ᑎᐱᑦ ᐅᓂᑭᒧᐅᓇ 89
89
1ᓂᑭ ᓂᑭᒧᑎᒺᓐ ᑎᐸᔨᒋᒐᓱᐤ ᐅᓱᐛᔨᒋᒐᐅᓐ ᑲᒋᒡ:
ᓂᑐᓂᒡ ᓂᑭ ᐅᒋ ᒋᔅᒐᔨᑎᒥᐊᐅᒡ ᒋᑯᐃᔅᑯᑐᐅᓂᔪᐤ ᒥᓯᐛ ᒐ ᐊᑎ ᐊᓂᔅᒐ ᐱᒪᑎᓯᒡ᙮
2ᐛᔅ ᓂᒋ ᐃᔅᒋᔄᓐ, “ᒋᔅᑎᒪᒐᔨᒋᒐᐅᓐ ᑲᒋᒡ ᒋᑭ ᒋᒥᑕᑭᓄᐤ;
ᒋᑯᐃᔅᑯᑐᐅᓐ ᒋᑭ ᐊᔨᑎᔅᑕᓐ ᒋᒋᒋᓯᑯᒡ᙮”
3“ᓂᒋ ᐎᒋ ᓂᔅᑯᒪᐤ ᓂᐅᐛᔭᐱᒪᑭᓐ,
ᓂ ᒋᒋ ᐃᑕᐤ ᑎᐱᑦ ᓂᑦ ᐊᑐᔅᒐᔭᑭᓐ,
4‘ᒋᑦ ᐊᐛᓯᒥᓯᒡ ᓂᑭ ᐊᔨᒋᐊᐅᒡ ᑲᒋᒡ,
ᑭᔭ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ᙮’ ”
5ᒋᓯᒂ ᑭᔭ ᒋᑭ ᒪᒥᒋᑐᑕᒧᒪᑭᓇ ᒋᒪᒥᔅᑲᒡ-ᐃᑐᐅᓇ, ᐅ ᑎᐸᔨᒋᒐᓱᐤ;
ᒋᑯᐃᔅᑯᑐᐅᓐ ᐊᓯᒡ ᐅᒪᐛᒋᐃᑐᐅᓄᐛᒡ ᒋᐸᔭᒋᓯᒥᒡ᙮
6ᐛᔅ ᐊᐛᓐ ᒋᒋᒋᓯᑯᒡ ᒐᒋ ᓇᔅᐱᑐᐛᑦ ᑎᐸᔨᒋᒐᓱᐛ ?
ᐊᐛᓐ ᒪᒃ ᐊ ᐃᑎᓯᔨᒋ ᐅᑯᓯᓯᐛᐛ ᑲ ᓱᐧᑲᑎᓯᒡ ᒐᒋ ᓇᔅᐱᑐᐛᑦ ᑎᐸᔨᒋᒐᓱᐛ ?
7ᒋᓴᒪᓂᑐᐤ ᓇᔅᒡ ᒋᑭ ᓇᓂᒋᔅᑕᑯᐤ ᑲ ᒪᐅᒋᐃᑐᔨᒋ ᐅᐸᔭᒋᓱᐛ,
ᑭᔭ ᒋᑭ ᒋᔅᑕᔨᒥᑯᐤ ᒥᓯᐛ ᑲ ᐛᔅᑲᔅᑲᑯᑦ᙮
8ᐅ ᑎᐸᔨᒋᒐᓱᐤ ᒋᓴᒪᓂᑐᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ,
ᐊᐛᓐ ᐊᔅᐱᔅ ᒥᔅᑯᐅᓯᑦ ᐊ ᑎᐸᔨᒋᒐᑦ ᒧᔭᒻ ᒋᔾ ?
ᑭᔭ ᒪᒃ ᒋᑯᐃᔅᑯᑐᐅᓐ ᑲ ᐛᔅᑲᔅᑲᑯᔨᓐ ?
