shequi'yonaje anishocaje cuaa. Jama anishocajo queahuisocuana ojo jjashahuabaquije'yo. O eshe nequijo ca oepojji jjashahuabaqui'yonaje oya Eyacuiñajjija huoojea poanijo. Jesosa shequi'yonaje ohua siajje acajo queapame pojjeama poaje.—
65Majoya aje Pilatohua jama acapoa etii poanicuana ba'a: —Jomajo nequica soldadocuana miquiaaya dojocue. Miquiananijje capoquiahua meijjani o jaa jaahuananeiya. ¡A'a peacuana oja yami siimeejji! Nahueneineicue.—
66Jamajjeya judío etii poanicuana soldadocuananijje poquiapoa meijjani jaahuasijje. Mei-ai jjani nabacapajji cojjasahuajje cuiabajicapoa emeshimeseja bajjanijji peaa ejeacajjajjaca poanijje. Soldadocuana majotii nequi jeacana'yapoa cuaa meijjanijaahuanajji.
Terpilih Sekarang Ini:
MATEO 27: ESE
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Copyright Mision Nuevas Tribus, 2006