Esita 6
6
Omutuki yeesa oluyaali mu Modekai
1Esiro syeene esyo, omutuki n'ahaywa endoolo, mani n'alagira bamuleetere esitabo sy'ebiindu biwaao buli ludaalo ebihoyerwa ohwiichuliswa, mani nibabimusomera. 2Mani nibanyoola nisyaandiikirwe koti lu Modekai yali n'afumbuule oluhobo lw'ohwiita omutuki oyo, oluhobo olwaholebwa Bbigitaana neende Teresi, abasaacha babiri hu balade b'omutuki, abaliindaanga ebiseenge bw'omutuki, abateemaho ohutemula Omutuku Ahasuera. 3Omutuki oyo mani n'ateeba ati, “Luyaali siina neende buhoongo siina ebihoyerwa ohubereswa Modekai hulw'esiholwa sino?”
Abahalaabani bamukobolamo bati, “Sibulao esiindu syamuholerwaho daawe.” 4Omutuki yateeba ati, “Bahunuufu siina abali mu dooho?”
Bulaanu Hamani yali huyaheengira sa mu lwaanyi; yali niyeechere ohusaba omutuki amuberese Modekai yaanihwe hu simikiro esyali nisiweere ohwoombahwa. 5Abahalaabani b'omutuki bamukobolamo bati, “Hamani niye oli mu lwaanyi.”
Omutuki mani n'aboola ati, “Lehe yeengire.”
6Hamani niyeengira mani omutuki n'amuteeba ati, “Siina syeene esihoyerwa ohuholera omuundu yi mutuki adaha ohuberesa oluyaali?”
Hamani n'achaaka ohubaasa mu mwooyo kwae ati: “Wiina wuundi yi mutuki adaha ohuberesa oluyaali ohutusaho ese?”
7Ao Hamani mani n'amuboolera ati, “Omuundu yi mutuki adaha ohuberesa oluyaali, 8lehe baleete ebyefwaalo by'obutuki, bi mutuki yefwaalire, neende efaraasi yi yeeruhiraho, eyefwaalire hu mutwe ekofia y'obutuki. 9Ebyefwaalo ebyo neende efaraasi bidiiswe mulala hu bachweenufu b'omutuki obahirira elalira oluyaali, afwaase ebyefwaalo ebyo, haandi amwiimirire n'amwihaase hu faraasi, amuhalanie akati w'esiko, abite n'alaangirira ati, ‘Bone, omuumdu yi mutuki adahire ohuberesa oluyaali, koti lu ahoyeerwe ohwiiswamo oluyaali.’ ”
10Omutuki mani n'aboolera Hamani ati, “Yanguyaho oleete ano ebyefwaalo neende efaraasi, oberese Modekai Omuyudaaya oluyaali olwo koti lu oboolere. Muholere buli siindu sy'oboolere ebyo, ataali ohulehaho esiindu syoosi daawe Ochia ohumunyoola niyehaale hu mulyaango kw'edooho.”
11Mani Hamani n'aleeta ebyefwaalo ebyo neende efaraasi, n'abifwaasa Modekai, n'amwiihasa hu faraasi, n'amwimirira ohuhalania akati w'esiko, abite n'alaangirira ati: “Bone, omuundu yi mutuki adahire ohuberesa oluyaali, koti lu ahoyeerwe ohwiiswamo oluyaali.”
12Modekai yakobolayo hu mulyaango kw'edooho. Nae Hamani niyalaalaho n'achia engo wae, niyebwiihiriire obweeni bwae esoni nichimudiirire. 13Hamani yachia yaboolera Seresi omuhasi wae alala neende abeecha bae boosi buli siindu syali nisimukwiireho. Mani Seresi omuhasi wae alala neende abeecha bae bakesi-kesi abo nibamuboolera bati: “Modekai oyo, koti lu ewe ochaakire ohumalwamo obunyala mu moni wae, n'ali ow'olwiibulo lw'Abayudaaya, haba soocha humunyala daawe, ohutusaho ohwemeeda sa ohwiiswa aasi.”
Ohwiitwa hwa Hamani
14Abo nibali nibasiilomalomaanga batyo, abasaacha balade abomu dooho bafuduhayo bwaangu mani baabukula baayira Hamani hu sidyaalo si Esita yali naatekeehe.
©Bible Society of Kenya, 2019
©Bible Society of Uganda, 2019