9ᒋ ᑎᐸᔨᑕᓐ ᐊ ᑯᔅᑕᑎᒂᒡ ᐎᓂᐸᒄ:
ᐃᔅᐱ ᒪᒪᐧᑲᐊᒡ, ᒋ ᒋᐱᒋᑕᓐ᙮
10ᔅᒋ ᐱᒂᐊᓐ ᕋᐊᑉ, ᒧᔭᒻ ᐊᐛᓐ ᑲ ᓂᐸᐊᑭᓄᐅᑦ;
ᔅᒋ ᐛᓴᔄᑎᓴᐛᐅᒡ ᑲ ᐛᐧᑲᑎᔅᒡ ᑲ ᒥᔅᑯᐛᒡ ᒋᔅᐱᑐᓐ ᐅᒡ᙮
11ᒋᓯᒂ ᒋ ᑎᐱᔨᐛᐅᓯᓐ, ᐊᔅᒋᔾ ᑭᔭ ᒋ ᑎᐱᔨᐛᐅᓯᓐ:
ᒥᓯᑕᔅᑲᒥᒡ, ᑭᔭ ᐊ ᐃᓯ ᓴᑭᔅᒋᓇᒡ, ᔅᒋ ᐎᔨᔅᑕᓐ᙮
12ᐊ ᒋᐛᑎᒡ ᑭᔭ ᐊ ᓴᐅᓄᐊᒡ ᔅᒋ ᐅᓯᑕᓐ:
ᑕᐸᕐ ᑭᔭ ᐦᐊᕐᒧᓐ ᒋᑭ ᒥᔽᔨᑎᒧᒥᑭᓇ ᒋᑦ ᐃᓯᓂᐧᑲᓱᐅᓂᒡ᙮
13ᒋᑭᓄᐛᔨᑕᓐ ᓱᐧᑲᑎᓯᐅ-ᒥᔅᐱᑐᓐ:
ᒥᔅᑯᐅᓯᒥᑭᓐ ᒋᑎᒋᔾ, ᑭᔭ ᐃᔅᐸᐤ ᒋᒥᔪᐅᓐ᙮
14ᑲ ᐎᓱᐛᐛᔨᑕᒂᒡ ᐃᔅ ᑭᔭ ᐃᑎᔅᑕᐤ ᒋᒋᓴᐅᒋᒪᐅ-ᑕᑎᐳᐛᓂᒡ:
ᒋᔅᑎᒪᒐᔨᒋᒐᐅᓐ ᑭᔭ ᑕᑈᐅᓐ ᒋᑭ ᓂᑲᓂᐸᔨᔅᑕᑯᓐ᙮
15ᓱᐛᔨᑕᑯᓱᐅᒡ ᐊᓐᒡ ᐃᔪᒡ ᑲ ᒋᔅᒐᔨᑕᒡ ᒥᔽᑎᒧᐤ ᐸᑕᑯᓱᐅᓂᔪᐤ:
ᒋᑭ ᐱᒧᑕᐅᒡ, ᐅ ᑎᐸᔨᒋᒐᓱᐤ ᒋ ᐛᓯᓱᐧᑲᓱᐅᓂᒡ᙮
16ᒋᑦ ᐃᓯᓂᐧᑲᓱᐅᓂᒡ ᒋᑭ ᒧᒐᔨᑎᒧᒡ ᐃᔅᑭᓐ ᒋᓯᑲᐛ:
ᑭᔭ ᒋᑯᐃᔅᑯᑕᑎᓯᐅᓂᒡ ᒋᑭ ᐃᔅᐸᔨᑕᑯᐊᑭᓄᐅᒡ᙮
17ᐛᔅ ᒋᔾ ᑲ ᐅᒋ ᒋᔅᑕᔨᑕᑯᓂᔨᒡ ᐅᒥᔅᑯᐅᓯᐅᓄᐛᐤ:
ᑭᔭ ᒋᓱᐛᔨᒋᒐᐅᓂᒡ ᓂᑦ ᐊᔅᑭᓂᓇᓐ ᒋᑭ ᐅᐱᓇᑭᓄᐤ᙮
18ᐛᔅ ᑎᐸᔨᒋᒐᓱᐤ ᓂ ᒋᔅᐸᐛᑎᑯᓇᓐ;
ᐅᐸᔭᒋᓯᒪ ᐃᔅᕋᐃᓪ ᑭᔭ ᐊᐅᒄ ᓂᒋᓴᐅᒋᒪᒥᓇᓐ᙮
19ᐊᑯ ᑲ ᐃᔨᒥᐊᑦ ᒋᐸᔭᒋᓯᒻ,
ᔅᒋ ᐃᔅᒋᔄᓐ ᒪᒃ, “ᓂᒋ ᒥᔭᐤ ᐎᒋᐃᑯᓯᐅᓂᔪᐤ ᐊᐛᓐ ᑲ ᓱᐧᑲᑎᓯᑦ, ᓂᒋ ᐃᔅᐸᔨᑕᑯᐊᐤ ᐊᐛᓐ ᑲ ᐅᐛᔭᐱᒥᒃ ᐃᔪᐛ ᐅᒡ᙮
20ᓂᒋ ᒥᔅᑯᐛᐤ ᑎᐱᑦ ᓂᑦ ᐊᑐᔅᒐᔭᑭᓐ;
ᐸᔭᒋ ᐱᒥᔪᐤ ᐅᒋ ᓂᒋ ᑐᒥᔅᑯᓇᐤ;
21ᒋᑭ ᒥᒋᒥᓂᑯᐤ ᓂᑎᒋᔪᐤ;
ᒋᑭ ᒥᔅᑯᐅᐃᑯᐤ ᑭᔭ ᓂᔅᐱᑐᓂᔪᐤ᙮
22ᓇᒪᐎᔾ ᓴᐧᑯᒋᐃᑯᐤ ᐅᐧᑲᓱᐛᐛ;
ᓇᒪ ᑭᔭ ᒋᑭ ᑯᒂᑕᒋᐃᑯᐤ ᑲ ᐅᑯᓯᓯᒥᑯᔨᒋ ᒥᒋᑥᐅᓂᔪᐤ᙮
23ᓂᑭ ᓂᒋᐛᐸᐅᒪᐛ ᑲ ᒪᓯᐃᑯᑦ ᐅᑎᔅᑯᐤ ᐅᑕᔅᑎᒥᐧᑯᒡ,
ᓂᑭ ᑯᒂᑕᒋᐃᒪᐛ ᒪᒃ ᑲ ᐛᐧᑲᑎᑯᑦ᙮
24ᒪᒃ ᓂᑯᐃᔅᑯᑐᐅᓂᔪᐤ ᑭᔭ ᓂᒋᔅᑎᒪᒐᔨᒋᒐᐅᓂᔪᐤ ᒋᑭ ᐎᒐᐅᑯᐤ;
ᑭᔭ ᓂᑦ ᐃᓯᓂᐧᑲᓱᐅᓂᒡ ᐅᑦ ᐊᔅᑭᓐ ᒋᑭ ᐅᐱᓇᑭᓄᐎᔪᐤ᙮
25ᓂᑭ ᐃᑎᔅᑕᐛᓐ ᑭᔭ ᐅᑎᒋᔾ ᐎᓂᐸᑯᒡ,
ᑭᔭ ᐅᒥᔪᐅᓂᒡ ᐊᓐᑕ ᐊ ᓯᐱᔅᑲᔨᒡ᙮
26ᓂᑭ ᒪᑕᒄ ᐊ ᐃᓯᑦ, ‘ᒋᔾ ᓄᑕᐎᔾ,
ᓂᒋᓴᒪᓂᑐᒻ, ᑭᔭ ᒋᔅᑕᐱᔅᒄ ᐛᒋᐱᔨᒡ ᓂᐱᒪᒋᐃᑯᓯᐅᓐ᙮’
27ᐊᓯᒡ ᑭᔭ ᓂᑭ ᐃᓯᐊᐤ ᓂᓂᔅᑎᒧᓴᓐ,
ᐅᔅᑕ ᐊ ᐃᔅᐸᔨᑕᑯᓯᑦ ᐃᔅᐱᔅ ᒋᓴᐅᒋᒪᐛ ᐊᔅᒋᒡ᙮
28ᓂᒋᔅᑎᒪᒐᔨᒋᒐᐅᓂᔪᐤ ᓂᑭ ᑭᓄᐛᔨᑎᒧᐛᐤ ᑲᒋᒡ,
ᑭᔭ ᓂᓂᔅᑯᒥᑐᐅᓂᔪᐤ ᒋᑭ ᐊᔨᒋᑲᐳᐅᔅᑕᑯᐤ᙮
29ᐅᑦ ᐊᐛᓯᒥᓴ ᑭᔭ ᓂᑭ ᐃᓯᐃᒪᐛ ᒐᒋ ᑕᔨᒋ ᑲᒋᒡ,
ᑭᔭ ᐅᒋᓴᐅᒋᒪᐤ ᑕᑎᐳᐛᑭᓐ ᒧᔭᒻ ᒋᓯᑯᒡ ᐊ ᒋᓯᑲᒡ᙮
30ᒥᓱᒄ ᐅᑦ ᐊᐛᓯᒥᓴ ᓂᑭᑕᒥᔨᒐᓂ ᓂᑦ ᐃᑎᓱᐛᐅᓂᔪᐤ,
ᑭᔭ ᐊᑲ ᐱᒧᑕᑎᒥᔨᒐᓂ ᓂᑎᐸᔅᑯᓂᒐᐅᓇ;
31ᒥᓱᒄ ᐱᑯᐱᑕᒥᔨᒐᓂ ᓂᑦ ᐃᑎᓱᐛᐅᓇ,
ᑭᔭ ᐊᑲ ᑭᓄᐛᔨᑎᒥᔨᒐᓂ ᓂᑦ ᐃᑎᓱᐛᐅᓇ;
32ᓂᑭ ᒧᐱᔅᑎᒺᓐ ᐅᐅᓂᑐᑎᒧᐅᓄᐛᐛ ᒥᔅᑎᑯᔪᐤ ᐅᒡ,
ᑭᔭ ᐅᒥᒐᑎᓯᐅᓄᐛᐛ ᐊ ᐸᐱᓯᔅᑕᐅᒧᒡ᙮
33ᐃᔭᐱᒡ ᒪᒃ ᓂᓴᒋᐃᐛᐤ ᒋᓴᐛᑎᓯᐅᓂᔪᐤ ᓇᒪᐎᔾ ᒋᒋᐛ ᓂᑭ ᒥᔅᑭᒪᐤ, ᓇᒪ ᑭᔭ ᓂᑭ ᓇᐃᑎᒺᓐ ᓂᑯᐃᔅᑯᑐᐅᓂᔪᐤ ᒐᒋ ᓄᑕᐱᔨᒡ᙮
34ᓂᓂᔅᑯᒥᑐᐅᓐ ᓇᒪᐎᔾ ᓂᑭ ᐱᑯᓇᓐ,
ᓇᒪ ᑭᔭ ᓂᑭ ᐊᒋᑕᓐ ᐊᓂᒪ ᓂᑐᓂᒡ ᑲᒋ ᐅᒋ ᐎᐎᐱᔨᒡ᙮
35ᐸᐃᒂᐤ ᓂᒋ ᒋᒋᐃᑥᓐ ᓂᐸᔭᒋᓯᐅᓂᒡ ᐅᒡ,
ᒐ ᐊᑲ ᒋ ᑭᑭᒋᔭᒥᒃ ᑎᐱᑦ᙮
36ᐅᑦ ᐊᐛᓯᒥᓴ ᑲᒋᒡ ᒋᑭ ᑕᔪᐛ,
ᑭᔭ ᐅᒋᓴᐅᒋᒪᐤ ᑕᑎᐳᐛᑭᓐ ᒧᔭᒻ ᐱᓯᒻ ᐊᐸᑕᔅᑎᒥᐱᓐ᙮
37ᒋᑭ ᐊᔨᑎᔅᑕᑭᓄᐎᔪᐤ ᒧᔭᒻ ᑎᐱᔅᑲᐤ ᐱᓯᒺ,
ᑭᔭ ᒧᔭᒻ ᑲ ᑯᐃᔅᑯᑎᑦ ᐅᑎᐸᒋᒧᐤ ᒋᒋᒋᓯᑯᒡ᙮”
38ᒪᒃ ᔅᒋ ᐛᐱᓇᐤ ᑭᔭ ᔅᒋ ᐱᒂᑕᐤ,
ᔅᒋ ᐎᔭᔅᑕᔨᒪᐤ ᒋᑐᒥᔅᑯᓂᑭᓐ᙮
39ᔅᒋ ᓄᑕᐱᔨᑕᐛᓐ ᑲᒋ ᓂᔅᑯᒥᑦ ᒋᑦ ᐊᑐᔅᒐᔭᑭᓐ:
ᔅᒋ ᐊᐱᔅᑕᔨᑕᑯᑕᐛᓐ ᐅᒋᓴᐅᒋᒪᐅᑯᓂᔎᐅᓐ ᒧᔅᑎᔅᑭᒥᒡ ᐊᒋ ᐃᓯ ᓂᒋᐛᐸᐊᒧᑦ᙮
40ᔅᒋ ᐱᒂᐊᒺᓐ ᒥᓯᐛ ᐅᒪᓂᔅᑲᑎᒂ;
ᔅᒋ ᓂᓱᐅᓇᒋᑕᐛᓐ ᑲ ᒥᔅᑯᐛᐃᒋ ᐅᐛᔅᑲᐃᑭᓂᒪ᙮
41ᒥᓯᐛ ᐊᓐᑕ ᑲ ᐱᒧᑕᔨᒋ ᓂᓱᐅᓇᒋᐃᑯᐎᐛ:
ᒥᒋᐊᔨᒧᒥᑯᐤ ᑭᔭ ᐎᒡ ᐃᔪᐛ᙮
42ᔅᒋ ᐊᔨᑎᔅᑕᐛᓐ ᐅᒥᔪᓂᔪᐤ ᑲ ᒪᓯᔨᑯᑦ;
ᔅᒋ ᒥᔽᔨᑎᒥᐃᒪᐛ ᒥᓯᐛ ᑲ ᐛᐧᑲᑎᑯᑦ᙮
43ᔅᒋ ᐊᓯᑕᐛᓐ ᐅᓯᒪᑭᓐ,
ᓇᒪ ᑭᔭ ᒋ ᐅᒋ ᓂᐳᐛᐊᐤ ᐊ ᒪᓯᑐᓇᓄᐎᒡ᙮
44ᔅᒋ ᐳᓂᐸᔨᑕᐛᓐ ᐅᒋᔅᑕᔨᑕᑯᓱᐅᓐ,
ᑭᔭ ᔅᒋ ᓂᒋᐛᐸᐊᒺᓐ ᐅᒋᓴᐅᒋᒪᐤ ᑕᑎᐳᐛᑭᓐ ᒧᔅᑎᔅᑭᒥᒡ ᐃᔅ᙮
45ᐅᒋᓯᑲᒪ ᐊ ᐅᔅᒋᓂᒋᐅᑦ ᓇᒪ ᒋ ᐅᒋ ᒥᒐᑐᑕᐛᓐ;
ᔅᒋ ᐊᒂᓇᐛᐤ ᓴᒂᔨᒧᐅᓂᔪᐤ᙮
46ᑕᓐ ᐃᔅᐱᔅ ᐊᔅᒄ, ᑎᐸᔨᒋᒐᓱᐤ ?
ᒧᓯᓇᐤ ᐊ ᒋᑭ ᑲᓱᓐ ?
ᒋᑭ ᐃᔎᓯᒐᒪᑭᓐ ᐊ ᒋᑦ ᐊᐧᑯᔪᐛᓯᐅᓐ ᒧᔭᒻ ᐃᔅᑯᑕᐤ ?
47ᒋᔅᒋᓯ ᐊᔅᐱᔅ ᒋ ᑕᒂᒡ ᓂᐱᒪᑎᓯᐅᓐ,
ᒐᒂᔪᐤ ᐛᒋ ᓂᑐᐎ ᒋ ᐃᓯ ᐅᓯᐃᒡ ᒥᓯᐛ ᐃᔪᒡ ?
48ᒐᒃ ᐃᔪᐤ ᐊ ᐱᒪᑎᓯᑦ, ᐊᑲ ᑭᔭ ᒐ ᐛᐸᑕᐧᒃ ᓂᐳᐅᓂᔪᐤ ?
ᒋᑭ ᐱᒪᒋᐊᐤ ᐊ ᐅᑦ ᐊᒐᒂ ᒋᐱᐃᒋᐛᐱᒡ ᐅᒡ ?
49ᑎᐸᔨᒋᒐᓱᐤ, ᑕᓐᑕ ᐊᓂᔭ ᐛᔅᑭᒡ ᒋᓴᒋᐃᐛᐅ-ᒋᓴᐛᑎᓯᐅᓇ,
ᑲᒋ ᒋᒋ ᐃᑎᑦ ᑎᐱᑦ ᒋᑕᑈᐅᓂᒡ ?
50ᒋᔅᒋᓯ, ᑎᐸᔨᒋᒐᓱᐤ, ᐊ ᐃᓯ ᒪᒋ ᐃᑕᑭᓄᐅᒡ ᒋᑦ ᐊᑐᔅᒐᔭᑭᓐᒡ;
ᐊ ᐃᓯ ᐱᒧᐅᑕᐅᒡ ᓂᐱᔪᒧᐅᓂᒡ ᑲ ᐃᓯ ᒋᔅᑐᓯᒡ ᒥᓯᐛ ᑲ ᓱᐧᑲᑎᓯᒡ ᐃᔪᒡ;
51ᑲ ᐃᓯ ᒋᔅᑐᓱᐛᒡ ᑲ ᐛᐧᑲᑎᔅᒡ;
ᑲ ᐃᓯ ᒥᒋᐃᑕᒡ ᒋᑐᒥᔅᑯᓂᑭᓇ ᐊ ᑕᑕᑯᔅᒐᔨᒋ᙮
52ᒋᑭ ᐎ ᒪᒥᒋᒪᑭᓄᐤ ᑎᐸᔨᒋᒐᓱᐤ ᑲᒋᒡ᙮
ᐊᒥᓐ, ᑭᔭ ᐊᒥᓐ᙮
Terpilih Sekarang Ini:
ᑎᐱᑦ ᐅᓂᑭᒧᐅᓇ 89: ᓇᔅᑲᐱ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada